34.8 C
Phnom Penh

នគរបាល​ចាប់ខ្លួន​មន្ត្រី​សហជីពប្រាំបួននាក់​ក្នុងការតវ៉ា​នៅ​ខេត្ត​តាកែវ

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិលមិញ នគរ​​​បាល​​​ខេត្ត​​​តាកែវ​​​បាន​​​ចាប់​​​ខ្លួន​​​មន្ត្រី​​​សហជីព​​​ប្រាំ​​​បួន​​​នាក់​​​អំឡុង​​​ការ​​​តវ៉ា​​​នៅខាង​​​ក្រៅ​​​រោង​​​ចក្រ​​​អេឡិចត្រូនិក​​​​​​ កន្លែង​​​ដែល​​​កម្មករ​​​បាន​​​ធ្វើ​​​កូដ​​​កម្ម​​​រយៈ​​​ពេល​​​ជិត​​​បី​​​ខែ​​​​​​ ទាម​​​ទារ​​​ប្រាក់​​​ខែ​​​ស្មើ​​​នឹង​​​មិត្ត​​​រួម​​​ការ​​​ងារ​​​របស់​​​ខ្លួន​​​​​​នៅ​​​ក្នុង​​​វិស័យ​​​កាត់​​​ដេរ​​​ដែរ​​​។

កម្ម​​​ករ​​​ប្រហែល​​​៤០០នាក់​​​ នៅ​​​រោង​​​ចក្រ Kuantech (Cambodia) ដែល​​​ផ្គត់​​​ផ្គង់​​​​​​គ្រឿង​​​អេឡិច​​​ត្រូនិក​​​ឲ្យក្រុមហ៊ុន Samsung បាន​​ដើរ​​​ចេញ​​​កាល​​​ពីថ្ងៃ​​​ទី​​​១១​​​ ខែ​​​មិថុនា បន្ទាប់​​​ពី​​​អះ​​​អាង​​​ថា ថៅកែ​​​រោង​​​ចក្រ​​​មិន​​​យក​​​ចិត្ត​​​ទុក​​​ដាក់​​​នឹង​​​កិច្ច​​​ព្រម​​​ព្រៀង​​​ដំឡើង​​​ប្រាក់​​​ខែ​​​ដល់​​​ពួក​​​គេ​​​ពី​​​១២៣​​​ដុល្លារ ដល់​​​១២៨​​​ដុល្លារ​​​ឡើយ​​​។

សាលា​​​ដំបូង​​​ខេត្ត​​​បាន​​​សម្រេច​​​ចេញ​​ដីកា​​​បង្គាប់​​​កាល​​​ពី​​​ថ្ងៃ​​​ទី​​​២៣​​​ខែមិថុនា បង្គាប់​​​ឲ្យ​​​កម្មករ​​ទាំង​​​អស់​​​ត្រឡប់​​​ចូលធ្វើការ​វិញ​​​ក្នុង​​​រយៈ​​​ពេល​​​ពីរ​​​ថ្ងៃ ។ ប៉ុន្តែ កម្មករ​​​ប្រហែល​​​៣០​​​នាក់​​​នៅ​​​តែ​​​បន្ត​​​ធ្វើ​​​ការ​​​តវ៉ា​​​កាល​​​ពី​​​ម្សិល​​​មិញ នៅ​​​រោង​​​ចក្រ​​​ស្ថិត​​​ក្នុង​​​ស្រុក​​​ត្រាំ​​​កក់នេះ​​​​ដដែល​​​។

លោក សុខ សុជា អធិការ​​​នគរបាល​​​ស្រុក​​​ស្តី​​​ទី​​​បាន​​​មាន​​​ប្រសាសន៍​​​ថា មន្ត្រី​​​​​​​សហជីព​​​ប្រាំ​​​បួន​​​នាក់​​​រួម​​​ទាំង​​​មនុស្ស​​​ម្នាក់​​​ដែល​​​កាន់​​​​​​​ឧបករណ៍​​​បំពង​​​សំឡេងផង​ ត្រូវ​​​​​​​​​នគរ​​​បាល​​​ខេត្តចាប់ខ្លួន​​​​កាល​​​ពី​​​ម្សិល​មិញ។

