29 C
Phnom Penh

​ចាប់​ខ្លួន​​សកម្មជន​ប្រាំនាក់​​​ពីបទ​ចែក​ខិត្តប័ណ្ណ​ប្រឆាំង​ច្បាប់ NGO

ដោយ ឌឹ ខេមបូឌា ដេលី

បទវិភាគ

អាជ្ញាធរ​​នៅ​ក្នុង​រាជធានី​ភ្នំពេញ​បាន​ចាប់​ខ្លួន​ និង​ដោះលែង​​សកម្មជន​​ប្រាំនាក់​កាល​ពី​ថ្ងៃ​សៅរ៍​​ពីបទ​ចែក​ចាយ​ខិត្តប័ណ្ណ​​​ជំរុញ​ឲ្យ​ពលរដ្ឋ​ “និយាយ​ថា ទេ” ចំពោះ​ច្បាប់​​ស្ដីពី​​​អង្គការ​មិន​មែន​រដ្ឋាភិបាល​ ដែល​បណ្ដា​អ្នក​រិះគន់​ព្រួយ​បារម្ភ​​ថា​វា​នឹង​ត្រូវ​បាន​ប្រើ​ប្រាស់​​ដើម្បី​រារាំង​មិន​ឲ្យ​មាន​ការ​រិះគន់​គណបក្ស​ប្រជាជន​កម្ពុជា​។

ច្បាប់​នេះ​ត្រូវ​បាន​អនុម័ត​ដោយ​សមាជិក​សភា​​មក​​ពី​គណបក្សប្រជាជន​កម្ពុជា​​​កាល​ពី​១សប្ដាហ៍​​មុន​ ចំពេល​​មាន​ការ​ធ្វើ​ពហិការ​ពី​គណបក្ស​សង្គ្រោះ​ជាតិ​ដែល​មាន​សំឡេង​ភាគ​តិច​នៅ​ក្នុង​​សភា ហើយ​កំពុង​តែ​​រង់ចាំ​ការ​បោះ​ឆ្នោត​នៅ​ព្រឹទ្ធសភា​ដែល​​គ្រប់​​គ្រង​ដោយ​​គណ​បក្ស​កាន់​អំណាច​​ដែរ​។​

​​កង​កម្លាំង​សន្តិសុខ​​​របស់​រដ្ឋាភិបាល ​ចាប់​ខ្លួន​សកម្មជន​មួយ​ក្រុម​ពីបទ​​ចែក​ចាយ​​​ខិត្តប័ណ្ណ​ប្រឆាំង​ច្បាប់​​ស្ដីពី​អង្គការ​មិន​មែន​រដ្ឋាភិបាល​​នៅ​ក្នុង​រាជធានី​​ភ្នំពេញ កាលពី​ម្សិលមិញ។ រូបថតៈ ស៊ីវ ចាន់ណា​/The Cambodia Daily
​​កង​កម្លាំង​សន្តិសុខ​​​របស់​រដ្ឋាភិបាល ​ចាប់​ខ្លួន​សកម្មជន​មួយ​ក្រុម​ពីបទ​​ចែក​ចាយ​​​ខិត្តប័ណ្ណ​ប្រឆាំង​ច្បាប់​​ស្ដីពី​អង្គការ​មិន​មែន​រដ្ឋាភិបាល​​នៅ​ក្នុង​រាជធានី​​ភ្នំពេញ កាលពី​ម្សិលមិញ។ រូបថតៈ ស៊ីវ ចាន់ណា​/The Cambodia Daily

នៅ​ម៉ោង​ប្រហែល​៨ព្រឹក​​​ថ្ងៃ​អាទិត្យ សកម្ម​ជន​ប្រហែល​៥០​នាក់​​បាន​ចាប់​ផ្ដើម​ហែក្បួន​​ចេញពី​ផ្សារ​រាត្រី​តាម​មាត់​ទន្លេ​ក្នុង​រាជធានី​ភ្នំពេញ​ ឆ្ពោះ​ទៅ​ភាគ​និរតី​​ ដើម្បី​​ចែក​ខិត្ត​ប័ណ្ណ​​​ដែល​សរសេរ​ថា ”​និយាយ​ថា​ទេ” ចំពោះ​​​ច្បាប់​​​​ស្ដីពី​​អង្គការ​មិន​មែន​រដ្ឋាភិបាល​​នៅ​តាម​ផ្សារ​ផ្សេងៗ​​ដែល​​ពួកគេ​បាន​ហែក្បួន​ឆ្លង​កាត់​​។

​ដល់​ម៉ោង​​ប្រហែល​១០​ព្រឹក​​ ពួកគេ​បាន​ទៅ​ដល់​ផ្សារ​អូរឫស្សី​ក្បែរ​ពហុកីឡដ្ឋាន​​​​ជាតិ​អូឡាំពិក ដែល​នៅ​ទីនោះ​​សន្តិសុខ​ខណ្ឌ និង​សន្តិសុខ​ផ្សារ​​បាន​ចាប់​ខ្លួន​ស្ត្រី​ប្រាំនាក់​ក្នុង​ចំណោម​​សកម្មជន​​ទាំង​អស់​នេះ​។ ពួកគេ​ត្រូវ​​​​​​​​បាន​នាំ​​ខ្លួន​ទៅ​កាន់​​​ប៉ុស្ដិ៍​នគរ​បាល​សង្កាត់​ មុន​ពេល​ត្រូវ​បាន​​​​​បញ្ជូន​ទៅ​កាន់​​​អធិការ​ដ្ឋាន​​​នគរ​បាល​​​ខណ្ឌ​​​ដើម្បី​​ធ្វើ​ការ​សាកសួរ​បន្ថែម ហើយ​​ត្រូវ​បាន​ដោះ​លែង​​​វិញ​នៅ​វេលា​​ម៉ោង​​​ប្រហែល​៥ល្ងាច​។

លោក ឡុង ឌីម៉ង់ អ្នកនាំពាក្យ​សាលា​រាជ​ធានី​បាន​មាន​ប្រសាសន៍​កាលពី​ម្សិលមិញ​ថា “យើង​​ត្រូវ​តែ​ចាប់​ខ្លួន​ពួកគាត់​ ព្រោះ​ពួកគាត់​​​​​ហែក្បួន​​តាម​ផ្លូវ​ និងទី​សាធារណៈ​​ដោយ​​គ្មាន​ការ​អនុញ្ញាត។ នៅ​ប្រទេស​ផ្សេងៗ​​ ពលរដ្ឋ​គាំទ្រ​ និង​អបអរ​សាទរ​ នៅ​ពេល​​ច្បាប់​ថ្មី​ត្រូវ​បាន​បង្កើត​ឡើង​​។ ប៉ុន្តែ​នៅ​ទី​នេះ​ ពួកគាត់​បែរ​ជា​ប្រឆាំង​ការ​បង្កើត​ច្បាប់​ទៅវិញ​”។

លោក​បាន​បន្ថែម​ថា ការ​ហែក្បួន​​នេះ​”ធ្វើឲ្យ​​ប៉ះពាល់​ដល់​សណ្ដាប់​ធ្នាប់​សាធារណៈ ហើយ​បង្ក​ការ​កក​ស្ទះ​ចរាចរណ៍​​។ វា​ក៏​ធ្វើ​ឲ្យ​ប៉ះពាល់​ដល់​បរិស្ថាន​​ដែរ ព្រោះ​​បន្ទាប់ពី​ពលរដ្ឋ​អាន​វា​ [ខិត្តប័ណ្ណ​] រួច​ ពួក​គាត់​នឹង​បោះ​វា​ចោល​ពាស​វាល​ពាសកាល​”។

លោក ឡុង ឌីម៉ង់ បាន​ចោទ​ប្រកាន់​ស្ត្រី​ទាំង​ប្រាំនាក់​​ដែល​​សុទ្ធ​តែ​ជា​សកម្មជន​ប្រឆាំង​​​​ការ​បណ្ដេញ​ចេញ​ដ៏​លេចធ្លោ​​ថា ​ជា​”អ្នក​តវ៉ា​អាជីព​ និង​គ្រប់​វិស័យ”។​ លោក​បាន​​លើក​ឡើង​ថា ពួកគេ​ត្រូវ​បាន​ដោះ​លែង​ បន្ទាប់ពី​​​​សន្យា​​​ថា​នឹង​ឈប់​ចែក​ខិត្តប័ណ្ណ​តទៅ​ទៀត​។cam-photo-ngo-arrest-licadho

អ្នកស្រី សុង ស្រីលាភ ដែល​​ស្ថិត​​​នៅ​ក្នុង​​ចំណោម​​​​ស្ត្រី​ដែល​ត្រូវ​បានចាប់​ខ្លួន​​បាន​លើក​​​ឡើង​ថា អាជ្ញាធរ​បាន​សួរ​ពួកគាត់​ថា តើ​ខិត្ត​ប័ណ្ណ​ទាំង​នេះ​បោះពុម្ព​នៅ​កន្លែង​ណា ប៉ុន្តែ​​ពួកគាត់​​មិនព្រម​​ប្រាប់​ទីតំាង​ឡើយ ហើយ​អាជ្ញាធរ​បាន​ចោទ​ប្រកាន់​​​​​ពួកគាត់​​ថា ​​ការ​ហែ​ក្បួន​នេះ​​ធ្វើ​ឡើង​តាម​​បញ្ជា​​​ពី​មេ​ដែល​មិន​​បញ្ចេញ​ឈ្មោះ​​​។

អ្នកស្រី​បាននិយាយ​ថា ”ខ្ញុំ​បាន​ប្រាប់​ពួកគេ​​​ថា គ្មាន​​អ្នក​ណា​បញ្ជា​ឲ្យ​យើង​ធ្វើ​ទេ​ វា​​គឺ​ជា​ឆន្ទៈ​របស់​ពលរដ្ឋ​ដែល​នាំគ្នា​តវ៉ា​​ប្រឆាំង​​​​​​ច្បាប់​ដែល​មិន​ការ​ពារ​ប្រយោជន៍​របស់​ពលរដ្ឋ”។

អ្នកស្រី​​បាន​លើក​ឡើង​ទៀត​ថា អ្នកស្រី​បាន​ចុះ​​​កិច្ច​សន្យា​ដើម្បី​ឲ្យ​គេ​ដោះលែង​អ្នកស្រី ប៉ុន្តែ​នឹង​​​បន្ត​ការ​តវ៉ា​ប្រឆាំង​ច្បាប់​ស្ដីពី​​អង្គការ​មិន​មែន​រដ្ឋាភិបាល​តទៅ​​ទៀត។

លោក អំ សំអាត អ្នក​គ្រប់គ្រង​​​ផ្នែក​បច្ចេក​​ទេស​​​នៅ​អង្គការ​សិទ្ធិ​មនុស្ស​លីកាដូ​ បាន​លើក​​​ឡើង​ថា លោក​បាន​ឃ្លាំមើល​ការ​ហែក្បួន​នេះ ​ហើយ​បាន​ឃើញ​ការ​ចាប់​ខ្លួន​​នេះ​។

លោក​បាន​មាន​ប្រសាសន៍​ថា ”​រាល់​ថ្ងៃ​ យើង​​​​ឃើញ​សាលា​រៀន​ ក្រុម​ហ៊ុន គ្លីនិក​ និង​ភោជនីយដ្ឋាន​ចែក​ខិត្តប័ណ្ណ​​នៅ​តាម​ផ្លូវ​ ប៉ុន្តែ​យើង​មិន​ដែល​ឃើញ​​អាជ្ញាធរ​​ឃាត់​ឬ​ចាប់​ខ្លួនពួកគេ​ឡើយ​”។

ច្បាប់​ស្ដីពី​អង្គការ​មិន​មែន​រដ្ឋាភិបាល​​ នឹង​តម្រូវ​ឲ្យ​អង្គការ​មិន​មែន​រដ្ឋាភិបាល​នៅ​ក្នុង​ប្រទេស​ទាំង​អស់​​ចុះ​បញ្ជី​ជាមួយ​រដ្ឋាភិបាល​ និង​ដាក់​ជូន​របាយការណ៍​ប្រចាំ​ឆ្នាំ​ស្ដីពី​សកម្ម​ភាព និង​ហិរញ្ញវត្ថុ​របស់​ខ្លួន​។

រដ្ឋាភិបាល​​លើក​ឡើង​ថា កម្ពុជា​ត្រូវ​ការ​ច្បាប់​នេះ​ជា​ចាំបាច់​​ ដើម្បី​ប្រយុទ្ធប្រឆាំង​ការ​លាង​លុយ និង​អំពើ​ភេរវកម្ម​។ បណ្ដា​អ្នក​រិះគន់​លើក​ឡើង​ថា ទឡ្ហីករណ៍​​នេះ​​ធ្វើ​ឡើង​ដើម្បី​បង្វែរ​ការ​​ចាប់​អារម្មណ៍​ ហើយ​ពួកគេ​ព្រួយបារម្ភ​ថា​​រដ្ឋាភិបាល​នឹង​ប្រើ​ប្រាស់​បទ-ប្បញ្ញត្តិ​​​​មិន​​​ច្បាស់​​លាស់​ស្ដី​អំពី​ការ​រក្សា​អព្យា​ក្រឹតភាព​ផ្នែក​នយោបាយ និង​ការ​គោរព​ប្រពៃណីជាតិ​ ជា​លេស​ដើម្បី​បិទ​អង្គការ​ណា​​ដែល​រិះគន់​គណបក្ស​ប្រជាជន​កម្ពុជា​។

អង្គការ​សហប្រជាជាតិ​ សហរដ្ឋអាមេរិក និង​សហភាព​អឺរ៉ុប​​ សុទ្ធ​តែ​បាន​ជំរុញ​ឲ្យ​គណ​បក្ស​ប្រជាជន​កម្ពុជា​ពិចារណា​​ឡើង​វិញ​ចំពោះ​​​​​ច្បាប់​នេះ​​​៕ ស៊ុយឈាង​​​​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស