បន្ទាប់ពីមានអធិការកិច្ចនៅមណ្ឌលបណ្តុះបណ្តាលវិជ្ជាជីវៈពោធិ៍សែនជ័យ នៅក្រុងភ្នំពេញកាលពីថ្ងៃអង្គារ តំណាងរាស្ត្រគណបក្សប្រឆាំង លោកស្រី កែ សុវណ្ណរតន៍ កាលពីថ្ងៃពុធបានមានប្រសាសន៍ថា លោកស្រីកំពុងស្វះស្វែងសុំជំនួយពីអង្គការសហប្រជាជាតិ ក្នុងការដឹកជញ្ជូនទៅផ្ទះវិញនូវអ្នកជាប់ឃុំរាប់សិបនាក់នៅកន្លែងឃុំខ្លួនដែលមានឈ្មោះអាក្រក់ ដែលសុំអង្វរឲ្យមានការដោះលែងអំឡុងទស្សនកិច្ចរបស់លោកស្រី។
លោកស្រី សុវណ្ណរតន៍ បានមានប្រសាសន៍ថា “ខ្ញុំគិតថា ប្រសិនបើយើងធ្វើការជាមួយអង្គការសហប្រជាជាតិ វានឹងលឿនជាងធ្វើការជាមួយមន្ទីរសង្គមកិច្ចរាជធានី ពីព្រោះមន្ទីរសង្គមកិច្ចនឹងចាំបាច់ត្រូវបំពេញឯកសារថែមទៀត ដើម្បីដោះលែងនិងដឹកជញ្ជូនអ្នកជាប់ឃុំ”។
កាលពីរសៀលថ្ងៃអង្គារ នៅពេលតំណាងរាស្ត្រគណបក្សសង្គ្រោះជាតិនិងគណបក្សប្រជាជនកម្ពុជា ក្នុងគណៈកម្មការសុខាភិបាលរបស់សភា បានធ្វើដំណើរចុះពិនិត្យមណ្ឌលនេះ ដែលគេស្គាល់ថា ព្រៃស្ពឺ នោះ មនុស្សជាច្រើនក្នុងចំណោមជិត១០០នាក់នៅមណ្ឌលនេះ បានអង្វរសុំឲ្យដោះលែងពួកគេ។ លោកស្រី សុវណ្ណរតន៍ ដែលជាប្រធានគណៈកម្មការនេះ បានសន្យានឹងពួកគេថា លោកស្រីនឹងទាក់ទងអង្គការសហប្រជាជាតិនៅព្រឹកស្អែក។
យោងតាមអ្នកជាប់ឃុំនិងក្រុមសិទ្ធិមនុស្សបានឲ្យដឹងថា ការរំលោភបំពានលើផ្លូវកាយនិងផ្លូវភេទកើតឡើងច្រើននៅព្រៃស្ពឺ រីឯស្ថានភាពសុខភាពនិងអនាម័យវិញអាក្រក់ហួសពីការស្មាន។ ការបណ្តុះបណ្តាលវិជ្ជាជីវៈគឺគ្មានទេនៅទីនោះ។
ទាក់ទងកាលពីថ្ងៃពុធ លោកស្រី សុវណ្ណរតន៍ បានមានប្រសាសន៍ថា លោកស្រីមិនអាចទាក់ទងមន្ត្រីនៅអង្គការសហប្រជាជាតិ ដែលលោកស្រីមិនបានប្រាប់ឈ្មោះបានទេ។
លោកស្រីបានមានប្រសាសន៍ថា លោកស្រីបាននិយាយជាមួយប្រធានមន្ទីរសង្គមកិច្ចរាជធានី លោក សន សុផល ដែលបានប្រាប់លោកស្រីថា លោកកំពុងដំណើរការរៀបចំការដឹកជញ្ជូនអ្នកជាប់ឃុំមួយចំនួន ដើម្បីឲ្យពួកគេអាចត្រឡប់ទៅខេត្តកំណើតរបស់ខ្លួនវិញ។
ទាក់ទងដោយអ្នកយកព័ត៌មានកាលពីម្សិលមិញ លោក សុផល បានអះអាងថា អ្នកនៅមណ្ឌលនេះទាំងអស់ដែលចង់ទៅផ្ទះវិញ ត្រូវបានដោះលែងអស់ហើយ។
លោកបាននិយាយថា “ខ្ញុំបានអនុញ្ញាតឲ្យពួកគេចាកចេញហើយ។ ខ្ញុំមិនដឹងថា នៅសល់មនុស្សប៉ុន្មានទៀតទេ។ ខ្ញុំមិនដឹងថានៅមានមនុស្សប៉ុន្មាននាក់នៅទីនោះទេ ពីព្រោះខ្ញុំមិនបានរាប់ពួកគេ”។
លោកស្រី វ៉ាន ហ៊ីលី តំណាងការិយាល័យស្នងការជាន់ខ្ពស់របស់អង្គការសហប្រជាជាតិ ទទួលបន្ទុកសិទ្ធិមនុស្ស (OHCHR) បានមានប្រសាសន៍តាមរយៈសារអេឡិចត្រូនិកកាលពីថ្ងៃពុធថា លោកស្រី សុវណ្ណរតន៍ មិនបានទាក់ទងការិយាល័យរបស់លោកស្រីទេ ប៉ុន្តែនឹងជួយជនជាប់ឃុំឲ្យបានត្រឡប់ទៅផ្ទះវិញ បើមានការស្នើសុំ។
លោកស្រីបានមានប្រសាសន៍ថា “OHCHR ទៅមើលព្រៃស្ពឺជាទៀងទាត់ ហើយយើងតែងតែត្រៀមជួយអ្នកដែលចង់ចាកចេញ”។ លោកស្រីបានបន្ថែមថា ស្ថានការណ៍នៅព្រៃស្ពឺ និងមណ្ឌលឃុំខ្លួនស្រដៀងនេះ នៅតែជាកង្វល់នៅឡើយ។
លោកស្រី លី បានមានប្រសាសន៍ ដោយអំពាវនាវឲ្យពិនិត្យការអនុវត្តនៃ “ការប្រមូលនិងឃុំខ្លួនមនុស្សដែលមិនបានប្រព្រឹត្តកំហុស ដោយគ្រាន់តែមើលឃើញភាពក្រីក្រនិងគ្មានផ្ទះសំបែងនោះថា “សេចក្តីត្រូវការនៅតែបន្ទាន់ យ៉ាងហោចណាស់ទាក់ទិននឹងថ្នាំពេទ្យ អាហារ និងអនាម័យ របស់អ្នកដែលត្រូវគេចាប់ប្រមូលនិងឃាត់ទុកនៅតាមមណ្ឌលនានា”៕ និត (រាយការណ៍បន្ថែមដោយ Alex Consiglio)