37 C
Phnom Penh

លោក ម៉ម សូណង់ដូ ទទួលបាន​ការ​យល់ព្រម​ឲ្យដាក់​ពាក្យ​សុំបង្កើត​គណបក្ស​នយោបាយ

ដោយ ឌឹ ខេមបូឌា ដេលី

បទវិភាគ

យោង​តាម​បុគ្គលិក​ម្នាក់​បាន​ឲ្យ​ដឹង​ថា ផែន​ការ​របស់​លោក ម៉ម សូណង់ដូ ម្ចាស់​ស្ថានីយ​វិទ្យុដ៏ពេញ​និយម និង​ជា​អ្នក​រិះគន់​រដ្ឋាភិបាល​ម្នាក់ ​ក្នុង​ការ​បង្កើត​គណបក្ស​នយោបាយនោះ​​​​ជិតបាន​​សម្រេច​ហើយ​នៅ​សប្ដាហ៍​នេះ ​នៅ​ពេល​ក្រសួង​មហាផ្ទៃ​បាន​ផ្ដល់​ភ្លើង​ខៀវ​ដល់​រូប​លោក​ឲ្យ​ដាក់​ពាក្យ​សុំ។

លោក ហា៊ង រិទ្ធី ដែល​សង្ឃឹម​ថា នឹង​ក្លាយ​ជា​អនុប្រធាន​គណបក្ស​នោះ​បាន​មាន​ប្រសា​សន៍​ថា ក្រសួង​បាន​ទទួល​ស្គាល់ថា បាន​ទទួលការ​ដាក់​ពាក្យ​សុំ​របស់​លោក​ ម៉ម សូណង់ដូ ដើម្បី​បង្កើត​គណបក្ស​​សម្បុក​ឃ្មុំ​សង្គម​ប្រជាធិបតេយ្យ​ ដែល​ដាក់​ឈ្មោះ​តាម​​ស្ថានីយ​វិទ្យុ​របស់​លោក គឺ​វិទ្យុ​សម្បុក​ឃ្មុំ​ កាលពី​ថ្ងៃ​អង្គារ។

លោក​បាន​​​មាន​ប្រសាសន៍​កាលពី​ម្សិលមិញ​ថា “​ក្រសួង​មហាផ្ទៃ​បាន​យល់​ព្រម​អនុញ្ញាត​ឲ្យ​យើង​ដាក់​ពាក្យ​សុំ​បង្កើត​គណបក្ស​ហើយ ប៉ុន្តែ​យើង​ត្រូវ​ដាក់​ពាក្យ​​ដោយ​ភ្ជាប់​ជាមួយ​នូវ​ឯកសារ​ជាច្រើន​ទៀត។ ដើម្បី​​ឲ្យ​មាន​សុពលភាព គណបក្ស​សម្បុកឃ្មុំ​សង្គម​ប្រជាធិបតេយ្យ ​ត្រូវ​តែ​បំពេញ​​បែប​បទ​ និង​លក្ខខណ្ឌ​ដូច​មាន​​ចែង​នៅ​​ក្នុង​ជំពូក​ទី៥ មាត្រា២០ នៃ​ច្បាប់​ស្ដីពី​គណបក្ស​នយោបាយ”។

មាត្រា​នោះ​ចែង​ពី​លក្ខខណ្ឌ​១១​ចំណុច​ដែល​​គណបក្ស​​បង្កើត​ឡើ​ងថ្មី​ត្រូវ​ដាក់​បញ្ចូល​នៅ​​ក្នុង​ពាក្យ​សុំនោះ​​ រួម​មាន​វិធាន​ លក្ខន្តិកៈ​ និង​គោល​នយោបាយ​ ព្រមទាំង​ឈ្មោះ​ និង​ស្នាម​មេដៃ​​សមាជិក​យ៉ាង​តិច​៤.០០០​នាក់​។

លោក រិទ្ធី​ បាន​មាន​ប្រសាសន៍​ថា ពួកគេ​នឹង​គ្មាន​បញ្ហា​​ពី​រឿង​នោះ​ឡើយ ហើយ​មាន​គម្រោង​​ដាក់​ឯកសារ​សំណុំបែប​បទ​ជាមួយ​ក្រសួង​មហាផ្ទៃ​នៅ​ដំណាច់​ខែ​នេះ។

លោក​បាន​មាន​ប្រសាសន៍​ថា “​គណបក្ស​សម្បុក​ឃ្មុំ​សង្គម​ប្រជាធិបតេយ្យ មាន​ធនធាន​មនុស្ស​គ្រប់គ្រាន់ និង​មាន​ប្រជាជន​រាប់​លាន​នាក់​ទាំង​ក្នុង​ និង​ក្រៅ​ប្រទេស​”។

ជារឿយៗ បើ​ទោះ​ជា​​អ្នក​រិះគន់​ខ្លាំង​ក្លា​​ដល់​គណបក្ស​ប្រជាជន​កម្ពុជា​ក៏ដោយ ក៏​លោក​ ម៉ម សូណង់ដូ បាន​​លើក​ឡើង​ថា លោក​ចង់​បង្កើត​គណបក្ស​របស់​លោក​ផ្ទាល់​ ពីព្រោះ​គណបក្ស​សង្គ្រោះជាតិ​កាន់​តែ​មាន​​ភក្ដីភាព​ជាមួយ​រដ្ឋាភិបាល​។

ក្រុម​មន្ត្រី​នៅ​ក្រសួង​មហាផ្ទៃ​មិន​អាច​ទាក់​ទង​បាន​ទេ​កាលពី​ម្សិលមិញ។ ​ដែល​សង្ឃឹម​ថា នឹង​​ចូល​ប្រឡូក​ក្នុង​វិស័យនយោបាយ​ផង​ដែរនោះ លោក សម អុិន អតីត​ប្រធាន​អង្គការ​មិន​មែន​រដ្ឋាភិបាល​មួយ​​មាន​គម្រោងដាក់​សំណើ​ដំបូង​របស់លោក​​ក្នុងការ​ចុះ​​បញ្ជី​គណបក្ស​ប្រជាធិបតេយ្យ​​មូលដ្ឋាន​ (Grassroots Democracy Party)នៅ​ដើម​ខែក្រោយផង​ដែរ​។

លោក សម អុិន បាន​មាន​ប្រសាសន៍​ថា មហិច្ឆតា​នយោបាយ​របស់​លោក​កើត​ចេញ​ពី​ចលនា​​​ខ្មែរ​ដើម្បី​ខ្មែរ ដែល​បង្កើត​ឡើង​កាលពី​ឆ្នាំ​មុន​ដោយ​លោក កែម ឡី អ្នក​វិភាគ​នយោបាយ​ម្នាក់​ ដើម្បី​ជំរុញ​សកម្មភាព​មូលដ្ឋាន​នៅ​ទូទាំង​ប្រទេស​។

លោក​បានមាន​ប្រសាសន៍​ថា “​យើង​គោរព​លទ្ធិប្រជាធិបតេយ្យ យើង​គោរព​មតិ​ភាគច្រើន ហើយ​យើង​​មិន​ចាត់​តាំង​ថ្នាក់ដឹកនាំ​​ដូច​គណបក្ស​ដទៃ​ឡើយ”។

លោក កែម ឡី បាន​មាន​ប្រសាសន៍​ថា លោក​បាន​ផ្ដល់​គំនិត​ឲ្យ​លោក សម អុិន បង្កើត​គណបក្ស​ ប៉ុន្តែ​លោក​នឹង​មិន​​ចូលរួមពាក់ព័ន្ធ​​ទេ​ ពីព្រោះ​លោក​មិនមាន​មហិច្ឆតា​នយោបាយ​ឡើយ៕ សារុន​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស