យោងតាមរបាយការណ៍ថ្មីរបស់អង្គការសហប្រជាជាតិបានឲ្យដឹងថា អត្រាបន្ទោរបង់ពាសវាលពាសកាលនៅកម្ពុជាបានថយចុះ៤២ភាគរយចាប់តាំងពីឆ្នាំ១៩៩០មក ប៉ុន្តែ ការទទួលបានអនាម័យដ៏ប្រសើររបស់អ្នកក្រីក្ររស់នៅក្នុងតំបន់ក្រុងនៅតែមានកម្រិតនៅឡើយ។
របាយការណ៍មានចំណងជើងថា “ការរីកចម្រើនផ្នែកអនាម័យ និងទឹកស្អាត” ដែលចេញដោយអង្គការ Unicef និងអង្គការសុខភាពពិភពលោកកាលពីម្សិលមិញ បានដាក់ចំណាត់ថ្នាក់ប្រទេសកម្ពុជាក្នុងលំដាប់ទី៣នៅក្នុងបញ្ជីនៃប្រទេសដែលបានកាត់បន្ថយអត្រាបន្ទោរបង់ពាសវាលពាសកាលយ៉ាងតិច២៥ភាគរយ។
យោងតាមរបាយការណ៍នេះបានឲ្យដឹងទៀតថា អត្រាបន្ទោរបង់ពាសវាលពាសកាលនៅកម្ពុជាក្នុងពេលបច្ចុប្បន្ន គឺបានថយចុះមកនៅត្រឹម៤៧ភាគរយ ពោលគឺបានថយចុះពី៨៩ភាគរយក្នុងរយៈពេល១៥ឆ្នាំកន្លងមកនេះ ។ ហើយអត្រាបន្ទោរបង់ពាសវាលពាសកាលក្នុងតំបន់ក្រុងនៅកម្ពុជាបានថយចុះមកដល់សូន្យភាគរយក្នុងពេលបច្ចុប្បន្ន បើធៀបទៅនឹងឆ្នាំ១៩៩០ដែលមាន៦៥ភាគរយនោះ រីឯនៅតាមទីជនបទវិញឥឡូវនេះធ្លាក់មកនៅត្រឹម៦០ភាគរយពោលគឺបានថយចុះពី៩៤ភាគរយ។
ទោះបីជា មានការរីកចម្រើនបែបនេះក្តី តែរបាយការណ៍នេះបានបង្ហាញឲ្យឃើញពីគម្លាតយ៉ាងឆ្ងាយរវាងអ្នកមាន និងអ្នកក្រីក្រនៅកម្ពុជាដោយអ្នកក្រីក្រនៅតំបន់ក្រុងដែលទទួលអនាម័យដ៏ប្រសើរមានត្រឹមតែ៣៦ភាគរយប៉ុណ្ណោះនៅក្នុងឆ្នាំ២០១២ បើធៀបនឹងអ្នកមានទ្រព្យសម្បត្តិធូរធារវិញ គឺទទួលបាន១០០ភាគរយ។
យោងតាមរបាយការណ៍នេះបានឲ្យដឹងបន្តទៀតថា ប្រទេសជិតខាងកម្ពុជា គឺមានភាពប្រសើរជាងឆ្ងាយណាស់។ ប្រទេសថៃបានលប់បំបាត់ភាពមិនស្មើភាពគ្នាក្នុងការទទួលបានអនាម័យដ៏ប្រសើរនៅក្នុងតំបន់ក្រុងបានទាំងស្រុង រីឯនៅក្នុងប្រទេសវៀតណាម និងប្រទេសឡាវវិញ អ្នកក្រីក្រនៅក្នុងតំបន់ក្រុងដែលទទួលបានអនាម័យដ៏ល្អប្រសើរគឺមាន៦៣ភាគរយ និង៥៦ភាគរយ៕ស៊ុយឈាង