កាលពីម្សិលមិញ កំហឹងបានផ្ទុះចេញពីគ្រប់មជ្ឈដ្ឋាននៃសង្គម បន្ទាប់ពីមានការចាក់ផ្សាយរូបភាពវីដេអូកាមេរា៉សុវត្ថិភាពដែលបង្ហាញពីសកម្មភាពបុរសអ្នកជំនួញធំម្នាក់ប្រើអំពើហិង្សាវាយដំទៅលើពិធីការិនីទូរទស្សន៍ម្នាក់យ៉ាងសាហាវនៅឯភោជនីយដ្ឋានមួយកន្លែងក្នុងរាជធានីភ្នំពេញ កាលពីដើមខែនេះ។
ក្នុងកម្មវិធីផ្សាយនៅល្ងាចថ្ងៃពុធ ស្ថានីយទូរទស្សន៍ CNC បានចាក់ផ្សាយរូបភាពវីដេអូដែលបង្ហាញពីលោក សុខ ប៊ុន ឧកញ៉ាអចលនទ្រព្យ និងជាប្រធានសមាគមអ្នកវាយតម្លៃអចលនទ្រព្យកម្ពុជា ធ្វើសកម្មភាពដាល់ ទាត់ធាក់ សម្រាតខោអាវ និងជាន់ក្បាលកញ្ញា ឯក សុជាតា ឬដែលគេស្គាល់ថា សាសា ដែលជាអតីតពិធីការិនីប្រចាំនៅស្ថានីយទូរទស្សន៍ CTN បន្ទាប់ពីនាងព្យាយាមការពារនារីម្នាក់ទៀតមិនឲ្យឧកញ៉ារូបនេះចូលទៅរំខាននាង។
ពេលទាក់ទងទៅកាលពីម្សិលមិញ កញ្ញា ឯក សុជាតា និយាយថា នាងបានដាក់ពាក្យបណ្ដឹងបទប៉ុនប៉ងមនុស្សឃាតប្ដឹងបុរសពីរនាក់ជុំវិញហេតុការណ៍នេះ ដែលបណ្ដាអ្នកតស៊ូមតិការពារសិទ្ធិស្ត្រីលើកឡើងថា ឆ្លុះបញ្ចាំងពីផ្នត់គំនិតចាក់ឫសក្នុងសង្គមខ្មែរ ដែលយល់ថាបុរសមានទ្រព្យ និងមានអំណាចអាចធ្វើបាបស្ត្រីបាន ជាពិសេសស្ត្រីដែលបម្រើការងារនៅក្នុងឧស្សាហកម្មសេវាកម្ម។
លោក ហ៊ីង ប៊ុនថន ព្រះរាជអាជ្ញារងអមសាលាដំបូងរាជធានីភ្នំពេញ មានប្រសាសន៍ថា លោក សុខ ប៊ុន ត្រូវបានកោះហៅមកសាកសួរកាលពីថ្ងៃពុធ ជុំវិញហេតុការណ៍នេះដែលបានកើតឡើងកាលពីវេលាទៀបភ្លឺឈានចូលព្រឹកថ្ងៃទី២ ខែកក្កដា។
លោក សុខ ខេមរិន្ទ្រ ប្រធាននាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ បានបញ្ជាក់ថា នាយកដ្ឋានរបស់លោកកំពុងតាមចាប់ខ្លួនលោក សុខ ប៊ុន ហើយបានលើកឡើងថា ពាក្យចចាមអារ៉ាមដែលថាគាត់បានភៀសខ្លួនទៅប្រទេសសិង្ហបុរី អាចជាការពិត។ លោកបានគូសបញ្ជាក់ថា “បើគាត់មិនរត់ទេ ក៏លាក់ខ្លួនដែរ”។
លោកបានបន្ថែមថា តាមពិតកញ្ញា ឯក សុជាតា បានដាក់ពាក្យបណ្ដឹងបទប្រើអំពើហិង្សាដោយចេតនាមានស្ថានទម្ងន់ទោស ប៉ុន្តែមិនទាន់មានការសន្មត់ណាមួយនៅឡើយទេ លុះត្រាតែលោក សុខ ប៊ុន ចេញមុខបកស្រាយ។ “ យើងមិនអាចស្ដាប់តែម្ខាងបានទេ។ ពេលនេះយើងមានតែម្ខាងប៉ុណ្ណោះ”។ លោកបានបន្តថា ពេលនេះនគរបាលក៏កំពុងតាមចាប់ខ្លួនរកអង្គរក្សរបស់លោក សុខ ប៊ុន ដែលគេមិនស្គាល់អត្តសញ្ញាណផងដែរ។
កាលពីម្សិលមិញ មានការរំជើបរំជួលយ៉ាងខ្លាំងតាមប្រព័ន្ធផ្សព្វផ្សាយសង្គមក្នុងប្រទេសកម្ពុជា ដោយសារតែរូបភាពវីដេអូប្រើអំពើហិង្សានេះដែលបង្ហាញពីសកម្មភាពលោក សុខ ប៊ុន បោចសក់កញ្ញា ឯក សុជាតា អូសកាត់តុ សង្កត់នាងផ្ទុបទៅនឹងដី ហើយបានដាល់ និងទាត់ធាក់នាងយ៉ាងសាហាវ នៅពេលលោក សុខ ប៊ុន អូសនាងពេញបន្ទប់ ព្រមទាំងចាប់សម្រាតខោអាវរបស់នាងទៀតផង។
លោក ហ៊ុន ម៉ានី កូនប្រុសពៅរបស់លោកនាយករដ្ឋមន្ត្រី ហ៊ុន សែន និងជាតំណាងរាស្ត្រមណ្ឌលកំពង់ស្ពឺមកពីគណបក្សប្រជាជនកម្ពុជា បានចូលទៅកាន់ទំព័រហ្វេសប៊ុកត្រង់កន្លែងវីដេអូឃ្លីបត្រូវបានគេចែករំលែកព្រោងព្រាត ហើយបានសរសេរមតិយោបល់មួយចំនួនដើម្បីឲ្យគេដឹងពីជំហររបស់លោក។
លោកបានសរសេរនៅលើទំព័រហ្វេសប៊ុកផ្ទាល់ខ្លួនថា “ មិនថា បញ្ហានេះជាបញ្ហាអ្វីទេរាល់ការប្រើអំពើហិង្សាលើស្ត្រីជាដំណោះស្រាយ គឺជាអ្វីដែលសង្គមមិនអាចទទួលយកបាន និងជាទង្វើដែលត្រូវតែថ្កោលទោស”។
នៅក្នុងសេចក្តីថ្លែងការណ៍មួយរបស់ខ្លួនលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានលើកឡើងថា មន្ត្រីណាមួយនៅក្នុងក្រសួងរបស់លោកដែលរកឃើញថា បានប្រើអំពើហិង្សាលើស្ត្រី នឹងត្រូវបណ្តេញចោល។
លោកបានមានប្រសាសន៍ទាក់ទិននឹងការសម្រេចរបស់លោកថា “ ខ្ញុំត្រូវតែធ្វើដូច្នេះ ខ្ញុំនឹងធ្វើវា។ ខ្ញុំសូមប្រកាសនៅថ្ងៃនេះ”។
នៅក្នុងកិច្ចសម្ភាសន៍តាមទូរស័ព្ទកាលពីរសៀលម្សិលមិញ កញ្ញា ឯក សុជាតា ដែលនិយាយថា នាងកំពុងត្រៀមធ្វើដំណើរទៅកាន់ទីក្រុងបាងកក ឬសិង្ហបុរី ដើម្បីព្យាបាលរបួសស្នាម បានរៀបរាប់ពីហេតុការណ៍ដែលនាំឲ្យឈានដល់មានការវាយដំនេះ។
កញ្ញាបានលើកឡើងថា ម្ចាស់ហាង Le Gand នៅកោះពេជ្រ ដែលជាជនជាតិជប៉ុន បានផឹកស្រាជាមួយលោក សុខ ប៊ុន និងអង្គរក្សរបស់លោកដើម្បីបំពេញកាតព្វកិច្ចជាម្ចាស់ហាង។
កញ្ញានិយាយថា “ បុរសរូបនោះ [លោក សុខ ប៊ុន] បានបង្ខំឲ្យនាងផឹកស្រារហូតដល់ស្រវឹង ហើយបន្ទាប់មក លោក សុខ ប៊ុន បានហៅគេគិតលុយ ហើយដើរចេញទៅបាត់ជាមួយនឹងអង្គរក្ស”។ កញ្ញាបានបន្ថែមថា ស្ត្រីជនជាតិជប៉ុនរូបនេះដែលកញ្ញាមិនប្រាប់ឈ្មោះបានដេកដួលនៅលើសាឡុង កន្លែងដែលនាងបានផឹកស្រា។ប៉ុន្មាននាទីក្រោយមក បុរសទាំងពីរនាក់នេះបានដើរត្រឡប់ចូលមកក្នុងហាងវិញ ដោយមានបំណងនាំស្ត្រីជនជាតិជប៉ុនរូបនេះទៅជាមួយពួកគេ ក្នុងនោះមានទាំងការប្រើកម្លាំងបាយទៀតផង។
កញ្ញានិយាយទៀតថា “ អង្គរក្សរូបនោះជេរប្រមាថខ្ញុំម្តងហើយម្តងទៀត ហើយដកកាំភ្លើងភ្ជង់ខ្ញុំ ធ្វើឲ្យខ្ញុំទ្រាំមិនបានក៏យកទូរស័ព្ទគប់ដៃអង្គរក្សម្នាក់នោះដើម្បីឲ្យឈប់ភ្ជង់ខ្ញុំ…បន្ទាប់មកពួកគេបានហក់មកវ៉ៃខ្ញុំតែម្តង”។
លោកស្រី ធីតា ឃឹះ នាយិការអង្គការមិនមែនរដ្ឋាភិបាល និងជាអ្នកតស៊ូមតិដើម្បីសមភាពយេនឌ័រដ៏លេចធ្លោមួយរូបលើកឡើងថា ហេតុការណ៍នេះបង្ហាញឲ្យឃើញពីសង្គមដែលអ្នកមានទ្រព្យសម្បត្តិស្ដុកស្ដម្ភ និងមានអំណាច ចាត់ទុកអ្នកដែលធ្វើការនៅក្នុងឧស្សាហកម្មសេវាកម្មដូចទាសករ។
លោកស្រីបានមានប្រសាសន៍ថា “ បុរសទាំងនេះធ្វើដូច្នេះ ព្រោះពួកគេគិតថា មានតែឯង ដូចជាបុរសមួយចំនួនបានមើលងាយស្ត្រីដូចទាសករផ្លូវភេទ និងដូចរបស់លេងសើចដែលពួកគេធ្វើអ្វីក៏បានតាមអំពើចិត្ត”។
លោកស្រីបានលើកឡើងបន្តថា ខណៈបណ្តាញទំនាក់ទំនងសង្គមអាចជួយជំរុញឲ្យតុលាការដោះស្រាយករណីនេះ ការសរសេរមតិយោបល់តាមហ្វេសបុ៊កក៏បានបង្ហាញឲ្យឃើញពីទស្សនៈមួួយចំនួនដែរជុំវិញវិសមភាពយេនឌ័រដែលកើតមាននៅក្នុងប្រទេសកម្ពុជា។
លោកស្រីបានមានប្រសាសន៍ថា “ នារីៗបានសរសេរមតិយោបល់របស់ខ្លួនលើទំព័រហ្វេសប៊ុកដូចជា ប្រសិនបើពួកគេជានារីល្អ ហេតុអីបានជាចេញក្រៅនៅពេលយប់”។
លោកស្រីបន្ថែមទៀតថា បណ្តាញទំនាក់ទំនងសង្គមជួយឲ្យគេអាចមើលឃើញវីដេអូកាមេរ៉ាសុវត្ថិភាពពណ៌សខ្មៅនេះ ប៉ុន្តែ អំពើហិង្សាបែបនេះមិនមែនជារឿងថ្មីទេសម្រាប់ស្ត្រីរាប់ពាន់នាក់ដែលធ្វើការនៅក្នុងឧស្សាហកម្មសេវាកម្ម។
លោកស្រីបានមានប្រសាសន៍ថា“ ពួកគេបានឃើញផ្ទាស់ភ្នែកជាច្រើនលើកច្រើនសាមកហើយ។ វាថ្មីសម្រាប់យើងដែលមិនដែលចេញទៅកន្លែងទាំងនេះនៅពេលយប់”៕ សុខុម និង ស៊ុយឈាង