37.6 C
Phnom Penh

​​លោក​នាយក​រដ្ឋមន្ត្រី​៖ បង្គោល​ព្រំដែន​​​​​មួយ​ចំនួន​​​​​អាច​បោះ​​មិន​ត្រឹម​ត្រូវ​​នៅ​ក្នុង​ទឹក​ដី​កម្ពុជា ​

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ លោក​នាយក​រដ្ឋមន្ត្រី ហ៊ុន សែន បាន​ទទួល​ស្គាល់​ថា បង្គោល​ព្រំដែន​​​​មួយ​ចំនួន​ដែលកំណត់​ព្រំដែន​ជាមួយ​វៀត​​​ណាម​​អាច​ត្រូវ​បាន​បោះ​មិន​ត្រឹម​ត្រូវ​នៅ​ក្នុង​ទឹកដី​​កម្ពុជា​ ប៉ុន្តែ​លោក​បាន​លើក​ឡើង​ថា រដ្ឋាភិបាល​​អាច​ពិនិត្យ​ឡើង​វិញ​ ហើយ​“ ទាម​ទារ​ឲ្យ​មាន​ការ​កែតម្រូវ​”។

​ចាប់​តាំង​ពី​ខែ​មុន សមាជិក​សភា​គណ​​​បក្ស​​​​សង្គ្រោះ​​ជាតិ​បាន​ដឹកនាំ​យុទ្ធនាការ​មួយ​​រក​ឲ្យ​ឃើញ​ពី​ការ​​ទន្ទ្រាន​ចូល​របស់​វៀតណាម​ក្នុង​ទឹក​ដីកម្ពុជា ទន្ទឹមនឹង​នោះ​ក៏​បាន​ចោទ​ប្រកាន់​​​​រដ្ឋា​ភិបាល​គណបក្ស​ប្រជាជន​កម្ពុជា​​ថា បាន​ឃុបឃិត​​ក្នុង​ការ​បោះ​បង្គោល​ព្រំដែន​​​​នៅ​ក្នុង​ទឹកដី​កម្ពុជា​ផង​ដែរ​។

លោក ហ៊ុន សែន​ បាន​ច្រាន​ចោល​ការ​អះអាង​បែបនេះ​ជាយូរ​មក​ហើយ​ ​ហើយ​ដែល​គួរ​ឲ្យ​កត់​សម្គាល់​បំផុត​នោះ​​ នៅ​ក្នុង​ការ​ថ្លែង​សុន្ទរកថា​ដ៏វែង​រយៈ​ពេល​​៥ម៉ោង​នៅ​ក្នុង​រដ្ឋសភា​កាលពី​ឆ្នាំ​២០១២ ប៉ុន្តែ​លោក​បាន​លើក​ឡើង​កាលពី​ម្សិលមិញ​ថា បង្គោល​​ព្រំដែន​នៅ​តាម​ព្រំដែន​វៀតណាម​​​ប្រវែង​១.២២៨​គីឡូម៉ែត្រ​ប្រហែល​ជា​ត្រូវ​ពិនិត្យ​ឡើង​វិញ។

លោក ហ៊ុន សែន បាន​មាន​ប្រសាសន៍​អំឡុង​ពិធី​ចែក​សញ្ញាបត្រ​​​​មួយ​ក្នុង​រាជធានី​ភ្នំពេញ​ថា “ ឥឡូវ​បាន​៨៣ភាគរយហើយ​ នៅ​​​សល់​១៧ភាគរយ ហើយ​៨៣ភាគរយ​នេះ ក៏យើង​នៅ​អាច​សើរើ​បាន​ទៀត​ត្រូវ​ធ្វើ​អូឌីត​មួយ​ចំនួន​ទៀត ករណី​ដែលបោះទៅ​វាមាន​លម្អៀង អ៊ីចឹង​ត្រូវ​កែ ទាមទារ​ឲ្យមាន​ការ​កែតម្រូវ​”។

ទោះ​ជាយ៉ាង​ណា​ លោក​នាយក​រដ្ឋមន្ត្រី​បាន​ច្រាន​ចោល​ការ​អះអាង​​របស់​គណបក្ស​ប្រឆាំង​ដែល​ថា ​រដ្ឋាភិបាល​របស់​លោក​បាន​បង្កើត​ឡើង​​ក្រោម​ការ​​កាន់​​កាប់​ប្រទេស​កម្ពុជា​ពី​សំណាក់​វៀតណាម​ក្នុង​​ទសវត្សរ៍​ឆ្នាំ​១៩៨០។

លោក ហ៊ុន សែន បាន​មាន​ប្រសាសន៍​ថា “​ខ្ញុំ​បាន​ប្រាប់​អ្នក​ចរចា​ថា៖ បើ​ចរចា​មិនត្រូវ​គ្នា អូសប​ន្លាយ​ក៏អូស​ទៅ​ ប្រសើរ​ជាងបាត់ដី”។

លោក​បាន​បន្ថែម​ថា “ដាក់​ជា​សំណួរ​មួយ​ថា ជិត​​៣០ឆ្នាំតាំង​ពី​កង​ទ័ព​វៀត​ណាមនៅ​ស្រុក​ខ្មែរ​ ម៉េច​ក៏មិន​បោះ​ឲ្យ​ហើយ​តែម្តង​ទៅ​ ដោយ​សារ​ខ្មែរ​មិន​ព្រម និយាយ​ឲ្យ​ពិត”។

លោក​ ហ៊ុន សែន ក៏​​ទំនង​ជា​បាន​ព្រមាន​​ដល់​ប្រទេស​វៀតណាម​ផង​ដែរ​​កុំ​ឲ្យ​គឃ្លើន​ពេក​​នៅ​ក្នុង​ការ​ចរចា​​​ជុំវិញ​ការ​បោះ​បង្គោល​ព្រំដែន​​​ ឬ​​ក្នុង​ការ​ស្វែង​រក​ទំនុក​ចិត្ត​ចាំបាច់​នៅ​​​​ពេល​មាន​ភាព​តាន​តឹង​ក្នុង​ពេល​បច្ចុប្បន្ន​រវាង​រដ្ឋាភិបាល និង​គណបក្ស​ប្រឆាំង​ក្នុង​ប្រទេស​កម្ពុជា​។

លោក​បាន​មាន​ប្រសាសន៍​ថា “​ខ្ញុំ​បាន​ផ្ញើ​សារ​ទៅ​ដៃគូ​របស់​យើង ប្រទេស​ជិត​ខាង​ថា កម្ពុជា​មិន​បោះ​បង់​សិទ្ធិ​ក្នុង​ការ​ទាមទារ​​ទៅ​លើ​ចំណុច​មួយ​ចំនួន​ទៀត​ឡើយ​ បើ​ទោះ​ជា​កម្ពុជា​មិន​​ទាន់​បានត្រូវ​គ្នា​ទៅ​លើ​​​ចំណុច​មួយ​ចំនួន​ផ្ទៃក្នុង​ក៏​ដោយ​”។

លោក សម រង្ស៊ី មេដឹកនាំ​គណបក្ស​ប្រឆាំង​​​បាន​មាន​ប្រសាសន៍​តាម​ទូរស័ព្ទ​ថា​ សុន្ទរកថា​របស់​លោកនាយករដ្ឋ​​​មន្ត្រី​​​ ហ៊ុន​​​ សែន បន្ទាប់ពី​ការ​​​​បដិសេធ​ជាច្រើន​ឆ្នាំដែល​​​ថា គ្មាន​បង្គោល​​​​ព្រំដែនណា​មួយ​ត្រូវ​បាន​បោះ​ខុស ហើយ​បណ្ដាល​ឲ្យ​បាត់​បង់​ទឹកដី​ប្រទេសកម្ពុជា​ទៅ​ប្រទេស​វៀតណាម​នោះ គឺ​ជា​ការ​បង្ហាញ​ឲ្យ​ឃើញ​ថា ត្រូវ​នៃគោល​នយោបាយ​របស់​គណបក្ស​ប្រឆាំង​ដែលមាន​ជាយូរ​មក​ហើយ​។

លោក សម រង្ស៊ី បាន​មាន​ប្រសាសន៍​ថា     “​ខ្ញុំ​សូម​ស្វាគមន៍​ការ​ទទួល​ស្គាល់​នេះ​​តាង ​នាម​លោក​នាយករដ្ឋមន្ត្រី ដែល​យ៉ាង​ហោច​ណាស​់​​​​បង្គោល​ព្រំដែន​មួយ​ចំនួន​ក្នុង​​ចំណោម​​​​បង្គោល​ព្រំដែន​ជាច្រើន​​ត្រូវ​បាន​បោះ​មិន​ត្រឹ​​ម​​​ត្រូវ​ក្នុង​ទឹកដី​កម្ពុជា​ ហើយ​នេះ​​​បង្ហាញឲ្យ​ឃើញ​ថា ត្រូវ​ពី​អ្វី​ដែល​ខ្ញុំ​បាន​​ព្យាយាម​​​​​លើក​ឡើង​ជាច្រើន​ឆ្នាំ​មក​ហើយ​”។

លោក​បាន​មាន​​​ប្រសាសន៍​​​បន្ថែម​ថា     “ប្រជាពល​​​រដ្ឋជា​​​ច្រើន​នឹងចាំ​ថា ដំបូង​នៅ​ពេល​ខ្ញុំ​បាន​និយាយ​​​ថា បង្គោល​​ព្រំដែន​ទាំង​នេះ​ត្រូវ​បាន​បោះ​មិន​ត្រឹម​ត្រូវ​នោះ ខ្ញុំ​ត្រូវ​ផ្ដន្ទាទោស​ឲ្យ​ជាប់​ពន្ធនាគារ​​សរុប​១២​ឆ្នាំ​ ដែល​១០​ឆ្នាំ​ពីបទ​បំផ្លាញ​ទ្រព្យ​សម្បត្តិ​សាធា​រណៈ និង​២​ឆ្នាំ​ទៀត​ពីបទ​ផ្សព្វ​ផ្សាយ​ព័ត៌មាន​​​មិន​ពិត​”។

លោក សម រង្ស៊ី បាន​ថ្លែង​ថា ការ​កើន​ឡើង​នូវ​បណ្តាញ​ផ្សព្វ​ផ្សាយសង្គម​​​នៅ​ប្រទេស​កម្ពុជា​បាន​បំបែក​​ទីតាំង​រឹងមាំ​​របស់​គណបក្ស​ប្រជាជន​កម្ពុជា​នៅ​តាម​ប្រព័ន្ធ​ផ្សព្វផ្សាយរបស់​​ប្រទេស​ ហើយ​បាន​បង្ខំ​ឲ្យ​​ដោះ​ស្រាយ​​បញ្ហា​ព្រំដែន​វៀតណាម​​ក្រោម​សម្ពាធ​ពី​គណបក្ស​សង្គ្រោះ​ជាតិ​។

លោក​បាន​មាន​ប្រសាសន៍​​បន្ថែម​ទៀត​ថា “​វា​ជា​បរិយា​​​​​​កាស​​​​ថ្មី។ មាន​វិធាន​ថ្មីសម្រាប់​​រឿង​នេះ ហើយ​​​​គណបក្ស​ប្រជាជន​កម្ពុជា​មិន​អាច​ធ្វើ​អ្វី​ដូច​ខ្លួន​ធ្លាប់​ធ្វើ​ពីមុន​បាន​ឡើយ​ ពីព្រោះ​បច្ចេកវិទ្យា​អាច​​​រក​បាន​សម្រាប់​មនុស្ស​​​គ្រប់​គ្នា​”។

កាលពី​ម្សិលមិញ​ផង​ដែរ រដ្ឋាភិបាល​បាន​បញ្ជូន​មន្ត្រី​មួយ​ក្រុម​ដឹកនាំ​ដោយ​លោក ឡុង វីសាលោ រដ្ឋលេខាធិការ​ក្រសួង​ការ​បរទេស​ឲ្យ​ចុះទៅ​កាន់​តំបន់​មួយ​ក្នុង​ស្រុក​កំពង់រោទិ៍ ខេត្ត​ស្វាយ​រៀង ដើម្បី​ពិនិត្យ​មើល​តំបន់​ដែល​មាន​វិវាទ​​ជាមួយ​សមភាគី​​ក្រសួង​ការ​បរទេស​​​​​មក​ពី​វៀតណាម​។

លោក សា​ត សាមុត ​អធិការ​នគរ​បាល​​ស្រុក​បាន​មាន​ប្រសាសន៍​កាលពី​យប់​មិញ​ថា “​យើង​មិន​ទាន់​បាន​បញ្ចប់​នៅ​ឡើយ​ទេ។ ពួកគេ​មិន​ទាន់​ទទួល​យក​ថា ដី​ដែល​មាន​វិវាទ​នោះ​ជា​របស់​យើង​ឡើយ ហើយ​ថា វា​អាច​បន្តនៅ​ថ្ងៃ​ស្អែក​”។

កាលពី​ថ្ងៃ​អាទិត្យ លោក រៀល ខេមរិន្ទ្រ សមាជិក​សភា​គណបក្ស​ប្រឆាំង​មាន​គម្រោង​ដឹកនាំ​ដំណើរ​ទស្សនកិច្ច​របស់​លោក​លើកទី​២​ទៅ​ពិនិត្យ​បង្គោល​ព្រំដែន​លេខ​២០២ និង​២០៣ នៅ​តាម​ព្រំដែន​ស្ថិត​ក្នុង​ស្រុក​កំពង់​​​រោទិ៍ ដើម្បី​បង្ហាញ​ពី​ការ​​ទន្ទ្រាន​យក​ដី​ពី​សំណាក់​វៀតណាម​។

​ព្រះតេជគុណ ប៊ុត ប៊ុនទិញ ជា​ប្រធាន​បណ្ដាញ​​​​ព្រះសង្ឃ​ឯករាជ្យ ដើម្បី​យុត្តិធម៌​សង្គម​បាន​មាន​សង្ឃដីកា​កាលពី​ម្សិលមិញ​ថា ព្រះអង្គ​នឹង​បញ្ជូន​ព្រះសង្ឃ​៥០​អង្គ​មក​ពី​ក្រុម​របស់​ព្រះ​អង្គ​ឲ្យ​និមន្ត​ទៅ​ជាមួយ​លោក រៀល ខេមរិន្ទ្រ។

ព្រះសង្ឃ​អង្គ​នេះ​បាន​មាន​សង្ឃដីកា​ថា ព្រះអង្គ​រីក​រាយ​ណាស់​ដោយ​ឃើញ​​លោក ហ៊ុន សែន ប្រកាន់​ជំហរ​រឹងមាំ​ស្ដីពី​ការ​ទន្ទ្រាន​​​​យក​ដី​ ប៉ុន្តែ​ថា​ លោក​នាយក​រដ្ឋមន្ត្រី​គួរ​កែ​​​តម្រូវ​អ្វី​ដែល​លោក​បាន​ប្រើ​កាលពី​ពេល​ថ្មីៗ​​​​​ទៅ​លើ​គូប្រជែង​នយោបាយ​របស់​លោក​ផងដែរ។

ព្រះតេជគុណ ប៊ុត ប៊ុនទិញ បាន​មាន​សង្ឃ​​​ដីកា​ទៀត​ថា ឥឡូវ​នេះ​លោក ហ៊ុន សែន និង​មន្ត្រី​របស់​លោក​​បាន​ទទួល​ស្គាល់​ថា ពួកគាត់​​ធ្វើ​ការ​ងារ​មិន​ទាន់​ល្អ​នៅ​ឡើយ​​ទេ ប៉ុន្តែ​វា​ជា​ការ​ល្អ​ដែល​លោកបាន​​លើក​ឡើង​ថា លោក​នឹង​មិន​​​បោះ​បង់​ បើ​ទោះ​​ជា​មាន​ភាព​ចម្រូង​ចម្រាស ​​​​ខ្លះ​ក៏ដោយ ហើយ​ឥឡូវ​នេះ​មាន​​ផែន​​​ការ​ធ្វើ​អ្វី​ៗ​ត្រឹម​ត្រូវ​”។

ព្រះអង្គ​បាន​មាន​សង្ឃដីកា​បន្ថែម​ថា “​ឥឡូវ​ នេះ​ផ្លែ​ឈើ​ទុំហើយ​។​លោក ហ៊ុន​ សែន ដឹង​ថា ​វា​ទុំហើយ​ ដូច្នេះ​​គាត់​ត្រូវ​ហូបវា​។ ស្រប​ពេល​ជាមួយ​គ្នា​នេះ​ដែរ​ គាត់​​គួរ​ឈប់​ថ្កោល​ទោស​គណបក្ស​​ប្រឆាំង​ថា ជា​អ្នក​ជាតិ​និយម​ជ្រុល​ទៀត​ទៅ​។ ប្រសិន​បើមិនមែន​ដោយ​​​សារ​គណបក្ស​ប្រឆាំង​ទេ​ គាត់ក៏​​ប្រហែល​ជា​គ្មាន​​​ឱកាស​ល្អ​​នេះដែរ​​”៕ សារុន (រាយការណ៍​បន្ថែម​ដោយ ម៉ិច ដារ៉ា​)​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស