28 C
Phnom Penh

របាយការណ៍​ផ្ទុយ​គ្នា​​អំពី​កន្លែង​​លាក់​ខ្លួន​លោកឧកញ៉ា សុខ ប៊ុន

ដោយ ឌឹ ខេមបូឌា ដេលី

បទវិភាគ

នគរ​បាល​ដែល​ដឹកនាំ​ការ​ស្វែង​រក​ចាប់​ខ្លួន​ឧកញ៉ា​អចលនទ្រព្យ ​ដែល​​គេ​ឃើញ​តាម​វីដេអូ​ឃ្លីប​​វាយ​ដំ​យ៉ាង​ព្រៃផ្សៃ​លើ​​ស្ត្រី​ពិធីករ​ទូរទស្សន៍​ បាន​និយាយ​កាលពី​ថ្ងៃ​សុក្រ​ថា ពួកគេ​បាន​ដំណឹង​ថា គាត់​បាន​រត់​ភៀស​ខ្លួន​ទៅ​ប្រទេស​សិង្ហបុរី ​ក៏​ប៉ុន្តែ​ស្ត្រី​ម្នាក់​​នៅ​ភូមិគ្រឹះ​​របស់​គាត់​ក្នុង​ក្រុង​ភ្នំពេញ​បាន​និយាយ​ថា ​ឧកញា៉​រូប​នេះ​មិន​​បាន​ចាក​ចេញ​ពី​ទីក្រុង​នេះ​ទេ។

រូបភាព​កាមេរ៉ា​សុវត្ថិភាព​​ដែល​បាន​លេច​ឡើង​កាលពី​ថ្ងៃ​ពុធ បង្ហាញ​ឲ្យ​ឃើញ​លោក សុខ ប៊ុន ដែល​មាន​ងារ​ជា​ឧកញ៉ា​ វាយ​ដំ​​ពិធី​ករ​ ឯក សុជាតា ហៅ សាសា ក្នុង​សកម្មភាព​ទាត់​ធាក់​ ដាល់ និង​ច្រំក្បាល​​ប្រហែល​១នាទី​នៅ​ភោជនីយដ្ឋាន​មួយ​កន្លែង​ក្នុង​ក្រុង​ភ្នំពេញ នា​ពេល​រំលង​អធ្រាត្រ​ចូល​ថ្ងៃ​ទី​២ ខែ​កក្កដា។

ឧត្ដម​សេនីយ៍ទោ សុខ ខេមរិន្ទ្រ ប្រធាន​នាយកដ្ឋាន​​នគរ​បាល​ព្រហ្មទណ្ឌ​នៃ​ក្រសួង​មហាផ្ទៃ​ បាន​មាន​ប្រសាសន៍​ថា ការ​តាម​ស្វែង​រក​បាន​ចាប់​ផ្ដើម​នៅ​ថ្ងៃ​ទី២ ខែ​កក្កដា នៅ​ពេល​ដែល​​កញ្ញា សុជាតា ​​បាន​ដាក់​ពាក្យ​ប្ដឹង​ទាក់​ទិន​នឹង​ការ​វាយ​ធ្វើ​បាប​នេះ ប៉ុន្តែ​រហូត​មក​ដល់​ពេល​នេះ​​មិន​ទាន់​រក​ឃើញ​ទេ​។

លោក​បាន​មាន​ប្រសាសន៍​ថា “​យើង​បាន​ចាប់​ផ្ដើម​ [ស្វែង​រក​] បន្ទាប់ពី​យើង​​បាន​ទទួល​ពាក្យ​បណ្ដឹង​​ ប៉ុន្តែ​យើង​មិន​អាច​រក​ឧកញ៉ា សុខ ប៊ុន ឃើញ​។ យើង​ឮថា គាត់​បាន​រត់​​ភៀស​​ខ្លួន​ទៅ​ប្រទេស​សិង្ហបុរី​បាត់​ហើយ​។

ព្រះរាជអាជ្ញារង​តុលាការ​ក្រុង​​​បាននិយាយ​កាលពី​ថ្ងៃ​ព្រហស្បតិ៍​ថា លោក​បាន​កោះ​ហៅ​លោក ប៊ុន មក​សាក​សួរ​កាល​ពី​ថ្ងៃ​ពុធ។ លោក​ ខេមរិន្ទ្រ បាន​មាន​ប្រសាសន៍​កាល​ពី​ថ្ងៃ​សុក្រ​ថា តាំង​ពី​ពេល​នោះ​មក​លោក​បាន​ស្នើ​សុំ​ដីកា​ចាប់​ខ្លួន​លោក ប៊ុន។

ព្រះរាជអាជ្ញា​​​រង ហ៊ីង ប៊ុនថន បាន​បដិសេធ​មិន​អត្ថាធិប្បាយ​​ទេ​កាល​ពី​ថ្ងៃ​សុក្រ លោក ឡេង ណាង ក្រឡាបញ្ជី​របស់លោក​ក៏​មិន​អត្ថាធិប្បាយ​ដែរ​។

ការ​ចុះ​ទៅ​ដល់​ក្រុម​ហ៊ុន​ សុខ ប៊ុន គ្រុប របស់​លោក ប៊ុន ​អ្នក​យក​​ព័ត៌មាន​បាន​ទៅ​ដល់​ភូមិ​គ្រឹះ​មួយ​ក្នុង​ខណ្ឌ​ចំការ​មន ដែល​នៅ​ទីនោះ​ស្ត្រី​ម្នាក់​​បាន​ឆ្លើយ​ទូរស័ព្ទ​ពី​ខ្លោង​ទ្វារ​​ បាន​​បដិសេធ​ថា លោក ប៊ុន​ មិន​បាន​ភៀស​ខ្លួន​ទៅ​ប្រទេស​សិង្ហបុរី​ទេ​។ ស្ត្រី​រូប​នេះ​បាន​និយាយ​ដោយ​មិន​អធិប្បាយ​ច្រើន ឬ​ប្រាប់​ឈ្មោះ​ខ្លួន​ឯង​នោះ​ថា “​គាត់​ទើប​តែ​ចេញ​ពី​ផ្ទះ​អំបាញ់​មិញ​”។

កញ្ញា សុជាតា បាន​​និយាយ​កាលពី​ថ្ងៃ​សុក្រ​ថា កញ្ញា​ស្ថិត​នៅ​ក្នុង​មន្ទីរ​ពេទ្យ​​ក្រុង​បាងកក ដើម្បី​ព្យាបាល​​របួស​ដែល​ទំនង​ជា​របួស​សើៗ​ និង​ស្នាម​ជាំ។

តារាទូរទស្សន៍​រូប​នេះ​បាន​បដិសេធ​​សេចក្ដី​រាយការណ៍​​ក្នុង​កាសែត​ជា​ភាសា​ខ្មែរ​ដែល​ថា កញ្ញា​បាន​​ទារ​សំណង​១.០០០.០០០​ដុល្លារ​ពី​លោក បុ៊ន​​ នោះ​។

កញ្ញា​បាន​និយាយ​តាម​រយៈ​សារ​ថា “​យើង​មិន​ទាន់​គិត​អំពី​ប្រាក់​ទេ​”។

ក្រោយ​ពី​ការ​វាយ​ដំ​ធ្វើ​បាប​នៅ​​ក្នុង​ភោជនីយដ្ឋាន​​​មួយ​នៅ​កោះពេជ្រ កញ្ញា សុជាតា បាន​និយាយ​ថា កញ្ញា​ការ​ពារ​មិត្ត​របស់​ខ្លួន​គឺ​ម្ចាស់​ហាង​ជនជាតិ​ជប៉ុន ពី​ការ​បំពារ​បំពាន​ពី​លោក​ ប៊ុន។

រូបភាព​បង្ហាញ​ឲ្យ​ឃើញ​ថា កញ្ញា សុជាតា ​អន្តរាគមន៍​ខណៈ​ដែល​លោក ប៊ុន និង​អង្គរក្ស​របស់​គាត់​ប៉ុន​ប៉ង​នាំ​យក​ស្ត្រី​ជប៉ុន​ ដែល​ទំនង​ជា​ដេក​លក់​​លើ​សាឡុង​ ចេញពី​ភោជនីយដ្ឋាន​នោះ​​បន្ទាប់​ពី​ផឹក​ស្រវឹង​ជោកជាំ​ជាមួយ​បុរស​ទាំង​ពីរ​នាក់​​។

ក្នុង​ពេល​​វាយ​ដំ​​​ដែល​​កញ្ញា​ សុជាតា ត្រូវ​គេ​​បោច​​សក់​អូស​ទម្លាក់​តុ​​នោះ​ អង្គរក្ស​បាន​ដក​កាំភ្លើង​ខ្លីហើយ​ភ្ជង់​ក្បាល​នាង​ ដោយ​រារាំង​បុគ្គលិក​​ម្នាក់​មិន​ឲ្យ​ចូល​ជួយ​។

នគរ​បាល​បាន​និយាយ​កាលពី​ថ្ងៃ​ព្រហស្បតិ៍​ថា គេ​ក៏​កំពុង​ស្វែង​រក​ចាប់​អង្គរក្ស​ដែល​មិន​ទាន់​​ស្គាល់​ភិន​ភាគ​​នៅ​ឡើយ​​។

ក្នុង​បទ​សម្ភាស​មួយ​កាលពី​ថ្ងៃ​ព្រហស្បតិ៍ កញ្ញា សុជាតា ​បាន​បដិសេធ​មិន​ប្រាប់​​ភិនភាគ​ស្ត្រី​ជប៉ុន​នោះ ព្រោះ​បារម្ភអំពី​សុវត្ថិភាព​របស់​នាង​។

កញ្ញា​បាន​និយាយ​​ដោយ​សំដៅ​លើ​​ការ​ខ្វះ​ការ​​ការ​ពារ​សាក្សី និង​ជន​រងគ្រោះ​​ក្នុង​ប្រទេស​នេះ​ថា “​ខ្ញុំ​ជឿ​ថា គ្រប់​ជនជាតិ​​ខ្លាច​ប្រព័ន្ធ​ច្បាប់​របស់​ប្រទេស​កម្ពុជា​”។

កញ្ញា សុជាតា បាន​​និយាយ​ថា “​​សូម្បី​ខ្ញុំ​កំពុង​ប្ដឹង​លោក សុខ ប៊ុន ​នាង​ក៏​បារម្ភ​អំពី​ខ្ញុំ​ដែរ​”។

នាង​សោក​ស្ដាយ​ចំពោះ​ខ្ញុំ​ដែល​នាង​មិន​អាច​ជួយ​ខ្ញុំ​ ហើយ​នាង​បាន​និយាយ​ថា នាង​មិន​អាច​ធ្វើ​អ្វី​​កើត​ទេ​ក្រៅ​តែ​ពី​លាក់​ខ្លួន​ ឬ​ទៅ​ប្រទេស​ជប៉ុន​វិញ​៕ មានិត (រាយការណ៍​បន្ថែម​ដោយ ហួត ចាន់ប៉ាវ និង Matt Blomberg)​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស