អង្គការមិនមែនរដ្ឋាភិបាលនៅតែរួបរួមគ្នាកាលពីម្សិលមិញ ដោយប្រកាន់ជំហរដាច់ខាតប្រឆាំងនឹងសេចក្ដីព្រាងច្បាប់ដែលនឹងបង្ខំឲ្យអង្គការមិនមែនរដ្ឋាភិបាលទាំងអស់នៅក្នុងប្រទេសចុះបញ្ជីជាមួយរដ្ឋាភិបាល ប៉ុន្តែមានការខ្វែងគំនិតគ្ន ថា តើត្រូវទទួលយកសំណើរបស់គណបក្សប្រជាជនកម្ពុជាសម្រាប់ការពិគ្រោះយោបល់រយៈពេល១១ម៉ោងមុនការបោះឆ្នោតនាពេលខាងមុខ ឬយ៉ាងណា។
បុគ្គលិកអង្គការមិនមែនរដ្ឋាភិបាលជាង២០០នាក់បានជួបជុំគ្នានៅសណ្ឋាគារកាំបូឌីយ៉ាណា ក្នុងរាជធានីភ្នំពេញ កាលពីព្រឹកម្សិលមិញ ដើម្បីប្រមូលការជំទាស់របស់ខ្លួនទៅនឹងសេចក្ដីព្រាងច្បាប់នោះ។ ពួកគេបារម្ភថា រដ្ឋាភិបាលនឹងប្រើប្រាស់បទប្បញ្ញត្តិមិនច្បាស់លាស់ និងទូលំទូលាយដើម្បីទប់ស្កាត់ និងបិទអង្គការទាំងនេះ ដែលនិយាយប្រឆាំងនឹងគណបក្សប្រជាជនកម្ពុជា ហើយចង់ឲ្យដកច្បាប់នេះ ឬយ៉ាងហោចណាស់ក៏ត្រូវសរសេរឡើងវិញភាគច្រើនផងដែរ។
សមាជិកសភាគណបក្សប្រជាជនកម្ពុជាគ្រោងរៀបចំជំនួបមួយនៅរដ្ឋសភាព្រឹកនេះ ដើម្បីស្តាប់សំណួរនិងកង្វល់របស់ពួកគេមុនការបោះឆ្នោតដែលគ្រោងធ្វើនៅថ្ងៃសុក្រ។ ប៉ុន្តែអង្គការមិនមែនរដ្ឋាភិបាលបានលើកឡើងកាលពីម្សិលមិញថា កិច្ចប្រជុំនេះគ្រាន់តែឲ្យល្អមើលតែប៉ុណ្ណោះ ហើយបានត្អូញត្អែរថា រដ្ឋសភាបានលុបឈ្មោះពួកគេមួយចំនួនចេញពីបញ្ជីជាភ្ញៀវ។
លោកស្រី ចក់ សុភាព ដែលជាប្រធានមជ្ឈមណ្ឌលសិទ្ធិមនុស្សកម្ពុជា មានប្រសាសន៍ដល់ការពិគ្រោះយោបល់នោះថា“រដ្ឋាភិបាលធ្វើដើម្បីគ្រាន់តែឲ្យល្អមើលប៉ុណ្ណោះ”។
លោកស្រី សុភាព បានមានប្រសាសន៍ថា ទោះយ៉ាងណា លោកស្រីនឹងចូលរួមដែរ។ អង្គការមួយចំនួនទៀតលើកឡើងថា ពួកគេនឹងមិនចូលរួមទេ ឬថា ពួកគេមិនទាំងបានអញ្ជើញទេ ហើយត្រូវបានឲ្យត្រឡប់ទៅវិញនៅពេលពួកគេបានព្យាយាមចុះឈ្មោះ។
នៅពេលត្រូវបានទាក់ទងតាមទូរស័ព្ទកាលពីម្សិលមិញ លោក ឈាង វុន អ្នកនាំពាក្យរដ្ឋសភា និងជាសមាជិកសភាគណបក្សប្រជាជនកម្ពុជាមានប្រសាសន៍ថា លោកមិនអាចនិយាយទៅកាន់អ្នកយកព័ត៌មានបានទេ ពីព្រោះលោកមានជំងឺ។ កាលពីសប្ដាហ៍មុន លោកបានមានប្រសាសន៍ថា សេចក្ដីព្រាងច្បាប់នោះ “ល្អ” ហើយថា ការបោះឆ្នោតទំនងជាគ្រោងធ្វើនៅថ្ងៃសុក្រ។
ទោះជាយ៉ាងណា អង្គការសិទ្ធិមនុស្សលីកាដូបានលើកឡើងថា អង្គការនេះត្រូវបានប្រាប់ដោយបុគ្គលិករដ្ឋបាលសភាកាលពីម្សិលមិញថា ការបោះឆ្នោតត្រូវលើកទៅធ្វើនៅថ្ងៃច័ន្ទវិញ។
គណបក្សសង្គ្រោះជាតិលើកឡើងថា ខ្លួនគាំទ្រអង្គការមិនមែនរដ្ឋាភិបាលចំពោះការជំទាស់នឹងច្បាប់នេះ។ គណបក្សខ្វះអាសនៈសភាមិនអាចរារាំងឬធ្វើវិសោធនកម្មបានទេ ប៉ុន្តែបានលើកឡើងពីលទ្ធភាពនៃការធ្វើពហិការការបោះឆ្នោត។
រដ្ឋាភិបាលលើកឡើងថា ខ្លួនត្រូវការច្បាប់នេះ ដែលនឹងតម្រូវឲ្យអង្គការទាំងអស់ដាក់របាយការណ៍ហិរញ្ញវត្ថុទៀងទាត់ ដើម្បីធ្វើឲ្យប្រាកដថា អង្គការភេរវកម្មមិនប្រើប្រាស់អង្គការមិនមែនរដ្ឋាភិបាលដើម្បីនាំលុយចូលក្នុងប្រទេស។
លោក ញ៉ិល ភាព សមាជិកសម្ពន្ធភាពកសិករដែលមានសហគមន៍ប្រហែល៤០ក្នុងខេត្តតាកែវ បាននិយាយនៅជំនួបកាលពីម្សិលមិញថា លោកបារម្ភថា ច្បាប់នេះនឹងត្រូវគេយកទៅប្រើខុស។
លោកមានប្រសាសន៍ថា “នៅក្នុងបរិបទកម្ពុជា សហគមន៍ដែលមានវិវាទដីធ្លីតែងតែធ្វើការតវ៉ា ហើយរដ្ឋាភិបាលតែងតែចោទពួកគេថាបានបង្កអសណ្ដាប់ធ្នាប់សង្គម ហើយអង្គការមិនមែនរដ្ឋាភិបាល [សមាគមសហគមន៍] ទាំងនោះ នឹងមិនត្រូវបានចុះបញ្ជីទេ”។
លោក Zachery Lampell ទីប្រឹក្សាផ្នែកច្បាប់នៅមជ្ឈមណ្ឌលអន្តរជាតិផ្តល់ជំនួយផ្នែកច្បាប់ដោយឥតគិតថ្លៃ បានមានប្រសាសន៍ថា ច្បាប់អង្គការមិនមែនរដ្ឋាភិបាលក៏នឹងរំលោភច្បាប់អន្តរជាតិផងដែរ ជាពិសេសកាតព្វកិច្ចរបស់កម្ពុជាក្នុងនាមជាភាគីនៃអនុសញ្ញាអន្តរជាតិស្ដីពីសិទ្ធិស៊ីវិល និងសិទ្ធិនយោបាយ។
លោកបានមានប្រសាសន៍ថា ដោយមិនមានហេតុផលច្បាស់លាស់ចំពោការបដិសេធមិនឲ្យចុះបញ្ជីនោះ “មានហានិភ័យថា សេចក្ដីសម្រេចនេះគឺធ្វើតាមតែអំពើចិត្ត”។
ខណៈដែលអង្គការមិនមែនរដ្ឋាភិបាលជួបជុំគ្នានៅសណ្ឋាគារកាំបូឌីយ៉ាណា កាលពីម្សិលមិញ អ្នកប្រឆាំងច្បាប់នេះប្រហែល៥០០នាក់ទៀតបានព្យាយាមហែក្បួនទៅចូលរួមដោយចេញពីខាងក្រៅស្ថានទូតរុស្ស៊ី។ ប៉ុន្តែពួកគាត់ត្រូវបានរារាំងដោយរបាំងផ្លូវនគរបាលនៅមុខរដ្ឋសភា កន្លែងដែលពួកគាត់ធ្វើការតវ៉ារហូតដល់ថ្ងៃត្រង់៕ សារុន (រាយការណ៍បន្ថែមដោយ ម៉ិច ដារ៉ា)