37 C
Phnom Penh

រដ្ឋាភិបាល​បដិសេធ​​ថា​ខ្លួន​មិន​បាន​ប្រើ​ផែនទី​ខុស​ទេ​

ដោយ ឌឹ ខេមបូឌា ដេលី

បទវិភាគ

លោក វ៉ា គីម​ហុង (ស្តាំ) ប្រធាន​គណៈកម្មាធិការ​ព្រំដែនរួម​​កម្ពុជា-វៀតណាម​ បង្ហាញ​ផែនទី​ស្តី​ពី​ព្រំដែន​កម្ពុជា​-វៀតណាម​ ដែល​គូរ​ដោយ​បារាំង​ដល់​អ្នក​យក​ព័ត៌មាន​និង​តំណាង​រាស្ត្រ​គណបក្ស​ប្រឆាំង​នៅឯ​ទីស្តីការ​គណៈរដ្ឋមន្ត្រី​ក្នុង​ក្រុង​ភ្នំពេញ។ រូបថតៈ ស៊ីវ ចាន់​ណា​/The Cambodia Daily

លោក​ វ៉ា គឹមហុង ​ប្រធាន​គណៈកម្មាធិការ​​​ព្រំដែន​​រួម​កម្ពុជា-វៀតណាម បាន​​រៀប​ចំ​​​សន្និ​សីទ​កាសែត​​​​មួយ​​កាល​ពី​​ម្សិលមិញ​​ដើម្បី​​​ឆ្លើយ​តប​​ទៅ​នឹង​ការ​អះអាង​​​របស់​គណបក្ស​ប្រឆាំង​​​ដែល​លើក​​ឡើង​ថា លោក​មិន​បញ្ចេញ​ផែន​ទី​របស់​រដ្ឋាភិបាល​​​ដែល​បង្ហាញពី​ព្រំដែន​កម្ពុជា-​វៀតណាម ដោយ​សារ​តែ​ផែន​ទី​ទាំង​នោះ​គូរ​ដោយ​វៀតណាម​ នៅ​ក្នុង​ទសវត្សរ៍​ឆ្នាំ​១៩៨០។

ក្នុង​រយៈ​ពេល​ជាង​១ខែ​មក​នេះ លោក វ៉ា គឹមហុង បាន​ច្រាន​ចោល​ការអំពាវ​នាវ​​​របស់ក្រុម​តំណាង​រាស្ត្រ​គណបក្ស​សង្គ្រោះ​ជាតិ​ ដែល​សុំឲ្យ​បញ្ចេញ​​ផែន​ទី​ច្បាប់​ចម្លង​ដែល​គណៈកម្មាធិការ​របស់​លោក​ប្រើ​ប្រាស់​ដើម្បី​កំណត់​ព្រំដែន​ បណ្តាល​ឲ្យ​មាន​​ការ​អះអាង​ថា លោក​មិន​បាន​ប្រើ​ប្រាស់​ផែនទី​ផ្លូវ​ការ​គូរ​ដោយ​បារាំង​ នៅ​ក្នុង​ឆ្នាំ​១៩៥៣ និង​ដែល​ទទួល​ស្គាល់​ដោយ​រដ្ឋធម្មនុញ្ញ​ឡើយ​​។

មុន​ពេល​លោក​បង្ហាញ​ផែន​ទី​ចាស់​គូរ​ដោយ​បារាំង​ ទៅ​ដល់​អ្នក​​មាន​វត្ត​មាន​​នៅ​​​ក្នុង​សន្និសីទ​នោះ ដែល​រួម​មាន​ទាំង​​លោក រៀល ខេមរិន្ទ្រ និង​លោក អ៊ុំ សំអាន តំណាង​រាស្ត្រ​គណបក្ស​សង្គ្រោះ​ជាតិ​ផង លោក វ៉ា គឹមហុង បាន​មាន​ប្រសាសន៍​ថា លោក​សង្ឃឹម​ថា កាយ​វិការ​នេះ​នឹង​បញ្ចប់​ការ​អះអាង​​ដែល​លើក​ឡើង​ថា រដ្ឋាភិបាល​នៅ​តែ​កំពុង​ប្រើ​ប្រាស់​ផែន​ទី​​​គូរ​អំឡុង​ការ​ត្រួត​​ត្រា​របស់​វៀតណាម ​នៅ​​ក្នុង​ទស​វត្សរ៍​​ឆ្នាំ​១៩៨០។