លោក សុជា បាន​​​មាន​​​ប្រសាសន៍​​​ថា “ពួក​​​គេ​​​បាន​​​ញុះញង់​​​កម្មករ​​​ឲ្យធ្វើ​​​ការ​​​តវ៉ា​​​ចាប់​​​តាំង​​​ពីថ្ងៃ​​​ទី​​​១១​​​ ខែមិថុនា​​​មក ហើយ​​​នៅ​​​ថ្ងៃ​​​េនះ​​​ពួក​​​គេ​​​បាន​​​បំផ្លាញ​​​ទ្វារ​​​របង​​​របស់​​​រោង​​​ចក្រ​​​ទៀត​​​ផង​​​។ រោង​​​ចក្រ​​​បាន​​​ដាក់​​​ពាក្យ​​​បណ្តឹង​​​ទៅ​​​តុលាការ​​​ ហើយ​​​តុលាការ​​​បាន​​​បង្គាប់​​​ឲ្យ​​​នគរ​​​បាល​​​ចាប់​​​ខ្លួន​​​​​​​​​​​​ពួក​​​គេ”។

លោក ពុធ សុវណ្ណ ប្រធាន​​​សម្ព័ន្ធ​​​សហជីព​​​កម្មករ​​​​​​ដែល​​​មិន​​​មាន​​​វត្ត​​​មាន​​​នៅ​​​ការ​តវ៉ា​​​នោះ​​បាន​​​មាន​​​ប្រសាសន៍ថា មន្ត្រី​​​ម្នាក់​​​ក្នុង​​​ចំណោម​​​មន្ត្រី​​​ទាំង​​​នោះ​​​ត្រូវ​​​បាន​​​ចាប់​​​ខ្លួន ហើយ​​​មន្ត្រី​​​ប្រាំពីរ​​​នាក់​​​ទៀត​​​មក​​​ពីសហជីព​​​ផ្សេង​​​ទៀត​។

ដោយ​​​ពន្យល់​​​ថា​​​ម៉ូតូ​​​​​​របស់​​​មន្ត្រី​​​សហជីព​​​ត្រូវ​​​បាន​​​រឹប​​​អូសនោះ ​​​លោក​​​បាន​​​មាន​​​ប្រសាសន៍​​​ថា “យើង​​​គិត​​​ថា ការ​​​ឃុំ​​​ខ្លួនពួកគាត់​​​​ធ្វើ​​​ឡើង​​​ដោយ​​​គ្មាន​​​មូល​​​ហេតុ​​​ត្រឹម​​​ត្រូវ​​​ឡើយ​​​…។ នគរ​​​បាល​​​បាន​​រឹបអូស​​​​ទ្រព្យ​​​សម្បត្តិ​​​របស់​​​ពួក​​​គាត់ទៀត​​​​” ។

ហីុង សុខុម អាយុ​​​២៣​​​ឆ្នាំ​​​ជា​​​អ្នក​​​តវ៉ា​​​ម្នាក់​​​ក្នុង​​​ចំណោម​​​អ្នក​​​តវ៉ា​​​ទាំង​​​នោះ​​​បាន​​​និយាយ​​​ថា ពួក​​​គាត់​​​​បាន​​​ព្យាយាម​​​ចូល​តវ៉ា​​​​​​​​​ក្នុង​​​បរិវេណ​​​រោង​​​ចក្រ​​​នៅ​​​ម៉ោង​​​ប្រហែល​​​២​​​រសៀល​​​ ប៉ុន្តែត្រូវ​​​បាន​​​សន្តិសុខ​​​រារាំង​​​។

គាត់​បាន​​​និយាយ​​​ថា “កម្មករ​​​មួយ​​​ចំនួន​​​ចង់​​​ចូល​​​ទៅ​​​ក្នុង​​​រោង​​​ចក្រ​​​។ ប៉ុន្តែ ពួក​​​គាត់​មិន​​​អាច​​​ចូល​​​បាន​​​ឡើយ​​​ ពីព្រោះ​​​សន្តិសុខ​​​បាន​​​រារាំង​​​ពួក​​​គាត់​ និង​​​បាន​​​​​​វាយ​​ពួកគាត់​ទៀត​​​​​”។

ហ៊ីង សុខុម បាន​​​និយាយ​​​ថា នគរបាល​​​ប្រហែល​​​៤០​​​នាក់​​​បាន​​​មក​​​ដល់​​​កន្លែង​​​កើត​​​ហេតុ​​​នៅ​​​ម៉ោង​​​ប្រហែល​​​៣រសៀល​​​ ហើយ​​​បាន​​​ចាប់​​​​​​ខ្លួនមនុស្ស​តែ​​​ម្តង​​​។

គេ​​​មិន​​​អាច​​​ទាក់​​​ទង​​​​លោក ឯក មានិត​​​ រដ្ឋបាល​​​នៅ​​​រោង​​​ចក្រ Kuantech បាន​​​ទេ​​​”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស