31.8 C
Phnom Penh

លោក ហ៊ុន សែន ជំរុញ​ឲ្យ​ប្រជាពល​រដ្ឋ និង​និវត្តន៍ជន​ចិញ្ចឹម​ត្រី​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ លោក​នាយក​រដ្ឋមន្ត្រី ហ៊ុន សែន បាន​​​​​​​ចូល​រួម​​ប្រារព្ធ​ទិវា​មច្ឆជាតិ​ ដោយ​ជំរុញ​ឲ្យ​​ជន​រួម​ជាតិ​​​ចិញ្ចឹម​ត្រី​​ឲ្យ​បាន​កាន់​តែ​ច្រើន​ដើម្បី​បំពេញ​​បន្ថែម​ពី​​លើ​​បរិមាណ​​ត្រី​ធម្មជាតិ​​​ដែល​កំពុង​ធ្លាក់​ចុះ​ ហើយ​លោក​ថែម​ទាំង​បាន​ស្នើ​ឲ្យ​ម្ចាស់​​​រណ្ដៅ​ដី​ប្រែក្លាយ​រណ្ដៅ​​ទាំង​នោះ​ទៅ​ជា​កសិដ្ឋាន​ចិញ្ចឹម​ត្រី​ទៀត​ផង​។

លោក​បាន​មាន​ប្រសាសន៍​ថា “​បើ​យើង​​​ពឹង​ផ្អែក​​តែ​ទៅ​លើ​​ផល​​ត្រី​ដែល​មាន​នៅ​តាម​​ទន្លេ​សាប​ ទន្លេ​មេគង្គ ទន្លេ​បាសាក់ ទន្លេ​បឹង​បួ​ដទៃ​ទៀត​ដែល​ជា​ទន្លេ​ធម្មជាតិ​​នោះ វា​មិន​គ្រប់​គ្រាន់​ទេ​ អីចឹង​ទាម​ទារ​ឲ្យ​​យើង​ចិញ្ចឹម​ត្រី​បន្ថែម​ទៀត​”។

លោក​បាន​ថ្លែង​បែប​នេះ​​ក្នុង​ពិធី​​លែង​កូន​ត្រី​ប្រហែល​១លាន​ក្បាល​ចូល​ទៅ​ក្នុង​អាង​ទឹក​ខ្នាច ក្នុង​ខេត្ត​កំពង់​ចាម​។ លោក​មាន​ប្រសាសន៍​​ថា ​បរិមាណ​​ត្រី​ចិញ្ចឹម​បាន​កើនឡើង​លើស​​ទ្វេដង​​កាលពី​ឆ្នាំ​មុនរហូត​​ដល់ ​៣០០.០០០ ​តោន​ ប៉ុន្តែ​​​លោក​​បាន​គូស​បញ្ជាក់​​ថា ប្រទេស​កម្ពុជា​ អាច​ចិញ្ចឹម​​ត្រី​បាន​ច្រើន​​ជាង​នេះ​ទៅ​ទៀត​​ ដោយ​លើក​​យក​ប្រទេស​វៀតណាម ​មក​ធ្វើ​ជា​ឧទាហរណ៍។

លោក​​​​​បាន​​មាន​ប្រសាសន៍​ថា “​ឯក​ឧត្ដម​​នាយក​រដ្ឋមន្ត្រី​វៀតណាម​​ ង្វៀន តាន់​យុង បាន​ប្រាប់​ខ្ញុំ​ថា ​គ្រាន់​តែ​​ត្រី​ឡាបយ៉ា​ដែល​វៀតណាម​ចិញ្ច្ឹម​ ក្នុង​មួយ​ឆ្នាំ​នាំ​ចេញ​បាន​ជាង​​ ២.០០០​លាន​ដុល្លារ​សហរដ្ឋអាមេរិក។ វៀតណាម​គ្មាន​បឹង​បួច្រើន​ដូច​នៅ​កម្ពុជា​ទេ​ អត់​មាន​ទន្លេ​សាប​ទេ ក៏​ប៉ុន្តែ​គេ​​មាន​បច្ចេកវិទ្យា​ដើម្បី​ចិញ្ចឹម​ត្រី ហើយ​បាន​នាំចេញ​ត្រី​ថែម​ទៀត​ផង”។

លោក​​បាន​បញ្ជាក់​​ថា បច្ចុប្បន្ន​មាន​​ប្រជាពលរដ្ឋ​ប្រមាណ​៦៥.០០០​គ្រួសារ​ដែល​ចិញ្ចឹម​ត្រី​នៅ​ទូទាំង​ប្រទេស​ ហើយ​ក្នុង​នោះ​ក៏​មាន​រូប​លោក​ដែរ​។ លោក​​មាន​​ប្រសាសន៍​ថា “​សូម្បី​តែ​ខ្ញុំ ​គឺ​ចិញ្ចឹម​ត្រី​ដែរ​។ ឥឡូវ​សួរ​ថា ​បន្ទាប់ពី​លោកឯង​ចូល​និវត្ត​​ទៅ ​រក​ស៊ីអី? ចិញ្ចឹម​ត្រី​”។

លោក​នាយក​រដ្ឋមន្ត្រី​ថែម​​ទាំង​បាន​ជំរុញ​ឲ្យ​អ្នក​ដែល​មាន​រណ្ដៅ​ដី ប្រែក្លាយ​រណ្ដៅ​ទាំង​នោះ​​​ឲ្យ​មាន​ប្រ​យោជន៍​​ទៀត​ផង​។សំដៅ​ដល់​ហេតុការណ៍​គ្រោះ​ថា្នាក់​​​ធ្លាក់​ឧទ្ធម្ភាគ​ចក្រ​មួយ​នៅ​ជាយ​រាជធានី​ភ្នំពេញ ដែល​បាន​ផ្តាច់​ជីវិត​​​មន្ត្រី​​យោធា​​ចំនួន​បួន​​រូប លោក​បាន​​ថ្លែង​ថា ​
“​នៅ​​ក្បែរ​ទីក្រុង​​ភ្នំពេញ​ និង​ទីរួម​​ខេត្ត​មួយ​ចំនួន​ មាន​​ការ​ជីក​ដី​ អាជីក​ដី​នោះ ​ជីក​រួច​ហើយ​​ហាក់​ដូច​ជា​ទុក​​ចោល​អារណ្ដៅ​ហ្នឹង​។ មាន​ពេល​មួយ​ឧទ្ធម្ភាគចក្រ​ហោះ​ទៅ​​ធ្លាក់​ក្នុង​រណ្ដៅ​មួយ​​​​។ បើ​​សិន​ជា​ម្ចាស់​ដី​​ គាត់​ប្រែក្លាយ​​អាហ្នឹង​​ឲ្យ​​​ទៅ​ជា​កន្លែង​ចិញ្ចឹម​ត្រី​តែ​ម្ដង​ វា​មិន​ចំណេញ​ជាង​ ព្រោះ​​គាត់​មិន​អាច​ធ្វើ​អី​បាន​ទៀត​ទេ​​”។

លោក ឱម សាវ៉ាត ប្រធាន​អង្គការ​សម្ព័ន្ធ​ភាព​​​​ដើម្បី​អភិរក្ស​ធនធាន​ជលផល​ ហៅ​កាត់​ថា FACT ដែល​ជា​អង្គការ​មិន​មែន​រដ្ឋាភិបាល ​បាន​លើក​ឡើង​ថា ការ​ចិញ្ចឹម​ត្រី​គឺ​ជា​ជម្រើស​ល្អ​បំផុតទី២​បន្ទាប់ពី​បរិមាណ​ត្រី​ធម្មជាតិ​ដែល​​មាន​ការ​ធ្លាក់​ចុះ ហើយ​​លោក​បាន​​បន្ទោស​ការ​ធ្លាក់​ចុះ​បរិមាណ​ត្រី​ទៅ​លើ​ការ​នេសាទ​ខុស​ច្បាប់​យ៉ាង​រាល​ដាល​ ការ​អនុវត្ត​​ច្បាប់​ធូរ​រលង់​ និង​អំពើ​ពុក​រលួយ។

លោក​បាន​​​មាន​ប្រសាសន៍​បន្ថែម​ទៀត​ថា “​យើង​បាន​មើល​ឃើញ​​ថា ចំនួន​ត្រី​ធម្មជាតិ​ធ្លាក់​ចុះ​ដោយ​សារ​ការ​នេសាទ​ខុស​ច្បាប់​ ហើយ​អាជ្ញាធរ​មិន​រឹត​បន្តឹង​​ការ​នេសាទ​។ ការ​នេសាទ​ខុស​ច្បាប់​នៅ​តែ​កើត​មាន​​ ដោយ​សារ​តែ​មន្ត្រី​​អាក្រក់​មួយ​ចំនួន​​ឃុប​ឃិត​ជាមួយ​ជន​ល្មើស​”៕ សុខុម​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស