30 C
Phnom Penh

រដ្ឋាភិបាល​​​កម្ពុជា​​​ស្ងាត់​​​ស្ងៀម ​​​បន្ទាប់​​​ពី​​​ចរចា​​​បញ្ហា​​​​​​ព្រំដែន​​​ ជា​​​មួយ​​​វៀត​​​ណាម​​​​​​ក្នុង​​​ថ្ងៃ​​​ដំបូង​​​

ដោយ ឌឹ ខេមបូឌា ដេលី

បទវិភាគ

លោក វ៉ា គឹមហុង រដ្ឋ​​​មន្ត្រី​​​ទទួល​​​បន្ទុក​​​កិច្ច​​​ការ​​​ព្រំដែន​​​មក​​​ពីគណបក្ស​​​ប្រជា​​​ជន​​​កម្ពុជា​​​​​​បាន​​​បដិសេធ​​​មិន​​​និយាយ​​​ជាមួយ​​​ក្រុម​​​អ្នក​​​យក​​​ព័ត៌​​​មាន​​​ទេ​​​កាលពី​​​ម្សិលមិញ បន្ទាប់​​​ពី​ជួប​​ជាមួយ​អនុ​​​​​​​​​រដ្ឋ​​​មន្ត្រី​​​ការ​​​បរទេស​​​វៀត​​​ណាម​​​សម្រាប់​​​កិច្ច​​​ប្រជុំ​​​ដំបូង​​​របស់​​​គណៈ​​​កម្មា​​​ធិការ​​​ព្រំដែន​​​​​​រួម​​​លើក​​​​ដំបូង​​​​ចាប់​​​តាំង​​​ពី​​​គណ​​​បក្ស​​​សង្គ្រោះ​​​ជាតិបាន​​​ចាប់​​​ផ្តើម​​​យុទ្ធនាការ​​​​​ស្វែង​​​រក​​​ការ​​​ទន្ទ្រាន​​​ទឹក​​​ដី​​​ពី​​​សំណាក់​​​វៀត​​​ណាម​​​​​​​​។

ពេល​​​ដើ​​​រចេញ​​​ពី​​​កិច្ច​​​ប្រជុ​​​ំ​​​នា​ព្រឹក​​​នោះ​​​នៅ​​​ឯទី​​​ស្តីការ​​​គណៈ​​​រដ្ឋ​​​មន្ត្រី​​​​ លោក វ៉ា គឹម   ហុង​​​ ដែល​​​​​​ត្រូវ​បាន​​​​គណបក្ស​​​សង្គ្រោះ​​​ ជាតិ​​​ចោទ​​​ប្រកាន់​​​​​​ថា   បាន​​​ឱន​​​ក្បាល​​​ការ​​​ពារ​​​ផល​​​ប្រយោជន៍​​​​​​របស់​​​វៀត​​​ណាម​​​អំឡុង​​​ពេល​​​ចរចា​​​ព្រំដែន​​​​​​មុន​​​ៗ​នោះ ​​​មិន​​​អើពើ​​​នឹង​​​ក្រុម​​​អ្នក​​​យក​​​ព័ត៌​​​មាន​​​ឡើយ​​​​​​រហូត​​​ទាល់​តែ​​​មាន ​​​​អ្នក​យក​ព័ត៌​មាន​ម្នាក់​​​​​​សួរ​​​ថា “ឯក​​​ឧត្តម ​​​​​​តើ​​​ខាង​​​វៀតណាម​​​សម្រេច​​​យ៉ាង​​​ណា​​​ហើយ​​​?”។

លោក វ៉ា គឹមហុង ដែលឈរ​​​ចាំ​​​ជណ្តើ​​​រ​​​យន្ត​​​​ក្នុង​ទឹក​មុខ​បែប​មួម៉ៅ​ បាន​​​ងាក​​​​មកអ្នក​​​យក​​​ព័ត៌​​​មា​​​ន​​​រូប​​នោះ ហើយ​​​លោក​​​បាន​​​ថ្កោល​​​ ទោស​​​សំណួរនោះ។

លោក​​​បានលើក​ឡើង​ថា “យើង​​​ប្រជុំ​​​ជាមួយ​​​គ្នា ហើយ​​​​​​​​មក​​​សួរ​​​ថាសម្រេច​​​ម៉េច​​​ អាហ្នឹង​គឺ​​​​​យើង​​​ចេះតែ​​​ដើរ​​​​​​និយាយ​​​ខុស​​​។​​​កម្ពុជា​​​-វៀតណាម​​​ប្រជុំ​​​ជាមួយ​​​គ្នា​​​ បើ​​​សម្រេច​​​ សម្រេច​​​ជាមួយ​​​គ្នា​​​ កុំ​​​ចេះ​​​តែ​​​ដាក់​​​ [សួរ​​​] អ៊ីចឹង​​​ វា​​​ដូច​​​ជា​​​យើង​​​កញ្ជះ​​​​គេ​​​អ៊ីចឹង​” មុន​ពេល​​​​បដិសេធ​​​មិន​​ឆ្លើយ​​​សំណួរ​​​បន្ថែម​​​ទៀត​​​។

កិច្ច​​​ប្រជុំបិទ​​​ទ្វារ​​​នៅ​​​ទី​​​ស្តីការ​​​គណៈរដ្ឋ​​​មន្ត្រី​​​នេះ​​​​​ ត្រូវ​​​បានធ្វើ​​​ឡើង​​​ក្រោម​​​អធិបតីភាពរបស់​​​​​​លោក វ៉ា គឹម​​​ហុង និង​​​លោក ហូ ស៊័នសឺន អនុ​​​រដ្ឋ​​​មន្ត្រី​​​ការ​​​បរទេស​​​វៀតណាម​​​ ដែល​​​ ទទួល​​​បន្ទុក​​​ចរចា​​​ការ​​​កំណត់​​​ព្រំដែន​​​កម្ពុជា​​​-វៀតណាម​​​។

លោក វ៉ា គឹមហុង មិន​​​អាច​​​ទាក់​​​ទង​​​តាម​​​ទូរស័ព្ទ​​​បាន​​​ទេ​​​កាល​​​ពី​​​ម្សិលមិញ​​​។ ទោះ​​​ជា​​​​​​យ៉ាង​​​ណា  លោកស្រី កុយ ពិសី ដែល​​​​​​ជា​​​អនុ​​​ប្រធាន​​​របស់​​​លោក​​​​​​ បាន​​​មាន​​​ប្រសាសន៍​​​កាល​​​ពី​ថ្ងៃ​ច័ន្ទ​ថា កិច្ច​​​ប្រជុំ​​​រយៈ​​​ពេល​​​ពីរ​​ថ្ងៃ​​​េនះ​​​នឹង​លើក​ឡើង​​អំពី​​​​តំបន់​​​ព្រំដែន​​​ដែល​​​មិន​​​ទាន់​​​បាន​​​កំណត់​​​នៅ​​​ឡើយ​​​ ព្រម​​​ទាំង​​​ឧប្បត្តិហេតុ​​​ដែល​​​បាន​​​កើត​​​ឡើង​​​កាល​​​ពី​​​ពេល​​​ថ្មី​​​ៗ​​​នេះ ផង​​​ដែរ​​​។

លោកស្រី​​​បាន​​​មានប្រសាសន៍​​​ទៀត​​​ថា “​​​មា​​​ន​​​របៀបវារៈ​​​សំខាន់​​​ពីរ​​​ដែល​​​ត្រូវ​​​​​​លើក​​​ឡើង​​​នៅ​​​ក្នុង​​​កិច្ច​​​ប្រជុំ​​​នេះ​​​។ ទី​​​១​​​យើង​​​នឹង​​​បន្ត​​​ដោះ​​​ស្រាយ​​​បញ្ហា​​​​​​នៅ​​​​​​សេស​​​សល់​​​ដែល​​​យើង​​​មិន​​​ទាន់​​​បាន​​​ព្រម​​​ព្រៀង​​​រួម​​​គ្នា​​​។ ទី​​​២​​​និយាយ​​អំពី​​​ចំនួន​​​ឧប្បត្តិហេតុ​​​ដែល​​​កើត​​​ឡើង​​​នៅ​​​តំបន់​​​ព្រំដែន​​​។ ឧប្បត្តិហេតុ​​​ដែល​​​យើង​​​លើក​​​ឡើង​​​ ឧទាហរណ៍​​​ដូច​​​ជា​​​ការ​​​ជីក​​​ស្រះ​​​ និងការធ្វើ​​​​ផ្លូវ​​​ និង​​​ប៉ុស្តិ៍ [យោធា] តាម​​​បណ្តោយ​​​ព្រំដែន​​​ជា​​​ដើម ហើយ​​​តំបន់​​​ខ្លះ​​​នៅ​​កៀក​នឹង​​​​ព្រំដែន​​​ណាស់​​​”។

ដឹក​​​នាំ​​​ដោយ​​​លោក អ៊ុំ សំអាន និង​​​ លោក រៀល ខេមរិន្ទ្រ​​​ គណ​​​បក្ស​​​សង្គ្រោះជាតិ​​​ចាប់​​​តាំង​​​ពីខែ​​​មុន​​​មក​​​បាន​​​ឆ្លុះ​​​បញ្ចាំង​​​ពីការ​​​ទន្ទ្រាន​ចូល​​​ទឹក​​​ដី​​​មួយ​​​ចំនួន​​ពី​​​​សំណាក់​​​​​វៀតណាម រួម​​​ទាំង​​​ស្រះ​​​ធំៗ​​​​​​ដែល​​​គេ​​​ជីក​​​នៅ​​ចំណុច​​ “តំបន់​​​ស” មួយ​​​ក្នុង​​​ខេត្ត​​​រតនគិរី ​​​និង​​​ប៉ុស្តិ៍​​​យោធា​​​មួយកន្លែង​​​​​​ដែល​​​បាន​​​សាង​​​សង់​​​លើ​​​តំបន់ស​តាម​​​ព្រំដែន​​​​​​ជាប់​ខេត្ត​​​កណ្តាល​​​ផង​​​ដែរ​​​។

“តំបន់​​​ស” បែប​​​នេះ​​​គឺ​​​ជា​​​តំបន់​​​មាន​​​វិវាទ​​​​​​នៅ​​​ព្រំដែន​​​ដែល​​​ត្រូវ​​​បាន​​​កំណត់​​​សម្រាប់​​​ការ​​​ចរចា​​​នៅ​​​ពេល​​​អនាគត​​​រវាង​​​មន្ត្រី​​​គណៈ​​​កម្មាធិការ​​​ព្រំដែន​​​រួម ហើយ​ក្នុង​​ពេល​​ជា​​​មួយគ្នា​នេះ ​​​​​គ្មាន​​​ប្រទេស​​​ណា​​​មួយ​​​ត្រូវ​​​​​​បាន​​​អនុ​​​ញ្ញាត​​​ឲ្យ​​​អភិវឌ្ឍ ឬ​​​អះអាង​​​សិទ្ធិកាន់​​​កាប់​​​ឡើយ​​​។

លោក រៀល ខេមរិន្ទ្រ ក៏​​​​អះអាងដែរ​​​​​ថា រូបលោក​​​​​​ត្រូវ​​​បាន​​​ជន​​​ស៊ីវិល​​​វៀតណាម ​​​វាយ​​​នឹង​​​ដំបង​​​ឈើ​​​ ខណៈ​​​ដែល​លោក​​​កំពុង​​​ដឹក​​​នាំ​​​ក្រុម​​​សកម្មជន​​​កាល​​​ពីថ្ងៃ​​​ទី២៨​​​ ខែ​​​មិថុនា​​​ ទៅកាន់​​​​ចំណុច​​​​​មាន​​​វិវាទ​​​មួយ​​​នៃ​​​​ព្រំដែន​ជាប់​​​ខេត្ត​​​ស្វាយ​​​រៀង​​​ ដែល​​​​​​វៀតណាម ​​​កំពុង​​​ស្ថាបនា​​​ផ្លូវ​​​មួយខ្សែ។

ក្រសួង​​​ការរ​​​បរទេស​​​កម្ពុជា​​​ បាន​​​តាម​​​ដាន​​​រាល់​ការ​​​ចុះ​​​ទៅ​​​​​​ពិនិត្យ​​​មើល​​​ស្ថាន​​​ភាព​​​ដោយ​​​តំណាង​​​រាស្ត្រ​​​ និង​​​សកម្មរបស់​​​​​​ជន​​​គណបក្ស​​​សង្គ្រោះ​​​ជាតិ ហើយ​បាន​ចេញ​​​កំណត់​​​ទូត​​​ដែល​​​ប្រើ​​​ពាក្យ​សម្ដី​ធ្ងន់ៗ​ផ្ញើ​​ទៅវៀតណាម​​​ដើម្បី​​​​ទាម​​​ទារ​​​ឲ្យ​​​ពួក​​​គេបញ្ឈប់​​​ការ​​​កសាង​​​បែប​​​នេះ​​​ ពីព្រោះ​​​វា​​​ជា​ការ​បំពាន​ច្បាប់​​​ “​​​តំបន់​​​ស”។

លោក អ៊ូ វីរៈ​​​ អ្នក​​​វិភាគ​​​នយោបាយ​​​មួយរូប និង​​​ជា​​​ប្រធានស្ថាប័ន​​​ស្រាវជ្រាវ “​​​​​​វេទិកា​​​អនាគត​​​”បាន​​​លើក​​​ឡើង​​​ថា ការ​​​លាក់បាំង​​​ដ៏បត់​​​បែន​​​​​​របស់​​​​គណបក្ស​​​ប្រជាជន​​​កម្ពុជា​​​​​​​​​ ជំុវិញ​​​​​​ការ​​​កំណត់​​​ព្រំដែន​​​ជាមួយនឹង​​​ប្រទេស​​​​​​វៀតណាម​​​ តួយ៉ាង​​​ដូច​​​ជា​​​ការ​​​បន្ត​​​បដិសេធ​​​មិន​​​ព្រម​​​បង្ហាញ​​​ផែនទី​​​ព្រំដែន​​​ផ្លូវ​​​ការ​​​ជា​​​សាធារណៈ​​​នោះ គឺ​​​កំពុង​​​តែ​​​ជួយ​​​គណបក្ស​​​សង្គ្រោះ​​​ជាតិ​​​ឲ្យ​​​ទទួលបាន​​​ជោគ​​​ជ័យ​​​ក្នុង​​​​​​ការអនុវត្ត​​​​​យុទ្ធនាការ​​​​​​របស់​​​ខ្លួន​​​ប្រឆាំង​​​រដ្ឋា​​​ភិបាល​​​។

លោក អ៊ូ វីរៈ បាន​​​មាន​​​ប្រសាសន៍​​​ថា “ត្រង់​​​ចំណុច​​​​​​ខ្លះ​​​ គណបក្ស​​​ប្រឆាំង​​​កំពុង​​​​​​តែ​​​ទទួល​​​បាន​​​ជ័យ​​​ជម្នះ​​​នៅ​​​ក្នុង​​​ការ​​​តតាំង​​​ជា​​​សាធារណៈ​​​ ប៉ុន្តែ មិន​​​ចាំបាច់​​​ខិត​​​ខំ​​​ពេក​​​នោះ​​​ទេ​​​ ព្រោះ​​​ថា គណបក្ស​​​ប្រជាជន​​​កម្ពុជា​​​កំពុង​​​តែ​​​ជួប​​​ការ​​​លំបាក​​​ក្នុងការ​​​លុប​​​​​​បំបាត់​​​ប្រវត្តិ​​​ដែល​​​ជាប់​​​ឈ្មោះ​​​ថា​​​ជា​​​អាយ៉ង​​​យួន​​​ ហេតុ​​​ដូច្នេះ​​​វា​​​ជា​​​រឿង​​​ងាយ​​​ស្រួល​​ណាស់​​​​សម្រាប់​​​​​​នរណា​​​ម្នាក់​​​ទាញ​​​យក​​​ផល​​​ចំណេញ​​​ពី​​​បញ្ហា​​​នេះ”។

លោក​​​បាន​​​មាន​​​ប្រសាសន៍​​​បន្ថែមទៀត​​​​​​ថា “បញ្ហា​​​គឺ​​​នៅ​​​ត្រង់​​​ថា គណបក្ស​​​ប្រជាជន​​​កម្ពុជា​​​កំពុង​​​តែ​​​បង្ហាញ​​​ឲ្យ គេ​​​ឃើញ​​​ថា ហាក់​​​បី​​​ដូច​​​ជា​​​មាន​​​រឿង​​​លាក់​​​បាំ​​​ង​​​ជា​​​ច្រើន​​​ ហើយ​​​បញ្ហា​​​នេះ​​​នឹង​​​ធ្វើ​​​ឲ្យ​​​​​​ពល​​​រដ្ឋ​​​ខ្មែរ​​​មាន​​​ការ​​​សន្និដ្ឋាន​​​កាន់​​​តែ​​​ខ្លាំង​​​ឡើង​​​ៗ”។

រដ្ឋាភិបាល​​​របស់​​​លោក​​​នាយក​​​រដ្ឋ​​​មន្ត្រី ហ៊ុន សែន កំពុង​​​តែ​​​តស៊ូ​​​ដើម្បី​​​ឆ្លើយ​​​ត​​​ប​​​ទៅ​​​នឹង​​​ការ​​​អះអាង​​​របស់​​​គណបក្ស​​​សង្គ្រោះ​​​ជាតិ​​​ដែល​​​ថា ខ្លួន​​​កំពុង​​​បដិសេធ​​​មិន​​​ព្រម​​​បង្ហាញ​​​ផែន​​​ទី​​​ព្រំ​​​ដែន​​​ផ្លូវ​​​ការ ដោយ​​​សារ​​​តាម​​​ពិត​​​ទៅ​​​​​​កំពុង​​​តែ​​​ប្រើ​​​ប្រាស់​​​ផែន​​​ទី​​​ដែលគូស​​​​​​អំឡុង​​​វៀតណាម​​​កាន់​​​កាប់កម្ពុជា​​​ក្នុងទសវត្សរ៍​​​ឆ្នាំ​​​១៩៨០។

គួរ​​​បញ្ជាក់​​​ថា កាល​​​ពី​​​ថ្ងៃ​​​ច័ន្ទ លោកនាយក​​​រដ្ឋ​​​មន្ត្រី​​​ ហ៊ុន សែន បាន​​​សរសេរ​​​លិខិត​​​ផ្ញើ​​​ទៅ​​​​​​កាន់​​​លោក បាន​​​ គីមូន អគ្គលេខាធិការ​​​អង្គការ​​​សហប្រជា​​​ជាតិ​​​ដើម្បី​សុំ​​​ខ្ចី​ផែន​​​ទី​​​កម្ពុជា​​​​​​ផ្លូវ​​​ការ​​​ដែល​​​គូស​​​​​​ដោយប្រទេស​​​​​​បារាំង ​​​និង​​​​​​ដែលបាន​​​​​​តម្កល់​​​នៅ​​​អង្គការ​​​សហ​​​ប្រជា​​​ជាតិ​​​ដើម្បី​​​យក​​​មក​​​ផ្ទៀង​​​​​​ផ្ទាត់​​​ជាមួយ​​​នឹង​​​ផែន​​​ទី​​​ដែល​​​រដ្ឋាភ​​​បាល​​​បាន​​​ប្រើ​​​ដើម្បី​​​កំណត់​​​ព្រំដែន​​​។

លោក ហ្វាហាន ហាក (Farhan Haq) អ្នក​​​នាំ​​​ពាក្យ​​​​​​លោក​​​ បាន​​​ គីមូន បាន​​​លើក​​​ឡើង នៅ​​​ក្នុង​​​អីុម៉េល​​​មួយ​​​ថា លោក​​​អគ្គរដ្ឋលេខា​​​ធិការ សហប្រជាជាតិ​​​​​​កំពុង​​​តែ​​​ពិចារណា​​​លើ​​​សំណើ​​​នេះ​​​ហើយ​​​។

លោក ហ្វាហាន ហាក បាន​​​មាន​​​ប្រសាសន៍​​​ ថា “បាទ​​​ គាត់​​​បាន​​​ទទួល​​​លិខិត​​​នេះ​​​ហើយ។ យើង​​​កំពុង​​​តែ​​​សិក្សា​​​អំពី​​​បញ្ហា​​​នេះ​​​ ហើយ​​​អាច​​​​​​នឹង​​​ផ្តល់​​​ព័ត៌មាន​​​បន្ថែម​​​តាម​​​ក្រោយ​​​”៕ សុខុម និង ស៊ុយឈាង​​​     

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស