28 C
Phnom Penh

មន្ត្រី​កងយោធពល​ខេមរភូមិន្ទ​ជាន់​ខ្ពស់​​មិន​ដឹង​ពី​ការ​ប្រឈម​មុខ​ដាក់គ្នា​ក្នុង​ជួរ​​ទាហាន​

ដោយ ឌឹ ខេមបូឌា ដេលី

បទវិភាគ

ពីរ​ថ្ងៃ​បន្ទាប់ពី​មេ​បញ្ជាការ​​យោធាវរៈម្នាក់​​​​ក្នុង​ខេត្ត​មណ្ឌលគិរី​បាន​ចោទ​ប្រកាន់​ទាហាន​មក​ពី​ខេត្ត​ក្រចេះ​​ពីបទ​​យក​កាំភ្លើង​​ភ្ជង់​​កូន​ចៅ​របស់​ខ្លួន ដើម្បី​រំដោះ​​អ្នក​កាប់​ឈើ​ខុស​ច្បាប់​មួយ​ក្រុម​មកពី​ប្រទេស​វៀតណាម​នោះ ក្រុម​មន្ត្រី​ជាន់​ខ្ពស់​​ពីរ​រូប​​ក្នុង​ចំណោម​មន្ត្រី​ជាន់​ខ្ពស់​ជាច្រើនក្នុង​ជួរ​ទាហាន​ ​​កាលពី​ម្សិលមិញ​បាន​លើក​ឡើង​ថា ពួកគាត់​មិន​​ដឹង​ពី​ហេតុការណ៍​នោះ​ទេ ចំណែក​​មេបញ្ជាការ​​កង​ទ័ព​ខេត្ត​ក្រចះ​បាន​កែ​ប្រែ​ការ​លើក​ឡើង​របស់​លោក​ពី​ហេតុការណ៍​​នោះ​។

យោង​តាម​លោក ថន ម៉េងស្រា៊ ​មេបញ្ជាការ​​​យោធាវរៈ​១ ​ខេត្ត​មណ្ឌលគិរី ​​បាន​ឲ្យ​ដឹង​ថា ហេតុការណ៍​នេះ​បាន​កើត​ឡើង​កាលពី​យប់​ថ្ងៃ​អង្គារ បន្ទាប់ពី​ទាហាន​របស់​លោក​បាន​ឃាត់​ខ្លួន​អ្នក​កាប់​ឈើ​ជនជាតិ​វៀតណាម​បួន​នាក់​នៅ​​ក្នុង​ស្រុក​កែវសីមា។

លោក​ ម៉េងស៊្រា បានមាន​ប្រសាសន៍កាលពីថ្ងៃពុធ​ថា នៅ​ម៉ោង​ប្រហែល​៩​និង​៣០​នាទី​យប់​ ទាហាន​មួយ​ក្រុម​មក​ពី​ខេត្ត​ក្រចេះ​​​បាន​ឡោមព័ទ្ធ​​កូនចៅ​របស់​លោក បាន​ដក​ហូត​អាវុធ​របស់​ពួកគេ​ និង​បាន​កា​រពារ​អ្នក​កាប់​ឈើ​ទាំងនោះ​​។ លោក​បាន​បន្ថែម​ថា លោក​បាន​រាយ​ការណ៍​ពី​ហេតុការណ៍​នេះ​ទៅ​ថ្នាក់​លើ​របស់​លោក​​។

លោក ណៃ តឹងឡឹង ​មេបញ្ជាការ​​​​​យោធា​ខេត្ត​ក្រចេះ​បាន​មាន​ប្រសាសន៍​កាលពី​ថ្ងៃ​ពុធថា ទាហាន​របស់​លោក​បាន​ដក​ហូត​អាវុធ​ទាំង​នោះ ពីព្រោះ​ទាហាន​​​ខេត្ត​មណ្ឌលគិរី​បាន​ដើរ​ឆ្លង​កាត់​ព្រំប្រទល់​​ខេត្ត​ ហើយ​ថា បុរស​ជនជាតិ​វៀតណាម​ដែល​លោក​ទទួល​ស្គាល់​ថា ជា​អ្នក​កាប់​ឈើ​នោះ​ ត្រូវ​បាន​ដោះ​លែង​ក្រោម​ “​ការ​ព្រមព្រៀង” ​​ជាមួយ​អាជ្ញាធរ​ក្នុង​ខេត្ត​​​ប៊ិញ​ហ្វុក​ (Binh Phuoc) ​ប្រទេស​វៀតណាម​។

នៅពេល​ត្រូវ​បាន​ទាក់​ទង​​កាលពី​ម្សិលមិញ លោក ទៀ បាញ់ រដ្ឋមន្ត្រី​​ក្រសួង​ការ​ពារ​ជាតិ​​ និង​លោក​ ឈុំ​ សុជាតិ អ្នកនាំពាក្យ​កង​យោធពល​ខេមរភូមិន្ទ​បាន​មាន​ប្រសាសន៍​ថា លោក​មិន​ដឹង​ពី​ហេតុ​ការណ៍​នោះ​​ទេ ហើយ​ក៏​មិន​ដឹង​ពី​ការ​ព្រមព្រៀង​ណាមួយ​ដែរ។

ទោះ​ជាយ៉ាង​ណា​ ក្រោយ​មក​ឧត្ដម​សេនីយ៍ ឈុំ សុជាតិ ​បាន​​​​ហៅ​អ្នក​យក​ព័ត៌មាន​ម្នាក់​មក​​​​ដោយ​និយាយ​ថា លោក​បាន​ពិនិត្យ​ជាមួយ​​មេបញ្ជា​ការ​យោធា​ខេត្ត​ក្រចេះ និង​ខេត្ត​មណ្ឌលគិរី​រួច​ហើយ ហើយ​លោក​ទាំង​ពីរ​បាន​បដិសេធ​ថា ​មិនមាន​ជនជាតិ​វៀតណាមណាម្នាក់​​​ជាប់​ពាក់​ព័ន្ធ​ក្នុង​ជម្លោះ​នោះ​ទេ។

​លោក​បានលើកឡើង​ពី​ការ​សន្ទនាជាមួយ​ឧត្ដម​សេនីយ៍​ត្រី ណៃ តឹងឡឹង ថា “រឿង​នេះ” ​គឺ​ថា ទាហាន​ពីរ​នាក់​ និង​កង​រាជអាវុធ​ហត្ថ​ម្នាក់​ប្រហែល​ជា​ស្រវឹង​ស្រា​នៅ​ពេល​បរិភោគ​អាហារ​ពេល​ល្ងាច ហើយ​បន្ទាប់​មក​ប៉ះទង្គិច​សម្ដី​គ្នា ដូច្នេះ​ពួកគេ​ក៏​បាន​រត់​ចូល​ក្នុង​តំបន់​របស់​លោក​​ ទី​ដែល​ទាហាន​ខេត្ត​ក្រចេះ​បាន​ប្រទះ​​ឃើញពួកគេ​ ដក​ហូូត​កាំភ្លើង ​​ហើយ​បញ្ជូន​ពួកគេ​ត្រឡប់​ទៅ​វិញ។

យោង​តាម​ឧត្ដម​សេនីយ៍ ឈុំ សុជាតិ បាន​ឲ្យ​ដឹង​ថា លោក ឈិត ម៉េងស្រេង មេបញ្ជា​ការ​យោធា​ខេត្ត​មណ្ឌលគិរី​ដែល​កាលពី​ថ្ងៃ​ពុធ បាន​ចោទ​ប្រកាន់​ទាហាន​ខេត្ត​ក្រចេះ​​ថា បាន​ការ​ពារ​អ្នក​កាប់​ឈើ​ជនជាតិ​វៀតណាម​នៅ​ក្នុង​ប្រទេស​កម្ពុជា​នោះ កាលពីម្សិលមិញបាន​មាន​ប្រសាសន៍​ថា ការ​ប្រឈម​មុខ​ដាក់​គ្នា​ “​មិន​ដែល​កើត​​ឡើង​ទេ”។

ឧត្ដម​សេនីយ៍ ឈុំ សុជាតិ បាន​មាន​ប្រសាសន៍​ថា “​គាត់​និយាយ​ថា មាន​​​រឿង​​តូច​តាច​​​​ជាមួយ​ប្រជា​ជន​ក្នុង​មូលដ្ឋាន ប៉ុន្តែ​ថា មិន​មាន​ជនជាតិ​វៀតណាម​​ជាប់​ពាក់​ព័ន្ធ​ទេ”។ លោក​បាន​បន្ថែម​ថា ទោះ​យ៉ាង​ណា ​លោក​នឹង​ស៊ើបអង្កេត​ករណី​នេះ​បន្ថែម​ទៀត។

ឧត្ដម​សេនីយ៍​ត្រី ណៃ តឹងឡឹង បាន​មាន​ប្រសាសន៍​ថា ការ​លើក​ឡើង​ដំបូង​របស់​លោក​ត្រូវ​បាន​អ្នក​យក​ព័ត៌មាន​ប្រឌិត។ លោក​បាន​មាន​ប្រសាសន៍​ថា “​​យើង​ឃើញ​​ទាហាន​ខ្មែរ​ពីរ​នាក់​​នៅ​ក្នុង​ទឹក​ដី​របស់​យើង ដូច្នេះ​ហើយ​យើង​ក៏​បាន​​ឃាត់​ខ្លួន​ពួកគេ​ ហើយ​ទាក់​ទង​ទៅ​ទាហាន​ខេត្ត​​មណ្ឌលគិរី​ឲ្យ​មក​យក​ពួកគេ​ត្រឡប់​ទៅ​វិញ។ មិនមាន​​ជនជាតិ​វៀតណាម​ទេ”។

ហេតុការណ៍​នេះ​បាន​កើត​ឡើង​នៅ​ក្នុង​តំបន់​ដែល​សម្បូរ​ព្រៃ​ការ​ពារ ហើយ​គេ​ឃើញ​មាន​ការ​ប៉ះ​ទង្គិច​គ្នា​មួយ​ចំនួន​រវាង​​កម្លាំង​សន្តិសុខ និង​អ្នក​កាប់​ឈើ​​ ដោយ​ក្រុម​ទាំង​ពីរ​នេះ​តែង​តែ​ជួប​គ្នា​​។

កាលពី​ខែ​ឧសភា ឆ្នាំ​២០១៤ លោក ស៊ិន វណ្ណវុធ អភិបាល​​ស្រុក​កែវសីមា ​​ត្រូវ​មន្ត្រី​កង​រាជអាវុធ​ហត្ថ​ម្នាក់​​​យក​កាំភ្លើង​ភ្ជង់​ក្បាល​របស់​លោក​ដែល​លោក​បាន​មក​ដល់​កន្លែង​​ចាប់​ឈើ​ ក្នុង​គោល​​បំណង​មក​យក​រថយន្ត​ទំនើប​មួយ​គ្រឿង​ដែល​ដឹក​ឈើ​ប្រណីត​ពេញ។

​លោក ស៊ូ ម៉ារិទ្ធ មន្ត្រី​កង​រាជអាវុធ​​បាន​​គេច​ខ្លួន​។ មិន​មាន​ព័ត៌មានពី​ការ​ចាប់​ខ្លួន​​គាត់​ទេ។

នៅ​ពេល​ត្រូវ​បាន​ទាក់​ទង​កាលពី​ម្សិលមិញ លោក ស៊ិន វណ្ណវុធ បាន​បដិសេធ​មិន​ធ្វើ​អត្ថា​ធិប្បាយ​អំពី​ស្ថានភាព​នៅ​ចំណុច​ប្រសព្វ​ជាមួយ​​ប្រទេស​វៀតណាម ខេត្ត​មណ្ឌលគិរី និង​ខេត្ត​​ក្រចេះ​ទេ​។

លោក​បាន​មាន​ប្រសាសន៍​ថា “​ប្រសិន​បើ​អ្នក​ចង់​បាន​ព័ត៌មាន​ សូមមក​ទី​នេះ ​ហើយ​មើល​ខ្លួន​ឯង​ទៅ”៕ សារុន​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស