40.5 C
Phnom Penh

ប៉ូលិស​ព្រងើយ​កន្តើយ​នឹង​ដីកា​ចាប់​ខ្លួន​មួយ​ទៀត សម្រាប់ មាស មុត

ដោយ ឌឹ ខេមបូឌា ដេលី

បទវិភាគ

ឯកសារ​ដែល​ចេញ​កាលពី​ថ្ងៃ​ច័ន្ទ​ដោយ​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​បាន​ឲ្យ​ដឹង​ថា ដីកា​ចាប់​ខ្លួន​ទី​២​សម្រាប់​អតីត​មេបញ្ជាការ​កងទ័ព​ជើង​ទឹក​ខ្មែរ​ក្រហម មាស មុត ត្រូវ​បាន​ប៉ូលិស​យុត្តិធម៌​ព្រងើយ​កន្តើយ​កាលពី​ខែ​មុន។

លោក មាស មុត ជាប់​ចោទ​ដោយ​កំបាំង​មុខ​ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ និង​ឧក្រិដ្ឋកម្ម​សង្គ្រាម​នៅ​ខែ​មីនា។ មេ​ស្រុក​ខ្មែរ​ក្រហម អ្នក​ស្រី អឹុម ចែម ក៏​ជាប់​ចោទ​ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ​ដែរ។ ការ​ខក​ខាន​របស់​រដ្ឋាភិបាល និង​អង្គការ​សហ​ប្រជាជាតិ មិន​ចាប់​ខ្លួន​អតីត​មន្ត្រី​ទាំង​ពីរ​នេះ បន្ទាប់ពី​ដីកា​ត្រូវ​បាន​ចេញ​សម្រាប់​ពួកគេ​កាលពី​ឆ្នាំ​មុន បាន​បង្ខំ​សហ​ចៅក្រម​ស៊ើប​អង្កេត​លោក​ ម៉ាក ហាម៉ុន ចេញ​ការ​ចោទ​ប្រកាន់​កំបាំង​មុខ។

តាម​​ដីកា​ចេញ​ថ្មី​ចុះ​ថ្ងៃ​ទី​៥​ខែ​មិថុនា​បង្ហាញ​ថា ការ​ប៉ុនប៉ង​ជា​លើក​ទី​២​របស់​ចៅក្រម ហាម៉ុន ដើម្បី​ជំរុញ​ឲ្យ​នគរបាល​យុត្តិធម៌​ចាប់​ខ្លួន មាស មុត ដែល​ទទួល​រង​ការ​ចោទ​ប្រកាន់​ថា​បាន​សម្លាប់​ទាំង​ទាហាន​របស់​ខ្លួន ទាំង​ជន​បរទេស​ដែល​ចាប់​បាន​នៅ​លម្ហ​សមុទ្រ មិន​ត្រូវ​បាន​គេ​យក​ចិត្ត​ទុក​ដាក់​ទេ​កាលពី​ខែ​មុន។

ដីកា​មាន​ខ្លឹមសារ​ថា “នគរបាល​យុត្តិធម៌​គួរ​នាំ​ខ្លួន មាស មុត មក​ចំពោះ​មុខ​សហ​ចៅក្រម​ស៊ើប​អង្កេត​អន្តរជាតិ សម្រាប់​សវនាការ​តទល់​គ្នា ដើម្បី​ពិចារណា​អំពី​ការ​ចេញ​ដីកា​សម្រាប់​ការ​ឃុំ​ខ្លួន​បណ្តោះ​អាសន្ន​ ដែល​អនុលោម​ទៅ​តាម​វិធាន​៦៣”។

ដីកា​និយាយ​ថា ប្រសិនបើ មាស មុត មិន​អាច​ត្រូវ​នាំ​ខ្លួន​មក​ចំពោះ​មុខ​ចៅក្រម ហាម៉ុន ភ្លាមៗ​ទេ គាត់​គួរ​ត្រូវ​គេ​ដាក់​ក្នុង​ការ​ឃុំ​ខ្លួន​ជា​បណ្តោះ​អាសន្ន “នៅ​ទីណា​ក៏​បាន​ក្នុង​ទី​ឃុំ​ខ្លួន​នៃ​អវតក និង​បង្ហាញ​ខ្លួន​ដល់​សហ​ចៅក្រម​ស៊ើប​អង្កេត​អន្តរជាតិ​ឲ្យ​បាន​ឆាប់​តាម​លទ្ធភាព”។

ថ្វីបើ​ការ​ចេញ​ជា​សាធារណៈ​នូវ​ដីកា​ចាប់​ខ្លួន​ជាង​មួយ​ខែ​មក​ហើយ​ក្តី ក៏លោក ម៉ៅ ចាន់ដារ៉ា ប្រធាន​សន្តិសុខ​នៅ​អវតក បាន​អះអាង​ថា លោក​នៅ​មិន​ទាន់​បាន​ទទួល​ដីកា​ទេ ហើយ​ថា​នគរបាល​យុត្តិធម៌​កំពុង “សិក្សា​បញ្ហា​សន្តិសុខ” ក្នុង​តំបន់​នានា​ជំុវិញ​ផ្ទះ​របស់ មាស មុត និង អុឹម ចែម។

លោក​ចាន់ដារ៉ា បាន​មាន​ប្រសាសន៍​ថា “ខ្ញុំ​មិន​ទាន់​បាន​ទទួល​ដីកា​ចាប់​ខ្លួន​នោះ​នៅ​ឡើយ​ទេ”។

លោក​បាន​មាន​ប្រសាសន៍​ថា “មិន​មែន​មាន​ន័យ​ថា​យើង​មិន​បាន​អនុវត្ត​ដីកា​នោះ​ទេ ប៉ុន្តែ​កំពុង​សិក្សា​បញ្ហា​សន្តិសុខ និង​មតិ​របស់​អ្នក​ភូមិ”។ លោក​បាន​បដិសេធ​មិន​អត្ថាធិប្បាយ​ច្រើន និង​បាន​បង្វែរ​សំណួរ​ទៅ​អវតក។

នៅ​ពេល​សួរ​អំពី​ការ​អះអាង​របស់​លោក ចាន់ដារ៉ា ដែល​ថា​លោក​មិន​ទាន់​បាន​ទទួល​ដីកា​ចាប់​ខ្លួន​នោះ លោក ឡា អូលសិន អ្នក​នាំ​ពាក្យ​សាលាក្តី បាន​និយាយ​ថា ដីកា​នោះ “បក​ស្រាយ​ខ្លួន​ឯង​” ហើយ​មិន​បាន​អត្ថាធិប្បាយ​បន្ថែម​ទេ។

ទោះបី​មាន​ការ​រិះគន់​ចៅក្រម ហាម៉ុន កាលពី​ខែ​មីនា ទាក់ទិន​នឹង​ការ​សម្រេច​ចិត្ត​របស់​គាត់​ក្នុង​ការ​ចោទ​ប្រកាន់​អតីត​មេបញ្ជាការ​កងទ័ព​ជើង​ទឹក​ទាំង​កំបាំង​មុខ​ក៏ដោយ ក៏​លោក ឡុង បញ្ញាវុធ អ្នក​សង្កេត​ការណ៍​តុលាការ​នៃ​គម្រោង​​ផ្តួច​ផ្តើម​យុត្តិធម៌​កម្ពុជា កាលពី​ថ្ងៃ​ច័ន្ទ​បាន​សរសើរ​ចៅក្រម​រូប​នេះ​ចំពោះ​ការ​បន្ត​ខិតខំ​របស់​គាត់​ដោយ​ប្រឈម​នឹង​ការ​មិន​សហការ​នៅ​ខាង​នគរបាល​យុត្តិធម៌។

លោក​បាន​មានប្រសាសន៍​ថា “ច្បាស់​ណាស់ នេះ​ជា​ការ​រំលោភ​កិច្ច​ព្រមព្រៀង ហើយ​ខ្ញុំ​សូម​សម្តែង​នូវ​ការ​សរសើរ​ចៅក្រម ហាម៉ុន ចំពោះ​ជំហាន​វិជ្ជមាន​ទៀង​ត្រង់​របស់​លោក​អំពី​បញ្ហា​នេះ ហើយ​ខ្ញុំ​គិត​ថា ប្រទេស​ម្ចាស់​ជំនួយ​និង​អង្គការ​សហ​ប្រជាជាតិ​ចាំបាច់​ត្រូវ​ដោះស្រាយ​បញ្ហា​ស្នូល​នេះ ដែល​ជា​ការ​ខកខាន​ខាង​រដ្ឋាភិបាល​មិន​អនុវត្ត​តាម​កិច្ច​ព្រមព្រៀង”។

លោក ឡុង ក៏​បាន​អំពាវនាវ​ដល់​អង្គការ​សហ​ប្រជាជាតិ​និង​ប្រទេស​ផ្តល់​ជំនួយ​របស់​សាលា​ក្តី​ត្រូវ​ហ៊ាន​និយាយ​ថែម​ទៀត​អំពី​ការ​ជ្រៀត​ជ្រែក​របស់​រដ្ឋាភិបាល​ក្នុង​សំណុំ​រឿង​០០៣​និង​០០៤។

លោក ឡុង បាន​មាន​ប្រសាសន៍​ថា “ប្រសិនបើ​ប៉ុណ្ណឹង​បាន​ហើយ ពួកគេ​ត្រូវ​និយាយ​ដូច្នេះ​ហើយ​…​ប្រសិនបើ​ពួកគេ​មិន​អាច​ធានា​បាន​នូវ​​បទដ្ឋាន​អន្តរជាតិ ពួកគេ​ត្រូវតែ​ទៀង​ត្រង់”។

លោក​បាន​បន្ថែម​ថា “គេ​ត្រូវ​ប្រាប់​សាធារណជន​អំពី​បញ្ហា​នេះ។ គេ​មិន​ត្រូវ​លាក់​លៀម​ជាមួយ​ជន​រងគ្រោះ កុំ​លាក់​បាំង កុំ​ធ្វើ​តាម​របៀប​បន្លំ​លាក់​រឿង​ពិត”។

លោក​នាយករដ្ឋមន្ត្រី ហ៊ុន សែន បាន​និយាយ​ឥត​សំចៃ​បង្ហាញ​អំពី​ការ​ជំទាស់​​របស់​លោក​ចំពោះ​សាលាក្តី​ខ្មែរ​ក្រហម​ដែល​ពង្រីក​វិសាលភាព​របស់​ខ្លួន​ហួស​ពី​ដំណាក់​កាល​ទី​២​នៃ​សំណុំ​រឿង​០០២ ដែល​លោក នួន ជា និង លោក ខៀវ សំផន កំពុង​ត្រូវ​តុលាការ​ជំនុំ​ជម្រះ​ពី​បទ​ឧក្រិដ្ឋកម្ម មាន​ទាំង​អំពើ​ប្រល័យ​ពូជសាសន៍​ផង។

អ្នក​ទាំង​ពីរ​ត្រូវ​បាន​ផ្តន្ទា​ទោស​ឲ្យ​ជាប់​ពន្ធនាគារ​មួយ​ជីវិត​ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ​កាលពី​ខែ​សីហា និង​កំពុង​រង់ចាំ​លទ្ធផល​ប្តឹង​ឧទ្ធរណ៍​របស់​ខ្លួន។

បន្ទាប់ពី​ត្រូវ​ចោទ​ប្រកាន់​នៅ​ខែ​មីនា លោក មាស មុត ដែល​អះអាង​អំពី​ភាព​គ្មាន​ទោស​របស់​លោក​នោះ បាន​និយាយ​ថា លោក “​ខ្វល់ខ្វាយ​នឹង​ការ​ដាំ​ពោត​និង​ដំឡូងមី” ជាង​សកម្មភាព​សាលា​ក្តី​នេះ៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស