30 C
Phnom Penh

UN ជួយ​​​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​​​​១២​​​នាក់​​​ទៅ​​​វៀតណាម​​​វិញ​​​

ដោយ ឌឹ ខេមបូឌា ដេលី

បទវិភាគ

អង្គការ​​​សហប្រជា​​​ជាតិ​​​ និង​​​សកម្មជន​​​សិទ្ធិ​​មនុស្ស​​​បាន​​​ឲ្យ​​​ដឹង​​​ថា  កាល​​​ពីម្សិល​មិញ ​អង្គការ​​​​​សហប្រជាជាតិ​​​​​​បាន​​​ជួយ​​​សម្រួល​​​ដល់​​​អ្នក​ស្វែង​​រក​សិទ្ធិ​ជ្រកកោន​ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ចំនួន​​​១២​​​នាក់​​​​ ដែល​​​ស្ម័គ្រ​​​ចិត្ត​​​វិល​​​ត្រឡប់​​​ទៅ​​​កាន់​​​ប្រទេស​​​វៀតណាមវិញ​​​​ បន្ទាប់​​​ពី​​​​ជន​​​ជាតិ​​​​ភាគ​​​តិច​​​ម៉ុង​​​តាញ៉ា​​​​​​មួយក្រុម​នេះ​​បាន​​​ចំណាយ​​​​​ពេល​​​រស់​​​នៅ​​​ក្នុង​​​រាជធានីភ្នំពេញ​​​អស់​​​ជា​​​ច្រើន​​​ខែ ដោយ​​​​​រំពឹង​​​ថា នឹង​​​ទទួល​​​បាន​​​ឋានៈជា​​​ជន​​​ភៀស​​​ខ្លួន​នោះ​​​​។​​​​​​​​​​​​​​​​​​​​​​​​

ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ជាង​​​១៦០​​​នាក់​​​បាន​​​ភៀស​​​ខ្លួន​​​ពី​​​តំបន់​​​ខ្ពង់​​​រាបនៃ​​​​​​​ប្រទេស​​​​​​វៀតណាម​​​​​​​​មក​កាន់​​​​កម្ពុជា​​​តាំង​​​ពី​​​ខែ​​​តុលាមក​​​ម្លេ៉ះ ​ក្នុងនោះ​​​​ភាគ​​​ច្រើន​​​បាន​​​មក​​​ដល់​​​រាជធានី​​​ភ្នំពេញ​ជា​​​​ទី​ដែល​​​ពួក​​​គេ​​​កំពុង​​​រង់​​​​ចាំ​​​នាយកដ្ឋាន​​​​​​ជន​​​ភៀស​​​ខ្លួន​​​នៅ​​​ក្រសួង​​​មហាផ្ទៃ​​​​​​​វាយ​​​តម្លៃ​​​អំពី​​​ការ​​​ស្នើ​​​សុំ​​​​សិទ្ធិ​​​ជ្រក​​​កោន​​​របស់​​​ពួក​​​គេ​​​។

លោក​​​​​​ស្រី វីវៀន​​​ តាន មន្ត្រី​​​ផ្នែក​​​ព័ត៌​​​មាន​​​ប្រចាំ​​​តំបន់​​​នៃឧត្តម​​​ស្នង​​​ការ​​​អង្គការ​​​សហ​ប្រជា​​​​​​​ជាតិ​​​ទទួល​​​បន្ទុក​​​ជន​​​ភៀស​​​ខ្លួន​​​​​​(UNHCR)​​បាន​​​លើក​​​ឡើង​​​កាល​​​ពីម្សិលមិញ​​​ថា អ្នក​​​ស្វែង​​​​​រក​​​សិទ្ធិ​ជ្រក​​​កោន​​​ចំនួន​​​១២​​​នាក់​​​បាន​​​ស្នើ​​​សុំ​​​ជំនួយ​​​​​ក្នុង​​​ការ​​​វិល​​​ត្រឡប់​​​ទៅ​​វៀតណាម​​​វិញ​។

លោក​​​ស្រី​​​​​​​​​លើក​​​ឡើង​​​តាម​​​រយៈ​​​អីុម៉េល​​​​​មួយ​​​ថា “ ដោយ​ផ្អែក​លើ​​​​សំណើ​​​​ និង​មូល​ហេតុ​​​​​​​​​ពិសេស​របស់​​​ពួក​​​គេ យើង​​​បាន​​​ជួយ​​​សម្រួល​​​ដល់​​​​ការ​​​វិល​​​ត្រឡប់​​​ទៅ​​​កាន់​តំបន់​ខ្ពង់​រាប​ភាគ​កណ្តាល​ប្រទេស​​​វៀតណាម​​​​​វិញ​​​របស់​​​អ្នកស្វែង​​​រក​​​សិទ្ធិ​​​ជ្រក​​​កោនជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ចំនួន​​​១២​​​នាក់​​​ បន្ទាប់​​​ពី​​​បាន​​​ផ្ទៀងផ្ទាត់​​​​ថា ពួក​​​គេ​​​ជ្រើស​​​រើស​​​បែប​​​នេះ​​​ដោយ​​​​​​ស្ម័គ្រ​​​ចិត្ត​​​”។

លោកស្រី​​​​​​​​បាន​លើក​ឡើង​បន្ថែម​​​​​ថា“ រដ្ឋា​ភិបាល​​​​​​វៀតណាម​​​​​បាន​​​យល់​​​ព្រម​​​ទទួល​​​ពួក​​​គេ​​ហើយ​​​​​បាន​​​ធានា​​​ថា ​​ខ្លួន​​​នឹង​​​មិន​​​រើស​​​អើង ឬ​​​ដាក់​​​ទោស​​​​​​ទណ្ឌ​​​លើ​​​ពួក​​​​​​​​​គេ​​​​​​ឡើយ​​​។ វា​​​ក៏​​​មាន​​​ការ​​​​​​​​​ធានា​​​ផង​​​ដែរ​​​ថា ឧត្តម​​​​​​ស្នង​​​ការ​​​អង្គការ​​​សហ​ប្រជាជាតិ​​​​​​ទទួល​​​បន្ទុក​​​ជន​​​​​ភៀស​​​ខ្លួន​​​នឹង​​​អាច​​​ទៅ​​​​​សួរ​​​សុខ​​​ទុក្ខ​​​​ពួក​​​គេ​​បាន​​​​ បន្ទាប់​​​ពី​​​ពួក​​​គេ​​​ទៅដល់​​​ស្រុក​​​កំណើត​​​វិញ​​​”។

យោង​​​តាម​​​លោក​​​ស្រី វីវៀន​​​ តាន បាន​​​ឲ្យ​​​ដឹង​​​ទៀត​​​ថា ជន​​​ជាតិ​​​ភាគ​​​តិច​​​ម៉ុង​​​តាញ៉ា “ បាន​​​និយាយ​ថា ​ហេតុផល​​​ដែល​​​ធ្វើ​​​ឲ្យ​​​ពួក​​​គេ​​​ចង់​​​វិល​​​ត្រឡប់​​​ទៅវិញ​គឺដោយសារ​ការ​​​លំបាក​​​នៅក្នុង​​​ប្រទេស​​​កម្ពុជា​​​​​​​”។

លោក ឡុង រុក្ខា ប្រធាន​​​នគរ​​​បាល​​​អន្តោ​ប្រវេសន៍​​​​ច្រក​​​ព្រំដែន​​​អូរយ៉ាដាវ​​​នៅ​ក្នុង​​​ខេត្ត​​​​រតនគិរី​​​បាន​​​លើក​​​ឡើង​​​ថា ជន​​​ជាតិ​​​ភាគ​​​តិច​​​ម៉ុង​​​​​​តាញ៉ា​​​បាន​​​ទៅ​​​ដល់​​​ព្រំដែន​​​នៅម៉ោង​​​ប្រហែល​​​​​៥​​​និង​​​៣០​​​​នាទី​ល្ងាច​​​ម្សិលមិញ​​​ ប៉ុន្តែ ​ពួកគេ​​​មិន​​​​ត្រូវ​​​បាន​​​អនុញ្ញាត​​​ឲ្យ​​​ឆ្លង​​​កាត់​​​ព្រំដែន​​​ឡើយ​​​​។

លោក​​​​​​មានប្រសាសន៍​​​ថា “ ខ្ញុំ​​​មិន​​​អនុញ្ញាត​​​​​​ឲ្យ​​​អ្នក​​​ទាំង​​​នោះ​​​ឆ្លង​​​កាត់​​​ព្រំដែន​​​ ដោយ​​​សារ​​​ពួក​​​គេ​​​គ្មាន​​​ឯកសារ​​​ផ្លូវ​​​ច្បាប់​​​។ ឥឡូវ​​​នេះ​​​យើង​​​​​បាន​​​ឲ្យ​​​ពួក​​​គេ​​​ស្នាក់​​​នៅ​​​ក្នុង​​​ក្រុង​​​បាន​​​លុង​​​មួយ​​​​​​យប់​​​ ហើយ​​​ទាក់​​​ទង​​​​​​​​​អាជ្ញាធរ​​​ខេត្ត​​​ដើម្បីស្នើ​​​សុំ​​​​លិខិត​​​អនុញ្ញាត​​​”។

ពេល​​​ទាក់​​​ទង​​​ម្តង​​​ទៀត​​​នៅ​​​ម៉ោង​​​ប្រហែល​​​​​៧និង​​​៤០​​​នាទី​​​យប់​​​​​​​​​ លោក​​​ស្រី វីវៀន តាន​​​បាន​​​លើក​​​ឡើង​​​ថា ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ទាំង​​​នេះ​​​បាន​​​ឆ្លង​​​កាត់​​​ច្រក​​​ព្រំដែន​​​ហើយ​​​។

លោកស្រី​​​បាន​​​មាន​​​ប្រសាសន៍​​​ថា“ តាម​ខ្ញុំ​​​​ដឹង​​​ ​​​ពួក​​​គេ​​​បាន​​​ឆ្លង​​​កាត់​​​ច្រក​​​ព្រំដែន​​​នោះ​​​ហើយ​​​ ហេតុ​​​ដូច្នេះ​​​វា​​​អស់​​​បញ្ហា​​​ហើយ​​​”។

ជន​​​ជាតិ​​​ភាគ​​​តិច​​​ម៉ុង​​​តាញ៉​​​ភាគ​​​ច្រើន​​​ដែល​​​បាន​​​ចូល​​​មក​​កម្ពុជា​ បាន​ឆ្លងកាត់​​​​​ខេត្ត​​​រតនគិរី​​​ ហើយ​​​ក្នុង​​​ករណីខ្លះ​​​បាន​​​ចំណាយ​​​ពេល​​​រាប់​​​​សប្តាហ៍​​​លាក់​ខ្លួន​នៅ​​​ក្នុង​​​ព្រៃ​​​ដើម្បីគេ​​​ចពីការ​​​ចាប់​​​ខ្លួន​​​។ ​កាល​​​ពីខែ​​​ធ្នូ ជន​​​ជាតិ​​​ភាគ​​​តិច​​​ម៉ុង​​​តាញ៉ា​​​ចំនួន​​​១៣​​​នាក់​​​ដែល​​​បាន​​​លាក់​​​ខ្លួន​​​នៅ​​​ក្នុង​​​​​ខេត្ត​​​នេះ​​​​​បាន​​​មក​​​ដល់​​​រាជ​​​ធានីភ្នំពេញ​​​​​ ហើយ​​​រដ្ឋាភិបាល​​​​​​បានផ្តល់​​​ឋានៈ​​​ជា​​​ជន​​​ភៀស​​​ខ្លួន​​​ដល់​​​​​ពួក​​​គេ​​​​​​នៅ​​​ខែ​​​មីនា។

ជោគជ័យ​នៃ​ក្រុម​ដំបូង​​ហាក់​ដូច​ជា​​បាន​លើក​​​ទឹក​ចិត្ត​​ជនជាតិ​ភាគតិច​ម៉ុងតាញ៉ា​​ឲ្យ​ចូល​​ប្រទេស​កម្ពុជា​ថែម​ទៀត​ ប៉ុន្តែ​រហូត​មក​ទល់​ពេល​នេះ​គ្មាន​អ្នក​ផ្សេង​ទៀត​ត្រូវ​បាន​គេ​ទទួល​ស្គាល់​​​ជាជន​ភៀស​ខ្លួន​ ឬ​​អនុញ្ញាត​ឲ្យ​​​​ដាក់ពាក្យ​​សុំ​សិទ្ធ​​ិជ្រក​ក្រោន​​​ទៅ​​នាយក​ដ្ឋាន​​ជនភៀស​ខ្លួន​​ឡើយ​។​

លោក ឆាយ​​ ធី អ្នក​សម្រប​សម្រួល​​នៅ​អង្គ​ការ​សិទ្ធិមនុស្ស​អាដហុក​ប្រចាំ​​ខេត្ត​រតនគិរី ​​បាន​លើកឡើង​​ថា មនុស្ស​១២​នាក់​ដែល​បាន​ត្រឡប់​ទៅ​ប្រទេស​វៀតណាម​វិញ​កាលពី​ម្សិល​​​មិញ​នោះ ដំបូង​ឡើយ​បាន​ភៀស​ខ្លួន​ទៅ​ប្រទេស​ថៃ​ ហើយ​បានធ្វើ​ដំណើរ​មក​ក្រុង​​​ភ្នំពេញ​កាលពី​ខែ​មេសា ដោយ​សង្ឃឹម​ថា នឹង​​​​ទទួល​បាន​​សិទ្ធិ​ជ្រកកោន​នយោបាយ​។

យោង​តាម​លោក ឆាយ ធី បាន​ឲ្យ​ដឹង​ទៀត​​​ថា ជន​ជាតិភាគតិច​ម៉ុងតាញ៉ា​ចំនួន​១៩​នាក់​ផ្សេង​ទៀត​ដែល​​បាន​​ធ្វើ​ដំណើរ​ពី​ប្រទេស​ថៃ​​​មក​ដល់​រាជធានី​ភ្នំពេញ បាន​​វិល​ត្រឡប់​ទៅ​ប្រទេស​វៀតណាម​វិញ​ហើយ។

លោក​​និយាយ​ថា “ ខ្ញុំ​ទទួលបាន​ដំណឹង​​​ថា ជនជាតិភាគតិច​ម៉ុង​តាញ៉ា​ទាំង​នោះ​​បាន​ស្ម័គ្រ​​​ចិត្ត​​ត្រឡប់​ទៅ​​ស្រុក​វិញ ហើយ​ថា គ្មាន​នរណា​​​​ម្នាក់​បាន​បង្ខំ​ពួកគេ​ឲ្យ​ទៅវិញ​នោះ​ទេ”។

កាលពី​ខែ​មិថុនា លោក ខៀវ សុភ័គ អ្នក​នាំាពាក្យ​ក្រសួង​​មហាផ្ទៃ​​បាន​និយាយ​ថា រដ្ឋា​ភិបាល​​ជឿ​ជាក់​ថា ជន​ជាតិ​ភាគតិច​ម៉ុង​តាញ៉ា​​ក្នុង​ប្រទេស​កម្ពុជា​​មិនមែន​ជា​អ្នក​ស្វែង​រក​សិទ្ធិ​​​​​ជ្រក​កោន​​ស្រប​​ច្បាប់​​ឡើយ​។

ទាំង​​ឧត្ដម​សេនីយ៍ ខៀវ សុភ័គ ទាំង​លោក ​​សុខ ផល អគ្គនាយក​នៃ​អគ្គនាយកដ្ឋាន​អន្តោ​​ប្រវេសន៍​​ក្រសួង​មហាផ្ទៃ​ មិន​អាច​​​ទាក់​ទង​សុំ​ការ​​អធិប្បាយ​បាន​ទេ​កាល​ពី​ម្សិលមិញ​។

ក៏ប៉ុន្តែ​លោក កែម សារិន ប្រធាន​​ការិយា​​ល័យ​ជន​ភៀស​ខ្លួន​ បាន​និយាយ​ថា លោក​បាន​​​ទទួល​​លិខិត​មួយ​ច្បាប់​​ពី​​ឧត្តម​​​ស្នង​​​ការ​​​អង្គការ​​​សហ​ប្រជា​​​​​ជាតិ​​​ទទួល​​​បន្ទុក​​​ជន​​​ភៀស​​​ខ្លួន​ប្រហែល​​១សប្ដាហ៍​មក​ហើយ​​ ដោយ​​ជូន​ដំណឹង​មក​​លោក​ថា មនុស្ស​១២​នាក់​នឹង​ត្រូវ​អម​ដំណើរ​ទៅ​ប្រទេស​វៀតណាម​។

ក្នុង​របាយការណ៍​មួយ​​ដែល​ចេញ​កាលពី​ខែ​មុន អង្គការឃ្លាំ​​មើល​សិទ្ធិ​មនុស្ស​​ ​បាន​និយាយ​​​ថា អាជ្ញាធរ​វៀតណាម​​​កំពុង​អនុវត្ត​កម្មវិធី​ជា​ប្រព័ន្ធ​​​​ដើម្បី​ចាប់​ខ្លួន​ ឃុំខ្លួន​ និង​ធ្វើ​ទារុណកម្ម​ ដោយ​​​ផ្ដោត​លើ​ជនជាតិ​ភាគតិច​ម៉ុង​តាញ៉ា ដែល​ជា​មូលហេតុ​​បង្ខំ​ឲ្យ​ពួកគេ​​ឆ្លង​ព្រំដែន​។

អង្គ​ការ​ការពារ​សិទ្ធិ​ជនជាតិភាគតិច​ម៉ុង​តាញ៉ា​ដែល​មាន​មូលដ្ឋាន​នៅ​សហរដ្ឋ​អាមេរិក​​​​​​​​​អះ​អាង​ថា ​បង​ប្អូន​របស់​ខ្លួន​​ត្រូវ​បាន​គេ​​​ធ្វើ​ទុក្ខ​បុក​​​​​​ម្នេញ ដោយ​ហេតុ​ថា​ ពួកគេ​បាន​គាំទ្រ​​អាមេរិក​​​​​​​អំឡុង​សង្គ្រាម​ឥណ្ឌូចិន​លើ​កទី១​៕ ស៊ុយឈាង និង មានិត(រាយការណ៍​បន្ថែម​ដោយ Chris Mueller)​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស