30 C
Phnom Penh

ទោះ​ជា​មាន​ឧបសគ្គ ក៏​សកម្មជន​គណបក្ស​សង្គ្រោះ​ជាតិ​ទៅ​ដល់​ព្រំដែន

ដោយ ឌឹ ខេមបូឌា ដេលី

បទវិភាគ

ស្រុក​កំពង់រោទិ៍, ខេត្ត​ស្វាយរៀង-ដោយ​មាន​ប្រជាពលរដ្ឋ​ប្រហែល​២.៥០០​នាក់​ធ្វើ​ដំណើរ​មក​ជាមួយ កាលពី​ថ្ងៃ​អាទិត្យ លោក រៀល ខេមរិន្ទ្រ តំណាង​រាស្ត្រ​គណបក្ស​ប្រឆាំង បាន​វិល​ត្រឡប់​ទៅ​កាន់​វាល​ស្រែ​នៅ​តាម​ព្រំដែន​ខាង​កើត​ដាច់​ស្រយាល​នៃ​ប្រទេស​កម្ពុជា ជា​ទី​ដែល​លោក​មាន​ប្រសាសន៍​ថា ជន​ស៊ីវិល​វៀតណាម​បាន​វាយ​ដុំ​លោក​កាលពី​ខែ​មុន នៅ​ពេល​ដែល​លោក​ដឹក​នាំ​ដំណើរ​ទៅ​មើល​បង្គោល​ព្រំដែន​ដែល​មាន​ជម្លោះ។

ជួបជុំ​គ្នា​នៅ​ទីលាន​ប្រជាធិបតេយ្យ​ក្នុង​ក្រុង​ភ្នំពេញ​នៅ​ម៉ោង​ប្រហែល​៥​ព្រឹក លោក ខេមរិន្ទ្រ និង​ក្រុម​អ្នក​គាំទ្រ​ភាគ​ច្រើន​ក្មេងៗ​ដែល​មាន​ចំនួន​កើន​ឡើង​យ៉ាង​ច្រើន បាន​ចូល​រួម​ក្នុង​ពិធី​ប្រោះព្រំ​មួយ មុន​ពេល​ឡើង​ជិះ​រថយន្ត​រាប់​សិប​គ្រឿង​ដែល​កំពុង​រង់​ចាំ។

មនុស្ស​មួយ​ក្រុម​ជា​ជន​ជាតិ​ខ្មែរ​​ប្រដាប់​ដោយ​ដំបង​ឈើ​ឈរ​នៅ​មុខ​ទាហាន​ខ្មែរ​នៅ​ចម្ងាយ​ប្រហែល​១គីឡូម៉ែត្រ​ពី​ព្រំដែន​វៀតណាម​ក្នុង​ខេត្ត​ស្វាយរៀង​ ដែល​ពួកគេ​ប្រឈម​នឹង​សកម្មជន​រាប់​រយនាក់​ដែល​ដឹក​នាំ​ដោយ​តំណាង​រាស្ត្រ​បក្ស​ប្រឆាំង​​ទៅ​កាន់​តំបន់​នោះ​កាលពី​ថ្ងៃ​អាទិត្យ​។ រូបថតៈ Alex Willemyns/The Cambodia Daily
មនុស្ស​មួយ​ក្រុម​ជា​ជន​ជាតិ​ខ្មែរ​​ប្រដាប់​ដោយ​ដំបង​ឈើ​ឈរ​នៅ​មុខ​ទាហាន​ខ្មែរ​នៅ​ចម្ងាយ​ប្រហែល​១គីឡូម៉ែត្រ​ពី​ព្រំដែន​វៀតណាម​ក្នុង​ខេត្ត​ស្វាយរៀង​ ដែល​ពួកគេ​ប្រឈម​នឹង​សកម្មជន​រាប់​រយនាក់​ដែល​ដឹក​នាំ​ដោយ​តំណាង​រាស្ត្រ​បក្ស​ប្រឆាំង​​ទៅ​កាន់​តំបន់​នោះ​កាលពី​ថ្ងៃ​អាទិត្យ​។ រូបថតៈ Alex Willemyns/The Cambodia Daily

មិន​សូវ​មាន​ការ​ផ្គត់ផ្គង់​និង​មាន​ភ្លៀង​មូសុង​ផង​នោះ បាន​ធ្វើ​ឲ្យ​ក្រុម​នេះ​យឺតយ៉ាវ ហើយ​បាន​ទៅ​ដល់​ខេត្ត​ស្វាយរៀង​នៅ​ពេល​ប្រហែល​ថ្ងៃ​ត្រង់ និង​បាន​បន្ត​ដំណើរ​ទាំង​លំបាក​តាម​ផ្លូវ​ដី​ចង្អៀត​និង​​ជង្ហុក​ក្រហេង​ក្រហូង ក្នុង​ស្រុក​កំពង់រោទិ៍​បន្ទាប់ពី​ម៉ោង​ពីរ​រសៀល។

ការ​ធ្វើ​ដំណើរ​ដ៏​ឆ្ងាយ​នេះ​មិន​បាន​បង្អាក់​ទឹក​ចិត្ត​សកម្មជន ដែល​បាន​ចុះ​ពី​រថយន្ត​ដើរ​លើ​ផ្លូវ​ភូមិ​មាន​ទឹក​ដក់​នៅ​ឯ​របាំង​ផ្លូវ​នគរបាល​មួយ​កន្លែង​នៅ​កំពង់​រោទិ៍។ ដើរ​ទៅមុខ​ក្រុម​មនុស្ស លោក ខេមរិន្ទ្រ បាន​និយាយ​ទៅ​កាន់​មេ​ប៉ូលិស​ដើម្បី​ចរចា​សុំ​ផ្លូវ​ឲ្យ​ក្រុម​របស់​លោក​ធ្វើ​ដំណើរ​ទៅ​មុខ​ទៀត។

លោក ខេមរិន្ទ្រ ទាំង​ទឹក​មុខ​ញញិម​ញញែម​បាន​ប្រាប់​ក្រុម​អ្នក​គាំទ្រ​របស់​លោក​ថា “បើ​ពួកគេ​ស្តាប់​យើង​និយាយ ហើយ​យើង​ស្តាប់​ពួកគេ​និយាយ អ្នក​គ្រប់គ្នា​នឹង​សប្បាយ​ចិត្ត​និង​មាន​ទឹក​ចិត្ត”។

ដោយ​មេ​បញ្ជាការ​នោះ​មាន​ការ​ស្រុះស្រួល​នឹង​តំណាង​រាស្ត្រ​គណបក្ស​សង្គ្រោះ​ជាតិ​រូប​នេះ ការ​ធ្វើ​ដំណើរ​បាន​ចាប់​ផ្តើម​ទៅ​កាន់​បង្គោល​ព្រំដែន​លេខ​២០៣ និង​វាលស្រែ​ដែល​ឥត​មាន​ដាំ​ស្រូវ គឺ​ទី​នោះ​ហើយ​ដែល​ជន​ស៊ីវិល​វៀតណាម ដែល​គាំទ្រ​ដោយ​ទាហាន​វៀតណាម បាន​ប៉ះ​ទង្គិច​ជាមួយ​ក្រុម​របស់​លោក ខេមរិន្ទ្រ ដែល​មាន​ចំនួន​ប្រហែល​មួយ​ភាគ​ដប់​នៃ​ក្រុម​វៀតណាម នៅ​ថ្ងៃ​ទី​២៨​ខែ​មិថុនា។

បន្ទាប់ពី​ដើរ​កាត់​វាល​ស្រែ​ប្រហែល​៤៥​នាទី ក្រុម​នេះ​បាន​ទៅ​ដល់​ថ្លុក​តូច​មួយ នៅ​ក្នុង​ទឹក​ដី​កម្ពុជា​យ៉ាង​ពិត​ប្រាកដ ដែល​នៅ​ទីនោះ​ហើយ លោក ខេមរិន្ទ្រ និយាយ​ថា លោក​ត្រូវ​បាន​ជនជាតិ​វៀតណាម​វាយ​ដុំ​ធ្វើ​បាប។

(ពីឆ្វេង) តំណាង​រាស្ត្រ​គណបក្ស​សង្គ្រោះ​ជាតិ​ លោក អ៊ំ សំអាន លោក រៀល ខេមរិន្ទ្រ​ និង​ ជាម ច័ន្ទនី​ ឈរថត​រូប​នៅ​ជិត​បង្គោល​ព្រំដែន​លេខ​២០៣ កាលពី​ថ្ងៃ​អាទិត្យ។​ រូបថតៈ Alex Willemyns/The Cambodia Daily
(ពីឆ្វេង) តំណាង​រាស្ត្រ​គណបក្ស​សង្គ្រោះ​ជាតិ​ លោក អ៊ំ សំអាន លោក រៀល ខេមរិន្ទ្រ​ និង​ ជាម ច័ន្ទនី​ ឈរថត​រូប​នៅ​ជិត​បង្គោល​ព្រំដែន​លេខ​២០៣ កាលពី​ថ្ងៃ​អាទិត្យ។​ រូបថតៈ Alex Willemyns/The Cambodia Daily

ទាហាន​និង​កម្លាំង​រាជ​អាវុធហត្ថ​កម្ពុជា ប្រដាប់​ដោយ​កាំភ្លើង បាន​រង់ចាំ​សកម្មជន​ទាំង​នោះ។ រួម​ជាមួយ​ជួរ​មនុស្ស​ស្លៀក​ពាក់​ស៊ីវិល​កាន់​ដំបង​ឈើ​រង់​ចាំ​សម្លុត​ផង​នោះ ពួកគេ​ឲ្យ​សញ្ញា​ដ៏​ច្បាស់​ថា ក្រុម​នេះ​មិន​អាច​ប្រថុយ​ដើរ​ហួស​ថ្លុក​នេះ​បាន​ទេ។

ដោយ​តំបន់​នេះ​នៅ​ចម្ងាយ​ប្រហែល​មួយ​គីឡូម៉ែត្រ​ពី​បង្គោល​ព្រំដែន​លេខ​២០៣​នោះ លោក ខេមរិន្ទ្រ កាលពី​សប្តាហ៍​មុន​បាន​យល់​ស្រប​ជាមួយ​អាជ្ញាធរ​ខេត្ត​ថា ក្រុម​របស់​លោក​នឹង​ឈប់​នៅ​ត្រង់​នោះ ហើយ​ឲ្យ​តំណាង​តែ​១០០​នាក់​ប៉ុណ្ណោះ​បន្ត​ដំណើរ​ទៅ​មុខ ដើម្បី​ពិនិត្យ​បង្គោល​នោះ។

ក្រុម​មនុស្ស​ជា​ជនជាតិ​ខ្មែរ​មាន​កាន់​ដំបង​ផង ដែល​រាំង​ផ្លូវ​ដែល​អាច​ធ្វើ​ដំណើរ​ជុំវិញ​ថ្លុក​នោះ និង​មាន​ការ​គាំទ្រ​ពី​ទាហាន​រាប់​សិប​នាក់ បាន​សើច​ចំអក​ដាក់​មនុស្ស​១០០​នាក់ ដែល​លោក ខេមរិន្ទ្រ បាន​ជ្រើសរើស​ឲ្យ​ទៅ។

ដោយ​បញ្ចេញ​ឫក​ពា​បង្ហាញ​ថា​ពួកគេ​នឹង​មិន​អនុញ្ញាត​ឲ្យ​ក្រុម​នេះ​ឆ្លង​កាត់​នោះ ការ​ប្រវាយ​ប្រតប់​គ្នា​មួយ​ប្រាវ​បាន​កើត​ឡើង នៅ​ពេល​ដែល​ពួក​មាន​ឫក​ច្រងេង​ច្រងាង​នេះ​បាន​ជួប​តទល់​នឹង​ក្រុម​អ្នក​គាំទ្រ​បក្ស​ប្រឆាំង ដោយ​រារាំង​ការ​ធ្វើ​ដំណើរ​របស់​ពួកគេ។

អ្នក​រៀបចំ​វ័យ​ក្មេង​បាន​និយាយ​ដោយ​សុំ​កុំ​ឲ្យ​ក្រុម​នេះ​រុល​ទៅ​មុខ​ថា “ពួកគេ​មាន​ដំបង យើង​គ្មាន​ទេ”។

ការ​ប្រវាយ​ប្រតប់​គ្នា​បាន​ចប់​ទៅ​វិញ​ភ្លាមៗ នៅ​ពេល​ដែល​ក្រុម​អ្នក​រៀបចំ​ប្រទាក់​ដៃ​គ្នា​ទាញ​ក្រុម​មនុស្ស​១០០​នាក់​មក​កាន់​កន្លែង​សុវត្ថិភាព។ អ្នក​ខ្លះ​បាន​សួរ​ថា ហេតុអ្វី​ឥឡូវ​នេះ ពួក​បុរស​ដែល​មើល​ទៅ​មាន​កំហឹង​ទាំង​នេះ​ធ្វើ​តាម​ការ​បញ្ជា​របស់​វៀតណាម ដោយ​រារាំង​ការ​ធ្វើ​ដំណើរ​របស់​ពួក​ខ្លួន​លើ​ទឹក​ដី​ខ្មែរ​ទៅ​វិញ។

ដោយក្រុម​អ្នក​រៀបចំ​ទប់​មនុស្ស​២.៥០០​នាក់​មិន​ឲ្យ​សម្រុក​ទៅ​តំបន់​ដី​ដែល​មាន​ភាព​តានតឹង​កំពុង​កើន​ឡើង​នោះ ស្រាប់តែ​មន្ត្រី​នគរបាល​ម្នាក់​បាន​ដើរ​ចូល​មក​ចន្លោះ​ភាគី​ទាំង​ពីរ តាម​មើល​ទៅ​ព្យាយាម​ធ្វើ​ឲ្យ​ពួក​អ្នក​កាន់​ដំបង​និង​ទាហាន​នៅ​ស្ងៀម​ស្ងាត់។

ក្រោយពី​រាប់​ចំនួន​មនុស្ស​ដែល​គេ​អនុញ្ញាត មន្ត្រី​នគរបាល​រូប​នេះ​បាន​អនុញ្ញាត​ឲ្យ​សកម្មជន​ដើរ​កាត់​ជួរ និង​ឆ្ពោះ​ទៅ​បង្គោល​ព្រំដែន។

បន្ទាប់ពី​ក្រុម​សកម្មជន​បាន​សម្រុក​ដើរ​ឆ្លង​កាត់​វាល​ស្រែ​ដែល​កំពុង​ដាំ​ដុះ ទាហាន​វៀតណាម​ប្រដាប់​អាវុធ​បាន​ឃ្លាំ​មើល ខណៈ​ដែល​ពួកគេ​ទៅ​ដល់​បង្គោល​ព្រំដែន​លេខ​២០៣ ដែល​ដាំ​នៅ​ចំ​កណ្តាល​វាល​ស្រែ។

តោង​បង្គោល​បេតុង​កម្ពស់​បី​ម៉ែត្រ និង​អម​ដំណើរ​ដោយ​លោក អ៊ំ សំអាន លោក ជាម ច័ន្ទនី និង លោក នុត រំដួល នោះ តំណាង​រាស្ត្រ​គណបក្ស​សង្គ្រោះ​ជាតិ លោក ខេមរិន្ទ្រ បាន​ប្រាប់​ក្រុម​មនុស្ស​ម្នា​ថា បង្គោល​ព្រំដែន​នេះ​ត្រូវ​គេ​ដាំ​នៅ​ទី​នេះ​ដោយ​មិន​ត្រឹម​ត្រូវ។

លោក ខេមរិន្ទ្រ បាន​និយាយ​ថា “ថ្ងៃ​នេះ​ជា​ថ្ងៃ​ប្រវត្តិសាស្ត្រ​មួយ​សម្រាប់​ប្រទេស​កម្ពុជា”។

លោក​បាន​និយាយ​ដោយ​សំដៅ​ប្រទេស​វៀតណាម​ថា “យើង​អាច​បង្ហាញ​បាន​ថា ពួកគេ​ដាំ​[បង្គោល​នេះ]​ដោយ​ខុស​ច្បាប់ ដោយ​ភាគី​តែ​ម្ខាង និង​តាម​រយៈ​ចុង​កាណុង។ យើង​នឹង​ប្រើ​អ្វី​ដែល​យើង​បាន​ឃើញ​នៅ​ថ្ងៃ​នេះ​ដើម្បី​ប្រៀប​ធៀប​ជាមួយ​ផែនទី​ពិត​ប្រាកដ ដែល​ឥឡូវ​ស្ថិត​ក្នុង​ដៃ​របស់​យើង”។

លោក​បាន​និយាយ​ថា “នេះ​ជា ‘តំបន់​ស’ មាន​ជម្លោះ ប៉ុន្តែ​យួន​អាច​ធ្វើ​ស្រែ​របស់​ពួកគេ​នៅ​ទី​នេះ​បាន ចំណែក​ពលរដ្ឋ​ខ្មែរ​សូម្បី​តែ​ដើរ​លើ​ដី​នេះ​ក៏​មិន​បាន​ផង”។

លោក សំអាន បាន​និយាយ​ មុន​ពេល​ហៅ​ក្រុម​អ្នក​ទៅ​មើល​ព្រំដែន​ធ្វើ​ដំណើរ​មក​វិញ​ថា “បង្គោល​នេះ​ស្ថិត​ក្នុង​ទឹក​ដី​របស់​យើង​យ៉ាង​ហោច​ណាស់​មួយ​គីឡូ​ម៉ែត្រ”។

ដោយ​ផ្លូវ​ដី​នៅ​ស្រុក​កំពង់​រោទិ៍​មាន​សភាព​កាន់​តែ​លំបាក​ជាង​កាល​ពី​ពេល​ថ្ងៃ ម៉ោង​៨​យប់​ទៅ​ហើយ ទើប​រថយន្ត​តួរីស​រាប់​សិប​គ្រឿង​បាន​បើក​មក​ដល់​ក្រុង​ស្វាយរៀង និង​បើក​ឆ្ពោះ​មក​ក្រុង​ភ្នំពេញ​វិញ៕ និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស