ក្នុងការជំនុំជម្រះនៅតុលាការក្រុងភ្នំពេញកាលពីថ្ងៃច័ន្ទ អតីតចៅសង្កាត់នៅខណ្ឌព្រែកព្នៅបានទទួលស្គាល់ចំពោះការរៀបចំឃាតកម្មលើគូប្រជែងនយោបាយ ដែលរួចផុតជីវិតពីការគប់គ្រាប់បែក ដែលបានបណ្តាលឲ្យស្លាប់កូនប្រុសរបស់លោកអាយុ១១ឆ្នាំ។
លោក ភី ណុប អាយុ៤៧ឆ្នាំ អតីតចៅសង្កាត់គោករកាអាប់កេរ្តិ៍ឈ្មោះ បាននិយាយថា លោកបានស្នើឲ្យបុរសម្នាក់ក្នុងចំណោមសហចុងចោទ ឈ្មោះ ពៅ ប៊ុនធឿន អាយុ៣៣ឆ្នាំ រៀបចំឃាតកម្មសម្លាប់ ស៊ន ស៊ីន ជាអ្នកគួកជេដីនិងជាក្រុមប្រឹក្សាសង្កាត់ ពីព្រោះ ស៊ីន បានព្យាយាមដណ្តើមតំណែងចៅសង្កាត់របស់លោក និងសម្លាប់លោក។
លោក ប៊ុនធឿន ជាមេដឹកនាំសហគមន៍ បានប្រាប់តុលាការថា បន្ទាប់ពីនោះគាត់បានដាក់កិច្ចការឲ្យ នួន សំរិត អាយុ២៨ឆ្នាំ និង អេង ប៉ូលី អាយុ២៨ឆ្នាំដែរ អនុវត្តការសម្លាប់នេះ។
លោក ណុប បាននិយាយថា “ខ្ញុំបានសុំឲ្យពួកគេធ្វើ តែក្រោយមក ខ្ញុំបានប្រាប់ពួកគេឲ្យផ្អាកវិញ”។ ណុប អះអាងថា សហចុងចោទទាំងបីបានបន្តធ្វើការវាយប្រហារផ្ទុយពីបំណងរបស់គាត់ ពីព្រោះពួកគេចង់បានចំណែកប្រាក់១០.០០០ដុល្លារដែលគាត់បានសន្យាឲ្យឈ្មោះ ធឿន សម្រាប់បំពេញការងារនេះ។
យោងតាមប៉ូលិសឲ្យដឹងថា លោក ស៊ីន កំពុងបរិភោគអាហារល្ងាចជាមួយកូនៗនិងមិត្តភក្តិរបស់លោកនៅខាងក្រៅផ្ទះក្នុងសង្កាត់ឃ្មួញ កាលពីថ្ងៃទី៩ខែតុលា ស្រាប់តែពេលនោះ បុរសពីរនាក់បានជិះម៉ូតូមួយគ្រឿងកាត់មុខផ្ទះ និងបានគប់គ្រាប់បែកមួយគ្រាប់លើពួកគេ បណ្តាលឲ្យស្លាប់កូនប្រុសរបស់គាត់។
សំរិត ជាកម្មករសំណង់ ជាប់ចោទពីបទឃាតកម្មគិតទុកជាមុនព្រោះបានគប់គ្រាប់បែក ហើយឈ្មោះ ប៉ូលី ប្រឈមនឹងការចោទប្រកាន់ដូចគ្នាព្រោះជាអ្នកបើកម៉ូតូ។
លោក ណុប ដែលកាលពីខែឧសភា ត្រូវតុលាការផ្តន្ទាទោសឲ្យជាប់ពន្ធនាគារបីឆ្នាំ ក្នុងរឿងក្តីមួយដោយឡែកដោយសារតែមិនអនុវត្តសេចក្តីសម្រេចរបស់តុលាការកំពូលកាលពីឆ្នាំ២០០៨ទាក់ទិននឹងជម្លោះដីធ្លី បានជាប់ចោទពីបទញុះញង់ឲ្យមានឃាតកម្មដោយគិតទុកជាមុននេះ។ ចំណែកឯ ប៊ុនធឿន ប្រឈមនឹងបទចោទដូចគ្នានេះ។
នៅពេលសួរដោយចៅក្រម កែវ មុនី ឲ្យពន្យល់ថា ហេតុអ្វី ពីដំបូងលោកបានបញ្ជាឲ្យធ្វើឃាតលោក ស៊ីន នោះ លោក ណុប បាននិយាយថា លោកបានឮថា លោក ស៊ីន បាននិងកំពុងព្យាយាមសូកប៉ាន់យកតំណែងចៅសង្កាត់របស់លោក និងសម្លាប់លោក។
លោក ណុប បាននិយាយថា “គាត់ប្រុងចំណាយ២៥.០០០ទៅ៣៥.០០០ដុល្លារ” យកតំណែងនេះ ហើយលោកបានបន្ថែមថា មិត្តភក្តិទាំងសងខាងបានព្រមានគាត់ “ឲ្យប្រយ័ត្ន ពីព្រោះមានគេចង់សម្លាប់ខ្ញុំ”។
លោក ណុប បាននិយាយថា បន្ទាប់ពីការប៉ុនប៉ងធ្វើឃាតមិនបានសម្រេច គាត់បានចំណាយ៥.០០០ដុល្លារទៅលោក ប៊ុនធឿន ដែលឲ្យ២.៥០០ដុល្លារទៅលោក សំរិត ដើម្បីចែកគ្នារវាងគាត់និងលោក ប៉ូលី។
ចៅក្រម មុនី បន្ទាប់មកបានស្តីបន្ទោសលោក ណុប ព្រោះក្បត់ភារកិច្ចរបស់ខ្លួនជាចៅសង្កាត់។
លោកចៅក្រមបាននិយាយថា “លោកជាចៅសង្កាត់ ទទួលខុសត្រូវក្នុងការបង្ក្រាបបទល្មើស តែផ្ទុយទៅវិញ លោកឯងទៅជាបង្កើតបទល្មើសទៅវិញ”។
“លោកអះអាងថា លោកសុំឲ្យពួកគេកុំឲ្យធ្វើរឿងហ្នឹងក្រោយពីជួលពួកគេហើយ ដូច្នេះហេតុអ្វីបានជាពួកគេចោទលោកថាជា [មេគំនិតឃាតកម្ម]?”
លោក ណុប បានឆ្លើយតប “ខ្ញុំមិនដឹងទេ”។
តុលាការក្រុងនឹងប្រកាសសាលក្រមនៅថ្ងៃទី៣០ ខែកក្កដានេះ៕ និត