33.3 C
Phnom Penh

មនុស្ស​រាប់រយ​នាក់​តវ៉ា​នៅមុខ​រដ្ឋសភា​​ជំទាស់នឹង​ច្បាប់​អង្គការ​មិនមែន​រដ្ឋាភិបាល

ដោយ ឌឹ ខេមបូឌា ដេលី

បទវិភាគ

អង្គការមិនមែន​រដ្ឋាភិបាល​បានប្រមូល​ផ្តុំ​មនុស្សប្រហែល​​​​៣០០នាក់​មក​ជួប​ជុំគ្នានៅមុខ​រដ្ឋសភា​កាល​ពី​ម្សិលមិញ​ដើម្បី​តវ៉ានឹង​ការអនុម័ត​ច្បាប់​ដែលនឹង​បង្ខំ​ឲ្យ​អង្គការ​មិនមែនរដ្ឋាភិបាល​ទាំង​អស់​ និង​សមាគមនានា​​​នៅក្នុង​ប្រទេស​​ចុះ​ឈ្មោះ និង​ដាក់​របាយការណ៍​ទៀង​ទាត់​ទៅ​​រដ្ឋា​ភិបាល​។

អ្នករិះគន់សេចក្តីព្រាង​ច្បាប់នេះ ដែល​កំពុង​ត្រូវ​បានពិនិត្យ​នៅ​រដ្ឋសភា​​​នៅ​មុន​ការ​បោះ​ឆ្នោត​នោះ ​លើកឡើង​ថា ច្បាប់នេះ​មាន​ភាព​មិន​ច្បាស់លាស់​ និងបទប្បញ្ញត្តិ​ទូ​លំទូលាយ​ដែល​នឹង​ផ្តល់ អំណាច​បន្ថែមទៀត​ដល់​រដ្ឋាភិបាល​ក្នុងការ​បិទ​​​ ឬ​បដិសេធ​​ការ​ចុះ​ឈ្មោះ​ដល់​អង្គការ​នានា ដែល​រិះគន់​​ដល់​គណបក្ស​ប្រជាជន​កម្ពុជា ឬ​ចេញ​ការ​គំាទ្រ​ដល់​គណបក្ស​។

សកម្មជន​តវ៉ា​នៅ​ក្រៅ​រដ្ឋសភា​ក្នុង​ក្រុង​ភ្នំពេញ​កាលពី​ម្សិលមិញ​ ប្រឆាំង​នឹង​សេចក្តី​ព្រាង​ច្បាប់​គ្រប់​គ្រង​អង្គការ​ក្រៅ​រដ្ឋាភិបាល​។ រូបថតៈ ស៊ីវ ចាន់​ណា​/The Cambodia Daily
សកម្មជន​តវ៉ា​នៅ​ក្រៅ​រដ្ឋសភា​ក្នុង​ក្រុង​ភ្នំពេញ​កាលពី​ម្សិលមិញ​ ប្រឆាំង​នឹង​សេចក្តី​ព្រាង​ច្បាប់​គ្រប់​គ្រង​អង្គការ​ក្រៅ​រដ្ឋាភិបាល​។ រូបថតៈ ស៊ីវ ចាន់​ណា​/The Cambodia Daily

លោកនាយក​រដ្ឋមន្ត្រី​ ហ៊ុន សែន ​បាន​ប្តេជ្ញា​ជំរុញ​​ច្បាប់នេះ​​តាមរយៈ​រដ្ឋសភា បើ​ទោះជា​មាន​​ឬ​គ្មាន​​​​គណបក្ស​​​ប្រឆាំងក៏​​​ដោយ​​​ ដែល​​​ជំទាស់​​​នឹង​​​ច្បាប់​​​នេះ។

អ្នក​ស្រី ឆាយ គឿន ​ដែល​បាន​​​​ទទួល​ជំនួយ​ពី​អង្គការ​មិនមែន​រដ្ឋាភិបាល​នានា​ក្នុង​រាជ​ធានី​ភ្នំពេញ​ទាក់ទង​វិវាទ​ដីធ្លី​​ជាមួយ​​គម្រោង​ផ្លូវ​រថភ្លើង​ដែល​ផ្តល់មូលនិធិដោយ​ម្ចាស់​ជំនួយ​​ដែល​គាំទ្រដោយ​រដ្ឋាភិបាល​​បាន​មាន​ប្រសាសន៍ថា “​ខ្ញុំ​​បានមក​ចូលរួម​​តវ៉ា​នេះ​ដើម្បីគាំទ្រ​​អង្គការ​នានា ពីព្រោះ​ពួកគេ​ប្រឹង​ប្រែង​ធ្វើការ​ដើម្បី​ជួយ​ប្រជា​ពលរដ្ឋ”។

អ្នកស្រីបានមាន​ប្រសាសន៍ថា “​ច្បាប់នេះ​នឹង​ដាក់សម្ពាធ​លើ​អង្គការ​នានា​ ដែលនឹងធ្វើ​ឲ្យ​ប៉ះ​ពាល់ដល់​​ប្រជាពលរដ្ឋ​ ពីព្រោះ​​ពួកគាត់​ត្រូវ​ការ​ជំនួយ​ពី​អង្គការ​ទាំងនោះ”។

លោក ធន សារាយ ប្រធានអង្គការ​សិទ្ធិមនុស្ស​អាដហុក ជា​អង្គការ​មិនមែន​រដ្ឋាភិបាល​ដែល​តែងតែ​រិះ​គន់​រដ្ឋាភិបាល​នោះ​បាន​មានប្រសាសន៍ថា ការ​អនុម័ត​ច្បាប់នេះ​នឹង​ធ្វើ​ឲ្យ​ប៉ះពាល់ដល់​​​​​​​​​កេរ្តិ៍ឈ្មោះ​ប្រទេស​កម្ពុជា​​​ ពោលគឺ អាមេរិក និង​អង្គការ​សហប្រជាជាតិ​ បាន​ជំទាស់​នឹង​ច្បាប់នេះ ហើយ​​​ក៏​​​​​​ប៉ះពាល់​​​ដល់​​​ការ​កាន់​​​​អំណាច​របស់​គណបក្ស​ប្រជាជន​កម្ពុជា​ដែរ​​​។

លោក​បាននិយាយ​ទៅកាន់​អ្នក​យកព័ត៌មាន​ថា “​តើ​អ្នក​គួរ​បោះ​ឆ្នោត​​ឲ្យ​គណបក្ស​ដែល​បាន​ធ្វើបាប​អ្នក​ជួយរបស់​ខ្លួនឬ​​ទេ?”។ ប្រសិន​បើ​គណបក្ស​ប្រជាជន​កម្ពុជា​​មិន​បញ្ឈប់​ច្បាប់នេះទេនោះ គណបក្ស​នេះ​នឹង​បាត់​បង់​ប្រជាប្រិយភាព​របស់​ខ្លួន​មិន​ខាន”។

រដ្ឋាភិបាល​លើក​ឡើង​ថា ខ្លួន​ត្រូវ​ការ​ច្បាប់នេះ​ដើម្បី​ការ​ពារ​​ការ​គំរាម​កំហែង​ពីការ​ផ្តល់​ហិរញ្ញប្បទាន​ភេរវកម្ម ដែលហូរ​ចូល​ក្នុង​ប្រទេស​តាមរយៈ​អង្គការ​មិនមែន​រដ្ឋាភិបាល។

ទោះយ៉ាង​ណា​ លោក អំ​ សំអាត​ អ្នកគ្រប់គ្រង​ផ្នែក​បច្ចេកទេស​​មកពី​អង្គការសិទ្ធិមនុស្ស​​លីកាដូ ​ជា​អង្គការ​មិនមែន​រដ្ឋាភិបាល​មួយ​ទៀត​ដេល​តែ​ងតែ​រិះគន់នោះ​បាន​មាន​ប្រសា​សន៍​ថា​ច្បាប់នេះ​គ្រាន់តែ​ជា​ល្បិច​នយោបាយ​របស់គណបក្ស​ប្រជាជន​កម្ពុជា​ដើម្បី​បំបិទ​មាត់​​អ្នក​ប្រឆំាង​​តែប៉ុណ្ណោះ។

លោក​បានមាន​ប្រសាសន៍ថា “​យើង​ធ្វើការ​តវ៉ា​នៅ​ថ្ងៃនេះ​ដើម្បី​បញ្ជូន​សារ​ទៅ​រដ្ឋា​ភិបាល​ និង​​រដ្ឋសភាថា យើង​មិន​ត្រូវ​កា​រច្បាប់នេះទេ ពីព្រោះ​ច្បាប់នេះ​វា​ផ្ទុយ​ទៅនឹង​​រដ្ឋ​ធម្មនុញ្ញរបស់​ប្រទេស​កម្ពុជា និង​ច្បាប់អន្តរជាតិ”។

ក្រុមអ្នកតវ៉ា​បានដើរ​ក្បួន​ពីរ​លើក​ជំុវិញ​ប្លុក​រដ្ឋសភានោះ តែ​មិនត្រូវ​បាន​រារាំង​ដោយ​សន្តិ​សុខ នគរបាល ឬ​ទាហានឡើយ​ ហើយ​បាន​បំបែកគ្នា​​ដោយ​សន្តិវិធី​មុនពេល​ថ្ងៃត្រង់៕សារុន​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស