លោក សុខ ប៊ុន បោះបង់ងារជាឧកញ៉ា ហើយនិយាយថា ជម្លោះ ‘ធ្វើឲ្យមានរបួសស្នាមទាំងសងខាង’
លោក ស ខេង រដ្ឋមន្ត្រីក្រសួងមហាផ្ទៃ បានមានប្រសាសន៍កាលពីម្សិលមិញថា មន្ត្រីនគរបាលបានឃុបឃិតជាមួយលោក សុខ ប៊ុន ឧកញ៉ាអចលនទ្រព្យ ដើម្បីជួយឲ្យគាត់គេចផុតពីការចាប់ខ្លួន មួយសប្ដាហ៍បន្ទាប់ពីបែកធ្លាយរូបភាពវីដេអូកាមេរ៉ាសុវត្ថិភាពដែលបង្ហាញពីសកម្មភាពគាត់ប្រើអំពើហិង្សាយ៉ាងព្រៃផ្សៃទៅលើពិធីការិនីទូរទស្សន៍ម្នាក់នៅភោជនីយដ្ឋានមួយកន្លែងក្នុងរាជធានីភ្នំពេញ។
អំឡុងពេលថ្លែងសុន្ទរកថានៅក្រសួងមហាផ្ទៃ អំពីវិវាទព្រំដែនជាមួយវៀតណាម លោក ស ខេង បានបញ្ជាក់ថា លោកដឹងថាមានមន្ត្រីមួយចំនួនជួយលោក សុខ ប៊ុន ដែលបានគេចខ្លួនទៅប្រទេសសិង្ហបុរី។
លោកបានមានប្រសាសន៍ថា“ ខ្ញុំដឹងដែរ មន្ត្រីយើងណាខ្លះលាក់ ។មិនមែនមិនដឹងទេ អ្នករារាំង [ការចាប់ខ្លួនលោក សុខ ប៊ុន]។ នៅត្រង់ណាក៏ដោយ ត្រូវតាមចាប់ឲ្យបាន។ទោះបីយើងស្គាល់រាប់អានមិត្តភក្ដិអីក៏ដោយ តែយើងកុំទៅឃុបឃិតនឹងរឿងដែលគេធ្វើខុស”។ លោកបានលើកឡើងបន្ថែមថា ការឃុបឃិតបែបនេះ គឺស្មើនឹងការជេរប្រមាថនាយករដ្ឋមន្ត្រី ហ៊ុន សែន និងកម្លាំងនគរបាលទាំងមូល។
លោក សុខ ខេមរិន្ទ ប្រធាននាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ កំពុងដឹកនាំការស៊ើបអង្កេតលើលោក សុខ ប៊ុន យកដី។
លោក ស ខេង បានទទួលស្គាល់ពីភាពលំបាកក្នុងការចរចាពីបញ្ហាព្រំដែនជាមួួយវៀតណាមដល់មន្ត្រីប្រហែល៤០០នាក់ដែលបានចូលរួម គឺពីនគរបាលព្រំដែនរហូតដល់អភិបាលខេត្ត។
លោកបានមានប្រសាសន៍ថា “ការដោះស្រាយបញ្ហាព្រំដែនជារឿងស្មុគស្មាញ ដែលទាមទារឲ្យមានការអត់ធ្មត់ និងការតស៊ូយ៉ាងស្វិតស្វាញ។
បញ្ហាស្មុគស្មាញបែបនេះមិនអាចត្រូវបានដោះស្រាយដូចភាគីមួយចំនួនចង់បាននោះទេ ប៉ុន្តែលុះណាតែភាគីទាំងពីរព្រមព្រៀងគ្នា។ យើងប្រឹងប្រែងធ្វើការយ៉ាង ខ្លាំងដើម្បីដោះស្រាយបញ្ហាធំៗមួយចំនួនជាមួយវៀតណាម ហើយនៅមានបញ្ហា មួយចំនួនទៀតដែលមិនទាន់ត្រូវបានដោះស្រាយនៅឡើយ”។
លោក ស ខេង បានមានប្រសាសន៍ថា ស្របពេលជាមួយគ្នានេះដែរ មន្ត្រីមូលដ្ឋានត្រូវប្រកាន់ខ្ជាប់នូវវិធានមូលដ្ឋានមួយចំនួនគឺទី១ហើយសំខាន់បំផុត ត្រូវបញ្ឈប់ការចរចាអំពីបញ្ហាបន្ទាត់ព្រំដែនដោយខ្លួនឯងជាមួយមិត្តភក្តិមកពីប្រទេសវៀតណាម។
លោកបានមានប្រសាសន៍ថា ” មានប្រជាពលរដ្ឋមួយចំនួន នៅពេលមិត្តភក្តិរបស់ខ្លួនមកស្នើសុំឲ្យមានការព្រមព្រៀងនៅកន្លែងមួយចំនួនដែលពួកគេបានធ្វើហើយ។ ប៉ុន្តែ យើងមិនអាចធ្វើតាមអ្វីដែលយើងចង់បាននោះទេ។ យើងត្រូវស្នើទៅថ្នាក់ជាតិសិនបើមិនដូច្នេះទេវានឹងប៉ះពាល់ដល់ទំនាក់ទំនង”។
លោករដ្ឋមន្ត្រីក៏បានបញ្ជាឲ្យក្រុមមន្ត្រីធ្វើឲ្យប្រាកដថា ម្ចាស់ដីនៅតាមព្រំដែនឈប់ជួលដីធ្លីរបស់ខ្លួនទៅឲ្យជនជាតិវៀតណាមដែលរស់នៅខាងភាគីម្ខាងទៀត។
លោកបានមានប្រសាសន៍ថា ផ្ទះសំបែងនិងដីស្រែចម្ការត្រូវស្ថិតនៅកន្លែងដដែល។ មិនចាំបាច់ពង្រីកលំនៅដ្ឋាន ឬរានដីព្រៃនោះ ឡើយ។ ឈប់សាងសង់ហេដ្ឋារចនាសម្ព័ន្ធ និងសំណង់ដែលប៉ះពាល់ដល់ស្ថានភាពនេះ។
លោករដ្ឋមន្ត្រីបានប្រកាសប្រាប់មន្ត្រីដែលចូលរួមឲ្យបិទច្រករបៀងក្រៅផ្លូវការនៅតាមបណ្តោយព្រំដែនទាំងអស់ និងចាប់ខ្លួនអ្នកដែលព្យាយាមឆ្លងព្រំដែនដោយ ខុសច្បាប់។
លោកបានមានប្រសាសន៍ថា កន្លែងដែលមានការឡើងកម្តៅរឿងបញ្ហាព្រំដែន “ទី១អាជ្ញាធររបស់យើងដែលបានឈរជើងនៅតំបន់នោះត្រូវទំនាក់ទំនងភ្លាមៗជាមួយវៀតណាមដើម្បីបញ្ឈប់រឿងនេះ។ ទី២ពួកគេត្រូវផ្ញើរបាយការណ៍ទៅថ្នាក់ឃុំ ថ្នាក់ស្រុកនិងខេត្តភ្លាមៗ។
ទោះជាយ៉ាងណា កិច្ចប្រជុំនេះ យូរៗម្តងមានភាពក្តៅគគុកជាពិសេសរវាងរដ្ឋមន្ត្រីទទួលបន្ទុកកិច្ចការព្រំដែន គឺលោក វ៉ា គឹមហុង និងមន្ត្រីមួយចំនួនទៀតដែលមានការស្រងាកចិត្ត។
លោក ជៀង អំ អភិបាលខេត្តស្វាយរៀង បានត្អូញត្អែរអំពីការដែលលោកមិនត្រូវ បានប្រាប់ច្បាស់លាស់ថា តើតំបន់ណាខ្លះនៅតាមបណ្តោយព្រំដែនជារបស់ប្រទេសកម្ពុជានោះ។
លោក វ៉ា គឹមហុង បានមានប្រសាសន៍ថា វាគឺជាកំហុសផ្ទាល់របស់អភិបាលខេត្តរូបនេះចំពោះការមិនបំពេញតួនាទីជាសេនាធិការគណៈកម្មាធិការព្រំដែនក្នុងខេត្តរបស់ខ្លួនផ្ទាល់។
លោក វ៉ា គឹមហុង បានលើកឡើងថា ”ឯកឧត្តមភ្លេចសេចក្តីសម្រេចរបស់លោកនាយករដ្ឋមន្ត្រីដែលបានបង្កើតអនុគណៈកម្មធិការព្រំដែន។ ឯកឧត្តមជាសេនាធិការគណៈកម្មាធិការព្រំដែន ទាំងអស់ហ្នឹងឯកឧត្តមមិនបានធ្វើទេ”។
នៅក្នុងការអភិវឌ្ឍទាក់ទងគ្នានេះដែរ លោក ហេង សំរិន ប្រធានរដ្ឋសភាបានបដិសេធមិនព្រមចារលើលិខិតមួយច្បាប់របស់គណបក្សសង្គ្រោះជាតិស្នើឲ្យរដ្ឋាភិបាល ផ្អាកការងារកំណត់ព្រំដែនរបស់ខ្លួនសិន រហូតដល់ក្រោយការបោះឆ្នោតទូទៅលើកក្រោយនៅឆ្នាំ២០១៨។
លោក ឡេង ប៉េងឡុង អគ្គលេខាធិការរដ្ឋសភាបានសរសេរលិខិតឆ្លើយតបផ្ញើជូនគណបក្សសង្គ្រោះជាតិវិញកាលពីម្សិលមិញថា “សម្តេច ហេង សំរិន ប្រធានរដ្ឋសភាមិនអាចចុះហត្ថលេខាលើសំណើនេះបានទេ ពីព្រោះរដ្ឋសភាបានសម្រេចអនុញ្ញាតឲ្យរដ្ឋាភិបាលបង្កើតគណៈកម្មាធិការជាតិដោះស្រាយបញ្ហាព្រំដែនឡើយ”។
លោក អ៊ំុ សំអាន បានមានប្រសាសន៍ថា លោក និងសមាជិកសភាគណបក្សប្រឆាំង១០រូបទៀតបានធ្វើសំណើនេះដោយសង្ឃឹម ថា ការបោះឆ្នោតនៅខាងមុខនឹងផ្តល់អំណាច ដល់គណបក្សថ្មីនូវសមត្ថភាពបន្ថែមទៀតក្នុងការដោះស្រាយបញ្ហានេះ។
លោកបានចោទប្រកាន់គណបក្សប្រជាជនកម្ពុជាថា បានព្យាយាមកំណត់ព្រំដែនដោយប្រើប្រាស់ផែនទីក្លែងក្លាយដែលផ្តល់ដោយប្រទេសវៀតណាម និងអនុញ្ញាតឲ្យក្រុងហាណូយបណ្តុះបណ្តាលប្រជាជនកម្ពុជាធ្វើការងារនេះ។
លោក អ៊ំុ សំអាន បានមានប្រសាសន៍ថា ការបដិសេធរបស់លោក ហេង សំរិន មិនព្រមចារលើសំណើរបស់ខ្លួន ក៏អាចរំលោភមាត្រា៩៦នៃរដ្ឋធម្មនុញ្ញដែរ ដែល អនុញ្ញាតឲ្យបណ្តាសមាជិកសភាចោទសួរទៅរាជរដ្ឋាភិបាល។
លោបានមានប្រសាសន៍ថា “យើងនឹងពិភាក្សាជាមួយសមាជិកសភាដទៃទៀតថាត្រូវស្នើសុំឲ្យក្រុមប្រឹក្សាធម្មនុញ្ញបកស្រាយមាត្រា៩៦ ឬយ៉ាងណា”៕សារុន (រាយការណ៍បន្ថែមដោយ ឃួន ណារីម)