លោក វ៉ា គឹមហុង ​ដែល​មាន​ឋានៈ​ជា​រដ្ឋមន្ត្រី​​​ទទួល​បន្ទុក​​​កិច្ច​ការ​​​​ព្រំដែន​នៅ​ទីស្ដីការ​គណៈរដ្ឋមន្ត្រី​ផង​ដែរ​នោះ បាន​មាន​ប្រសាសន៍​ថា “​ខ្ញុំ​សូម​រំឭក​អស់​លោក​​ចំពោះ​ការ​ចោទ​ប្រកាន់​ធ្ងន់ៗ​មក​លើ​រដ្ឋាភិបាល​កម្ពុជា​ ពី​សំណាក់​ឯក​ឧត្ដម​មួយ​ចំនួន និង​សាធារណជនដែល​ចោទ​​ថា យើង​បាន​ប្រើ​ប្រាស់​ផែន​ទី​ក្លែង​ក្លាយ​ ឬ​​ផែន​ទី​ខុស​”។

លោក​បាន​លើក​ឡើង​ទៀត​ថា ​ការ​អះអាង​បែប​នេះ​គឺ​ស្មើ​នឹង​ការ​ចោទ​ប្រកាន់​ថា រដ្ឋាភិបាល​កម្ពុជា​​​ “​ក្បត់​ជាតិ​ ដោយ​សារ​តែ​​ការ​ប្រើ​ប្រាស់​ផែន​ទី​ខុស​​​សម្រាប់​កំណត់​ព្រំដែន​ បណ្តាល​​ឲ្យ​ប្រទេស​របស់​យើង​បាត់​បង់​ទឹក​ដី និង​អធិបតេយ្យ”។

លោក​បាន​បក​ស្រាយ​​ថា “​ផែន​ទី​​ដែល​បង្ហាញ​នៅ​ទីនេះ គឺ​ដើម្បី​ចៀស​វាង​កុំ​ឲ្យ​មាន​​ការ​រិះគន់​បែប​នេះ​ទៀត។ ដូច្នេះ​សូម​កុំ​យក​បញ្ហា​ព្រំដែន​​ទៅ​ធ្វើ​យុទ្ធនាការ​ដើម្បី​ទទួល​បាន​ប្រជា​ប្រិយភាព”។

ដោយ​មាន​​ជំនួយ​​ការ​ជួយ​ត្រដាង​ផែនទី​ចាស់​ៗជា​ច្រើន​​ផ្ទាំង​នៅ​លើ​កម្រាល​ព្រំ​​ខាង​មុខ​តុ​របស់​ខ្លួន​ លោក វ៉ា គឹមហុង បាន​អញ្ជើញ​​ឲ្យ​ក្រុម​អ្នក​យក​ព័ត៌មាន​ និង​តំណាង​រាស្ត្រ​គណ​បក្ស​​សង្គ្រោះ​ជាតិ​ទាំង​ពីររូប​​ពិនិត្យ​មើល​ភាព​ត្រឹម​ត្រូវ​នៃ​ផែនទី​ទាំង​នោះ ​ហើយ​​អំឡុង​ពេលនោះ​លោក​ថែម​ទាំង​បាន​ស្រែក​​​​​ប្រាប់​លោក រៀល ខេមរិន្ទ្រ កុំ​ឲ្យ​ជាន់​ផែនទី​ទាំង​នោះ​ទៀត​ផង​។

លោក​​​​​​បាន​មាន​ប្រសាសន៍​​ថា “​ផែនទីដែល​យើង​កំពុង​បង្ហាញ​នៅ​ទី​នេះ គឺ​ជា​ផែន​ទី​ភូមិ​សាស្ត្រ​​​​ឥណ្ឌូ​ចិន​ និង​​ផែនទី​២៦​​ផ្ទាំង​ទៀត​ដែល​រក​ឃើញ​នៅ​នាយកដ្ឋាន​ភូមិសាស្ត្រ​​របស់​យើង​នៅ​ទីនេះ​ នៅ​ពេល​យើង​ត្រូវ​បាន​​​រំដោះ​​ក្នុង​ឆ្នាំ​១៩៧៩​។ ផែន​ទី​ផ្សេងៗ​ទៀត​ យើង​ទទួល​បាន​ពី​នាយកដ្ឋាន​ភូមិសាស្ត្រ​បារាំង​”។

លោក វ៉ា គឹមហុង បាន​ចំណាយ​ពេល​៤ម៉ោង​បន្ទាប់​ដើម្បី​​បង្ហាញ​ច្បាប់​ចម្លង​ឌីជីថល​នៃ​ផែនទី​បារាំង​​ ដែល​បង្ហាញ​ពី​ព្រំប្រទល់​​ក្នុង​ខេត្ត​មួយ​ចំនួន​​ដូច​ជា​ខេត្ត​កណ្ដាល ព្រែវែង និង​កំពត​ជា​ដើម​ ដោយ​ពន្យល់​​បក​ស្រាយ​ថា កម្ពុជា ​និង​វៀតណាម​​ បាន​បោះ​បង្គោល​ព្រំដែន​យ៉ាង​ត្រឹម​ត្រូវ​​យោង​ទៅ​តាម​ផែន​ទី​នេះ​។

ប៉ុន្តែ​លោក អ៊ុំ​ សំអាន តំណាង​រាស្ត្រ​​មណ្ឌល​ខេត្ត​បាត់ដំបង​​ ដែលបាន​​ជួយ​ដឹកនាំ​​យុទ្ធនា​ការ​ព្រំដែន​របស់​គណបក្ស​សង្គ្រោះ​ជាតិ​ក្នុង​ពេល​ថ្មីៗ​នេះ ​បាន​ជំទាស់​ការ​អះអាង​របស់​លោក វ៉ា គឹមហុង ដែល​លើក​ឡើង​ថា បង្គោល​ព្រំដែន​ត្រូវ​បាន​បោះ​នៅ​ទីតាំង​សម​ស្រប​នៅ​​ក្នុង​ខេត្ត​កំពត។

លោក​បាន​​លើក​យក​​ការ​ធ្វើ​ដំណើរ​​​របស់តំណាង​រាស្ត្រ​គណបក្ស​សង្គ្រោះ​ជាតិចុះ​ទៅ​ពិនិត្យ​​មើល​ស្ថាន​ភាព​​ព្រំដែន​​​​នៅ​ទី​​នោះក្នុង​ពេល​ថ្មីៗ​នេះ មក​ធ្វើ​ជា​ភ័ស្តុតាងដើម្បី​បញ្ជាក់ ដោយ​បណ្ដាល​ឲ្យ​មាន​ប្រកែក​គ្នា​​តឹង​សរសៃក​​ជាមួយ​​ជំនួយ​ការ​មួយ​រូប​ក្នុង​ចំណោម​ជំនួយ​ការ​របស់​លោក វ៉ា គឹមហុង ដែល​បានលើក​ឡើង​ថា ខ្លួន​​ក៏​បាន​ចុះ​ទៅ​​ពិនិត្យមើល​តំបន់​នោះ​ដែរ​កាលពី​ពេល​ថ្មីៗ​នេះ ហើយ​​មើល​ឃើញ​​ថា បង្គោល​ព្រំដែន​ទាំង​នោះ​គឺ​ត្រឹម​ត្រូវ​។

កាលពី​ខែ​មុន ដោយ​​សារតែ​លោក វ៉ា គឹមហុង ​បដិសេធ​មិន​បញ្ចេញ​ផែន​ទី​​របស់​រដ្ឋាភិបាល គណបក្ស​សង្គ្រោះជាតិ​បាន​​​ងាក​ទៅ​សុំ​​ច្បាប់​ចម្លង​​ឌីជីថល​នៃ​ផែន​ទី​បារាំង
​ពី​វិទ្យាស្ថាន​​ជាតិ​ភូមិសាស្ត្រ (National Geographic Institute) នៅ​ក្នុង​ទីក្រុង​ប៉ារីស​។

កាល​ពី​ម្សិលមិញ​​លោក វ៉ា គឹមហុង បាន​មាន​ប្រសាសន៍​ថា លោក​​នឹង​នៅ​តែ​មិន​​ប្រគល់​​​
​ផែន​ទី​ច្បាប់​ចម្លង​​របស់​រដ្ឋាភិបាល​​ឲ្យ​ទៅ​គណបក្ស​ប្រឆាំងដដែល​ ប៉ុន្តែ​លោក​រីក​រាយ​នឹង​ពិនិត្យ​​មើល​ផែន​ទី​របស់​គណបក្ស​សង្គ្រោះ​ជាតិ​​ដើម្បី​កំណត់​ថា តើ​វា​ជា​ច្បាប់​ចម្លង​ស្រប​ច្បាប់​នៃ​ផែនទី​គូរ​ដោយ​បារំាង ​ឬយ៉ាង​ណា។

លោក​បាន​​មាន​ប្រសាសន៍​សំដៅ​ដល់​លោក សម រង្ស៊ី ប្រធាន​គណបក្ស​សង្គ្រោះ​ជាតិ​ថា “ទុក​ឲ្យ​អ្នក​ជំនាញ​របស់​យើង​​​ពិនិត្យ​ផ្ទៀង​ផ្ទាត់​ ហើយ​​ចាំ​ប្រគល់​លទ្ធផល​ឲ្យ​ទៅ​គាត់​។ ខ្ញុំ​នឹង​មិន​​ប្រគល់ [ផែន​ទី​របស់​រដ្ឋាភិបាល​] ឲ្យ​ទេ​ ពីព្រោះ​យើង​ធ្លាប់​បាន​បង្ហាញ​​​វា​ឲ្យ​គាត់​មើល​រួច​ហើយ”​។

លោក សម រង្ស៊ី បាន​មាន​ប្រសាសន៍​តាម​ទូរស័ព្ទ​កាលពី​ម្សិលមិញ​ថា លោក​ជឿថា ​ការ​ស្ទាក់​ស្ទើរ​​​របស់​លោក វ៉ា គឹមហុង ​​​ក្នុង​​បង្ហាញ​​​ផែន​ទី​របស់​ខ្លួនសម្រាប់​ការ​​ពិនិត្យ​ពិច័យ​ជា​​សាធារណៈ បង្ហាញ​ថា ​លោក​កំពុង​​តែ​​លាក់​បាំង​អ្វីម្យ៉ាង​ហើយ​ ​ប៉ុន្តែ​លោក​​​រីក​រាយ​នឹង​​​ប្រគល់​​ផែន​ទី​របស់​លោក​ដើម្បី​ធ្វើ​ការ​ផ្ទៀង​ផ្ទាត់។

លោក​បាន​ថ្លែង​ថា “​ប៉ុន្តែ​ខ្ញុំ​រំពឹងនឹង​​​មានការ​ធ្វើ​ដូចគ្នា​ដើម្បី​​​បញ្ជាក់​ថា តើ​ផែន​ទី​របស់​ពួកគេ​ក្លែង​ក្លាយ​ ឬអត់​”។ លោក​បាន​មាន​ប្រសាសន៍​បន្ត​ថា ​ការ​បង្ហាញ​ផែន​ទី​​ទាំង​នេះ​​ត្រួសៗ​ មិន​បានអនុញ្ញាត​ឲ្យ​គណបក្ស​សង្គ្រោះ​ជាតិផ្ទៀង​ផ្ទាត់​ភាព​ត្រឹម​ត្រូវ​របស់​វា ឬ​ក៏​ពិនិត្យ​មើល​ថា តើ​​បង្គោល​ព្រំដែន​ត្រូវ​បាន​បោះ​ដោយ​ត្រឹម​ត្រូវ​ ឬក៏​អត់​នោះ​ទេ។

មាត្រា២​នៃ​រដ្ឋធម្មនុញ្ញ​​​ឆ្នាំ​១៩៩៣​ចែង​ថា ផែន​ទី​​តែ​មួយ​គត់​ដែល​អាច​យក​មក​ប្រើ​ប្រាស់​បាន​ដើម្បី​កំណត់​ព្រំដែន​របស់​កម្ពុជា គឺ​ជា​ផែន​ទី​គូរ​ដោយ​បារំាង ​ដែល​​​ប្រើ​ខ្នាត​១/១០០.០០០​​នៅ​ក្នុង​ឆ្នាំ​១៩៥៣ និងដែល​​​ត្រូវ​បាន​​អង្គការ​សហប្រជាជាតិ​​ទទួល​ស្គាល់​​ពេញ​លេញ​នៅ​ក្នុង​ឆ្នាំ​១៩៦៩​។

លោក សម រង្ស៊ី ​​បាន​​​មាន​​ប្រសាសន៍​ថា “​គេ​​​ប្រហែល​ជា​និយាយ​ថា ពេល​នេះ​គេ​​បាន​បង្ហាញ​ផែនទី​ត្រឹម​ត្រូវ​ហើយ ប៉ុន្តែ​តើ​គេ​បាន​ប្រើ​ប្រាស់​ផែន​ទី​ទាំង​នោះ​ដោយ​របៀប​ណា​? យើង​ចង់​ឃើញ​ផែនទី​នោះ​ដើម្បី​​ផ្ទៀង​ផ្ទាត់​ថាតើ​​​គេ​​បាន​សម្រេច​គូរ​ព្រំដែនដោយ​របៀបណា។ ការ​ធ្វើ​បទ​បង្ហាញ​របស់​លោក វ៉ា គឹមហុង ជា​ជាង​ការ​ផ្ដល់​ចម្លើយ​ បាន​ធ្វើ​ឲ្យ​មាន​​សំណួរ​ចោទ​សួរ​កាន់​តែ​ច្រើន​”។

លោក អ៊ុំ សំអាន ​បាន​​ធ្វើ​សន្និសីទ​កាសែត​​​ដាច់​ដោយ​ឡែក​មួយ​ដោយ​ឥត​ព្រាង​ទុក​​​នៅ​ខាង​ក្រៅ​ទីស្ដីការ​គណៈរដ្ឋមន្ត្រី​កាលពី​ម្សិលមិញ ​​ភ្លាមៗបន្ទាប់ពី​​សន្និសីទ​កាសែត​របស់​លោក វ៉ា គឹមហុង ប៉ុន្តែ​​ត្រូវ​បាន​​សន្តិសុខ​បញ្ឈប់​ទាំង​កណ្ដាល​ទី​។

លោក​បាន​មាន​ប្រសាសន៍​ថា “​និយាយ​ជារួម​ ផែនទី​ទាំង​នេះ គឺ​​យួន​​ជា​​អ្នក​គូរ​នៅ​ទស​វត្សរ៍​​១៩៨០” មុនពេល​សន្តិសុខ​​បណ្ដេញ​ក្រុមអ្នក​យក​ព័ត៌មាន​ឲ្យ​ចេញពី​តំណាង​រាស្ត្រ​រូប​នេះ​៕ សុខុម​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស