ប្រជាពលរដ្ឋនៅអគារប៊ូឌីង ក្នុងរាជធានីភ្នំពេញ បាននិយាយកាលពីម្សិលមិញថា ពួកគាត់ព្រួយបារម្ភជាថ្មីម្ដងទៀតអំពីការបណ្ដេញចេញ បន្ទាប់ពីចៅសង្កាត់បានចេញលិខិតមួយច្បាប់នៅខែនេះ ស្នើឲ្យពួកគាត់ចាកចេញពីផ្ទះរបស់ខ្លួន ដោយលើកឡើងអំពីការគ្មានសុវត្ថិភាពនៅអគារចាស់ទ្រុឌទ្រោមនេះ។
អនាគតនៃអគារទ្រុឌទ្រោមនេះជាគម្រោង លំនៅដ្ឋានតម្លៃថោក ដែលត្រូវបានសាងសង់ក្រោមការដឹកនាំរបស់សម្ដេច នរោត្តម សីហនុ កាលពីឆ្នាំ១៩៦៣ ហើយឥឡូវនេះជាលំនៅដ្ឋានរបស់ប្រជាពលរដ្ឋរាប់រយគ្រួសារនោះ មិនប្រាកដប្រជាជាង១ឆ្នាំមកហើយ។
លោក ប៉ា សុជាតិវង្ស អភិបាលក្រុងបានមានប្រសាសន៍កាលពីខែកញ្ញាថា អគារនេះគ្រោងនឹងត្រូវវាយចោល មុនពេលក្រឡាស់សម្ដី ហើយនិយាយថា អគារនេះនឹងទុកនៅដដែល ប៉ុន្តែអ្នករស់នៅនឹងត្រូវទទួលខុសត្រូវចំពោះការថែរក្សាវា។
នៅដើមខែនេះ ចៅសង្កាត់ទន្លេបាសាក់ លោក ខាត់ ណារិទ្ធ បានចេញសេចក្ដីជូនដំណឹងមួយដល់ប្រជាពលរដ្ឋ៥៤៧គ្រួសារនៅអគារនោះ ដោយព្រមានពួកគេថា អគារនេះគ្មានសុវត្ថិភាព និងបានណែនាំអ្នកទាំងនោះឲ្យចាកចេញជាបណ្ដោះអាសន្នសិន។
លោក ណារិទ្ធ បាននិយាយកាលពីម្សិលមិញទាក់ទិននឹងលិខិតចុះកាលបរិច្ឆេទថ្ងៃទី១ ខែកក្កដាថា “យើងមិនបង្ខំពួកគាត់ឲ្យចាកចេញ ទេ។ យើងណែនាំអ្នករស់នៅឲ្យចាកចេញ និង ធ្វើការជួសជុល ពីព្រោះយើងមិនចង់ឲ្យពួកគាត់កើតមានគ្រោះថ្នាក់ណាមួយនោះឡើយ”។
លាត ចិន្តា អាយុ៣០ឆ្នាំ បាននិយាយថា អ្នកស្រីជឿថា ការព្រមានអំពីសុវត្ថិភាព និងការ ណែនាំឲ្យចាកចេញជាបណ្ដោះអាសន្ន គឺជាការប៉ុនប៉ងរឹបអូសយកផ្ទះរបស់អ្នកស្រី។
អ្នកស្រីបាននិយាយថា “ប្រសិនបើយើងចាកចេញ ពួកគេ [សាលារាជធានី] នឹងមិនអនុញ្ញាតឲ្យយើងត្រឡប់ចូលផ្ទះរបស់យើងវិញទេ”។
ស៊ា វួចអេង អាយុ៤៩ឆ្នាំ បានគាំទ្រគំនិតរបស់អ្នកជិតខាងរបស់គាត់ ហើយបានប្ដេជ្ញាស្នាក់នៅក្នុងអគារនោះរហូតទាល់តែស្លាប់។
អ្នកស្រីបាននិយាយថា “ខ្ញុំស៊ូស្លាប់បើអគារនេះរលំសង្កត់ខ្ញុំ ប៉ុន្តែខ្ញុំគ្មានប្រាក់ឯណាដើម្បីរើចេញជាបណ្ដោះអាសន្ន ហើយធ្វើការជួសជុលទេ”។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបាននិយាយថា លិខិតនោះគ្រាន់តែជាការព្រមានមួយដល់ប្រជាជនថា អគារនោះគ្មានសុវត្ថិភាព ហើយលោកបានបន្ថែមថា ការជួសជុលមិនមែនជាការទទួលខុសត្រូវរបស់សាលារាជធានីទេ។
លោកបានសួរថា “តើបងប្អូននឹងសុំឲ្យរដ្ឋជួសជុលផ្ទះរបស់បងប្អូនឬ? វាជាផ្ទះរបស់បងប្អូន ដូច្នេះបងប្អូនត្រូវជួសជុលវាដោយខ្លួនឯង”៕ មានិត (រាយការណ៍បន្ថែមដោយ Alex Consiglio)