30.1 C
Phnom Penh

គណបក្ស​សង្គ្រោះ​ជាតិ​ និង​អាជ្ញាធរ​ខេត្ត​ស្វាយរៀង​​​ប្រកែក​គ្នា​យក​ត្រូវ​រៀងៗ​ខ្លួន​ជុំវិញ​​ហេតុការណ៍​ផ្ទុះ​អំពើ​ហិង្សា​នៅ​ព្រំដែន​

ដោយ ឌឹ ខេមបូឌា ដេលី

បទវិភាគ

ទាហាន​វៀតណាម​ឈរ​ជាមួយ​ជន​ស៊ីវិល​វៀតណាម​ ដែល​បាន​ប៉ះ​ទង្គិច​ជាមួយ​សកម្មជន​ខ្មែរ​​ក្នុង​ខេត្ត​ស្វាយរៀង​ កាលពី​ថ្ងៃ​អាទិត្យ។ រូបថតៈ ម៉ា ចិត្រា​

កាល​ពី​ម្សិលមិញ​​លោក សម រង្ស៊ី ប្រធាន​គណបក្ស​ប្រឆាំង​បាន​មាន​ប្រសាសន៍​ការ​ពារ​តំណាង​រាស្ត្រ​គណបក្ស​សង្គ្រោះ​ជាតិ​មួយ​រូប​ដែល​​រង​ការ​វាយ​ដំ​ពី​សំណាក់​​ប្រជាជន​ស៊ីវិល​រៀតណាម​​ អំឡុង​ពេល​ចុះ​ទៅ​ពិនិត្យ​មើល​ចំណុច​ព្រំដែនមាន​វិវាទ​ក្នុង​ខេត្ត​ស្វាយ​រៀង​ ខណៈ​អាជ្ញាធរ​ខេត្ត​និយាយ​ថា ការ​ចុះ​ទៅ​ពិនិត្យ​មើល​ព្រំដែន​​នេះគឺ​ជា​ការ​បង្ក​រឿង និង​រំលោភ​​​ “វប្បធម៌​សន្ទនា”​។

សកម្មជន​គណបក្ស​​ប្រឆាំង​មួយ​ក្រុម​​ដឹក​នាំ​ដោយ​លោក រៀល ខេមរិន្ទ្រ តំណាង​រាស្ត្រ​គណបក្ស​សង្គ្រោះ​ជាតិ​កាលពី​ថ្ងៃ​អាទិត្យ បាន​ព្យាយាម​ចុះទៅ​ពិនិត្យ​មើល​ចំណុច​ព្រំដែន​មាន​វិវាទ​មួយ​ក្នុង​ស្រុក​កំពង់រោទិ៍​ ​ប៉ុន្តែ​​បាន​​ជួប​ប្រទះ​នឹង​​ប្រជាជន​ស៊ីវិល​វៀតណាម​មួយ​ក្រុម​ធំ ដែល​បាន​​រារាំង​ពួកគាត់​មិន​ឲ្យ​​បន្ត​ដំណើរ​​ឆ្ពោះ​ទៅ​បង្គោល​ព្រំដែន​មួយ​។

ការ​វាយ​តប់​គ្នា​បាន​ផ្ទុះ​ឡើង​​​ដោយ​ក្នុង​នោះ​​លោក រៀល ខេមរិន្ទ្រ ​ត្រូវ​​​ជន​ជាតិ​វៀតណាម​វាយ​នឹង​ដំបង​​ ហើយ​លោក សម រង្ស៊ី បាន​ថ្លែង​ប្រាប់​ក្រុម​អ្នក​យក​ព័ត៌មាន​កាលពី​ម្សិលមិញ​ថា វា​ច្បាស់​ណាស់​ថា ដី​នោះ​ស្ថិត​នៅ​ក្នុង​ប្រទេស​កម្ពុជា​ ហើយ​​ជន​ស៊ីវិល​វៀតណាម​ដែល​គាំទ្រ​ដោយ​ទាហាន ​​​បាន​ធ្វើ​ខុស​ហើយ។

នៅ​ខាង​ក្រៅ​រដ្ឋសភា​​បន្ទាប់ពី​សម័យ​ប្រជុំ​​ស្ដីពី​ថវិកា​ឆ្នាំ​២០១៣ លោក សម រង្ស៊ី បានមាន​ប្រសាសន៍​ថា “​វា​ជា​សិទ្ធិ​របស់​យើង​។ នៅ​ក្នុង​ទឹក​ដី​កម្ពុជា​ យើង​អាច​ទៅ​សួរ​សុខទុក្ខ​ប្រជារាស្ត្រ​ខ្មែរ​តាម​​បណ្ដោយ​ព្រំដែន ដែល​រងគ្រោះ​ដោយ​សារ​បាត់​បង់​ដី​ចម្ការ​ និង​ដី​ស្រែ​របស់​ខ្លួន​។ ​យើង​គិត​គូ​ប្ដឹង​​ថ្នាក់​ជាតិ​​​ ថ្នាក់​អន្តរជាតិ​ សុំ​ធ្វើ​ម៉េច​កុំ​ឲ្យ​មាន​អំពើ​ហិង្សា​​មក​លើ​ប្រជាពល​រដ្ឋខ្មែរ​​ដែល​​អត់​មាន​កំហុសអី​ទាល់​តែ​សោះ​ គ្រាន់​តែ​ទៅ​ការ​ពារ​​បូរណភាព​ទឹក​ដី​​​ប្រទេស​កម្ពុជា​។​​យើង​ចង់​ឲ្យ​អាជ្ញាធរ​​នៅ​​ប្រទេស​កម្ពុជា​យើង​ និង​​ប្រជារាស្ត្រ​ខ្មែរ​ទាំង​អស់​រួម​កម្លាំង​គ្នា​ដើម្បី​ទប់​ទល់​កុំ​ឲ្យ​បរទេស​​​មើល​ងាយ​ខ្មែរ​ ចេះ​តែ​ធ្វើ​បាប​ជនជាតិ​ខ្មែរ​ និង​លេប​ត្របាក់​កម្មសិទ្ធិ​​ដីធ្លី​របស់​ប្រជាពលរដ្ឋ​ខ្មែរ​នៅ​តាម​​​ព្រំ​ដែន​”។

ទោះ​ជា​យ៉ាង​ណា កាលពី​ម្សិលមិញ​សាលា​​ខេត្ត​​ស្វាយ​រៀង​​បាន​ចេញ​សេចក្ដី​ថ្លែងការណ៍​​មិន​ទទួល​​ខុស​ត្រូវ​ចំពោះ​សកម្មភាព​របស់​លោក រៀល ខេមរិន្ទ្រ​ ឡើយ ដោយ​លើក​ឡើង​ថា ពួកគាត់​បាន​រំលោភ​ “វប្បធម៌​សន្ទនា” ដែល​លោក​ សម រង្ស៊ី ​និង​លោក​នាយក​រដ្ឋមន្ត្រី ហ៊ុន សែន កំពុង​លើក​កម្ពស់​។

សេចក្ដី​ថ្លែងការណ៍​នោះ​មាន​ខ្លឹមសារ​ដូច្នេះ​ថា “​ការ​ចុះ​ទៅ​ពិនិត្យ​មើល​ព្រំដែន​ដែល​​ដឹកនាំ​ដោយ​លោក​ រៀល ខេមរិន្ទ្រ មិន​បាន​ជូន​ដំណឹង​​អាជ្ញាធរ​មូលដ្ឋាន​​ឲ្យ​ជួយ​រៀបចំ​សន្តិសុខ​ សុវត្ថិភាព និង​ជូន​ដំណឹង​ទៅ​សមភាគីវៀតណាម​​ ដើម្បី​​ចៀស​វាង​ឧប្បត្តិ​ហេតុ​ណាមួយ​កើត​ឡើង​នោះ​ទេ។ បំណង​​ [​នៃ​​ដំណើរ​] នេះ​ គឺ​ដើម្បី​បង្ក​អសន្តិសុខ​នៅ​តាម​ព្រំដែន​ជា​ការ​ប្រឆាំង​ទាំង​ស្រុង​ចំពោះ​​វប្បធម៌​​សន្ទនា​​ដឹកនាំ​ដោយ​មេដឹកនាំ​កំពូល​ទាំងពីរ​​ដែល​ប្រកាន់​ខ្ជាប់​​ការ​ចរចា​លើ​បញ្ហា​ជាតិ​ បូរណភាព​ទឹក​ដី​ និង​អធិបតេយ្យ​ព្រំដែន​”។

លោក វ៉ា គឹមហុង ប្រធាន​គណៈកម្មការ​​ព្រំដែន​រួម​កម្ពុជា​-វៀតណាម បាន​មាន​ប្រសាសន៍​ថា លោក​មិន​ដឹង​ច្បាស់​ថា​ តើ​លោក រៀល ខេមរិន្ទ្រ ​​បាន​ស្ថិត​នៅ​លើ​ទឹក​ដីកម្ពុជា ឬ​ក៏​ចូល​ទៅ​ក្នុង​ទឹក​ដី​វៀតណាម ឬ​ចូល​ទៅ​​តំបន់​​ណា​មួយ​ដែល​មិន​ទាន់​មាន​ការ​កំណត់​នៅ​ឡើយ​នោះ​ទេ។

លោក​បានមាន​ប្រសាសន៍​ថា “​ខ្ញុំ​មិន​ទាន់​ទទួល​បាន​របាយការណ៍​អំពី​​ករណី​​នេះ​នៅ​ឡើុយ​ទេ។ យើង​មិន​ដឹង​ថា ពួកគាត់​​បាន​ទៅ​កន្លែង​ណា​ខ្លះ​ទេ”។

លោក រៀល ខេមរិន្ទ្រ បាន​បដិសេធ​ថា ​ការ​ធ្វើ​ដំណើរ​របស់​លោក​មិន​បាន​រំលោភ​ “​វប្បធម៌​សន្ទនា​” ទេ ហើយ​បាន​មាន​ប្រសាសន៍​ថា ​ច្បាស់​ណាស់​ថា​លោក​និង​ក្រុម​របស់​លោក​បាន​ស្ថិត​នៅ​លើ​ដី​របស់​កម្ពុជា ​នៅ​ពេល​ពួកគាត់​រង​ការ​វាយ​ប្រហារ​ ពីព្រោះ​ពួកគាត់​មិន​ទាន់​បាន​ទៅ​ដល់​​បង្គោល​ព្រំដែន​ដែល​ពួកគាត់​ចង់​ពិនិត្យ​មើល​នៅ​ឡើយ​។

លោក​​បានមាន​ប្រសាសន៍​ថា “ទីតាំង​នោះ​ជា​របស់​កម្ពុជា​។ ​ដោយ​សារ​តែ​បង្គោល​ព្រំដែន​​លេខ​២០៣​​ស្ថិត​នៅ​​ទៅ​ទៀត​ ដូច្នេះ​ទឹក​ដី​នេះ​ជា​របស់​កម្ពុជា​។ នៅ​ពេល​​ពួក​គេ​មក​វ៉ៃ​យើង​​នៅ​ក្នុង​ទឹក​ដី​របស់​យើង​​ ហើយ​អាជ្ញាធរ​​បដិសេធ​​មិន​ទទួល​ខុស​ត្រូវ​ នោះគឺ​ជា​រឿង​ដ៏​អាម៉ាស់។ យើង​មិន​អាច​ប្រើ​វប្បធម៌​សន្ទនា​ ដើម្បី​បណ្ដោយ​ឲ្យ​យួន​យក​ទឹក​ដី​របស់​យើង​តាម​អំពើ​ចិត្ត​នេះ​ទេ​។ គណបក្ស​សង្គ្រោះ​ជាតិ​គាំទ្រ​​វប្បធម៌​សន្ទនា ប៉ុន្តែ​វប្បធម៌នេះ​គឺ​ដើម្បី​បម្រើ​​ផល​ប្រយោជន៍​​របស់​ជាតិ​”​៕ សុខុម​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស