មួយឆ្នាំ បន្ទាប់ពីការតវ៉ានៅទីលានប្រជាធិបតេយ្យដែលបានប្រែក្លាយជាហិង្សា និងត្រូវបានចាត់ថាការប៉ុនប៉ងធ្វើកុបកម្មនោះ កាលពីម្សិលមិញ សាលាដំបូងរាជធានីភ្នំពេញបានប្រកាសថា ខ្លួននឹងពន្លឿនសវនាជំនុំជម្រះរឿងក្តីបុរស១១នាក់ ដែលត្រូវបានចាប់ខ្លួនក្រោយមក ហើយបានបង្គាប់ពួកគេមិនឲ្យចាកចេញពីប្រទេស។
សន្តិសុខរដ្ឋាភិបាល៣៩នាក់ គឺជាដើមចោទនៅក្នុងករណីនេះ ហើយពួកគេម្នាក់ៗកំពុងស្វែងរកសំណងជាប្រាក់រាប់ពាន់ដុល្លារពីចុងចោទទាំងនោះ គឺសកម្មជនគណបក្សសង្គ្រោះជាតិ ដែលត្រូវបានចោទប្រកាន់ពីបទញុះញង់ និងបង្កអំពើហិង្សាអំឡុងពេលធ្វើការតវ៉ាទាមទារឲ្យ ”ដោះលែងទីលានប្រជាធិបតេយ្យ”។
មុនពេលចាប់ផ្តើមនៅថ្ងៃទី២ នៃការសាកសួរសន្តិសុខទាំងនោះ ដែលឥឡូវនេះសន្តិសុខ៩នាក់បានរៀបរាប់ពីហេតុការណ៍របស់ខ្លួន លោក លឹម មករន្ទ ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍ថា ករណីនេះនឹងបន្តក្រោមលក្ខខណ្ឌថ្មី។
លោក លឹម មករន្ទ បានមានប្រសាសន៍ ថា “តុលាការមិនអនុញ្ញាតឲ្យចុងចោទទាំង ១១នាក់ ចាកចេញពីប្រទេសកម្ពុជាឡើយ ពីព្រោះតុលាការនឹងបើកសវនាការរាល់ថ្ងៃរហូតដល់ដោះស្រាយសំណុំរឿងនេះចប់សព្វគ្រប់”។
លោក ជូង ជូងី មេធាវីតំណាងចុងចោទទាំងនោះបានជំទាស់សេចក្តីសម្រេចេនះ ដោយលើកឡើងពីការណាត់ជួបរបស់គ្រូពេទ្យនៅថ្ងៃទី៥ ខែសីហា នៅឯសហរដ្ឋអាមេរិកដើម្បីព្យាបាលលោក មាជ សុវណ្ណារ៉ា ប្រធានផ្នែកព័ត៌មានរបស់គណបក្សសង្គ្រោះជាតិដែលបានរងរបួសក្នុងគ្រោះថ្នាក់រថយន្តកាលពីខែមិថុនា។
លោកក៏បានលើកឡើងផងដែរថា លោកមានសំណុំរឿងផ្សេងទៀតត្រូវដោះស្រាយហើយលោកមិនអាចធានាថា កូនក្តីរបស់លោកនឹងចូលរួមនៅក្នុងតុលាការឡើយ ។
ដោយធ្វើការសាកសួរដំបូងគេកាលពីម្សិលមិញ គឺលោក ណម ផល្លា អាយុ៣០ឆ្នាំ ជាសន្តិសុខម្នាក់ដែលបាននិយាយថា លោកត្រូវក្រុមសកម្មជនព្រួតវាយ បន្ទាប់ពីត្រូវបានបញ្ជាដោយ សន្តិសុខមួយក្រុមមកពីសង្កាត់ផ្សារ ថ្មីខណ្ឌដូនពេញឲ្យទៅពិនិត្យមើលការតវ៉ានោះ។
ដោយសំដៅដល់អ្នកដែលត្រូវបានដាក់ពង្រាយដើម្បីញុះញង់ឲ្យប្រើអំពើហិង្សានិងពាក្យដែលគេប្រើដើម្បីប្រមាថទៅលើជនជាតិវៀតណាមបែបរើសអើងនោះ លោក ផល្លា បាននិយាយថា “ខ្ញុំបានឮពួកគេស្រែកថា ខ្ញុំគឺជាជនបាតដៃទី៣ និងជាយួន”។
លោកបាននិយាយថា “ដៃស្តាំរបស់ខ្ញុំបានបាក់ ហើយខ្លួនប្រាណនិងក្បាលរបស់ខ្ញុំត្រូវបានវាយរហូតខ្ញុំសន្លប់”។
ទោះជាយ៉ាងណា លោក ណម ផល្លា បាននិយាយថា លោកមិនស្គាល់ចុងចោទទាំង១១នាក់ក្នុងសាលសវនាការឡើយ។
លោក ម៉ៅ ពិសិដ្ឋ អាយុ៤៥ឆ្នាំ ប្រធានភូមិ១ក្នុងសង្កាត់ជ័យជម្នះ ខណ្ឌដូនពេញបានមានប្រសាសន៍ថា លោកបានដួលទៅលើដី បន្ទាប់ពីត្រូវបានវាយពីខាងក្រោយ ដោយដំុថ្មបន្ទាប់ពីលោកបានមកដល់កន្លែងកើតហេតុភ្លាម”។
លោកបានមានប្រសាសន៍ថា “ខ្ញុំបានឮពួកគេស្រែកថា ‘វាយពួកគេឲ្យស្លាប់ទៅ។ ពួកគេជាជនបាតដៃទី៣'”។ លោកបានបន្ថែមថា ខណៈដែលសន្តិសុខខណ្ឌប្រដាប់ដោយដំបងនោះលោក និងសន្តិសុខសង្កាត់ផ្សេងទៀតមិនមានដំបងទេ។
លោក ហម សារ៉េត សន្តិសុខខណ្ឌម្នាក់បាននិយាយថា សន្តិសុខមួយក្រុមប្រហែល៦០នាក់បានជួបគ្នានៅការិយាល័យខណ្ឌ នៅម៉ោងប្រហែល៦ព្រឹក មុនពេលឆ្ពោះទៅកន្លែងតវ៉ាប្រដាប់ដោយដំបង។
លោកបាននិយាយថា លោកមកដល់ទីលានប្រជាធិបតេយ្យនៅម៉ោង៧ និង៤៥នាទីព្រឹក ហើយថា ក្រុមអ្នកតវ៉ាបានបង្កអំពើហិង្សានៅពេលសន្តិសុខបានហែកបដា ដែលចងភ្ជាប់នឹងលួសបន្លានៅជុំវិញទីលានប្រជាធិបតេយ្យ។
លោកបានថ្លែងថា “ខ្ញុំមិនបានឃើញ [អ្នកតវ៉ា] រងរបួសទេ ប៉ុន្តែ កម្លាំងរបស់យើងជាច្រើននាក់បានរងរបួស”។
សវនាការនឹងបន្តនៅថ្ងៃនេះ៕សារុន