នគរបាលក្រុងព្រះសីហនុ បាននិយាយកាលពីម្សិលមិញថា ពេលនេះខ្លួនកំពុងតាមប្រមាញ់បុរសជនជាតិរុស្ស៊ី ម្នាក់ដែលជាប់សង្ស័យពីបទសម្លាប់បុរសជនជាតិរុស្ស៊ី ម្នាក់ទៀតកាលពីយប់ថ្ងៃសៅរ៍ ដោយបានចាក់ជនរងគ្រោះពីក្រោយខ្នងចំនួន៣០កាំបិត មុនពេលអារកជនរងគ្រោះ។
លោក ញ៉ែត ភ័ណ្ឌ នាយការិយាល័យនគរបាលព្រហ្មទណ្ឌកម្រិតធ្ងន់នៃស្នងការរដ្ឋានខេត្តព្រះសីហនុ បានមានប្រសាសន៍ថា ប្រជាពលរដ្ឋដែលរស់នៅក្នុងសង្កាត់លេខ៤ ក្នុងក្រុងឆ្នេរសមុទ្រមួយនេះ បានប្រទះឃើញសពជនរងគ្រោះឈ្មោះ ដេនីស ហ្គនចារ៉ូវ (Denis Goncharov) អាយុ២៨ឆ្នាំ អណ្ដែតនៅក្នុងអូរមួយកាលពីរសៀលថ្ងៃអាទិត្យ នៅចម្ងាយប្រមាណ៤០០ម៉ែត្រពីឆ្នេរអូរត្រេះ ដ៏ពេញនិយម។
លោក ញែ៉ត ភ័ណ្ឌ ដែលកំពុងដឹកនាំការស៊ើបអង្កេតនេះបានបញ្ជាក់ថា នៅពេលនគរបាលប្រទះឃើញសាកសព នគរបាលបានរកឃើញកូនសោបន្ទប់អាផាតមិន និងប្រាក់មួយចំនួនតូចក្នុងហោប៉ៅរបស់ជនរងគ្រោះ ព្រមទាំងខ្សែកពាក់នៅនឹងក។
លោកលើកឡើងបន្តថា “យើងសន្និដ្ឋានថា ករណីនេះមិនមែនជាករណីប្លន់ទេ ព្រោះទ្រព្យសម្បត្តិមួយចំនួនរបស់ជនរងគ្រោះមិនបានបាត់ទៅណា”។ លោកបានមានប្រសាសន៍បន្ថែមថា យោងតាមប្រពន្ធជនជាតិចិន របស់ជនរងគ្រោះបានឲ្យដឹងថា ទូរស័ព្ទស្មាតហ្វូនរបស់ជនរងគ្រោះបានបាត់។
យោងតាមលោក ញ៉ែត ភ័ណ្ឌ បានឲ្យដឹងទៀតថា ប្រពន្ធរបស់ជនរងគ្រោះដែលមានឈ្មោះថា យ័ន ឃួយស៊ាង (Yuan Cuixiang) អាយុ២៦ឆ្នាំ ក៏បានប្រាប់នគរបាលដែរថា បុរសជនជាតិរុស្ស៊ី ម្នាក់បានជិះម៉ូតូមកទទួលប្ដីរបស់នាងដល់អាផាតមិនរបស់ខ្លួនកាលពីយប់ថ្ងៃសៅរ៍ ហើយថា អ្នកទាំងពីរបានចេញទៅផឹកស៊ីជាមួយគ្នា។
នាយការិយាល័យនគរបាលព្រហ្មទណ្ឌរូបនេះបានបញ្ជាក់ថា បុរសជនជាតិរុស្ស៊ី ដែលលោកមិនបញ្ចេញអត្តសញ្ញាណដោយសារខ្លាចប៉ះពាល់ដល់ការងាររបស់នគរបាលក្នុងការតាមប្រមាញ់ជននេះ គឺជាជនសង្ស័យសំខាន់នៅក្នុងឃាតកម្មនេះ។ “ពួកគេជិះម៉ូតូមួយគ្រឿងទៅផឹកស៊ីជាមួយគ្នា ហើយបន្ទាប់មក ជនសង្ស័យបានសម្លាប់ជនរងគ្រោះតាមផ្លូវ។ យើងសង្ស័យថា ឃាតកម្មនេះជាការសងសឹក”។
លោកបានឲ្យដឹងថា នគរបាលសង្ស័យថា ដេនីស ហ្គនចារ៉ូវ កំពុងជិះម៉ូតូរបស់បុរសម្នាក់ទៀតនៅពេលឃាតកម្មនេះបានកើតឡើង ហើយថា វាហាក់ដូចជាជនរងគ្រោះបានព្យាយាមគេចខ្លួនអ៊ីចឹង ពីព្រោះសាកសពជនរងគ្រោះត្រូវបានប្រទះឃើញនៅក្បែរអម្បែងកញ្ចក់ដែលទំនងជាអម្បែងកញ្ចក់ម៉ូតូ។ “ជនរងគ្រោះបានព្យាយាមរត់ ហើយជនសង្ស័យបានបន្តចាក់ជនរងគ្រោះ។ យើងអាចនិយាយបែបនេះបាន ពីព្រោះសពជនរងគ្រោះត្រូវបានប្រទះឃើញនៅចម្ងាយប្រហែល១០ម៉ែត្រពីអម្បែងកញ្ចក់”។
លោកមានប្រសាសន៍ថា ប្រពន្ធរបស់ជនរងគ្រោះបានប្រាប់ភ្នាក់ងារស៊ើបអង្កេតថា នាងបាននិយាយជាមួយប្ដីរបស់នាងតាមទូរស័ព្ទជាលើកចុងក្រោយនៅម៉ោងប្រហែល១២និង៤០នាទីរំលងអធ្រាត្រឈានចូលព្រឹកថ្ងៃអាទិត្យ។លោកបានលើកឡើងថា ”ប្រពន្ធរបស់ជនរងគ្រោះបានទូស័ព្ទទៅជនរងគ្រោះ ហើយជនរងគ្រោះក៏បានឆ្លើយតបត្រឹមតែពាក្យថា ’អូនសម្លាញ់’ ហើយក៏ស្ងាត់ទៅវិញ។ ក្រោយមក គ្មានអ្នកណាអាចទាក់ទងទៅគាត់បានទេ”។
លោកបានបញ្ជាក់បន្ថែមថា ប្ដីប្រពន្ធមួយគូនេះបានធ្វើដំណើរពីក្រុងបាងកក ប្រទេសថៃ មកដល់ក្រុងព្រះសីហនុ កាលពីខែមេសា ប៉ុន្តែលោកមិនបានដឹងថា ពួកគេធ្វើអ្វីនោះទេនៅក្នុងប្រទេសកម្ពុជា។
ចំណែកឯលោក សារ៉ាត់ វិជ្ជា នាយការិយាល័យនគរបាលបច្ចេកទេស និងវិទ្យាសាស្ត្រខេត្តព្រះសីហនុ ដែលបានពិនិត្យសាកសពជនរងគ្រោះជាមួយក្រុមវេជ្ជបណ្ឌិតនៅមន្ទីរពេទ្យបង្អែកខេត្ត មានប្រសាសន៍ថា ពួកលោកបានសន្និដ្ឋានថា ជនរងគ្រោះត្រូវឃាតករចាក់ចំនួន៣០កាំបិត មុនពេលអារក។
លោកបានលើកឡើងទៀតថា ”ជនរងគ្រោះបានរងការវាយប្រហារចន្លោះពីម៉ោង១១ដល់ម៉ោង១២យប់ថ្ងៃសៅរ៍ និងនៅមិនឆ្ងាយពីកន្លែងដែលយើងប្រទះឃើញសាកសពជនរងគ្រោះទេ។ ប៉ុន្តែយើងពិបាកស្វែងរកភ័ស្តុតាងបន្ថែមទៀតណាស់ដោយសារតែភ្លៀងធ្លាក់ខ្លាំង”។ លោកបានបន្តថា នគរបាលកំពុងបន្តរុករកនៅអូរ និងតំបន់ជុំវិញនោះដើម្បីរកមើលតម្រុយបន្ថែមទៀត។
លោក កុល ផល្លី ស្នងការរងខេត្តព្រះសីហនុ មានប្រសាសន៍ថា ជនរងគ្រោះគឺជាវិស្វករផ្នែកបច្ចេកវិទ្យាព័ត៌មាន (IT) ដែលមកកម្សាន្តនៅកម្ពុជា ក្នុងនាមជាទេសចរ ហើយលោកក៏បដិសេធមិនបញ្ចេញអត្តសញ្ញាណជនសង្ស័យជនជាតិរុស្ស៊ី នេះដែរ។ “ខ្ញុំអាចបញ្ជាក់បានថា វាពាក់ព័ន្ធនឹងជម្លោះផ្ទាល់ខ្លួន ហើយជនសង្ស័យគឺជាជនបរទេស មិនមែនខ្មែរទេ”៕ សុខុម