មេធាវីតំណាងរោងចក្រកាត់ដេរមួយក្នុងខណ្ឌពោធិ៍សែនជ័យ រាជធានីភ្នំពេញ កន្លែងដែលកម្មការិនីបួននាក់រងរបួសកាលពីសប្ដាហ៍មុន នៅពេលអ្នកបើកបររថយន្តធុនធំមួយគ្រឿងបានបុកចូលក្នុងក្រុមអ្នកតវ៉ានោះ បានមានប្រសាសន៍កាលពីម្សិលមិញថា រោងចក្រមិនទទួលខុសត្រូវឡើយ ពីព្រោះកម្មករបានរត់ទៅខាងមុខរថយន្តដែលកំពុងបើកបរក្នុងល្បឿនលឿនដោយខ្លួនឯង។
កាលពីថ្ងៃព្រហស្បតិ៍ កម្មកររោងចក្រកាត់ដេរប្រហែល១០០នាក់ដែលធ្វើការតវ៉ាបានបិទច្រកចេញរោងចក្រកាត់ដេរ S.H. International ដែលកាន់កាប់ដោយជនជាតិកូរ៉េខាងត្បូង ស្រាប់តែនៅពេលនោះឈ្មោះ គឹម សាត អាយុ២២ឆ្នាំបានបើករថយន្តដែលដឹកម៉ាស៊ីនដេរពេញបុកចូលក្នុងក្រុមអ្នកតវ៉ាតែម្តង។
បុរសឈ្មោះ សាត នេះត្រូវបានឃាត់ខ្លួនភ្លាមៗ ប៉ុន្តែត្រូវបានដោះលែងវិញនៅថ្ងៃបន្ទាប់ ពីព្រោះរោងចក្របានយល់ព្រមបង់សំណងដល់កម្មករទាំងនោះ។
ទោះជាយ៉ាងណា លោកស្រី សែ គុតកុឡា មេធាវីតំណាងរោងចក្រ S.H.បានមានប្រសាសន៍ថា រោងចក្រមិនបានយល់ព្រមឡើយ។ លោកស្រីបានមានប្រសាសន៍ថា “ខ្ញុំគិតថា មិនចាំបាច់ទទួលខុសត្រូវទេ ពីព្រោះមិនមានសេចក្ដីសម្រេចចុងក្រោយថា ក្រុមហ៊ុនរបស់យើងត្រូវឬក៏ខុសនោះឡើយ”។
លោកស្រីក៏បានអះអាងថា បានឃើញគ្រោះថ្នាក់នេះផងដែរ ហើយបានច្រានចោលការលើកឡើងមុនៗ។ លោកស្រី គុតកុឡា បានមានប្រសាសន៍ថា “កម្មករបានរត់ទៅខាងមុខរថយន្តដោយខ្លួនឯង។ មានកម្មករប្រហែល២០នាក់នៅខាងមុខរថយន្ត ហើយអ្នកបើកបរជាន់ហ្វ្រាំងមិនទាន់”។
លោកស្រីបានបន្ថែមថា រោងចក្របានផ្តល់កិច្ចសន្យាបន្តទៅឲ្យក្រុមហ៊ុនដឹកជញ្ជូនមួយ ហើយអ្នកបើកបររថយន្តមិនមែនជាបុគ្គលិករោងចក្រទេ។
នៅក្នុងរបាយការណ៍ដែលបានចេញផ្សាយកាលពីម្សិលមិញដោយរោងចក្រ S.H. បានបង្ហាញថា ក្រុមហ៊ុននោះជាក្រុមហ៊ុនដឹកជញ្ជូនព្រះចន្ទពេញវង់។
កម្មករបានធ្វើកូដកម្មចាប់តាំងពីចុងខែមុនមក ពីព្រោះពួកគេអះអាងថា ពួកគេមិនបានបើកប្រាក់ខែសម្រាប់ខែឧសភាទេ។
លោកស្រី គុតកុឡា បានមានប្រសាសន៍ថា កម្មករមានកំហឹង ពីព្រោះរោងចក្រមិនបានបន្តកិច្ចសន្យារបស់ពួកគេឡើយ។
លោកស្រីបានមានប្រសាសន៍ថា “នេះគឺជារដូវធ្លាក់ចុះ ហើយការបញ្ជាទិញក៏បានថយចុះផងដែរ ដូច្នេះយើងចាំបាច់ត្រូវកាត់បន្ថយចំនួនកម្មករ”។
លោក ហ៊ីង ប៊ុនធឿន អនុប្រធានសហព័ន្ធសហជីពស្មារតីកម្មករខ្មែរ បានមានប្រសាសន៍ថា កម្មករទាំងបួននាក់ដែលរងរបួសនោះ បានគ្រាន់បើហើយនៅផ្ទះរបស់ពួកគេ។ លោកបានបន្ថែមថា លោកជឿថា ក្រុមហ៊ុនត្រូវទទួលខុសត្រូវ។
លោកបានមានប្រសាសន៍ថា “ក្រុមហ៊ុនបានបញ្ជាឲ្យអ្នកបើកបរធ្វើដូច្នេះ។ មានភ័ស្តុតាង និងសាក្សី ហើយយើងបានដាក់ពាក្យបណ្ដឹងទៅនគរបាល។ ហេតុអ្វីបានជានគរបាលដោះលែងជនសង្ស័យទៅវិញ?”។
លោក ជា សុវណ្ណ នាយនគរបាលព្រហ្មទណ្ឌខណ្ឌពោធិសែនជ័យ បានមានប្រសាសន៍ថា លោកបានដោះលែងអ្នកបើកបរតាមសេចក្តីបង្គាប់របស់លោក អ៊ុំ សុភ័ក្ត្រ ព្រះរាជអាជ្ញារងអមសាលាដំបូងរាជធានីភ្នំពេញ។
គេមិនអាចទាក់ទងលោក សុភ័ក្ត្រ ដើម្បីសុំអត្ថាធិប្បាយបានទេ៕ សារុន