38.8 C
Phnom Penh

នាយក​​​ដ្ឋាន​​​អន្តោ​​​ប្រវេសន៍​​​អំពាវ​​​នាវ​​​សុំ​​​ជំនួយ​​​​​​​​​ក្នុង​​​ការ​​​គ្រប់​​​គ្រង​​​ជន​​​អន្តោប្រវេសន៍​​​ខុស​​​ច្បាប់​​​

ដោយ ឌឹ ខេមបូឌា ដេលី

បទវិភាគ

cam-photo-front-channa1-800x533

កាល​​​ពី​​​ម្សិលមិញ ប្រធាន​​​នាយក​​ដ្ឋាន​​​អន្តោប្រវេសន៍​​​នៃ​​​ក្រសួង​​​​​​មហាផ្ទៃ​បាន​​​អំពាវ​​​នាវ​​​ឲ្យ​​​អភិបាលនិង​​​ស្នង​​​ការ​​​នគរ​​​បាល​​​ខេត្ត​​​ជួយ​​​គ្រប់​​​គ្រង​​​ជន​​​អន្តោប្រវេសន៍​​​ខុស​​​ច្បាប់​​​ ខណៈ​​​ចំនួន​​​នៃ​​​ជន​​​អន្តោប្រវេសន៍​​​ជនជាតិ​​​វៀតណាម​​​បាន​​​កើន​​​ឡើង​​​ទ្វេ​​​ដង​​​ក្នុង​​​រយៈ​​​ពេល​​​ប្រាំ​​​ឆ្នាំ​​​កន្លង​​​មក​​​នេះ​​​។

ពេល​​​ថ្លែង​​​នៅ​​​ឯកិច្ច​​​ប្រជុំ​​​ពាក់​​​ព័ន្ធ​​​នឹង​​​បញ្ហា​​​អន្តោប្រវេសន៍​​​នៅ​​​ក្រសួង​​​មហាផ្ទៃ​​​​​​​​​​​​​​ លោក សុខ ផល អគ្គនាយក​​​នៃ​​​អគ្គនាយក​​​ដ្ឋាន​​​អន្តោប្រវេសន៍​​​បាន​​​​​​លើក​​​ឡើង​​​ថា ចំនួន​​​នៃ​​​ជន​​​អន្តោប្រវេសន៍​​​ជន​​​ជាតិ​​​វៀតណាម​​​នៅ​​​កម្ពុជា​​​បាន​​​កើន​​​ឡើង​​​គួរ​​​ឲ្យកត់​​​សម្គាល់​​​ចាប់​​​តាំង​​​ពីឆ្នាំ​​​២០០៩​​​មក​​​។

ឧត្តម​​​សេនីយ៍​​​ សុខ ផល បាន​​​មាន​​​ប្រសាសន៍​​​ថា “ជំរឿន​​​លើ​​​ជន​​​ជាតិ​​​វៀតណាម​​​ចាប់​​​ពី​​​ឆ្នាំ​​​២០០២​​​រហូត​​​ដល់​​​ឆ្នាំ​​​២០០៩​​​បាន​​​រក​​​ឃើញ​​​ថា មាន​​​[ជន​​​អន្តោប្រវេសន៍] ជន​​​ជាតិ​​​វៀតណាម​​​ចំនួន​​​៧០.០០០នាក់​​​ រស់​​​នៅ​​​កម្ពុជា​​​។ [ជំរឿន] ចាប់​​​ពី​​​ឆ្នាំ​​​២០១០​​​ដល់​​​ឆ្នាំ​​​២០១៤​​​​​​បាន​​​រក​​​ឃើញ​​​ជាង​​​១៦០.០០០នាក់​​​”។

ឧត្តម​​​សេនីយ៍ សុខ ផល បាន​​​លើក​​​ឡើង​​​ទៀត​​​ថា កាល​​​ពី​​​ឆ្នាំ​​​២០១៤​​​ នាយកដ្ឋាន​​​អន្តោប្រវេសន៍​​​ដែល​​​ត្រូវ​​​បាន​​​បង្កើត​​​ឡើង​​​កាល​​​ពី​​​ខែ​​​មករា​​​ឆ្នាំ​​​មុន បន្ទាប់​​​ពី​​​ត្រូវ​​​បាន​​​កាត់​​​ចេញ​​​ពី​​​នគរ​​​បាល​​​ជាតិ​​​​​​បាន​​​រក​​​ឃើញ​​​ជន​​​ជាតិ​​​វៀតណាម​​​​​​ចំនួន​​​១.៨០០នាក់​​​ដែល​​​គ្មាន​​​ឯកសារ​​​ត្រឹម​​​ត្រូវ​​​។

លោក​​​បាន​​​​​​បន្ថែម​​​ថា នៅ​​​ក្នុង​​​ឆ្នាំ​​​ដដែល​​​នោះ​​​នាយក​​​ដ្ឋាន​​​នេះ​​​បាន​​​និរទេស​​​ជន​​​អន្តោ​ប្រវេសន៍​​ខុស​ច្បាប់​ចំនួន​​១.៥០០នាក់​ដែលភាគ​ច្រើន​ជា​ជន​ជាតិ​វៀតណាម​ ហើយ​មាន​​​ជន​​​អន្តោប្រវេសន៍​បន្ថែម​ទៀត​ត្រូវ​បាន​និរទេស​នៅ​ក្នុង​ឆ្នាំ​នេះ​។

លោក​បាន​មាន​ប្រសាសន៍​ថា “នៅ​ក្នុង​រយៈ​​​ពេល​​​ប្រាំ​​​មួយ​​​ខែ​​​ដំបូង​​​ក្នុង​​​ឆ្នាំ​​​២០១៥ យើង​​​បាន​​​និរទេស​​​ជន​​​អន្តោប្រវេសន៍​​​ខុស​​​ច្បាប់​​​ចំនួន​​​១.២០០នាក់​​​ក្នុង​​​នោះ​​​៩៨​​​ភាគ​​​រយ​​​ជា​​​ជន​​​ជាតិ​​​វៀតណាម”។

អំឡុង​​​កិច្ច​​​ប្រជុំ​​​នៅឯក្រសួង​​​មហាផ្ទៃ ឧត្តមសេនីយ៍ សុខ ផល បាន​​​លើក​​​ឡើង​​​ថា នាយក​​​ដ្ឋាន​​​របស់​​​លោក​​​ត្រូវ​​​ការ​​​ជំនួយ​​​ក្នុង​​​ការ​​​គ្រប់​​​គ្រង​​​ជន​​​អន្តោប្រវេសន៍​ខុស​ច្បាប់​ជា​ពិសេស​ជន​ជាតិ​វៀតណាម​។

លោក​បាន​មាន​ប្រសាសន៍​ថា “សូម​ អភិបាល​និង​ស្នង​ការ​នគរ​បាល​​ខេត្ត​ទាំងអស់​នៅ​ទូទាំង​ប្រទេស​ជួយ​ត្រួត​ពិនិត្យ​ជន​​​អន្តោប្រវេសន៍​​ដែល​ធ្វើ​ការ​នៅ​ក្នុង​ប្រទេស ​ទាំង​ស្រប​ច្បាប់​ និង​ខុស​ច្បាប់​។ យើង​ចង់​ធានា​ឲ្យ​​​បាន​​​នូវ​​​ច្បាប់​អន្តោប្រវេសន៍​នៅ​ក្នុង​ប្រទេស​របស់​យើង​”។

