យោងតាមព្រះរាជក្រឹត្យដែលទទួលបានកាលពីម្សិលមិញបានឲ្យដឹងថា មនុស្ស៣៨នាក់រួមទាំងអតីតមន្ត្រីក្រសួងសុខាភិបាលម្នាក់ ដែលកំពុងត្រូវបានស៊ើបអង្កេតដោយអង្គភាពប្រឆាំងអំពើពុករលួយ (ACU)ពីបទទទួលប្រាក់សំណូកជាង៣៥០.០០០ដុល្លារ ផងនោះ នៅសប្ដាហ៍នេះត្រូវបានតែងតាំងជាទីប្រឹក្សាលោក សាយ ឈុំ ប្រធានព្រឹទ្ធសភាថ្មី។
នៅក្នុងព្រះរាជក្រឹត្យពីរលើកមុនដែលឡាយព្រះហស្តលេខាដោយព្រះមហាក្សត្រ នរោត្តម សីហមុនី នៅថ្ងៃបន្ទាប់ពីមរណភាពលោក ជា ស៊ីម អតីតប្រធានព្រឹទ្ធសភា និងជាប្រធានគណបក្សប្រជាជនកម្ពុជាកាលពីថ្ងៃទី៨ ខែមិថុនានោះ ទីប្រឹក្សាទាំងអស់ទាំងរបស់លោក សាយ ឈុំ ដែលបានកាន់តួនាទីពីមុនជាអនុប្រធានព្រឹទ្ធសភា និងរបស់លោក ជា ស៊ីម ត្រូវបានលុបចោលតួនាទីរបស់ខ្លួនទាំងអស់។
ព្រះរាជក្រឹត្យចុះកាលបរិច្ឆេទថ្ងៃច័ន្ទបង្ហាញថា អតីតទីប្រឹក្សាលោក ជា ស៊ីម មួយចំនួនត្រូវបានផ្ដល់តួនាទីថ្មីជាទីប្រឹក្សារបស់លោក សាយ ឈុំ ដែលត្រូវបានតែងតាំងជាអនុប្រធានមួយរូបក្នុងចំណោមអនុប្រធានពីររូបរបស់គណបក្សប្រជាជនកម្ពុជាកាលពីចុងសប្ដាហ៍។
ក្នុងចំណោមទីប្រឹក្សាចាស់ៗរបស់លោក ជា ស៊ីម ដែលឥឡូវនេះជាទីប្រឹក្សារបស់លោក សាយ ឈុំ នោះគឺលោក ម៉ម សារិន ដែលពីមុនជាប្រធានខុទ្ទកាល័យលោក ជា ស៊ីម និងលោក យឹម លាង កូនប្រុសរបស់លោកឧបនាយករដ្ឋមន្ត្រី យឹម ឆៃលី ដែលជាប្រធានកងអង្គរក្សលោក ជា ស៊ីម។
ដោយត្រូវបានតែងតាំងជាទីប្រឹក្សារបស់លោក សាយ ឈុំ ផងដែរ គឺលោក ដួង សុជាតិ អតីតប្រធានមជ្ឈមណ្ឌលជាតិជំងឺគ្រុនចាញ់ដែលត្រូវបានរកឃើញថាបានទទួលប្រាក់សំណូកជាង៣៥០.០០០ដុល្លារទាក់ទងនឹងកិច្ចសន្យាពីអង្គការមូលនិធិសាកល ដើម្បីប្រយុទ្ធនឹងជំងឺអេដស៍ របេង និងគ្រុនចាញ់។
កាលពីខែវិច្ឆិកា ឆ្នាំ២០១៣ ការស៊ើបអង្កេតផ្ទៃក្នុងរបស់អង្គការមូលនិធិសាកលបានកំណត់ថា លោក ដួង សុជាតិ បានឃុបឃិតជាមួយក្រុមហុ៊នផលិតមុងបរទេសដើម្បីកិបកេងប្រាក់របស់អង្គការមូលនិធិសាកល បណ្តាលឲ្យមានការស៊ើបអង្កេតរបស់អង្គភាពប្រឆាំងអំពើពុករលួយដែលកំពុងតែបន្តនៅឡើយ”។
នៅពេលត្រូវបានទាក់ទងកាលពីម្សិលមិញ លោក ដួង សុជាតិ បានបដិសេធមិនធ្វើអត្ថាធិប្បាយអំពីការតែងតាំងថ្មីនេះទេ។
លោក សុខ ឦសាន អ្នកនាំពាក្យគណបក្សប្រជាជនកម្ពុជាបានមានប្រសាសន៍ថា លោក សាយ ឈុំ បានជ្រើសរើសយកទីប្រឹក្សាចាស់ៗរបស់លោក ជា ស៊ីម ល្អៗតែប៉ុណ្ណោះ មុនពេលជ្រើសរើសអ្នកខាងក្រៅដែលមានគុណសម្បត្តិគ្រប់គ្រាន់ផ្សេងទៀត។
លោក សុខ ឦសាន បានមានប្រសាសន៍ថា “សម្ដេច សាយ ឈុំ មិនចង់បានទីប្រឹក្សាច្រើនទេ ពីព្រោះលោកចង់បានតែមនុស្សវៃឆ្លាតប៉ុណ្ណោះដើម្បីជួយដល់ការងាររបស់លោក”។
លោកបានបន្ថែមថា “កន្លងមក ទីប្រឹក្សាសម្ដេច ជា ស៊ីម មួយចំនួនមិនចង់បានប្រាក់ខែរដ្ឋទេ ប៉ុន្តែគ្រាន់តែចង់បានកិត្តិយស និងសេចក្ដីថ្លៃថ្នូក្នុងការអមដំណើរសម្ដេច ជា ស៊ីម តែប៉ុណ្ណោះ”៕ សារុន