លោក ជា មុនី បានមានប្រសាសន៍កាលពីម្សិលមិញថា លោកនឹងចូលរួមជាមួយគណ បក្សសង្គ្រោះជាតិដើម្បីបំពេញមហិច្ឆតារបស់ខ្លួនដែលមានជាយូរមកហើយ នៅពេលលោកលាលែងពីតំណែងប្រធានសហជីពសេរីកម្មករ ដែលត្រូវបានបង្កើតឡើងដោយបងប្រុសរបស់លោកដែលត្រូវគេធ្វើឃាត និងលោក សម រង្ស៊ី ប្រធានគណបក្សប្រឆាំង នៅក្នុងឆ្នាំ១៩៩៦។
មន្ត្រីសហជីពសេរីកម្មករមិនទាន់បានលើកឡើងថា ពេលណានឹងធ្វើការបោះឆ្នោតដើម្បីជ្រើសរើសបេក្ខភាពជំនួសលោក ជា មុនី ដែលបានឡើងធ្វើជាប្រធានសហជីពមួយនេះភ្លាមៗបន្ទាប់ពីលោក ជា វិជ្ជា ត្រូវបានធ្វើឃាតកាលពីឆ្នាំ២០០៣ នៅឡើយទេ ប៉ុន្តែប្រធានក្រុមតំណាងរាស្ត្រគណបក្សសង្គ្រោះជាតិ មានប្រសាសន៍ថា គណបក្សរបស់លោកនឹងស្វាគមន៍មេដឹកនាំសហជីពរូបនេះ។
កាលពីដើមខែនេះ លោក ជា មុនី បានមានប្រសាសន៍ថា លោកនឹងសម្រាកពីការងារទទួលខុសត្រូវរបស់លោកនៅក្នុងសហជីពសេរីកម្មករ ដើម្បីបន្តការងាររកស៊ីបម្រើផលប្រយោជន៍ផ្ទាល់ខ្លួនដោយធ្វើជាអ្នកសម្រុះសម្រួលកិច្ចព្រមព្រៀងដីធ្លីសម្រាប់ក្រុមហ៊ុនបរទេសណាដែលសម្លឹងចង់បង្កើតរោងចក្រក្នុងប្រទេសកម្ពុជា។
កាលពីម្សិលមិញ លោកបានលើកឡើងថា ការធុញទ្រាន់នឹងការងារសហជីព បានញាំងឲ្យរូបលោកងាកទៅចាប់យកការងារទទួលខុសត្រូវថ្មី។ លោកថ្លែងថា ”តាមពិត ក្នុងចិត្តខ្ញុំ ខ្ញុំចង់ចូលរួមជាមួយគណបក្សយូរហើយ ប៉ុន្តែគ្មានអ្នកមក [ដឹកនាំសហជីពសេរីកម្មករ] ដូច្នេះខ្ញុំក៏ចេះតែបន្តធ្វើទៅ។ ការងាររបស់ខ្ញុំដែលផ្ដោតតែទៅលើកម្មករ និងច្បាប់សម្រាប់កម្មករ គឺជាការងារដដែលៗ ដូច្នេះហើយខ្ញុំចង់ធ្វើការផ្លាស់ប្ដូរដើម្បីជួយជាតិ”។ លោកបានបន្តថា ការមានប្រៀបរបស់គណបក្សសង្គ្រោះជាតិ លើគណបក្សប្រជាជនកម្ពុជាក្នុងពេលថ្មីៗនេះ ជាមូលហេតុសំខាន់សម្រាប់ការសម្រេចចិត្តរបស់លោក។
កាលពីឆ្នាំមុន អតីតមន្ត្រីសហជីពសេរីកម្មករបីរូប ដែលពេលនេះដឹកនាំសហជីពផ្ទាល់ខ្លួន បាននិយាយថា លោក ជា មុនី បានប្រព្រឹត្តអំពើពុករលួយក្នុងសហជីព ហើយបានប្រើប្រាស់មុខតំណែងរបស់ខ្លួនដើម្បីធ្វើឲ្យខ្លួនមានបាន។
