ឯកសារលែងជាសម្ងាត់ដែលចេញកាលពីថ្ងៃច័ន្ទបង្ហាញឲ្យឃើញថា សហចៅក្រមស៊ើបអង្កេតនៅសាលាក្តីខ្មែរក្រហមបានបន្ទោសចំពោះការខកខានរបស់ប៉ូលិសយុត្តិធម៌មិនអនុវត្តដីកាចាប់ខ្លួនជនសង្ស័យ មាស មុត និង អុឹម ចែម ដោយសារតែសេចក្តីសម្រេចដ៏ចម្រូងចម្រាសក្នុងការចោទពួកគេទាំងពីរកំបាំងមុខ។
អតីតមន្ត្រីខ្មែរក្រហមពីរនាក់ត្រូវបានចោទពីបទឧក្រិដ្ឋកម្មប្រឆាំងមនុស្សជាតិកាលពីខែមីនា។ ការខកខានរបស់រដ្ឋាភិបាល និងអង្គការសហប្រជាជាតិ មិនចាប់ខ្លួនអ្នកទាំងពីរ ដែលបង្ខំសហចៅក្រមស៊ើបអង្កេតអន្តរជាតិ លោក ម៉ាក ហាម៉ុន (Mark Harmon) ឲ្យធ្វើការចោទប្រកាន់កំបាំងមុខ បានទទួលរងការរិះគន់ខ្លាំងពីក្រុមសិទ្ធិមនុស្ស។
ក្នុងលិខិតថ្ងៃទី៣០ខែមករាផ្ញើជូនលោក ឯម សំអាន រដ្ឋលេខាធិការក្រសួងមហាផ្ទៃ ដែលជាប្រធានគណៈកម្មការសន្តិសុខសាលាក្តី លោក ហាម៉ុន និយាយថា លោកបានចោទជនសង្ស័យដោយកំបាំងមុខ ពីព្រោះអាជ្ញាធរមិនបានអនុវត្តដីកាចាប់ខ្លួន ដែលចេញចំពោះអតីតមេស្រុកខ្មែរក្រហម អុឹម ចែម និងអតីតមេបញ្ជាការកងទ័ពជើងទឹករបបខ្មែរក្រហម មាស មុត កាលពីខែសីហានិងខែធ្នូ ជាបន្តបន្ទាប់។
លោក ហាម៉ុន បាននិយាយក្នុងលិខិតនោះថា “ខ្ញុំបានធ្វើសេចក្តីសម្រេចនេះទាំងស្ទាក់ស្ទើរ ប៉ុន្តែមានអារម្មណ៍ថា ខ្ញុំគ្មានជម្រើសផ្សេងទេ”។
និយាយដល់សាលាក្តីតាមឈ្មោះផ្លូវការរបស់សាលាក្តីនេះ លោកនិយាយថា ” ខ្ញុំមើលឃើញជាមុនថា ការចាត់វិធានការនេះនឹងនាំឲ្យមានការចាប់អារម្មណ៍ច្រើនជាសាធារណៈ ចំពោះការខកខានរបស់ប៉ូលិសយុត្តិធម៌មិនបំពេញការទទួលខុសត្រូវរបស់ខ្លួនតាមលក្ខខណ្ឌនៃកិច្ចព្រមព្រៀង យ៉ាងណាក៏ដោយ ការពន្យារពេលនេះបង្កើតហានិភ័យមិនអាចទទួលយកបានចំពោះសិទ្ធិជនសង្ស័យនិងជនរងគ្រោះ ហើយនឹងធ្វើឲ្យកើតមានការមិនគោរពទាំងនីតិវិធីច្បាប់ ទាំងអង្គជំនុំជម្រះវិសាមញ្ញក្នុងតុលាការកម្ពុជា”។
លោក ហាម៉ុន ថ្លែងថា លោកបានជួបជាមួយ លោក ឡោ សុឡេង មន្ត្រីសម្ពន្ធការនគរបាលយុត្តិធម៌ នៅខែតុលា ពិភាក្សាអំពីដីកាចាប់ខ្លួន អុឹម ចែម។ ឧត្តមសេនីយ៍ ឡោ សុឡេង បានស្នើ “កម្មវិធីផ្សាព្វផ្សាយសហគមន៍” នៅតំបន់នានាជុំវិញផ្ទះរបស់ អុឹម ចែម ជាលក្ខខណ្ឌសម្រាប់ការចាប់ខ្លួនអ្នកស្រី និងតំបន់ជំុវិញនៅជិតផ្ទះរបស់ មាស មុត ក្នុងស្រុកសំឡូត ខេត្តបាត់ដំបង។
លោក ហាម៉ុន និយាយក្នុងលិខិតនោះថា “ចាប់តាំងពីកម្មវិធីផ្សាព្វផ្សាយសហគមន៍ បានបញ្ចប់រួចរាល់ រយៈពេលជាងពីរខែបានកន្លងផុត ហើយគ្មានដីកាចាប់ខ្លួនណាមួយត្រូវបានគេអនុវត្តទេ”។
លោកបន្ថែមថា ការពន្យារពេលបន្តទៀតអាចប៉ះពាល់ដល់សិទ្ធិរបស់ “ពលរដ្ឋខ្មែរក្នុងការទទួលបានយុត្តិធម៌ ពីឧក្រិដ្ឋកម្មដែលបានប្រព្រឹត្តនៅក្នុងរបបកម្ពុជាប្រជាធិបតេយ្យ”។
លោក សំអាន និងអ្នកនាំពាក្យក្រសួងមហាផ្ទៃ មិនអាចទាក់ទងសុំការអត្ថាធិប្បាយបានទេ៕ និត (រាយការណ៍បន្ថែមដោយ ឃួន ណារីម)