28 C
Phnom Penh

លោក សម រង្ស៊ី លើក​ឡើង​ថា ផែនទី​ព្រំដែន​វៀត​ណាម​បង្ហាញ​ពី​ការឈ្លានពាន

ដោយ ឌឹ ខេមបូឌា ដេលី

បទវិភាគ

នៅកិច្ច​ប្រជុំ​​រវាង​មន្ត្រី​ព្រំដែន​កម្ពុជា និង​វៀតណាម​នៅ​ក្នុង​រាជធានី​ភ្នំពេញ​នៅ​ថ្ងៃ​នេះ លោក សម រង្ស៊ី ​មេដឹកនាំ​គណបក្ស​ប្រឆាំង​បាន​មាន​ប្រសាសន៍​កាលពី​ម្សិលមិញ​ថា ច្បាប់​ចម្លង​ផែនទី​ព្រំដែន​ឌីជីថល​របស់​គណបក្ស​សង្គ្រោះ​ជាតិ​ ឥឡូវ​នេះ​ត្រូវ​បាន​បង្កើត​ឡើង​​ដើម្បី​ដំណើរ​ការ​ជាមួយ​​បច្ចេកវិទ្យា​ជីភីអេស ហើយ​បាន​បង្ហាញ​រួច​ហើយ​ថា បង្គោល​ព្រំដែន​បាន​​បោះ​ខុស​កន្លែង​នៅ​ក្នុង​ខេត្ត​ស្វាយរៀង​។

មាន​ប្រសាសន៍​បន្ទាប់ពី​​​​ពិធី​មួយ​​នៅ​ការិយាល័យ​គណបក្ស​សង្គ្រោះជាតិ​ក្នុង​រាជធានី​ភ្នំពេញ ​ដើម្បី​រំឭក​ខួប​នៃ​ការ​ប្រយុទ្ធគ្នា​កាលពី​ឆ្នាំ​១៩៩៧​នោះ លោក សម រង្ស៊ី បាន​មាន​ប្រសា​សន៍​ថា ឥឡូវ​នេះ​គណបក្ស​​ប្រឆាំង​អាច​យក​កូអរដោនេ ជីភីអេស ​ស្ដីពី​បង្គោល​ព្រំដែន​ដែល​ពួកគាត់​បាន​ទៅ​ពិនិត្យ​មើល​ ដើម្បី​រក​ឲ្យ​ឃើញ​ថា តើ​វា​ស្ថិត​នៅ​ក្នុង​បន្ទាត់​ព្រំដែន​ពិត​ប្រាកដ​ឬ​យ៉ាង​ណា។

លោក សម រង្ស៊ី បាន​មាន​ប្រសាសន៍​ថា ​”​យើង​មាន​ផែនទី​នេះ ហើយ​មានតែ​ផែនទី​មួយ​ប៉ុណ្ណោះ​ [ចែង​] ក្នុងរដ្ឋធម្មនុញ្ញ​។ ខ្ញុំបានសាកល្បង​​ផែនទី​​ឌីជីថល​កាលពី​យប់​មិញ ហើយ​យើង​បាន​រក​ឃើញ​ថា បង្គោល​ព្រំដែន​ពីរ​បី​​ដែលត្រូវ​បាន​បោះ​នោះ​ ស្ថិត​ក្នុង​ទឹក​ដី​កម្ពុជា”។

លោក​បាន​បន្ថែមថា “​​ យើង​អាច​ទៅ​មើល​បង្គោល​ព្រំដែន​ដែល​​មាន​វិវាទ​ណា​មួយ ហើយ​​យក​កូអរដោនេ​បង្គោល​ព្រំដែន​នោះ​ទៅ​ដាក់​លើ​ផែនទី​ឌីជីថល ហើយ​ផែន​ទី​នោះ​នឹង​​​ប្រាប់​យើង​ថា តើ​បង្គោល​ព្រំដែន​នោះ​ស្ថិត​នៅ​ក្នុង​ប្រទេស​កម្ពុជា ឬ​ស្ថិត​ក្នុង​ប្រទេស​ជិត​ខាង​។ នេះ​គឺ​ជាភ័ស្តុ​តាង​ដែល​យើង​មិន​អាច​ប្រកែក​បាន​”។

នៅ​ពេល​​ត្រូវ​បាន​ទាក់​ទង​តាម​ទូរស័ព្ទ​ក្រោយ​មក លោក សម រង្ស៊ី បាន​មាន​ប្រសាសន៍​ថា លោក​បាន​ចូល​មើល​កូអរដោនេ ជីភីអេស សម្រាប់​បង្គោល​ព្រំដែន​លេខ​១៨៤ ១៨៥ ១៨៦ និង​១៨៧ ដែល​គួរ​ស្ថិត​នៅ​តាម​បណ្ដោយ​ព្រំដែន​ក្នុង​ខេត្ត​ស្វាយរៀង ហើយ​បាន​រក​ឃើញ​ថា តាម​ពិត បង្គោល​ទាំង​នេះ​​ស្ថិតនៅ​ក្នុង​ទឹក​ដី​កម្ពុជា​។

លោក សម រង្ស៊ី ដែល​បាន​និរទេស​ខ្លួន​ទៅ​រស់​នៅ​ប្រទេស​បារាំង​ចាប់​ពី​ឆ្នាំ​២០០៩ ដល់​ឆ្នាំ​២០១៣ ដើម្បី​គេចពី​ការ​ចោទប្រកាន់បទ​​ព្រហ្មទណ្ឌ​ ដោយ​សារ​តែ​លោក​ដក​បង្គោល​​តម្រុយ​ព្រំដែន​លេខ​១៨៥​នោះ បាន​មាន​ប្រសាសន៍​ថា “​ដោយសារ​​​ខ្ញុំ​បាន​ប្រមូល​កូអរ​ដោ​នេ​​បង្គោល​ព្រំដែន​ទាំង​បួន​នេះ ខ្ញុំ​បាន​ប្រើ​វិធី​សាស្ត្រ​ថ្មីរបស់យើង​ ហើយ​ទទួល​បាន​លទ្ធផល​ថា បង្គោល​​ទាំង​បួន​នេះ​​ស្ថិត​ក្នុង​ទឹក​ដី​កម្ពុជា​”។

លោក​បាន​មាន​ប្រសាសន៍​ថា “​វា​ស្ថិត​នៅ​ចម្ងាយ​ប្រហែល​​១០០​ម៉ែត្រ​ប៉ុណ្ណោះ​ពី​ព្រំដែន។ នេះ​នឹង​មិនទាន់​​ជា​បញ្ហា​ធ្ងន់​ធ្ងរ​បំផុត​អំពី​​បង្គោល​ព្រំដែន​ទាំង​នោះទេ​។ កសិករ​ខ្មែរ​របស់​យើង​បាន​អះអាង​ថា ពួកគាត់​បាន​បាត់​បង់​ដីច្រើន​ជាង​នេះ​​ទៅ​ទៀត​ ដូច្នេះ​ឥឡូវ​នេះ​យើង​​អាច​ទៅ​ពិនិត្យ​មើល​បង្គោល​ទាំង​នោះ។

នៅ​ក្នុង​បទ​សម្ភាសន៍​​តាម​វិទ្យុ​សំឡេង​សហរដ្ឋអាមេរិក ដែល​បាន​ចាក់​ផ្សាយ​កាលពី​ព្រឹក​ម្សិលមិញ លោក វ៉ា គឹមហុង ប្រធាន​គណៈកម្មាធិការ​ព្រំដែន​រួម បាន​មាន​ប្រសាសន៍​ថា លោក​នៅ​តែ​មិន​ជឿ​ដដែលថាលោក សម រង្ស៊ី ​ថា​មាន​​ផែន​ទី​ត្រឹម​ត្រូវ​ចែង​ដោយ​​រដ្ឋ​ធម្មនុញ្ញ​។

បើ​ទោះ​ជា​មាន​​យុទ្ធនាការ​របស់​គណបក្ស​សង្គ្រោះ​ជាតិ​ក៏​ដោយ ក៏​រដ្ឋាភិបាល​​បាន​បដិ​សេធ​​មិន​ចេញ​​ផ្សាយ​ផែន​ទី​ផ្លូវ​ការ​ស្ដីពី​ព្រំដែន​កម្ពុជា​-វៀតណាម​ជា​សាធារណៈ ដែល​គេ​ប្រើ​ដើម្បី​បោះ​បង្គោល​ព្រំដែន​នេះ​ដែរ។ លោក វ៉ា គឹមហុង បាន​មាន​ប្រសាសន៍ថា ទំនង​ជា​លោក សម រង្ស៊ី រក​មិន​ឃើញ​ផែន​ទី​ត្រឹម​ត្រូវ​ឡើយ។

លោក វ៉ា គឹមហុង បាន​មាន​ប្រសាសន៍ថា “​ខ្ញុំ​មិន​គិត​ថា ផែន​ទីដែល​លោក សម រង្ស៊ី មាន​នេះ​ ជា​ផែន​ទី​ដើម​ឡើយ ពីព្រោះ​បារាំង​មិន​បាន​បោះ​ពុម្ព​ផែន​ទី​បន្ថែមទៀត​ទេ ​បន្ទាប់ពី​ឆ្នាំ​១៩៥៥មក។ ខ្ញុំ​គិត​ថា មនុស្ស​មួយ​ចំនួន​កំពុង​ប្រើ​ប្រាស់​ផែនទី​ថ្មី​ដើម្បី​ញុះញង់​ប្រជា​ពល​រដ្ឋ​ឲ្យ​គាំទ្រ​ពួកគេ​តែ​ប៉ុណ្ណោះ​”។

លោក​បាន​បន្ត​ថា “​ប៉ុន្តែ​នេះ​មិន​មែន​ជា​ចម្លើយ​ល្អ​ទេ។ ចម្លើយ​ដែល​ល្អ​នោះ​គឺ​ថា យើង​ត្រូវ​ធ្វើ​ការ​ចរចា​ដោយ​ស្ងៀម​ស្ងាត់​​”។