លោក ជា មុនី ក៏ត្រូវបានចោទប្រកាន់ថាមានទំនាក់ទំនងជាមួយគណបក្សប្រជាជនកម្ពុជាដែរ ប៉ុន្តែ លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិបានលើកឡើងថា គេនឹងវិនិច្ឆ័យលោកតាមរយៈអត្តចរិត មិនមែនតាមរយៈការសន្និដ្ឋានឬពាក្យចចាមអារ៉ាមនោះទេ។
លោកមានប្រសាសន៍ថា ”មនុស្សស្ទើរគ្រប់គ្នានៅក្នុងគណបក្សប្រឆាំងសុទ្ធតែត្រូវបានចោទប្រកាន់បែបនេះ។ ប៉ុន្តែជាក់ស្តែង បើយើងមានការប្ដេជ្ញាចិត្ត សាធារណជននឹងវិនិច្ឆ័យតាមនោះ មិនមែនផ្អែកលើការចោទប្រកាន់ទេ”។
លោកបន្តថា ” [លោក ជា មុនី ] តែងតែខំធ្វើការដើម្បីគាំទ្រកម្មករនៅក្នុងប្រទេស។ គាត់យល់ពីប្រជាជន ហើយយើងនឹងស្វាគមន៍គាត់”។ លោកបានបន្ថែមថា នៅមិនទាន់មានការពិភាក្សាជាផ្លូវការក្នុងគណបក្សនៅឡើយទេពាក់ព័ន្ធតួនាទីដែលអាចនឹងផ្តល់ឲ្យលោក ជា មុនី។
លោកបានមានប្រសាសន៍បន្ថែមទៀតថា”ខ្ញុំមិនដឹងអំពីផែនការរបស់គាត់ទេ ប៉ុន្តែ ប្រហែលជាគាត់បាននិយាយជាមួយនរណាម្នាក់រួចហើយមើលទៅ”។
លោក សម រង្ស៊ី ដែលបានរួមគ្នាជាមួយលោក ជា វិជ្ជា បង្កើតចលនាកម្មករដំបូងគេនៅកម្ពុជាក្រោយសម័យសង្គ្រាម ស្របពេលវិស័យឧស្សាហកម្មកាត់ដេរចាប់ផ្តើមឈានចូលក្នុងប្រទេសកម្ពុជាក្នុងទសវត្សរ៍ឆ្នាំ១៩៩០នោះ បានបញ្ជាក់កាលពីម្សិលមិញថា គ្មានចំណាត់ការផ្លូវការណាមួយក្នុងការនាំលោក ជា មុនី ចូលក្នុងគណបក្សប្រឆាំងឡើយ។
លោក សម រង្ស៊ី បានមានប្រសាសន៍នៅទីស្នាក់ការកណ្តាលរបស់សហជីពសេរីកម្មករក្នុងរាជធានីភ្នំពេញកាលពីថ្ងៃអាទិត្យ នៅពេលលោក ជា មុនី ប្រកាសពីការសម្រេចលាលែងពីតំណែងរបស់ខ្លួនថា ”ពេលគាត់ចូលរួម នោះជាការសម្រេចចិត្តរបស់គាត់”។
បទបញ្ជាផ្ទៃក្នុងរបស់សហជីពសេរីកម្មរបានចែងថា មេដឹកនាំមួយរូបអាចកាន់តំណែងបានត្រឹមតែពីរអាណត្តិប៉ុណ្ណោះ ដែលក្នុងមួយអាណត្តិៗមានរយៈពេលបីឆ្នាំ។
កាលពីម្សិលមិញ លោក ជា មុនី បដិសេធមិនប្រាប់ថា តើពេលណាការបោះឆ្នោតនឹងត្រូវធ្វើឡើងដើម្បីជ្រើសរើសអ្នកកាន់តំណែងជំនួសលោកឡើយ។ ចំណែកឯលោក សាយ សុខនី ដែលជាអនុប្រធានមួយរូបក្នុងចំណោមអនុប្រធានសហជីពសេរីកម្មករបានលើកឡើងថា បច្ចុប្បន្ន សហជីពសេរីកម្មករគ្មានប្រាក់ដើម្បីរៀបចំការបោះឆ្នោតជ្រើសរើសអ្នកដឹកនាំថ្មីទេ៕ សុខុម និង ស៊ុយឈាង