នៅក្នុងករណីដាច់ដោយឡែកពីរកាលពីថ្ងៃអង្គារ នគរបាលបានចាប់ខ្លួនបុរសកសិករវ័យ៦១ឆ្នាំម្នាក់ក្នុងខេត្តពោធិ៍សាត់ បន្ទាប់ពីប្ដីប្រពន្ធពីរនាក់ចោទប្រកាន់គាត់ថា បានរំលោភកូនស្រីអាយុ១២ឆ្នាំរបស់ខ្លួន ខណៈអាជ្ញាធរខេត្តក្រចេះបានឃាត់ខ្លួនបុរសវ័យ២៨ឆ្នាំម្នាក់ទៀតពីបទរំលោភក្មេងប្រុសអាយុ៨ឆ្នាំ។
នគរបាលខេត្តពោធិ៍សាត់បានចាប់ខ្លួនឈ្មោះ ចាន់ សាវិន នៅក្នុងឃុំស្នាអន្សា ស្រុកក្រគរ បន្ទាប់ពីទទួលបានពាក្យបណ្ដឹងពីឪពុកម្ដាយរបស់ក្មេងស្រីអាយុ១២ឆ្នាំ នេះបើយោងតាមការឲ្យដឹងពីលោក កែ សុគន្ធា ស្នងការរងខេត្តនេះ។ លោកបានលើកឡើងទៀតថា ឪពុកម្ដាយរបស់ក្មេងស្រីរងគ្រោះបានប្រាប់នគរបាលថា ឈ្មោះ ចាន់ សាវិន បានរំលោភកូនស្រីរបស់ខ្លួនលើកទី១កាលពីថ្ងៃសុក្រ និងលើកទី២កាលពីថ្ងៃអង្គារ។
លោកបន្តថា “ ជនល្មើសបានគំរាមសម្លាប់ក្មេងស្រីរងគ្រោះ បើនាងប្រាប់ម្ដាយនាង ឬនរណាម្នាក់នៅក្នុងមូលដ្ឋាន ដូច្នេះហើយក្មេងស្រីរងគ្រោះក៏លាក់បាំងព័ត៌មាននេះរហូតដល់ម្សិលមិញ”។ ពេលម្ដាយក្មេងស្រីរងគ្រោះទៅដល់ផ្ទះរបស់ខ្លួនវិញកាលពីថ្ងៃអង្គារ សង្កេតឃើញកូនស្រីរបស់គាត់ស្លេកស្លាំងយ៉ាងខ្លាំង ហើយក៏បានបញ្ចុះបញ្ចូលនាងឲ្យប្រាប់គាត់ថា តើមានអ្វីកើតឡើង។
លោកបន្ថែមទៀតថា “ បុរសចំណាស់រូបនោះបានរំលោភក្មេងស្រីរងគ្រោះចំនួនពីរដង [កាលពីថ្ងៃអង្គារ] ព្រោះឪពុកម្ដាយរបស់នាងបានទុកនាងឲ្យនៅតែឯង។ ជនសង្ស័យជាបុរសពោះម៉ាយ ដូច្នេះហើយទើបបានជាគាត់ទប់អារម្មណ៍មិនបាន នៅពេលគាត់ឃើញក្មេងស្រីរងគ្រោះនៅតែម្នាក់ឯង”។ លោកបានបញ្ជាក់ថា ឈ្មោះ ចាន់ សាវិន ត្រូវបានឃុំខ្លួននៅស្នងការដ្ឋានខេត្ត ហើយនឹងត្រូវបញ្ជូនខ្លួនទៅតុលាការនៅថ្ងៃនេះ។
នៅខេត្តក្រចេះ នគរបាលចាប់ខ្លួនឈ្មោះ យ៉ា ថន អាយុ២៨ឆ្នាំ នៅផ្ទះរបស់ជនសង្ស័យក្នុងឃុំកំពង់ចាម ស្រុកសំបូរ បន្ទាប់ពីឪពុកម្ដាយរបស់ក្មេងប្រុសអាយុ៨ឆ្នាំ ដែលជាអ្នកជិតខាងរបស់ខ្លួន បានដាក់ពាក្យបណ្ដឹងចោទប្រកាន់ខ្លួនពីបទរំលោភកូនប្រុសរបស់ពួកគាត់ នេះបើយោងតាមការលើកឡើងរបស់លោក ឈិន សំបូរ អធិការរងស្រុកសំបូរ។
លោកបានថ្លែងថា ករណីរំលោភនេះបានកើតឡើងកាលពីយប់ថ្ងៃច័ន្ទ បន្ទាប់ពីឈ្មោះ យ៉ា ថន ដែលជាមនុស្សទាត់ខ្យល់ បានបញ្ចុះបញ្ចូលក្មេងប្រុសរងគ្រោះឲ្យទៅមាត់ទន្លេជាមួយខ្លួននៅក្បែរផ្ទះរបស់ពួកគេ។“ នៅម៉ោងប្រហែល១០យប់ថ្ងៃច័ន្ទ ជនល្មើសបានបញ្ចុះបញ្ចូលក្មេងប្រុសរងគ្រោះឲ្យទៅមាត់ទន្លេ ហើយក៏រំលោភក្មេងប្រុសរងគ្រោះនៅទីនោះ។ អ្នកភូមិបានបញ្ចាំងភ្លើងចំមុខជនល្មើស ហើយពេលនោះជនល្មើសក៏បានរត់គេចខ្លួនពីកន្លែងកើតហេតុភ្លាមៗ”។
ក្រោយពីត្រូវចាប់ខ្លួននៅផ្ទះរបស់ជនល្មើសក្នុងថ្ងៃបន្ទាប់ ឈ្មោះ យ៉ា ថន សារភាពថា ខ្លួនពិតជាបានរំលោភក្មេងប្រុសរងគ្រោះមែន។ លោក ឈិន សំបូរ បានលើកឡើងអំពីមូលហេតុដែលនាំឲ្យជនល្មើសប្រព្រឹត្តបទល្មើសថា “ ជនល្មើសស្រវឹងស្រា គ្មានប្រពន្ធ ហើយមិនអាចទប់អារម្មណ៍បាន”។ លោកបានបញ្ជាក់ថា ឈ្មោះ យ៉ា ថន នឹងត្រូវបញ្ជូនខ្លួនឡើងតុលាការនៅថ្ងៃនេះ៕ សុខុម