នៅចុងបញ្ចប់នៃថ្ងៃទី៣ និងជាថ្ងៃចុងក្រោយនៃកិច្ចប្រជុំរបស់គណៈកម្មាធិការព្រំដែនចម្រុះនៅក្នុងរាជធានីភ្នំពេញកាលពីម្សិលមិញ គណៈប្រតិភូកម្ពុជា និងវៀតណាមបានជល់កែវស្រាសំប៉ាញ អំឡុងពិធីចុះហត្ថលេខាជាសាធារណៈ ហើយបានចាកចេញទៅវិញដោយមិនផ្ដល់ព័ត៌មានលម្អិតជុំវិញការពិភាក្សារបស់ភាគីទាំងពីរឡើយ។
ដោយបន្តរក្សាភាពស្ងាត់ស្ងៀមមិននិយាយអ្វីសោះអំពីការចរចានេះ លោក វ៉ា គឹមហុង រដ្ឋមន្ត្រីទទួលបន្ទុកកិច្ចការព្រំដែន បានដើរប្រជ្រៀតក្រុមអ្នកយកព័ត៌មានចូលទៅក្នុងជណ្ដើរយន្ត បន្ទាប់ពីកិច្ចប្រជុំនៅឯទីស្ដីការគណៈរដ្ឋមន្ត្រី។
លោក វ៉ា គឹមហុង បានថ្លែងទៅកាន់ក្រុមអ្នកយកព័ត៌មានក្រោយពីកិច្ចប្រជុំដែលមានរយៈពេលជាង៣ម៉ោងនេះថា “ វាស្ថិតនៅក្នុងសេចក្ដីថ្លែងការណ៍។ ខ្ញុំបានចេញសេចក្ដីថ្លែងការណ៍រួចហើយ ដូច្នេះសូមទៅមើលវាទៅ។ យើងបានពិភាក្សាគ្នាអស់ហើយ”។
ចំណែកឯលោក ហូ ស៊័ន សឺន អនុរដ្ឋមន្ត្រីការបរទេសវៀតណាម ដែលជាប្រធានគណៈប្រតិភូរបស់វៀតណាម ដែលចូលរួមនៅក្នុងការពិភាក្សានេះ បដិសេធមិនផ្ដល់បទសម្ភាសទេ ដោយនិយាយជាភាសាអង់គ្លេសទៅកាន់ក្រុមអ្នកយកព័ត៌មានថា “ ខ្ញុំត្រូវទៅអាកាសយានដ្ឋានហើយ”។
លោកស្រី គុយ ពិសី អនុប្រធានគណៈកម្មាធិការព្រំដែនចម្រុះរបស់កម្ពុជា បានមានប្រសាសន៍កាលពីថ្ងៃច័ន្ទថា កិច្ចប្រជុំនេះនឹងដោះស្រាយការកំណត់ព្រំដែនដែលមិនទាន់ចប់រួចរាល់ ព្រមទាំងបាតុភាពមួយចំនួនដែលបានផ្ទុះឡើងកាលពីពេលថ្មីៗនេះនៅតាមបណ្ដោយព្រំដែន នៅពេលគណបក្សសង្គ្រោះជាតិបានដឹកនាំការធ្វើដំណើរចុះទៅពិនិត្យមើលបង្គោលព្រំដែនផងដែរ។
ទោះជាយ៉ាងណា សេចក្ដីថ្លែងការណ៍សង្ខេបដែលត្រូវបានចែកជូនបន្ទាប់ពីកិច្ចប្រជុំចុងក្រោយកាលពីម្សិលមិញនេះ មិនបានបង្ហាញលទ្ធផលជាក់លាក់នោះទេ។
សេចក្តីថ្លែងការណ៍នេះមានខ្លឹមសារដូច្នេះថា “ ប្រជុំនេះបានដំណើរការទៅប្រកបដោយបរិយាកាសស្និទ្ធស្នាល ឈរលើមូលដ្ឋាន និងស្មារតីគោរពគ្នាទៅវិញទៅមកនូវឯករាជ្យ អធិបតេយ្យភាព និងបូរណភាពទឹកដីនៃប្រទេសនីមួយៗ។
ទី១ ភាគីទាំងពីរទទួលស្គាល់ថា ការងារខណ្ឌសីមា និងបោះបង្គោលព្រំដែនគោករវាងប្រទេសទាំងពីរមានភាពស្មុគស្មាញច្រើន ទោះជាភាគីទាំងពីរបានបោះបង្គោលព្រំដែនបានចំនួនប្រមាណ៨៣ភាគរយរួចហើយក៏ដោយ។ ភាគីទាំងពីរឯកភាពគ្នាថានឹងខិតខំបញ្ចប់កិច្ចការព្រំដែនឱ្យបានចប់នាពេលខាងមុខ។
ទី២ ភាគីទាំងពីរឯកភាពអនុម័តឱ្យបានម៉ឺងម៉ាត់តាមស្មារតីនៃសេចក្តីប្រកាសព័ត៌មានរួមចុះថ្ងៃទី១៧ ខែមករា ឆ្នាំ១៩៩៥ ស្តីពីការរក្សាស្ថានភាពបច្ចុប្បន្ននៅតាមបណ្តោយព្រំដែន។
ទី៣ ភាគីទាំងពីរឯកភាពឱ្យក្រុមបច្ចេកទេសចម្រុះព្រំដែន ក៏ដូចជាអាជ្ញាធរពាក់ព័ន្ធនៅតាមបណ្តាខេត្តជាប់ព្រំដែននៃប្រទេសទាំងពីរ សហការគ្នាដោះស្រាយឱ្យមានប្រសិទ្ធភាព រាល់បាតុភាពដែលកើតមានឡើងតាមបណ្តោយព្រំដែន ដើម្បីទប់ស្កាត់ និងបញ្ចៀសការរីករាលដាល ដែលនាំឱ្យប៉ះពាល់ដល់ទំនាក់ទំនងល្អរវាងប្រទេសទាំងពីរ”។
លោក សម រង្ស៊ី ប្រធានគណបក្សសង្គ្រោះជាតិ បានមានប្រសាសន៍តាមទូរស័ព្ទបន្ទាប់ពីកិច្ចប្រជុំនេះថា សេចក្ដីថ្លែងការណ៍ផ្លូវការនេះបានបង្ហាញយ៉ាងច្បាស់ថា ភាគីទាំងពីរមិនបានដោះស្រាយបញ្ហាព្រំដែនដែលកើតឡើងកាលពីពេលថ្មីៗនេះទេ។
លោកបានលើកឡើងថា “ សេចក្ដីថ្លែងការណ៍របស់ពួកគេបង្ហាញថា មានបញ្ហាដែលមិនទាន់បានដោះស្រាយ។ របៀបសរសេរសេចក្ដីថ្លែងការណ៍នេះបង្ហាញថា ពួកគេមិនអាចឈានដល់កិច្ចព្រមព្រៀងនោះទេ”។
ប៉ុន្តែលោកបានថ្លែងថា លោកសង្ឃឹមថា នោះជាសញ្ញាបង្ហាញថា លោក វ៉ា គឹមហុង និងអ្នកចរចាផ្សេងទៀតដែលតំណាងឲ្យភាគីកម្ពុជា បានបដិសេធមិនធ្វើតាមការទាមទាររបស់ភាគីវៀតណាម។
លោកបានមានប្រសាសន៍បន្ថែមទៀតថា“ គណបក្សសង្គ្រោះជាតិគាំទ្ររដ្ឋាភិបាលដរាបណារដ្ឋាភិបាលប្រើប្រាស់ឥរិយាបថរឹងមាំប្រកបដោយភាពត្រឹមត្រូវ។ យើងចង់ជំរុញឲ្យពួកគេរក្សាជំហររឹងមាំ និង
កាន់តែរឹងមាំឡើង ហើយយើងនឹងរួមបញ្ចូលការខំប្រឹងប្រែងរបស់យើងជាមួយការខំប្រឹងប្រែងរបស់រដ្ឋាភិបាល ដើម្បីគោលបំណងការពារបូរណភាពទឹកដីរបស់កម្ពុជា”៕សុខុម (រាយការណ៍បន្ថែមដោយ Alex Willemyns)