35 C
Phnom Penh

បក្ស​សង្គ្រោះ​​ជាតិ​​ទាម​​ទារ​​ឲ្យ​​មាន​​​ការ​​បង្កើត​​គណៈ​កម្មាធិការ​​​ព្រំដែន​​ថ្មី​ ​និង​​លុប​​ចោល​​សន្ធិ​សញ្ញា​​ព្រំដែន​​បំពេញ​​បន្ថែម​

ដោយ ឌឹ ខេមបូឌា ដេលី

បទវិភាគ

បន្ទាប់ពី​ដំណើរ​ចុះទៅ​កាន់​តំបន់មានជម្លោះ​តាម​បណ្ដោយ​​ព្រំដែន​កម្ពុជា​-វៀតណាម​អស់​រយៈ​ពេល​ប៉ុន្មាន​សប្ដាហ៍​រួច​មក គណបក្ស​សង្គ្រោះ​ជាតិ​បាន​ចេញ​សេចក្ដី​ថ្លែង​ការណ៍​ផ្លូវ​ការ​មួយ​កាលពី​ថ្ងៃ​ព្រហស្បតិ៍ ដោយ​​ទាមទារ​ឲ្យ​រដ្ឋាភិបាល​​រុះ​រើ​គណៈកម្មាធិការ​ព្រំដែន​របស់​ខ្លួន​ លុប​ចោល​សន្ធិសញ្ញា​ព្រំដែន​ឆ្នាំ​២០០៥ និង​យក​សំណុំរឿង​ប្រឆាំង​​នឹង​វៀតណាម​ទៅ​កាន់​តុលាការ​អន្តរជាតិ​។

យុទ្ធនាការ​ចុង​ក្រោយ​ក្នុង​ចំណោម​យុទ្ធនាការ​ជាយូរ​មក​ហើយ​របស់​គណបក្ស​សង្គ្រោះ​ជាតិ​ប្រឆាំង​នឹង​​ការ​ដោះ​ស្រាយ​របស់​រដ្ឋាភិបាល​ក្នុង​ការ​វាស់​វែង​ព្រំដែន​​របស់​​កម្ពុជា​ជាមួយ​​ប្រទេស​វៀតណាម​ គឺ​​ផ្ដោត​លើ​តំបន់​ចំនួន​បួន​​​មាន​​ដូច​ជា​​ខេត្ត​រតនគិរី ​ខេត្ត​មណ្ឌលគិរី ខេត្ត​កណ្ដាល និង​ខេត្តត្បូងឃ្មុំ។

នៅ​ក្នុង​សេចក្ដី​ថ្លែងការណ៍​មួយ​ចេញ​កាលពី​ថ្ងៃ​ព្រហស្បតិ៍ គណបក្ស​សង្គ្រោះជាតិ​បាន​លើក​ឡើង​ថា បន្ទាប់ពី​ការ​ចង​ក្រង​ឯកសារ​ទាក់​ទិន​នឹង​ការ​ឈ្លាន​ពាន​ជា​ច្រើន​លើក​ច្រើនសារ​ពី​សំណាក់​វៀតណាម រដ្ឋាភិបាល​​ត្រូវ​តែ​ធ្វើ​កំណែទម្រង់​ឲ្យ​បាន​ស៊ីជម្រៅ​ចំពោះ​វិធី​សាស្ត្រ​នៅ​ក្នុង​ការ​វាស់​វែង​ព្រំដែន​។

គណបក្ស​សង្គ្រោះ​ជាតិ​ទាម​​ទារ​ឲ្យ​រដ្ឋាភិបាល​ “​ដាក់​ពាក្យ​បណ្ដឹង​ទៅ​កាន់​តុលាការ​យុត្តិធម៌​អន្តរជាតិ ហើយ​ទាម​ទារ​ឲ្យ​រដ្ឋសភា​​រៀបចំ​កិច្ច​ប្រជុំ​មួយ​​ដើម្បី​​អនុម័ត​លើ​ការ​លុប​ចោល​នៃ​សន្ធិសញ្ញា​បំពេញ​បន្ថែម​ឆ្នាំ​២០០៥”។

គណបក្សសង្គ្រោះ​ជាតិ​ក៏​​អំពាវ​នាវ​ឲ្យ​មាន​ការ​បង្កើត​គណៈកម្មាធិការ​ព្រំដែន​ថ្មីមួយ​ ដែល​រួម​មាន​សមាជិក​មក​ពី​គណបក្ស​ប្រឆាំង និង​​អង្គការ​សង្គម​ស៊ីវិល​ ក៏​ដូចជា​ការ​បង្ហាញ​នូវ​ផែន​ទី​ដែល​កំពុង​ត្រូវ​បាន​ប្រើ​ប្រាស់​ក្នុង​ការ​ចរចា​គ្នា​រវាង​កម្ពុជា​ និង​វៀតណាម​ផង​ដែរ​ ហេតុ​ដូច្នេះ​​គេ​អាច​ពិនិត្យ​ផែន​ទី​​នេះ ដើម្បី​ប្រៀប​ធៀប​នឹង​បង្គោល​ព្រំដែន​ជាក់​ស្ដែង​។

លោក​ ម៉ៅ មុនីវណ្ណ សមាជិក​សភា​មកពី​គណបក្ស​សង្គ្រោះ​ជាតិ​ដែល​ជា​អ្នក​ដឹកនាំ​ដំណើរ​ក្នុង​ពេល​ថ្មីៗ​ចុះទៅ​កាន់​តំបន់​ព្រំដែន បាន​លើក​ឡើង​កាលពី​ម្សិលមិញ​ថា កំណត់​ទូត​​ចំនួនពីរ​ក្នុង​ពេល​ថ្មីៗ​នេះ ដែល​ក្រសួង​ការ​បរទេស​ផ្ញើ​​ទៅ​កាន់​ប្រទេស​វៀតណាម​​ ដោយ​ជូន​ដំណឹង​អំពី​​ភាព​មិន​ប្រក្រតី​តាម​ព្រំដែន​នៅ​ក្នុង​ខេត្ត​រតនគិរី និង​ខេត្ត​កណ្ដាល​​នោះ​អាច​ផ្ដល់​​​ជា​កម្លាំង​​​ជំរុញ​សម្រាប់​​ការ​ធ្វើ​កំណែទម្រង់​។

លោក​ មុនីវណ្ណ បានមាន​ប្រសសន៍​ថា “​ដោយ​សារ​រដ្ឋាភិបាល​កម្ពុជា​​ក៏​ទទួល​ស្គាល់​ថា វៀតណាម​បាន​ជីក​ស្រះ​នៅ​​លើ​ទឹកដីកម្ពុជា​ [ក្នុង​ខេត្ត​រតនគិរី] ហើយ​កំពុង​សាង​សង់​ប៉ុស្តិ៍​យោធា​នៅ​លើ​តំបន់​មាន​ជម្លោះ​ក្នុង​ខេត្ត​កណ្ដាល​​ដែរនោះ ​ហេតុ​ដូច្នេះ​​វា​ជា​រឿង​​សមហេតុ​ផល​​​សម្រាប់​​រដ្ឋសភា​បើក​​សម័យ​ប្រជុំពេញ​អង្គ​ដើម្បី​លុប​ចោល​សន្និសញ្ញា​ព្រំដែន​បំពេញ​បន្ថែម ដែល​ចុះ​ហត្ថលេខា​ដោយ​កម្ពុជា​ និង​វៀតណាម​ក្នុង​ឆ្នាំ​២០០៥”។

សន្ធិសញ្ញា​ឆ្នាំ​២០០៥​ដ៏ចម្រូង​ចម្រាស​នេះ​ ​បាន​ទទួល​រង​ការ​រិះគន់​ពី​គ្រប់​មជ្ឈដ្ឋាន​ រាប់​ចាប់​ពី​​សម្ដេច​ឪ​ នរោត្តម សីហនុ រហូត​ដល់​សកម្មជន​​មក​ពី​គណបក្ស​ប្រឆាំង​ជាច្រើនរូ​ប​ទៀត​ ដែល​ក្នុង​នោះ​មួយ​ចំនួន​ត្រូវ​បាន​​ចាប់​ដាក់​ពន្ធនាគារ​ពីបទ​រិះគន់​សន្ធិសញ្ញា​នេះ​​ បន្ទាប់ពី​លោក​នាយក​រដ្ឋមន្ត្រី ហ៊ុន សែន បាន​ដាក់​ពាក្យ​បណ្ដឹង​ចោទ​ប្រកាន់​ពីបទ​បរិហាកេរ្តិ៍​។

គេ​មិន​អាច​ទាក​់ទង​លោក វ៉ា គឹមហុង ​ប្រធាន​គណៈកម្មាធិការ​ព្រំដែន​បាន​ឡើយ​កាលពី​ថ្ងៃ​សុក្រ។ លោក សុខ ឦសាន អ្នក​នាំពាក្យ​គណបក្ស​ប្រជាជន​កម្ពុជា​បាន​លើក​ឡើង​ថា គណបក្ស​សង្គ្រោះ​​ជាតិ​​កំពុង​ប្រើ​ប្រាស់​​បញ្ហា​ព្រំដែន​​នេះ​ដើម្បី​​ទាញ​ប្រយោជន៍​នយោបាយ​។

លោក​បាន​មាន​ប្រសាសន៍​ថា “​​អ្វី​ក៏ដោយ​ដែល​ពួកគេ​កំពុង​និយាយ​ និង​ធ្វើ​នេះ​គឺ​គ្រាន់​តែ​ជាការ​ឃោសនា​ផ្នែក​នយោបាយ​ប៉ុណ្ណោះ ដើម្បី​ទាញ​ប្រយោជន៍ និង​ប្រជាប្រិយភាព​សម្រាប់​គណបក្ស​ខ្លួន​។ លើស​ពី​នេះ​ទៅ​ទៀត ​វា​គ្មាន​ហេតុផល​ត្រូវ​លុប​ចោល​សន្ធិសញ្ញា​ព្រំដែន​បំពេញ​បន្ថែម​ឡើយ​ ព្រោះ​យើង​បាន​អនុវត្ត​​វា​យ៉ាង​រលូន​អស់​រយៈ​ពេល​១០​ឆ្នាំ​មក​ហើយ​”។

លោក សុខ ឦសាន ក៏​បាន​លើក​ឡើង​ផង​ដែរ​ថា មិន​ចាំបាច់​​​ត្រូវ​ការ​កែប្រែ​គណៈកម្មាធិការ​ព្រំដែន​នោះឡើយ​។

លោក​បាន​មាន​ប្រសាសន៍​ថា “​តាម​ពិត​ទៅ កិច្ច​ការ​​ព្រំដែន​​គឺ​ជា​ការ​ទទួល​ខុស​ត្រូវ​របស់​រដ្ឋាភិបាល ដើម្បី​ការ​ពារ​បូរណភាព​ទឹក​ដី​កម្ពុជា​។ ហេតុ​ដូច្នេះ ​មិន​ចំាបាច់​ត្រូវ​ការ​​បង្កើត​គណៈកម្មាធិការ​ព្រំដែន​មួយ​ផ្សេង​ទៀត​ឡើយ​ ព្រោះ​រដ្ឋាភិបាល​មាន​គណៈកម្មាធិការ​ព្រំដែន​​ដែល​ជា​ទីភ្នាក់​ងារ​សម្រាប់​ធ្វើ​ការ​លើ​រឿង​នេះ​ស្រាប់​រួច​ហើយ​”៕ ស៊ុយឈាង​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស