ទីស្ដីការគណៈរដ្ឋមន្ត្រីបានចេញសេចក្ដីថ្លែងការណ៍មួយកាលពីថ្ងៃសុក្រ រិះគន់លោក សម រង្ស៊ី ប្រធានគណបក្សសង្គ្រោះជាតិ ខ្លាំងៗជុំវិញផែនទីមួយផលិតដោយបារាំង ដែលលោកបានបង្ហោះតាមបណ្ដាញទំនាក់ទំនងសង្គមហ្វេសប៊ុក ដោយអះអាងថា ប្រធានគណបក្សប្រឆាំងរូបនេះមិនគោរពបូរណភាពទឹកដីរបស់កម្ពុជា។
ទីស្ដីការគណៈរដ្ឋមន្ត្រីបានលើកឡើងថា លោក សម រង្ស៊ី បានធ្វើឲ្យការពិភាក្សាជុំវិញបញ្ហាព្រំដែនរបស់កម្ពុជា ជាមួយវៀតណាម មានភាពស្មុគស្មាញដោយការបង្ហោះចែករំលែកផែនទីដែលលោក ហុង សុខហួរ សមាជិកព្រឹទ្ធសភាមកពីគណបក្សប្រឆាំង បានទិញពីវិទ្យាស្ថានជាតិភូមិសាស្ត្ររបស់បារាំង ក្នុងតម្លៃ១៦៨ដុល្លារ។
សេចក្ដីថ្លែងការណ៍នេះមានខ្លឹមសារដូច្នេះថា ”[លោក សម រង្ស៊ី] ក៏មានបំណងបង្ហាញថា ផែនទីដែលគាត់បានទិញពីផ្សារមួយនៅបារាំង មានតម្លៃជាងផែនទីផ្លូវការដែលរដ្ឋាភិបាលបាននិងកំពុងប្រើប្រាស់” ដើម្បីកំណត់ព្រំដែនជាមួយវៀតណាម។ សេចក្ដីថ្លែងការណ៍ដដែលនេះបន្តថា “តើតម្លៃអធិបតេយ្យរបស់កម្ពុជា នៅក្នុងក្រសែភ្នែករបស់ឯកឧត្ដម សម រង្ស៊ី និងគណបក្សសង្គ្រោះជាតិ មានតម្លៃត្រឹមតែ១៦៨ដុល្លារទេឬ?”។
យោងតាមលោក សម រង្ស៊ី បានឲ្យដឹងថា លោក ហុង សុខហួរ បានទិញផែនទីនេះដើម្បីឲ្យគណបក្សប្រឆាំងអាចកំណត់ដឹងថា តើរដ្ឋាភិបាលបានបោះបង្គោលតាមបណ្ដោយព្រំដែនជាមួយវៀតណាម ត្រឹមត្រូវដែរឬទេ។
ក្នុងរយៈពេល១សប្ដាហ៍ដែលគណបក្សសង្គ្រោះជាតិបានប្រកាសថា ខ្លួនមានផែនទីនេះ លោក វា៉ គឹមហុង រដ្ឋមន្ត្រីទទួលបន្ទុកកិច្ចការព្រំដែន បានធ្វើសន្និសីទកាសែតដើម្បីបង្ហាញផែនទីរបស់រដ្ឋាភិបាល ដោយលាត្រដាងវានៅលើកម្រាលព្រំនៅទីស្ដីការគណៈរដ្ឋមន្ត្រី។
បន្ទាប់ពីបានច្រានចោលកំហុសឆ្គងនៅក្នុងការងារកំណត់ព្រំដែនរបស់រដ្ឋាភិបាលក្នុងរយៈពេលរាប់ទសវត្សរ៍មកនេះ លោកនាយករដ្ឋមន្ត្រី ហ៊ុន សែន បានទទួលស្គាល់កាលពីសប្ដាហ៍មុនថា បង្គោលព្រំដែនមួយចំនួនរបស់វៀតណាមប្រហែលជាបានបោះចូលក្នុងទឹកដីរបស់ប្រទេសកម្ពុជា ហើយថា រដ្ឋាភិបាលនឹង “ទាមទារឲ្យកែតម្រូវ “នៅក្នុងករណីបែបនេះ។
លោក សម រង្ស៊ី បានមានប្រសាសន៍កាលពីម្សិលមិញថា លោកបានបង្ហោះចែករំលែកផែនទីដែលទិញនៅក្នុងទីក្រុងបា៉រីសនេះ ដើម្បីបង្ហាញថាផែនទីព្រំដែនរបស់កម្ពុជា ដែលរដ្ឋធម្មនុញ្ញចែងឲ្យប្រកាន់ខ្ជាប់តាមជានិច្ចនោះ គឺងាយស្រួលរកណាស់។
ដោយចាត់ទុកការបកស្រាយរបស់ទីស្ដីការគណៈរដ្ឋមន្ត្រីចំពោះសេចក្ដីសម្រេចរបស់លោកថា “ខុសឆ្ងាយ” នោះ លោក សម រង្ស៊ី លើកឡើងបន្តថា ”ខ្ញុំគិតថាវាមានប្រយោជន៍សម្រាប់អ្នកដែលការពារផលប្រយោជន៍របស់កម្ពុជា ដឹងថាផែនទីបែបនេះគឺអាចរកបាន មិនពិបាកទេ”៕ សុខុម (រាយការណ៍បន្ថែមដោយ Colin Meyn)