លោក ហង្ស វុទ្ធី ដែលធ្លាប់ជាដៃស្តាំរបស់លោក ហេង ពៅ អតីតស្នងការនគរបាលរាជធានីភ្នំពេញដែលកំពុងជាប់ពន្ធនាគារបានប្រាប់សាលាដំបូងរាជធានីកាលពីម្សិលមិញថា លោកត្រូវគេបង្ខំឲ្យគេចខ្លួនពីពន្ធនាគារព្រៃសកាលពីឆ្នាំ២០០៧ ខណៈការបើកសវនាការជុំវិញការហែកគុករបស់លោកកំពុងត្រូវបានបន្ត។
កាលពីខែមិថុនាឆ្នាំ២០០៦ លោក ហង្ស វុទ្ធី ដែលត្រូវបានផ្តន្ទាទោសឲ្យជាប់ពន្ធនាគាររយៈពេល៤៥ឆ្នាំពីបទបាញ់សម្លាប់ចៅក្រមសាលាដំបូងរាជធានីភ្នំពេញទាំងថ្ងៃត្រង់នោះ បានហែកគុកព្រៃសជាមួយអ្នកទោស១១នាក់ផ្សេងទៀត ហើយបានលាក់ខ្លួនរហូតដល់ឆ្នាំ២០១២ នៅពេលលោកប្រគល់ខ្លួនឲ្យអាជ្ញាធរ ហើយអះអាងថា លោកគេចចេញពីពន្ធនាគារក្រោមការបង្ខំរបស់គេ។
អំឡុងពេលកំពុងគេចខ្លួន លោក ហង្ស វុទ្ធី ត្រូវបានកាត់ទោសកំបាំងមុខឲ្យជាប់ពន្ធនាគាររយៈពេលពីរឆ្នាំពីបទហែកគុក ជាសេចក្តីសម្រេចមួយដែលលោកបានប្តឹងទាស់កាលពីឆ្នាំមុន ដែលជាហេតុធ្វើឲ្យមានការបើកសវនាការឡើងវិញ។ នៅក្នុងតុលាការកាលពីម្សិលមិញ លោកបានលើកឡើងថា ឧត្តមសេនីយ៍ឯក ម៉ក់ ជីតូ ដែលជានាយការិយាល័យនគរបាលព្រហ្មទណ្ឌនៅក្រសួងមហាផ្ទៃ កាលពីឆ្នាំ២០០៧ បានរៀបចំឲ្យមានការហែកគុកនេះដើម្បីធ្វើឃាតលោក ចំពេលកំពុងមានការដកមន្ត្រីនគរបាលចេញពីតំណែង និងចំពេលមានការសម្លាប់មនុស្សជាច្រើននៅក្រៅប្រព័ន្ធតុលាការ ប៉ុន្តែ លោកបានដឹងពីផែនការនេះទាន់ពេលវេលា។
លោក ហង្ស វុទ្ធី បានប្រាប់តុលាការថា “ខ្ញុំមានជាប់ពាក់ព័ន្ធក្នុងសំណុំរឿងបី ឬក៏បួនសំណុំរឿងដែលគេបានចោទប្រកាន់ខ្ញុំ។ ខ្ញុំមិនបានធ្វើអ្វីទាល់តែសោះក្នុងសំណុំរឿងទាំងអស់នេះ។ លោក ម៉ក់ ជីតូ រៀបចំឲ្យមានការហែកគុក ព្រោះគាត់ចង់សម្លាប់ខ្ញុំបំបិតភ័ស្តុតាង”។
លោក ហង្ស វុទ្ធី ក៏បានរៀបរាប់អំពីរឿងរ៉ាវនៃការហែកគុកឆ្នាំ ២០០៦ ដែលលោកត្រូវបានគេចោទប្រកាន់ថា ជាមេខ្លោងផងដែរដោយលោក អះអាងថា តាមពិតទៅលោកត្រូវបាននាំចេញពីគុកដោយអ្នកទោសផ្សេងៗទៀតដែលចងដៃ និងបិតមាត់របស់លោក ខណៈកំពុងកាត់ចម្រឹងបង្អួចនៅជាន់ទី២។
លោកបានលើកឡើងទៀតថា នៅពេលចរន្តអគ្គិសនីក្នុងពន្ធនាគារត្រូវបានបិទ អ្នកទោសម្នាក់ឈ្មោះ សំ ឌីណា បានយកកាំបិតភ្ជង់របស់លោក ហើយបង្ខំឲ្យលោកគេចខ្លួនដោយប្រើខ្សែដែលគេយកម៉ុង និងកំរាលមកចងភ្ជាប់គ្នា។
លោកបានបន្ថែមថា នៅខាងក្រៅបរិវេណពន្ធនាគារមានរថយន្តមួយគ្រឿង ម៉ូតូពីរគ្រឿង និងបុរសមួយចំនួនប្រដាប់ដោយកាំភ្លើងអាកា៤៧កំពុងរង់ចាំដើម្បីចាប់ក្រុមអ្នកទោសដែលហែកគុក ប៉ុន្តែ លោកអាចរត់គេចខ្លួនរួចដោយចូលទៅក្នុងព្រៃ។
លោកបាននិយាយថា “នៅពេលគាត់សម្លាប់ខ្ញុំមិនបាន លោក ម៉ក់ ជីតូ បានសម្លាប់ សំ ឌីណា ដើម្បីបំបិតភ័ស្តុតាងនៃ [ផែនការហែកគុកនេះ]”។ លោកបានអះអាងទៀតថា ឧត្តមសេនីយ៍ឯក ម៉ក់ ជីតូ ចង់ប្រើប្រាស់លោកដើម្បីបង្កើតសំណុំរឿងដាក់បន្ទុកលើលោក ហេង ពៅ ដែលកំពុងអនុវត្តទោសជាប់ពន្ធនាគាររយៈពេល៩៨ឆ្នាំពីបទឧក្រិដ្ឋជាច្រើន។
ឧត្តមសេនីយ៍ឯក ម៉ក់ ជីតូ ដែលឥឡូវជាអគ្គស្នងការរងនគរបាលជាតិមិនអាចទាក់ទងបានឡើយកាលពីម្សិលមិញ។
ចៅក្រម លាង សំណាត បានឲ្យដឹងថា សំណុំរឿងហែកគុករបស់លោក ហង្ស វុទ្ធី នឹងត្រូវប្រកាសសាលក្រមនៅថ្ងៃទី៩ ខែកក្កដា៕ស៊ុយឈាង