កាលពីម្សិលមិញ អធិការរងនគរបាលស្រុកម្នាក់បានទទួលស្គាល់ថា ខ្លួនពិតជាបានបាញ់នៅក្បែរអ្នកសម្លាប់សត្វម្នាក់ក្នុងមូលដ្ឋានម្នាក់ដែលគាត់ចោទថា បានធ្វើអំពើ ឲ្យប្រពន្ធរបស់គាត់ស្លាប់ ប៉ុន្តែបានអះអាងថា គាត់បាញ់កាំភ្លើងនោះគ្រាន់តែដើម្បីរំសាយកំហឹងតែប៉ុណ្ណោះ។
លោក ស្វាយ សាវ៉េត អធិការរងនគរបាលស្រុកបារាយណ៍បានមានប្រសាសន៍ថា លោកបានដកកាំភ្លើងអាកា-៤៧បាញ់ឡើងលើពីគ្រាប់កាលពីថ្ងៃអាទិត្យ ខណៈដែលខឹងនឹងលោក សែន រា៉នី អាយុ៣៦ឆ្នាំ ដែលគាត់ត្រូវទទួលខុសត្រូវចំពោះការស្លាប់ប្រពន្ធរបស់ខ្លួនដោយអាថ៌កំបាំងនៅថ្ងៃនោះ។
លោក សាវ៉េត បានមានប្រសាសន៍ថា “ខ្ញុំទទួលស្គាល់កំហុសរបស់ខ្ញុំថា ខ្ញុំពិតជាបានបាញ់កាំភ្លើងពីរគ្រាប់ឡើងលើមែន ដោយសារខ្ញុំខូចចិត្ត”។
លោកបានមានប្រសាសន៍ថា “ខ្ញុំមិនអាចទប់កំហឹងបាន ពីព្រោះខ្ញុំខឹងពីការដែលប្រពន្ធរបស់ខ្ញុំស្លាប់ដោយមិនដឹងមូលហេតុ” ដោយលោកពន្យល់ថា លោកជឿថា លោក រ៉ានី គឺជាគ្រូអាបធ្មប់ ពីព្រោះគាត់ជាជនជាតិចាម។
លោកបានបន្ថែម “ខ្ញុំស្បថដាក់ជីវិតថា ខ្ញុំមិនបានប៉ុនប៉ងសម្លាប់គាត់ទេ”។ លោក សាវ៉េត បានមានប្រសាសន៍ថា មេរបស់គាត់គឺលោក សួង ថេន ជាអធិការស្រុកបានដកហូតកាំភ្លើងវែង និងកាំភ្លើងខ្លីរបស់គាត់ហើយចាប់តាំងពីពេលនោះមក ដើម្បីរង់ចាំការស៊ើបអង្កេតលើករណីនេះ។
លោក រ៉ានី ដែលនិយាយថា គាត់បានគេចខ្លួនពីផ្ទះកាលពីថ្ងៃច័ន្ទ ហើយបានដាក់ពាក្យបណ្ដឹងប្ដឹងទៅសាលាដំបូងខេត្តកំពង់ធំកាលពីថ្ងៃអង្គារនោះ បានតបតថា ការអះអាងរបស់លោក សាវ៉េត មិនពិតឡើយ។
លោកបាននិយាយថា “លោក សាវ៉េត បានដកកាំភ្លើងបាញ់ពីរគ្រាប់គំរាមខ្ញុំ ហើយបន្ទាប់មក កូនប្រុសរបស់គាត់បានដកកាំភ្លើងខ្លីភ្ជង់ខ្ញុំ ហើយគំរាមសម្លាប់ខ្ញុំទៀត…ខ្ញុំពិតជាភ័យខ្លាចខ្លាំងណាស់”។
លោកបានបន្ថែមថា “គាត់បានចោទខ្ញុំថា ធ្វើអំពើឲ្យប្រពន្ធរបស់គាត់ស្លាប់ ប៉ុន្តែវាមិនសមហេតុផលទេ ពីព្រោះខ្ញុំមិនបានដឹងពីរឿងនោះទេ។ គាត់មកនិយាយសុំទោស ប៉ុន្តែខ្ញុំមិនអាចអភ័យទោសឲ្យគាត់បានទេ។ ខ្ញុំសូមឲ្យអាជ្ញាធរផ្ដន្ទាទោសគាត់ទៅតាមច្បាប់”។
លោក រ៉ានី បាននិយាយថា បច្ចុប្បន្ននេះលោកកំពុងស្នាក់នៅផ្ទះឪពុករបស់លោកនៅក្បែរនោះជាមួយប្រពន្ធដែលមានផ្ទៃពោះ និងកូនៗពីរនាក់ទៀត។
លោក អុិត សុភា ព្រះរាជអាជ្ញាអមសាលាដំបូងខេត្តបានមានប្រសាសន៍ថា លោកមិនទាន់បានទទួលពាក្យបណ្ដឹងរបស់លោក រ៉ានី ទេ។ ប្រសិនបើយើងទទួលបានពាក្យបណ្ដឹង យើងនឹងកោះហៅភាគីទាំងអស់ឲ្យមកបង្ហាញខ្លួននៅតុលាការដើម្បីធ្វើការសាកសួរ៕ សារុន