គណៈកម្មាធិការ​របស់​លោក វ៉ា គឹមហុង ដែល​មាន​មន្ត្រី​មក​ពី​ភាគី​កម្ពុជា និង​វៀតណា និង​មាន​ភារកិច្ចពាក់ព័ន្ធ​ការ​បោះ​បង្គោល​ព្រំដែន​នោះ គ្រោង​នឹង​ជួប​​ប្រជុំគ្នា​នៅ​ថ្ងៃ​នេះ​ជា​លើក​ដំបូង​ចាប់​តាំង​ពី​ការ​តវ៉ា​​កាល​ពីពេល​ថ្មីៗ​អំពី​ការ​ទន្ទ្រាន​​​​ចូល​ទឹក​ដី​កម្ពុជា​ពីសំណាក់​​​ប្រទេស​វៀតណាម។

លោក វ៉ា គឹមហុង បាន​មាន​ប្រសាសន៍​តាម​ទូរស័ព្ទ​ថា កិច្ច​ប្រជុំ​​ដែលត្រូវ​បាន​​គ្រោង​ធ្វើ​នៅ​ក្រុង​សៀមរាប​នោះ ឥឡូ​វនេះ​ត្រូវ​បាន​ប្តូរ​មក​ធ្វើ​នៅ​រាជធានី​ភ្នំពេញ​វិញ ប៉ុន្តែ​លោក​បាន​បដិសេធ​មិន​ធ្វើ​អត្ថាធិប្បាយ​ថា តើ​កិច្ច​ប្រជុំ​នេះ​ធ្វើ​ពិត​ប្រាកដ​នៅ​កន្លែង​ណា​ ឬ​បញ្ហា​អ្វី​ដែល​មន្ត្រី​កម្ពុជា​នឹង​លើក​ឡើង​នោះ​ឡើយ​។

លោក សម រង្ស៊ី និង​គណបក្ស​ប្រឆាំង​បាន​​ចោទ​ប្រកាន់​រដ្ឋាភិបាល​ម្ដង​ហើយ​ម្ដង​ទៀត​ចំពោះ​ការ​មិន​ព្រម​បញ្ចេញ​​ផែន​ទី​ព្រំដែន​ផ្លូវ​ការ​ ពីព្រោះ​រដ្ឋាភិបាល​​បាន​និង​កំពុង​ប្រើ​ប្រាស់​​ជា​ផែន​ទី​ដែល​គូរ​ដោយ​វៀតណាម​ខុស​ច្បាប់ ដែល​បាន​ដាក់​ខ្សែ​បន្ទាត់​ព្រំដែន​នៅ​ក្នុង​ទឹក​ដី​កម្ពុជា។

មាត្រា​២​នៃ​រដ្ឋធម្មនុញ្ញ​ឆ្នាំ​១៩៩៣​ចែង​ថា មាន​តែ​ផែនទី​ខ្នាត​១/១០០.០០០​ ដែល​គូរ​ដោយ​អាណានិគម​បារាំង​ និង​ត្រូវ​បាន​ទទួល​ស្គាល់​ពេញ​លេញ​ដោយអង្គការ​សហប្រជា​ជាតិ​ក្នុង​ឆ្នាំ​១៩៦៩​ប៉ុណ្ណោះ​អាច​ត្រូវ​បាន​​ប្រើ​ដោយ​រដ្ឋាភិបាល​ដើម្បី​កំណត់អំពី​​ព្រំដែន​កម្ពុជា។

លោក អ៊ូ វីរៈ អ្នក​វិភាគ​នយោបាយ​បាន​មាន​ប្រសាសន៍​ថា រដ្ឋាភិបាល​គួរ​បញ្ចប់​វិវាទ​នេះ​ជាមួយ​លោក សម រង្ស៊ី ដោយ​ចេញ​ផ្សាយ​ផែន​ទី​ព្រំដែន​ផ្លូវ​ការ​ដើម្បី​​ធ្វើ​ឲ្យ​មាន​តម្លាភាព និង​ការ​​ពិនិត្យ​ពិច័យ​អំឡុង​ការ​កំណត់​ព្រំដែន​។

លោក​​បានមាន​ប្រសាសន៍​ថា “​លោក វ៉ា គឹមហុង គួរ​ចេញ​ផ្សាយ​ផែនទី​នេះ​។ ពួកគេ​ត្រូវ​ចេះ​រៀនស្មោះ​ត្រង់​ជាមួយ​ប្រជាពលរដ្ឋ​របស់​ខ្លួន និង​ដើម្បី​​ទទួល​បាន​ការ​គាំទ្រ​ពី​ពួកគាត់​។ នៅ​ក្នុង​ស្ថានភាព​ដែល​យើង​បាត់​បង់​ដី​​ ឬ​ដោះ​ដូរ​ដី និង​​​ភូមិ​មួយ​ចំនួន​​ជាមួយ​វៀតណាម​ ​ប្រជា​ពលរដ្ឋ​ចាំបាច់​ត្រូវ​ដឹង​៕ សារុន​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស