មន្ត្រីម្នាក់បានឲ្យដឹងកាលពីម្សិលមិញថា អ្នកបរបាញ់សត្វព្រៃម្នាក់នៅក្នុងខេត្តមណ្ឌលគិរីបានរត់គេចពីការចាប់ខ្លួនទាំងប្រផិតប្រផើយកាលពីថ្ងៃអាទិត្យ នៅពេលនគរបាល និងមន្ត្រីរដ្ឋបាលព្រៃឈើបានឆ្មក់ចូលផ្ទះរបស់គាត់ ហើយបានរកឃើញសាច់ទន្សោងចំនួន១៤គីឡូក្រាម និងក្បាលសត្វជាងប្រាំដែលជាប្រភេទសត្វទន្សោងដែលជិតផុតពូជ។
លោក កែវ សុភ័ក្រ្ត អនុប្រធានព្រៃការពារ ខេត្តមណ្ឌលគិរីបានមានប្រសាសន៍ថា វត្ថុតាងដែលត្រូវបានរកឃើញនៅផ្ទះរបស់លោក សំ ប្រុស អាយុ៤០ឆ្នាំ ស្ថិតនៅក្នុងឃុំពូជ្រៃ ស្រុកពេជ្រាដាមាន ឈើប្រណីតជាឈើប្រភេទឈើលេខ១ ចំនួន១៣២ដុំកាំភ្លើងអាកា-៤៧ ពីរដើម កាំភ្លើងសេកាសេមួយដើម និងកាំភ្លើងខ្យល់កែច្នៃមួយដើមផងដែរ។
ដោយពន្យល់ថា អាជ្ញាធរបានស្វែងរកសត្វសាច់ទន្សោងដែលគេដាក់លក់នៅទីផ្សារដែលកាត់ហើយខ្ចប់ស្លឹកចេក ដើម្បីឲ្យមើលទៅដូចជានំអន្សមនោះ លោកបានមានប្រសាសន៍ថា “យើងបានចំណាយពេលជាងមួយខែស្វែងរកអ្នកបរបាញ់សត្វព្រៃ…ជាមួយមន្ត្រីសម្ងាត់របស់យើង”។
លោក សុភ័ក្រ្ត បានថ្លែងថា នៅពេលនគរបាល និងមន្ត្រីរដ្ឋបាលព្រៃឈើបានកំណត់អត្តសញ្ញាណអ្នកបរបាញ់រូបនេះកាលពីថ្ងៃអាទិត្យ ពួកគេប្រញាប់ទៅផ្ទះជននេះដើម្បីចាប់ខ្លួន ប៉ុន្តែ ជននេះបានរត់គេចខ្លួនបាត់ទៅហើយ។
លោកបានបន្ថែមថា “ឥឡូវេនះយើងនឹងដាក់សំណើទៅតុលាការសុំដីកាចាប់ខ្លួនពីព្រោះជននេះគឺជាអ្នកប្រមាញ់សត្វព្រៃដ៏សកម្មម្នាក់ ដែលប្រើប្រាស់អាវុធខុសច្បាប់ និងកាប់ឈើខុសច្បាប់នៅក្នុងតំបន់នេះផងដែរ៕សារុន