EdC៖ បន្ទោស​​​អាកាស​​​ធាតុ​​​ចំពោះ​​​វិក្កយបត្រ​​​អគ្គិសនី​​​ប្រែប្រួល​​​តម្លៃ

អគ្គិសនី​កម្ពុជា​ (EdC) បាន​​​ចេញ​​​សេចក្តី​​​ជូន​​​ដំណឹង​​​កាល​​​ពីថ្ងៃ​​​អង្គារ ដោយ អះ​​​អាង​​​ថា វិក្កយបត្រ​​​អគ្គិសនី​​​​​​កើន​​​ឡើង​​​ដោយ​​​សារ​​​អាកាស​​​ធាតុ​​​ក្តៅ​​​ មិនមែន​​​ដោយ​​​សា​​​រការ​​​​ប្រែ​​​ប្រួល​​​អត្រា​​​​​​ តម្លៃ​​​​​​ដែលគិតថ្លៃពីអតិថិជន ​​​នោះ​​​ឡើយ​​​។

សេចក្តី​​​ជូន​​​ដំណឹង​​​ដែល​​​ចុះ​​​ហត្ថលេខា​​​ដោយ​​​លោក កែវ រតនៈ អគ្គនាយក​​​ EdC បាន​​​លើក​​​ឡើង​​​ថា “កាល​​​ពី​​​ខែ​​​មេសា ឧសភា និង​​​ខែ​​​មិថុនា វា​​​ជា​​​រដូវ​​​ក្តៅ​​​ ដូច្នេះ​​​អ្នក​​​ប្រើ​​​ប្រាស់​​​អគ្គិសនី​​​តែង​​​តែ​​​ប្រើ​​​ច្រើន​​​។ រដ្ឋាភិបាល​​​មិន​​​មាន​​​គម្រោង​​​បោក​​​ប្រាស់អតិថិជន​​​ទេ​​​។ ប្រសិន​​​បើ​​​អតិថិជន​​​មាន​​​ចម្ងល់​​​អំពី​​​ការ​​​ប្រើ​​​ប្រាស់​​​អគ្គិសនី​​​នៅ​​​លើ​​​កុង​​​ទ័រ​​​អគិ្គសនី​​​របស់​​​ខ្លួន​​​ពួក​​​គាត់​​​អាច​​​​​មក​​​​​​កាន់​​​ការិយាល័យ​​​ធ្វើ​​​ការ​​​តវ៉ា​​​បាន​​​”។

នៅ​​​ក្នុង​​​រាជ​​​ធានី​​​ភ្នំពេញ លោក អា៊ាន សាវុធ អនុប្រធាន​​​សាខា EdC ក្នុង​​​​​​សង្កាត់​​​ចាក់​​​អង្រែ​​​ក្រោម​​​ ខណ្ឌ​​​មាន​​​ជ័យ​​​ថ្លែង​​​ថា ការិយា​​​ល័យ​​​​របស់​​​លោក​​​ទទួល​​​បាន​​​លិខិត​​​តវ៉ា​​​នៅ​​​ឆ្នាំ​​​នេះ​​​ច្រើន​​​ជាង​​​​​​ឆ្នាំ​​​មុន​​​។ លោក​​​បាន​​​បន្ត​​​ថា “យើង​​​ទទួល​​​បាន​​​​​​លិខិត​​​តវ៉ា​​​​​​ពី​​​​អតិថិជន​​​អំពី​​​កុង​​​ទ័រ​​​អគ្គិសនី​​​ និង​​​ការ​​​កើន​​​ឡើង​​​តម្លៃយ៉ាង​​​ខ្លាំង​​​​​​នៅ​​​​​​លើ​​​វិក្កយបត្រ​​​​​​ប្រើ​​​ប្រាស់​​​អគ្គិសនី​​​​​​”។

លោក​​​បាន​​​បន្ថែម​​​ថា “ខ្ញុំ​​​យល់​​​ស្រប​​​ថា វិក្កយបត្រ​​​អគ្គិសនី​បាន​​​កើន​​​ឡើង​​​គ្រប់​​​កន្លែង​​​ក្នុង​​​រាជ​​​ធានី​​​ភ្នំពេញ និង​​​តាម​​​បណ្តា​​​ខេត្ត​​​។ សូម្បី​​​នៅ​​​​ផ្ទះ​​​របស់​​​ខ្ញុំ​​​ក៏​​​កើន​​​ឡើង​​​ដែរ​​​”។

ទោះ​​​ជាយ៉ាងណា  លោក សាវុធ បាន​​​និយាយ​​​​​​​​​ឡើង​​​វិញ​​​ថា វិក្កយបត្រ​​​អគ្គិសនី​​​កើន​​​ឡើង​​​ដោយ​​​សារ​​​តែ​​​អាកាស​​​ធាតុ​​​ក្តៅ​​​ខ្លាំង​​​​​​នៅ​​​ក្នុង​រយៈ​​​ពេលប៉ុន្មាន​​​ខែ​​​នេះ​​​។

សេចក្តី​​​ជូន​​​ដំណឹង​​​របស់​​​EdC​​​ បណ្តាល​​​ឲ្យ​​​មាន​​​ការ​​​ចោទ​​​សួរ​​​យ៉ាង​​​ច្រើន​​​​​​ជុំ​​​វិញ​​​វិក្កយបត្រ​​​អគ្គិសនី​​​ដែល​​​កើន​​​ឡើងបែប​​​​នេះ ទាំង​​​តាម​​​ប្រព័ន្ធ​​​អីុធើ​​​ណិត និងការ​​​​មកដោយ​​​​ផ្ទាល់​​​​​​។

នៅ​​​ការិយាល័យ​​​កណ្តាល​​​របស់ EdC នៅ​ជិត​​​​វត្ត​​​ភ្នំ​​​កាល​​​ពី​​​ថ្ងៃ​​​សុក្រ ម៉ុន សុខា ជា​​​និស្សិត​​​សាកល​​​​វិទ្យាល័យ​​​ម្នាក់​​​ដែល​​​ជួល​​​អាផាតមិន​​​ក្នុង​​​រាជ​​​ធានីភ្នំពេញ​​​បាន​​​​​​លើកឡើង​​​ថា ការ​​​កើន​​​ឡើង​​​តម្លៃ​​​ប្រើប្រាស់​នៅ​​​លើ​​​វិក្កយបត្រ​​​អគ្គិសនី​​​ គឺ​​​ខ្ពស់​​​ណាស់​​​មិន​​​អាច​​​មិន​​​អើពើ​​​បាន​​​ឡើយ​​​។

សុខា បាន​​​និយាយ​​​មុន​​​ពេល​​​ដាក់​​​ពាក្យ បណ្តឹង​​​​នៅ​​​ EdC​​​ ថា “ប្រសិន​​​បើ​​​វា​​​កើន​​​ឡើង​​​បន្តិច​​​បន្តួច​​​ ខ្ញុំ​ក៏​​​មិន​​​​​​មក​​​តវ៉ា​​​ដែរ​​​​​​​​​ ប៉ុន្តែ វា​​​កើន​​​ឡើង​​​ខ្លាំង​​​ពេក។ និស្សិត​​​រូប​​​នេះ​​​បាន​​​បន្ត​​​ថា “តាម​​​ធម្មតា​​​ខ្ញុំ​​​បង់​​​ប្រាក់​​​ប្រហែល​​​១១២​​​ដុល្លារ​​​ក្នុង​​​មួយ​​​ខែ​​​ ប៉ុន្តែ រយៈ​​​ពេល​​​ពីរ​​​ខែ​​​ចុង​​​ក្រោយ​​​នេះ​​​ ខ្ញុំ​​​បង់​​​ប្រហែ​​​ល១៨៥​​​ដុល្លារ​​​ ដោយ​​​ប្រើ​​​របស់ប្រើប្រាស់​ដដែល​​​​​​”។

តុលា ជា និង ជា នា ដែល​​​ផ្លាស់​​​មក​​​រស់​​​នៅ​​​ក្នុង​​​ប្រទេស​​​កម្ពុជា​​​ពី​​​អូស្ត្រាលី​​​កាល​​​ពី​​​ឆ្នាំ​​​មុន​​​ និង​​​បើក​​​អាជីវកម្មផ្ទាល់ខ្លួន​​​ក្នុង​​​រាជ​​​ធានី​​​ភ្នំពេញ​​​បាន​​​​​​លើក​​​ឡើង​​​ថា វិក្កយបត្រ​​​អគ្គិសនី​​​កាល​​​ពី​​​ខែ​​​មុន​​​គឺ​​​ប្រហែល​​​២៥​​​ភាគ​​​រយ​​​ខ្ពស់​​​ជាង​​​ធម្មតា​​​។

លោក ជា បាន​​​មាន​​​ប្រសាសន៍ ថា  ដោយ​​​មិន​​​អាច​​​ពិនិត្យ​​​មើល​​​កុង​​​ទ័រ​​​​​​របស់​​​ខ្លួន​​​បាន​​​ ដែល​​​គេ​​​ដាក់​​​នៅ​​​លើបង្គោល​​​​​​ខ្ពស់​​​​​​ ពួក​​​គាត់​​​មិន​​​អាច​​​កំណត់​​​ថា ពួក​​​គាត់​​​ប្រើ​​​ប្រាស់​​​អគ្គិសនី​​​អស់​​​ច្រើន ឬ​គេ​យក​តម្លៃលើស​ពី​ពួកគាត់​​​​នោះ​​​ឡើយ​​​។

អ្នកស្រី នា បាន​​​និយាយ​​​ថា  វិក្កយបត្រ​​​អគ្គិ​​​ សនី​​​ចុង​​​ក្រោយ​​​របស់​​​ពួកគាត់ស្មើ​​​ទៅ​​​នឹង​​​អ្វី​​​ដែលពួក​​​គាត់​​​​​​​​​បាន​​​បង់​​​​​​ក្នុង​​​ប្រទេស​​​អូស្ត្រាលី។ “បើ​​​យើង​​​ប្រៀប​​​ធៀប​​​តម្លៃនេះ​ទៅ​នឹង​​​​​​ប្រាក់​​​ខែអ្នក​​​មក​​​ពី​​​ប្រទេស​​​ក្រីក្រវិញ​​​ វា​​​គួរ​ឲ្យ​​​​អស់​​​សំណើច​​​មែន​​​ទេ​​​?”៕សារុន​​​