កាលពីម្សិលមិញ សាលាដំបូងរាជធានីភ្នំពេញបានចាប់ផ្តើមសាកសួរអ្នកឃ្លាំមើលសិទ្ធិមនុស្សដ៏លេចធ្លោមួយរូបដែលប្រឈមនឹងការចោទប្រកាន់ពីបទបរិហារកេរ្តិ៍ និងប៉ុនប៉ងជ្រៀតជ្រែកយុត្តាធិការរបស់មន្ត្រីតុលាការចំនួនពីររូបជុំវិញវិវាទដីធ្លីនៅក្នុងខេត្តសៀមរាប។
អំឡុងការសាកសួរបិទទ្វារ លោក សៀង សុខ ព្រះរាជអាជ្ញារងអមសាលាដំបូងរាជធានី បានសាកសួរលោក នី ចរិយា ប្រធានផ្នែកឃ្លាំមើលនៅអង្គការសិទ្ធិមនុស្សអាដហុកជុំវិញការអះអាងដែលលោកបានលើកឡើងអំឡុងសន្និសីទកាសែតចំនួនពីរលើកកាលពីខែឧសភាថា ចៅក្រមសើុបសួរមួួយរូប និងព្រះរាជអាជ្ញាមួយរូបបានចាប់ខ្លួនកសិករចំនួនពីរនាក់ ដែលមានវិវាទដីធ្លីជាមួយក្រុមហ៊ុនកសិកម្មមួយក្បែរភូមិរបស់ពួកគេនៅក្នុងស្រុកស្វាយលើដាក់ពន្ធនាគារដោយមិនត្រឹមត្រូវ។
កសិករទាំងពីរនាក់នេះត្រូវបានបញ្ជូនទៅពន្ធនាគារកាលពីខែមករា បន្ទាប់ពីសាលាដំបូងខេត្តសៀមរាបបានចោទប្រកាន់ពួកគេពីបទបំផ្លិចបំផ្លាញផលដំណាំរបស់ក្រុមហ៊ុនមួយឈ្មោះសហគមន៍តាខ្មៅដែលទទួលបានសិទ្ធិកាន់កាប់ដីសម្បទានសង្គមទំហំ៤១៩ហិកតានៅក្នុងស្រុកវ៉ារិន ដែលនៅជាប់ភូមិរបស់កសិករទាំងពីរនាក់នេះកាលពីឆ្នាំ២០១២។
កសិករទាំងពីរនាក់នេះត្រូវបានរកឃើញថា មានទោសកំហុសកាលពីឆ្មាំមុន ហើយត្រូវបានផ្តន្ទាទោសឲ្យជាប់ពន្ធនាគាររយៈពេលពីរឆ្នាំ[ដោយកសិករពីរនាក់ផ្សេងទៀតត្រូវបានផ្តន្ទាទោសដោយកំបាំងមុខ] ប៉ុន្តែ ទោសជាប់ពន្ធនាគាររបស់ពួកគេត្រូវលោកកូយ សៅ ចៅក្រមប្រធានក្រុមប្រឹក្សាជំនុំជម្រះព្យួរស្ទើរតែទាំងអស់។
ក្រោយការសាកសួរនៅសាលាដំបូងរាជធានីរួចកាលពីម្សិលមិញ លោក នី ចរិយា បានលើកឡើងថា លោកបានបង្ហាញភ័ស្តុតាងដើម្បីបញ្ជាក់ថា កសិករទាំងពីរនាក់នេះត្រូវបានចាប់ខ្លួនដោយមិនត្រឹមត្រូវ ក្នុងនោះរួមមានលិខិតចុះថ្ងៃទី៦ ខែសីហា មួយច្បាប់ពីលោក ឃឹម ប៊ុនសុង អភិបាលខេត្តសៀមរាបដែលលើកឡើងថា សហគមន៍តាខ្មៅបានប្រើប្រាស់ផែនទីខុសពីដីដែលគេលៃទុកឲ្យ។
លិខិតនេះមានខ្លឹមសារដូច្នេះថា “ អាជ្ញាធរខេត្តមិនអាចអនុញ្ញាតឲ្យសហគមន៍នេះបន្តការអភិវឌ្ឍនៅលើដីនេះទៀតបានឡើយដោយចេញបញ្ជាឲ្យសហគមន៍នេះផ្អាកសកម្មភាពរបស់ខ្លួន”។
លោក នី ចរិយា បានមានប្រសាសន៍ថា ”ភ័ស្តុតាងដែលខ្ញុំបានផ្តល់នេះបង្ហាញថា អ្នកទាំងនោះត្រូវបានចាប់ខ្លួនដោយខុសច្បាប់ ដោយព្រះរាជអាជ្ញារង សុខ កែវបណ្ឌិត និងត្រូវបានឃុំខ្លួនដោយខុសច្បាប់ដោយចៅក្រមស៊ើបសួរ គី រិទ្ធី “។
លោកបានមានប្រសាសន៍បន្ថែមថា “មិនមានធាតុផ្សំបទល្មើសគ្រប់គ្រាន់មកចោទប្រកាន់ខ្ញុំពីបទបរិហារកេរ្តិ៍ បរិហារបង្កាច់កេរ្តិ៍ ឬប៉ុនប៉ងជ្រៀតជ្រែកយុត្តាធិការរបស់មន្ត្រីតុលាការឡើយ”។
លោក លី គឹមហ៊ុន ប្រធានសហគមន៍តាខ្មៅ បានអះអាងថា វិវាទដីធ្លីនៅក្នុងខេត្តសៀមរាបបានកើតឡើង បន្ទាប់ពីមានការផ្លាស់ប្តូរព្រំប្រទល់ស្រុក ហើយថាលោកបានបញ្ជាក់ទីតាំងរបស់លោកជាមួយសាលាស្រុកស្វាយលើ ដែលបានអនុញ្ញាតឲ្យលោកបន្តគម្រោងរួចហើយ។
អាជ្ញាធរមូលដ្ឋានមិនអាចបញ្ជាក់ពីអ្វីដែលលោក លី គឹមហ៊ុន បានលើកឡើងឡើយ ហើយទាំងលោក លី គឹមហ៊ុន និងមន្ត្រីសាលា ស្រុកសុទ្ធតែមិនអាចទាក់ទងបានកាលពីម្សិលមិញ។
លោក លី សំរ៉េត ប្រធានរដ្ឋបាលសាលាខេត្តសៀមរាប ក៏មិនអាចពន្យល់អំពីការផ្លាស់ប្តូរព្រំប្រទល់នេះដែរ ប៉ុន្តែ មានការសង្ស័យចំពោះភាពស្របច្បាប់នៃប្រតិបត្តិការរបស់សហគមន៍តាខ្មៅ។
លោកបានមានប្រសាសន៍ថា “ខ្ញុំមិនច្បាស់ ទេថា តើព្រំប្រទល់ត្រូវបានផ្លាស់ប្តូរឬយ៉ាងណានោះ”។ លោកបានបន្ថែមថា សហគមន៍តាខ្មៅ នៅមិនទាន់មានអាជ្ញាប័ណ្ណត្រឹមត្រូវនៅឡើយទេ។
លោក លី សំរ៉េត បានបង្វែរសំណួរបន្ថែមទៅលោក ប៊ុន ថារិទ្ធ អភិបាលរងខេត្តេនះ ដែលបដិសេធមិនធ្វើអត្ថាធិប្បាយ ព្រោះលោក “មិនមែនជាអ្នកទទួលខុសត្រូវក្នុងសំណុំរឿងនេះ”។
លោកអភិបាលខេត្ត ឃឹម ប៊ុនសុង ក៏បានបដិសេធមិនធ្វើអត្ថាធិប្បាយដែរ ក៏ដូចជាមន្ត្រីសាលាដំបូងខេត្តចំនួនពីររូបទៀតគឺលោក សុខ កែវបណ្ឌិត និងចៅក្រម គី រិទ្ធី ដែលបានដាក់ពាក្យប្តឹងលោក នី ចរិយា។
លោក វ៉ែន ឡន កសិករម្នាក់ក្នុងចំណោមកសិករចំនួនពីរនាក់ដែលជាប់ពន្ធនាគារត្រូវបានដោះលែងនៅថ្ងៃទី៣ ខែកក្កដា នេះបើយោងតាមលោក ពូក យ៉ារ៉ាន់ មេធាវីរបស់កសិកររូបនេះ។ កសិករទី២ឈ្មោះ បឿន សុខ គ្រោងនឹងត្រូវដោះលែងនៅខែក្រោយ៕ ស៊ុយឈាង