ក្រុមមន្ត្រីបានឲ្យដឹងកាលពីម្សិលមិញថា បុរសជនជាតិខ្មែរម្នាក់ដែលជាគ្រូបង្រៀន និងជាសកម្មជនដែលបាននាំសិស្សសាលាបឋម និងសិស្សវិទ្យាល័យប្រហែល៤០នាក់ចុះទៅកាន់តំបន់ព្រំដែនមានជម្លោះក្នុងខេត្តស្វាយរៀង ត្រូវបានវាយដំ និងចាប់ឃុំឃាំងអស់មួយយប់ដោយអាជ្ញាធរវៀតណាម។
យោងតាមលោក កឹង ខន ស្នងការនគរបាលខេត្តស្វាយរៀងបានឲ្យដឹងថា លោក ផែន ប៊ុនធឿន អាយុ៣២ឆ្នាំ ដែលជាប្រធានអង្គការមិនមែនរដ្ឋាភិបាលចំនួនពីរ គឺមជ្ឈមណ្ឌលអន្តរជាតិជប៉ុនដើម្បីសិទ្ធិកុមារស៊ីរ៉ៃត៍ (C-Right) និងមជ្ឈមណ្ឌលសកម្មភាពដើម្បីសមភាព (Center for Action Toward Equality) ដែលសុទ្ធតែជាអង្គការតស៊ូមតិសម្រាប់សិទ្ធិកុមារនោះ ត្រូវបានចាប់ខ្លួនដោយអាជ្ញាធរវៀតណាមនៅតាមព្រំដែនក្នុងស្រុកកំពង់រោទ៍។
លោក កឹង ខន បានមានប្រសាសន៍កាលពីម្សិលមិញថា “អាជ្ញាធរវៀតណាមបានចាប់ខ្លួន និងឃុំឃាំងគាត់ [កាលពីថ្ងៃសៅរ៍]។ ពួកគេបានប្រគល់គាត់មកឲ្យអាជ្ញាធររបស់យើងវិញនៅម៉ោង១០ព្រឹកមិញនេះ។ ឥឡូវនេះ គាត់ត្រូវបានដោះលែងវិញហើយបន្ទាប់ពីត្រូវបានសួរនាំនៅឯស្នងការដ្ឋាននគរបាលរបស់យើង”។
មនុស្សមួយក្រុមមានគ្នា៤៣នាក់ ក្នុងនោះភាគច្រើនជាក្មេងៗសិស្សសាលាបានចុះទៅត្រួតពិនិត្យនៅតំបន់មួយក្បែរកន្លែងដែលមានការប៉ះទង្គិចគ្នាកាលពីខែមុនរវាងលោក រៀល ខេមរិន្ទ្រ តំណាងរាស្ត្រមកពីគណបក្សសង្គ្រោះជាតិ និងពលរដ្ឋវៀតណាម។ លោក សាត សាមុត អធិការនគរបាលស្រុកកំពង់រោទ៍នេះបានលើកឡើងថា ការចុះទៅតំបន់ព្រំដែនរបស់មនុស្សទាំងនេះ គឺដើម្បីអង្កេត និងសិក្សាអំពីវិធីសាស្ត្រធ្វើកសិកម្មរបស់វៀតណាម។
លោកបានលើកឡើងទៀតថា កសិករវៀតណាមបានធ្វើស្រែនៅលើដីដែលលោក ប៊ុនធឿន ត្រូវបានវាយដំ និងចាប់ខ្លួន ទោះបីជាតំបន់នេះនៅមិនទាន់ត្រូវបានវាស់វែងឲ្យបានត្រឹមត្រូវ ហើយអាជ្ញាធរកម្ពុជាជឿជាក់ថា វាស្ថិតនៅខាងផ្នែកព្រំដែនកម្ពុជាក៏ដោយ។
លោក សាមុត បានមានប្រសាសន៍ថា “ប្រសិនបើយើងសិក្សាពិចារណាអំពីបង្គោលព្រំដែន វាគឺជាដីរបស់យើង ហើយនៅមិនទាន់មានកិច្ចព្រមព្រៀងកាត់ដីនេះនៅឡើយទេ។ តំបន់នេះមានដីជាច្រើនហិកតាដែលកាន់កាប់ដោយវៀតណាម”។
លោកបានមានប្រសាសន៍បន្ថែមទៀតថា “មានមនុស្សប្រហែលបួននាក់ប៉ុណ្ណោះដែលបានចូលទៅតំបន់នោះ ប៉ុន្តែនៅពេលពួកគេឃើញជនជាតិវៀតណាមលើកដីគ្រវី ពួកគេបានរត់ត្រឡប់មកវិញ។ ក្មេងៗទាំងអស់បានរត់គេច ហើយគាត់ [លោក ប៊ុនធឿន] នៅតែម្នាក់ឯង ហើយគេបានចាប់គាត់តែម្ដង។ គាត់បានរងរបួសត្រង់ចិញ្ចើម និងកួយដី…ប៉ុន្តែគាត់នៅតែមានកម្លាំងពលំបន្ទាប់ពីត្រូវបានវាយដំ។ ដំបូងឡើយមានមនុស្សតែពីរបីនាក់ប៉ុណ្ណោះ ប៉ុន្តែបន្ទាប់មកមានមនុស្សកាន់តែច្រើនឡើងៗមកឡោមព័ទ្ធគាត់ ហើយមានអ្នកខ្លះមានទាំងកាន់ចបកាប់ និងប៉ែលទៀតផង”។
នៅក្នុងខ្សែវីដេអូមួយស្ដីអំពីលោក ប៊ុនធឿន កំពុងត្រូវបានសួរនាំដោយនគរបាលកម្ពុជា និងវៀតណាម មន្ត្រីវៀតណាមម្នាក់ដែលនិយាយជាភាសាខ្មែរបានលើកឡើងថា គ្រូបង្រៀនរូបនេះ “បានសារភាពថា គាត់ទៅតំបន់ព្រំដែនដើម្បីពិនិត្យមើលដីស្រែ”។
មន្ត្រីវៀតណាមរូបនេះបានប្រាប់លោក ប៊ុនធឿន ថា “គ្មានដីស្រែសម្រាប់អ្នកឯងមកមើលទេ រដូវនេះមិនមែនជារដូវធ្វើស្រែឡើយ”។
មន្ត្រីកម្ពុជាម្នាក់បានសួរគ្រូបង្រៀនរូបនេះដែលមានបង់រុំរបួសនៅលើថ្ងាសថា “ហេតុអីបានជាលោកទៅទីនោះដោយមិនបានសុំការអនុញ្ញាត? លើកក្រោយមុននឹងទៅតំបន់ព្រំដែន លោកគួរតែជូនដំណឹងមកយើងជាមុនសិន”។
លោក ប៊ុនធឿន បានឆ្លើយតបថា “ខ្ញុំមិនបានប៉ះពាល់អ្វីដែលជាកម្មសិទ្ធិរបស់ពួកគេឡើយ…ខ្ញុំគ្រាន់តែដើរតាមផ្លូវប៉ុណ្ណោះ”។
នៅពេលទាក់ទងតាមទូរស័ព្ទកាលពីរសៀលម្សិលមិញ លោក ប៊ុនធឿន បានលើកឡើងថា លោកត្រូវបានគេបញ្ជូនមកមន្ទីរពេទ្យមួយក្នុងរាជធានីភ្នំពេញ ប៉ុន្តែលោកមិនរងរបួសធ្ងន់ឡើយ។
លោកបានលើកឡើងទៀតថា លោកមិនបានឆ្លងកាត់ចូលទឹកដីវៀតណាមឡើយអំឡុងពេលចុះទៅកាន់ព្រំដែន។
លោកបានមានប្រសាសន៍ថា “យើងបានធ្វើដំណើរទៅមើលស្រូវរបស់វៀតណាម ហើយឆ្លៀតឱកាសនេះបង្ហាញដល់សិស្សានុសិស្សអំពីស្ថានភាពនៅក្នុងប្រទេសកម្ពុជាបច្ចុប្បន្ន”។
លោកបានមានប្រសាសន៍បន្ថែមទៀតថា “ខ្ញុំបានដើរតែម្នាក់ឯងទៅកាន់ព្រំដែន ប៉ុន្តែត្រូវពលរដ្ឋវៀតណាមបញ្ឈប់។ ខ្ញុំបានឈប់ ហើយបន្ទាប់មកពួកគេបានរត់សំដៅមកខ្ញុំដោយដៃមានកាន់ចបកាប់ និងប៉ែល ហើយបន្ទាប់មកទៀតពួកគេបានចាប់ផ្ដើមវាយដំខ្ញុំតែម្ដង។ ក្រោយមក អាជ្ញាធរវៀតណាមបានមកដល់ ហើយនាំខ្ញុំទៅកាន់ប៉ុស្តិ៍របស់ពួកគេ”។
កាលពីខែមុន គណបក្សសង្គ្រោះជាតិបានដឹកនាំយុទ្ធនាការមួយដើម្បីបើកកកាយអំពីការឈ្លានពានចូលមកទឹកដីកម្ពុជាដោយវៀតណាម ដែលជាហេតុនាំឲ្យរដ្ឋាភិបាលបានផ្ញើកំណត់ទូតទៅវៀតណាមចំនួនបីលើក។
កាលពីម្សិលមិញ លោក សម រង្ស៊ី មេដឹកនាំគណបក្សប្រឆាំងបានការពារសិទ្ធិរបស់លោក ប៊ុនធឿន ក្នុងការចូលទៅកាន់តំបន់ព្រំដែនមានជម្លោះ ហើយបានអំពាវនាវឲ្យរដ្ឋាភិបាលទប់ស្កាត់កុំឲ្យមានការវាយដំបែបនេះកើតឡើងម្ដងទៀត។
លោក សម រង្ស៊ី បានមានប្រសាសន៍ថា “រដ្ឋាភិបាលត្រូវតែប្រាកដថា រឿងបែបនេះនឹងមិនកើតឡើងទៀតឡើយនៅពេលអនាគត”។
លោក ជុំ សួនរី អ្នកនាំពាក្យក្រសួងការបរទេសបានបដិសេធមិនធ្វើអត្ថាធិប្បាយលើការវាយដំ និងការចាប់ខ្លួនលោក ប៊ុនធឿន ឡើយ។
លោកបានមានប្រសាសន៍ថា “ខ្ញុំនៅមិនទាន់ឃើញសេចក្ដីរាយការណ៍អំពីបញ្ហានេះនៅឡើយទេ”៕ ស៊ុយឈាង (រាយការណ៍បន្ថែមដោយ Alex Willemyns)