មណ្ឌលបណ្តុះបណ្តាលវិជ្ជាជីវៈពោធិ៍សែនជ័យក្រុងភ្នំពេញ ដែលគេហៅថា ព្រៃស្ពឺ ជាថ្មីម្តងទៀតបានរងការរិះគន់ ដោយមន្ត្រីទទួលស្គាល់កាលពីថ្ងៃព្រហស្បតិ៍ថា ជនអនាថាជាច្រើននាក់ដែលត្រូវគេចាប់ឃុំនៅទីនោះ មុនបុណ្យសពលោក ជា ស៊ីម អតីតប្រធានគណបក្សប្រជាជនកម្ពុជាកាលពីសប្តាហ៍មុន មិនទាន់ត្រូវបានដោះលែងនៅឡើយទេ។
ជាផ្នែកមួយនៃការរៀបចំសម្រាប់ពិធីបុណ្យសពថ្ងៃទី១៩ខែមិថុនា ប៉ូលិសបានប្រមូលក្មេងចិញ្ចើមផ្លូវ អ្នកសុំទាន និងស្ត្រីរកស៊ីផ្លូវភេទរាប់សិបនាក់ ហើយបញ្ជូនពួកគេទៅមណ្ឌលនេះ ដែលក្រុមសិទ្ធិមនុស្សបានចងក្រងឯកសារនៃការរំលោភរាងកាយនិងផ្លូវភេទជាច្រើន។
ក្នុងសេចក្តីថ្លែងការណ៍ចេញកាលពីថ្ងៃព្រហស្បតិ៍ អង្គការសិទ្ធិមនុស្ស (HRW) បានអំពាវនាវឲ្យដោះលែងអ្នកទាំងនោះដែលជាប់ឃុំនៅព្រៃស្ពឺ និងបិទមណ្ឌលនេះ និងកន្លែងផ្សេងទៀតដែលដូចទីនេះ។
លោក ហ្វីល រ៉ូបឺតសុន (Phil Robertson) អនុប្រធានអង្គការឃ្លាំមើលសិទ្ធិមនុស្សប្រចាំតំបន់អាស៊ី បាននិយាយក្នុងសេចក្តីថ្លែងការណ៍ថា “ថ្ងៃឈប់សម្រាកនិងពិធីបុណ្យកម្ពុជាមិនគួរប្រារព្ធ ដោយមានការចាប់ខ្លួនជនងាយរងគ្រោះបំផុតនៅប្រទេសនេះស្រេចតែចិត្តនោះទេ។ អ្នកដែលត្រូវចាប់ឃុំខ្លួនដោយគ្មានការចោទប្រកាន់ដាក់ចូល ‘មណ្ឌលឱកាស’ មានឈ្មោះមិនល្អនេះ គួរត្រូវដោះលែងភ្លាមៗ “។
លោក ហ្វីល រ៉ូបឺតសុន បានបន្ថែមថា “ការទុកមណ្ឌលឃុំខ្លួនដូចជាព្រៃស្ពឺឲ្យនៅបើកតទៅទៀត នាំឲ្យកើតមានមិនចេះចប់ចំពោះអាជ្ញាធរក្នុងការរំលោភសិទ្ធិមូលដ្ឋានរបស់មនុស្ស ដែលគេមិនចង់បាន។ រដ្ឋាភិបាលគួរបិទមណ្ឌលទាំងនេះភ្លាមៗ ហើយគាំទ្រសេវាស្ម័គ្រចិត្តពិតប្រាកដ ដើម្បីជួយពលរដ្ឋកម្ពុជាទន់ខ្សោយ”។
លោក សន សុផល ប្រធានមន្ទីរសង្គមកិច្ចរាជធានីភ្នំពេញ បានមានប្រសាសន៍ថា មនុស្សមិនដល់១០០នាក់ត្រូវបានគេចាប់ចេញពីផ្លូវមុនពិធីបុណ្យសពលោក ជា ស៊ីម ហើយមានមនុស្ស១០ទៅ២០នាក់នៅក្នុងមណ្ឌលនោះនៅឡើយកាលពីថ្ងៃព្រហស្បតិ៍។ នៅពេលសួរមូលហេតុដែលចាំបាច់ត្រូវបញ្ជូនមនុស្សចេញពីផ្លូវមុនពេលបុណ្យសព លោក សុផល បានដាក់ទូរស័ព្ទចុះ។
លោក ឡុង ឌីម៉ង់ អ្នកនាំពាក្យសាលាក្រុង បានមានប្រសាសន៍ថា ព្រៃស្ពឺ នឹងមិនត្រូវបិទទេ។
លោក ឌីម៉ង់ មានប្រសាសន៍ថា “យើងនឹងមិនធ្វើតាមអនុសាសន៍របស់អង្គការបរទេសនេះទេ”។ លោកមានប្រសាសន៍ថា “ព្រៃស្ពឺមិនល្អឥតខ្ចោះនោះទេ” ប៉ុន្តែលោកបន្ថែមថា ការអះអាងអំពីការរំលោភបំពាននៅមណ្ឌលនេះគឺគ្មានមូលដ្ឋានឡើយ។
លោក ហែម សារិន ជាសន្តិសុខនៅមណ្ឌលបណ្តុះបណ្តាលវិជ្ជាជីវៈពោធិ៍សែនជ័យ បានមានប្រសាសន៍ថា មនុស្ស៨០នាក់ត្រូវបានគេនាំមកមណ្ឌលនេះមុនបុណ្យសពលោក ជា ស៊ីម ហើយ៤០នាក់ត្រូវបានដោះលែងកាលពីថ្ងៃពុធ។
លោកបានមានប្រសាសន៍ថា “ពួកគេមិនធ្វើអ្វីទេនៅទីនេះ។ ពួកគេគ្រាន់តែហូបនិងសម្រាក ហើយយើងមិនមានការបណ្តុះបណ្តាលជំនាញណាមួយដល់ពួកគេទេ”៕ និត