ឧត្តម​សេនីយ៍ សុខ ផល បាន​បន្ថែម​ទៀត​ថា ​មាន​តែ​ជន​ជាតិ​វៀតណាម​ប្រហែល​២០​ទៅ​៣០​ភាគ​រយ​ប៉ុណ្ណោះ​ដែល​ឆ្លង​កាត់​តាម​រយៈ​​​ច្រក​​​ព្រំដែន​​​អន្តរជាតិ​​​ផ្លូវ​​​ការ​​​ ប៉ុន្តែ លោក​​​មិន​​​បាន​​​ប្រាប់​​​ឲ្យ​​​ដឹង​​​ថា តើ​​​អ្នក​​​ផ្សេង​​​ៗ​​​ទៀត​​​ចូល​​​មក​​​ក្នុង​​​ប្រទេស​​​តាម​​​របៀប​​​ណា​​​ឡើយ​​​។cam-photo-immigrants-channa

លោក​​​បាន​​​មាន​​​ប្រសាសន៍​​​ថា “ជន​​​អន្តោប្រវេសន៍​​​ជា​​​ច្រើន​​​ទាំង​​​នេះ​​​ដែល​​​ធ្វើ​​​ការ​​​នៅ​​​ក្នុង​​​​​​ប្រទេស​​​កម្ពុជា​​​​​​គ្មាន​​​ឯកសារ​​​ឡើយ​​​ ជា​​​ពិសេស​​​នៅ​​​តាម​​​រោង​​​ចក្រ​​​”។

​​​លោក ផាត សារ៉ាត់​​​ ប្រធាន​​​ច្រក​​​ព្រំដែន​​​អន្តរ​​​ជាតិ​​​បាវិត​​​នៅក្នុង​​​ខេត្ត​​​ស្វាយ​​​រៀង​​​ដែល​​​ជា​​​ច្រក​​​ព្រំដែន​​​ផ្លូវ​​​ការ​​​ធំបំផុត​​​ជាប់​​​ព្រំដែន​​​ប្រទេស​​​វៀតណាម​​​នោះ​​​​​​​​​​​​បាន​​​លើក​​​​​​ឡើង​​​ថា ជន​​​ជាតិ​​​វៀតណាម​​​ជា​​​ច្រើន​​​បាន​​​ឆ្លង​​​កាត់​​​តាម​​​ច្រក​​​ព្រំដែន​​​នេះ​​​ ប៉ុន្តែ ភាគ​​​ច្រើន​​​ជា​​​ភ្ញៀវ​​​ទេសចរ​​​។

លោក​​​បាន​​​មាន​​​ប្រសាសន៍​​​ថា “ជន​​​អន្តោ​​​ប្រវេសន៍ជន​ជាតិ​វៀតណាម​ភាគ​ច្រើន​មិន​​មក​​ឆ្លង​កាត់​តាម​ច្រក​​ព្រំដែន​អន្តរ​ជាតិ​យើង​ឡើយ​។ ពួក​គេ​ឆ្លង​កាត់​តាម​ច្រក​របៀង​ព្រំដែន​”។

ច្រក​របៀង​ព្រំដែន​មួយ​ចំនួន​នៅ​កម្ពុជា​​អាច​ត្រូវ​បាន​ប្រើ​ប្រាស់​ជា​ផ្លូវ​ការ​ដោយ​នគរ​បាល​ និង​យោធា​​​តែ​​​​ប៉ុណ្ណោះ​ ប៉ុន្តែ អ្នក​ភូមិ​មូល​ដ្ឋាន​ និង​ពល​ករ​ចំណាក​ស្រុក​​ជា​​​រើយ​​​ៗ​​​តែ​ង​តែ​ត្រូវ​បាន​អនុញ្ញាត​ឲ្យ​ឆ្លង​កាត់​។

លោក ហ៊ូ សាគុណ ប្រធាន​នាយក​ដ្ឋាន​កណ្តាល​នគរ​បាល​ព្រំដែន​នៃ​ក្រសួង​មហាផ្ទៃ​​បាន​លើក​ឡើង​ថា លោក​ត្រូវ​បាន​ថ្នាក់​លើ​បញ្ជា​ឲ្យ​បង្ក្រាប​តាម​ច្រក​របៀង​ទាំង​នេះ​។

លោក​បាន​មាន​ប្រសាសន៍​ថា “ប៉ុន្តែ​ វា​​​លំបាក​ក្នុង​ការ​បញ្ឈប់​ក្រុម​តូច​ៗ​ដែល​ព្យាយាម​ឆ្លង​កាត់​តាម​ច្រក​របៀង​”។ លោក​បាន​បន្ថែម​ថា នាយកដ្ឋាន​របស់​លោក​​បាន​ល្បាត​តាម​ច្រក​របៀង​ទាំង​នេះ​ ប៉ុន្តែ ពំុ​មាន​លទ្ធភាព​ឃ្លាំ​មើល​ពួកគេ​ជាប់​លាប់​រហូត​​​នោះ​ឡើយ​។

លោក​បាន​មាន​ប្រសាសន៍​ថា “សម្រាប់​រយៈ​​​ពេល​​​ប្រាំ​​​មួយ​​​នៃ​​​រដូវ​​​វស្សា​​​ យើង​​​គ្មាន​​​លទ្ធភាព​​​ឡើយ​​​”។

កាល​​​ពី​​​ខែ​​​សីហា​​​ឆ្នាំមុន នាយកដ្ឋាន​​​អន្តោប្រវេសន៍​​​បាន​​​ប្រកាស​​​​​​ឲ្យ​​​មាន​​​ការ​​​ធ្វើ​​​ជំរឿន​​​​​ថ្មី​​​លើ​​​ជន​​​អន្តោប្រវេសន៍​​​ និង​​​ជំរុញ​​​ឲ្យ​​​មាន​​​ការ​​​អនុវត្ត​​​ច្បាប់​​​យ៉ាង​​​តឹង​​​រឹុង​​​ ដោយ​​​តម្រូវ​​​ឲ្យជន​​​បរទេស​​​ត្រូវ​​​មាន​​​ប័ណ្ណ​​​ការ​​​ងារ​​​។

កាល​​​ពី​​​ខែ​​​ឧសភា​​​ ឧត្តម​​​សេនីយ៍ទោ អ៊ុក ហៃសិលា ប្រធាន​​​​​​នាយកដ្ឋាន​​​ផ្នែក​​​ស៊ើប​​​អង្កេត​​​ និង​​​អនុវត្តន៍​​​នីតិវិធីនៃ​​​អគ្គនាយក​​​ដ្ឋាន​​​អន្តោប្រវេសន៍នៅ​​ក្រសួង​មហាផ្ទៃ​បាន​លើក​ឡើង​ថា ជន​បរទេស​ចំនួន​​១.៨៧៣​នាក់​មក​ពី​ប្រទេស​ចំនួន​៣៦​ត្រូវ​បាន​និរទេស​ចាប់​តាំង​ពី​ការ​ធ្វើ​ជំរឿន​បាន​​​ចាប់​ផ្តើម​​មក​។

កាល​ពី​ម្សិលមិញ​ឧត្តម​សេនីយ៍ទោ​​​រូប​​​នេះ​​​បាន​លើក​ឡើង​ថា នាយក​ដ្ឋាន​របស់​លោក​មិន​មែន​ផ្តោត​តែ​ទៅ​លើ​ជន​ជាតិ​វៀតណាម​នោះ​ឡើយ​។

លោក​បាន​មាន​ប្រសាសន៍​ថា “នៅ​ពេល​យើង​បន្ត​ប្រតិបត្តិការ​ យើង​ឃើញ​មាន​ជន​ជាតិ​វៀតណាម​ជា​ច្រើន​ ព្រោះ​ពួកគេ​នៅជា​ក្រុម​ៗ​។ ប៉ុន្តែ យើង​ផ្តោត​លើ​ជន​បរទេស​ទាំង​អស់​”៕ស៊ុយឈាង (រាយការណ៍​​​បន្ថែម​​​ដោយ Chris Mueller)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស