27 C
Phnom Penh

​សាល​ក្រម​ជុំវិញ​​សំណុំ​រឿង​ចាប់​ជំរិត​ ហើយ​សម្លាប់​​​ត្រូវ​បាន​ជំទាស់

ដោយ ឌឹ ខេមបូឌា ដេលី

បទវិភាគ

នៅ​ក្នុង​ការ​បង្ហាញ​ការ​ជំទាស់​ដ៏កម្រ​មួយ​ក្នុង​តុលាការកាលពី​ម្សិលមិញ​​ ព្រះរាជអាជ្ញា​អម​សាលា​ដំបូង​ខេត្ត​កណ្ដាល ​​បាន​​ប្ដឹង​ទាស់​នឹង​សាល​ក្រម​​ផ្តន្ទា​ទោស​បុរស​ពីរ​នាក់​​ដែល​ជាប់​ពាក់​ព័ន្ធ​​ក្នុង​ការ​ចាប់​ជំរិត​ហើយ​សម្លាប់​។

ព្រះរាជអាជ្ញា លឹម សុគន្ថា ​បាន​សុំ​ឲ្យ​មាន​ការ​ចោទ​ប្រកាន់​បុរស​បី​នាក់​ដែល​ជាប់​ពាក់​ព័ន្ធ​​​​​នៅ​ក្នុង​ការ​ចាប់ជំរិត​ហើយ​សម្លាប់​យុវជន​​​ ហេង ពិសិដ្ឋ អាយុ​២៥​ឆ្នាំ​ ជា​កូន​ប្រុស​របស់​ម្ចាស់​​ហាង​នំប៉័ងដែល​មាន​សាខា​ច្រើន​កន្លែង​​​​ពីបទ​មនុស្ស​ឃាត​​គ្រោង​ទុក​ជាមុន​​កាលពី​ខែ​កក្កដា ឆ្នាំ​២០១៤​ ក្រោយ​ការ​ស៊ើបអង្កេត​អស់​​​រយៈ​ពេល​ជា​ច្រើន​ខែ​។

តែទោះ​ជាយ៉ាង​ណា នៅ​​ក្នុង​ការ​ប្រកាស​​​សាល​ក្រម​កាលពី​ថ្ងៃ​ច័ន្ទ លោក ហុក វ៉ាន់ធីណា ចៅក្រម​ប្រធាន​ក្រុម​ប្រឹក្សា​ជំនុំជម្រះ​ដែល​ក៏​ជា​ប្រធាន​សាលា​ដំបូង​ខេត្ត​កណ្ដាល​ដែរ​នោះ ​បាន​បន្ធូរ​បន្ថយ​​បទ​​ចោទ​ប្រកាន់​លើ​ជន​សង្ស័យ​​​ចំនួន​​ពីរ​នាក់​​​​ដែល​ម្នាក់​ឈ្មោះ ឥន្ធ រស្មី អាយុ​២៦​ឆ្នាំ និង​ម្នាក់​ទៀត​ឈ្មោះ សេង សុខ អាយុ​​​២៥​ឆ្នាំ ទៅ​ជា​បទ​រក្សា​​​ទុក​អាវុធ​​ខុស​ច្បាប់​ និង​​មិន​រាយការណ៍​អំពី​បទ​ឧក្រិដ្ឋ​​​​នេះ​ដល់​អាជ្ញាធរ​ ដោយ​​​ផ្តន្ទា​ទោស​​ពួកគេឲ្យ ជាប់​​​ពន្ធ​នា​គារ​​​​ក្នុង​ម្នាក់ៗ​​​​រយៈ​ពេល​១ឆ្នាំ ខណៈ​​ការ​ចោទ​​ប្រកាន់​ដ៏​ធ្ងន់ធ្ងរ​ត្រូវ​ធ្លាក់​​​លើ​​ជន​សង្ស័យ​ម្នាក់​ទៀត​ឈ្មោះ សេង ចន្ធី អាយុ​២៥​ឆ្នាំ ដែល​ត្រូវ​​​បាន​ផ្ដន្ទាទោស​ឲ្យ​ជាប់​ពន្ធនា​​​គារ​មួយ​ជីវិត​។

លោក សុគន្ថា មាន​ប្រសាសន៍​តាម​​ទូរ​ស័ព្ទ​​បន្ទាប់​ពី​ការ​ប្រកាស​សាល​ក្រម​ថា“​ខ្ញុំ​មិនអាច​ទទួល​យក​សេចក្ដី​សម្រេច​​ដែល​​​កែ​ប្រែការ​​​ចោទ​​ប្រកាន់​លើ​ចុងចោទ​​បាន​ឡើយ។ ខ្ញុំ​បាន​ប្ដឹង​ទាស់​នឹង​សេចក្ដី​សម្រេច​នេះ​រួចហើយ”។

លោក​បាន​មាន​ប្រសាសន៍​បន្ថែម​ថា“ ឆ្លង​កាត់​តាម​រយៈ​ការ​ស៊ើបអង្កេត​ យើង​បាន​រក​ឃើញ​ថា ជន​ទាំង​បី​នាក់​នេះ​សុទ្ធ​តែ​មាន​ជាប់​ពាក់​ព័ន្ធ​ ហើយ​ពួកគេ​បាន​ដឹក​ជន​រងគ្រោះ​​តាម​រថយន្ត​ជាមួយ​គ្នា​​​ បន្ទាប់ពី​ចាប់​ជន​រង​គ្រោះ​បាន​”។ លោក​​បន្ថែម​ថា ជន​សង្ស័យ ចន្ធី​​​ បាន​​​សារភាព​ថា ពួកគេ​ទាំងបីនាក់​សុទ្ធតែ​​ត្រូវ​ទទួល​ខុស​ត្រូវ​ស្មើៗ​គ្នា។

នៅ​ពេល​ទាក់ទង​កាលពី​ម្សិលមិញ លោក ​ចៅ​ វុទ្ធី នាយរង​ការិយាល័យ​ព្រហ្មទណ្ឌ​កម្រិត​​​ធ្ងន់​ខេត្ត​កណ្ដាល ដែល​ដឹកនាំ​ការ​ស៊ើប​អង្កេត​​​​​ក្នុង​សំណុំ​រឿង​ចាប់​ជំរិត​ហើយសម្លាប់​​នេះ ​ក៏​បាន​លើក​ឡើង​ផង​ដែរ​ថា លោក​​វង្វេង​វង្វាន់​​​អស់​ហើយ​​ដោយ​សារ​តែ​ការ​បន្ធូរ​បន្ថយ​ការ​ចោទ​ប្រកាន់​នេះ​។

លោក​បាន​មាន​ប្រសាសន៍​ថា“ ខ្ញុំ​មិន​យល់​​​សោះ​ ហេតុ​អ្វី​បានជា​តុលាការ​កែប្រែ​ការ​ចោទ​​​ប្រកាន់​លើ​ពួកគេ​។ ​បន្ទាប់ពី​ការ​ស៊ើប​​អង្កេត​របស់​យើង យើង​បាន​រក​ឃើញ​ថា សេង សុខ ក៏​ជា​ឃាតករ​ដែរ​”។ លោក​បាន​បន្ថែមថា ឥន្ធ រស្មី យ៉ាង​ហោច​ណាស់​ក៏​មាន​ជាប់​ពាក់​ព័ន្ធ​នៅ​ក្នុង​ឃាត​កម្ម​​នេះ​​ដែរ​។

លោក​ វុទ្ធី ក៏​បាន​លើក​ឡើង​ទៀត​ផង​ដែរ​ថា នគរ​បាល​កំពុងតែ​​តាម​ស្វែង​រក​ជន​សង្ស័យ​​ទី៤​នៅ​ឡើយ គឺ​​​ឈ្មោះ វឹត សុធារ៉ា ដែល​លោក​ចាត់ទុក​ថា ជា​មេខ្លោង​នៅ​ក្នុង​​ផែន​ការ​​​ជំរិត​ទារ​ប្រាក់ពី​គ្រួសារ​ដែល​មាន​​​ហាង​នំប៉័ង​យីហោ​ ហេង ចេង ជាច្រើន​​សាខា។

លោក ឡុង លន់ មេធាវី​របស់​​ ចន្ធី បាន​លើក​​​ឡើង​កាលពីម្សិលមិញ​ថា កូនក្ដី​របស់​ខ្លួន​​​បាន​សារភាព​ដោយ​សារ​មាន​ការ​ធ្វើ​​ទារុណ​កម្ម​។

រីឯ​លោក ណាច ទ្រី មេធាវី​របស់​ សេង សុខ វិញ​ ​លើក​ឡើង​ថា ​បន្ទាប់ពី​មាន​ការ​ពន្យារ​​​ពេល​ម្ដង​ហើយ​ម្ដង​ទៀត​នៅ​ក្នុង​សំណុំ​រឿង​នេះ​ លោក​មិន​បានយក​ចិត្តទុកដាក់​នឹង​​រឿង​ចូល​រួម​​ក្នុង​ការ​ផ្ដន្ទាទោស​​កាលពី​ថ្ងៃ​ច័ន្ទ​ឡើយ ហើយ​ក៏​មិន​បាន​ដឹង​ពី​សាល​ក្រម​នេះ​ដែរ​។

គេ​មិន​អាច​ទាក់​ទង​​ចៅក្រម​ វ៉ាន់​ធីណា ដើម្បី​សុំ​ការ​ធ្វើ​អត្ថាធិប្បាយ​បាន​ឡើយ​៕ ស៊ុយឈាង​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស