ក្រុមមន្ត្រីបានឲ្យដឹងកាលពីម្សិលមិញថា កាលពីថ្ងៃពុធ មន្ត្រីរដ្ឋាបាលព្រៃឈើក្នុងខេត្តឧត្តរមានជ័យបានរកឃើញរោងអារឈើ និងឈើប្រណិតរាប់ពាន់ដុំនៅក្នុងតំបន់ព្រៃដាច់ស្រយាល ដែលមានតែទាហាននៅទីនោះ។ យោងតាមលោក ម៉ៅ សំណាង នាយប៉ុស្តិ៍ សង្កាត់កូនក្រៀល បានឲ្យដឹងថា រោងអារឈើនេះត្រូវបានរកឃើញនៅក្នុង សង្កាត់កូនក្រៀល ក្រុងសំរោង ចម្ងាយប្រហែល២០គីឡូម៉ែត្រពីព្រំដែនកម្ពុជា-ថៃ។
លោកបានមានប្រសាសន៍ថា “ មានតែកងយោធពលខេមរៈភូមិន្ទប៉ុណ្ណោះ ដែលអាចចូលតំបន់នោះបាន ហើយអ្នកភូមិរបស់យើងមិនដែលទៅទីនោះឡើយ ប៉ុន្តែ យើងមិនហ៊ានបន្ទោសទាហាននោះទេ”។ លោក សំណាង បានលើកឡើងថា រោងអារឈើនេះបានមានប្រតិបត្តិការប្រហែលបីខែមកហើយ ហើយជាកម្មសិទ្ធិរបស់អ្នកជំនួញម្នាក់ដែលលោកបដិសេធមិនប្រាប់ឈ្មោះ។
លោកបានបន្ថែមថា តំបន់ដែលរោងអារឈើនេះស្ថិតនៅគឺមានការយាមកាមដោយទាហានមកពីកងពលតូចលេខ៤២នៃកងពលធំលេខ៤នៃកងយោធពលខេមរភូមិន្ទ។ លោកបានមានប្រសាសន៍ថា “ ឥឡូវនេះនៅសល់តែដើមឈើតូចៗប៉ុណ្ណោះ ឈើល្អទាំងអស់បាត់បង់អស់ហើយ”។ លោក ប៉ែន វ៉ូយ មេបញ្ជាការកងពលតូចលេខ៤២មិនអាចទាក់ទងបានឡើយកាលពី ម្សិលមិញ។
លោក ចេង ដេវីដ មន្ត្រីរដ្ឋបាលព្រៃឈើជាន់ខ្ពស់មួយរូបនៅក្នុងខេត្តឧត្តរមានជ័យបានលើកឡើងថា ក្រុមការងាររបស់លោកកំពុងដឹកជញ្ជូនឈើដែលភាគច្រើនជាកំណាត់ឈើប្រភេទធ្នង់ដែលអាចលក់បានរាប់ពាន់ដុល្លារក្នុងមួយមែ៉ត្រគូបចេញពីក្នុងព្រៃ ហើយត្រឡប់ទៅទីបញ្ជាការដ្ឋានក្នុងក្រុងសំរោងវិញ។ លោកបានលើកឡើងទៀតថា នៅពេលមន្ត្រីរដ្ឋបាលព្រៃឈើបានទៅដល់កន្លែងអារឈើនោះ មនុស្សដែលកំពុងធ្វើការនៅទីនោះបានរត់ចែកជើងគ្នាចូលក្នុងព្រៃ ហើយគេមិនអាចចាប់ខ្លួនអ្នកទាំងនោះបានឡើយ។
លោក ដេវីដ បានមានប្រសាសន៍ថា “ យើងនៅមិនទាន់វាស់ឈើទាំងនោះនៅឡើយទេ ប៉ុន្តែ ឈើដែលរឹបអូសបានទាំងនេះមានរាប់ពាន់ដុំ ហើយគេក៏រឹបអូសបានរណារចំនួនបីគ្រឿងផងដែរ។ ឥឡូវនេះយើងកំពុងតែសើុបអង្កេត ដើម្បីរកឲ្យឃើញថា នរណាជាម្ចាស់រោងអារឈើនេះ ព្រោះវាស្ថិតនៅក្នុងព្រៃជ្រៅ”។
យោងតាមលោក អ៊ុំ សុភក្ត្រ អភិបាលក្រុងសំរោងបានឲ្យដឹងថា លោកអភិបាលខេត្ត ស ថាវី បានថ្លែងនៅក្នុងពិធីរុក្ខទិវាមួយនៅក្នុងក្រុងនេះកាលពីថ្ងៃពុធ ដោយលោកបានពិភាក្សាអំពីប្រតិបត្តិការចុះបិទរោងអារឈើនេះ។ លោក សុភក្ត្រ បានមានប្រសាសន៍ថា “ ប៉ុន្តែ លោកមិនបានបន្ទោសទាហានថា បានកាប់ឈើខុសច្បាប់ឡើយ លោកគ្រាន់តែមានប្រសាសន៍ថា មានឈើរាប់ពាន់ដុំត្រូវបានរឹបអូសប៉ុណ្ណោះ”៕ ស៊ុយឈាង