លោក ប៉ា សុជាតិវង្ស អភិបាលក្រុង កាលពីថ្ងៃច័ន្ទបានចោទអង្គក្រៅរដ្ឋាភិបាលដោយមិនបញ្ចេញឈ្មោះ ថាបានចំណាយប្រាក់លើក្រុមអ្នកតវ៉ាល្បីៗ មកពីតំបន់បឹងកក់ និងបុរីកីឡា ក្នុងទីក្រុង ឲ្យធ្វើបាតុកម្មតាងនាមបុព្វហេតុរបស់ខ្លួន និងបានអំពាវនាវឲ្យពួកគេដោះលែងស្ត្រីទាំងនោះ”។
ការអះអាងរបស់លោកធ្វើឡើងពីរថ្ងៃ បន្ទាប់ពីស្ត្រីប្រាំនាក់ក្នុងក្រុមនោះត្រូវបានចាប់ខ្លួននិងឃាត់ខ្លួនអស់រយៈពេលជាច្រើនម៉ោង ព្រោះចែកចាយខិត្តប័ណ្ណ ជំរុញអ្នកទីក្រុងឲ្យ “និយាយថា ទេ” ចំពោះច្បាប់ ដែលក្រុមអ្នករិះគន់បារម្ភថា រដ្ឋាភិបាលនឹងប្រើដើម្បីបំបិទមាត់ក្រុមមិនមែនរដ្ឋាភិបាល ដែលរិះគន់គណបក្សប្រជាជនកម្ពុជាកំពុងកាន់អំណាច។
បើទោះជាស្ត្រីបានចាប់ផ្តើមធ្វើការតវ៉ាប្រឆាំងនឹងការបណ្តេញចេញទាំងបង្ខំដែលប៉ះពាល់ដល់តំបន់របស់ពួកគេក៏ដោយ ក៏ពួកគេតាំងពីពេលនោះមកបានចូលរួមក្នុងបុព្វហេតុជាច្រើន។
លោក សុជាតិវង្ស បានមានប្រសាសន៍នៅពេលសម្ពោធដាក់ឲ្យប្រើប្រាស់សាលាបឋមសិក្សាថ្មីមួយកន្លែងក្នុងខណ្ឌជ្រោយចង្វាថា “ខ្ញុំសូមស្នើអង្គការក្រៅរដ្ឋាភិបាលនិងសង្គមស៊ីវិលមួយចំនួន តើអាចដោះលែងបងប្អូនប្រជាពលរដ្ឋយើងនៅបឹងកក់និងបុរីកីឡាបានទេ?”។ គេចាប់យកក្រុមនេះមកធ្វើបាតុករអាជីពពហុវិស័យ”។
“ក្រុមទេព វន្នី នៅបឹងកក់ និងក្រុម ឆាយ គឹមហ៊ន នៅបុរីកីឡា ជាបាតុករអាជីព។ ដើរតាមផ្លូវគេឲ្យ៥ដុល្លារដល់១០ដុល្លារក្នុងមួយថ្ងៃ”។
ទាក់ទងតាមទូរស័ព្ទកាលពីថ្ងៃច័ន្ទ លោកអភិបាលក្រុងបានបដិសេធមិនប្រាប់ឈ្មោះអង្គការក្រៅរដ្ឋាភិបាល ដែលលោកបានចោទថាបង់ប្រាក់ឲ្យស្ត្រីទាំងនោះ ដោយអះអាងថា លោកមិនចង់មានការប្រឈមទេ។
នៅពេលសួរឲ្យបង្ហាញភ័ស្តុតាងគាំទ្រការអះអាងរបស់លោក លោកបានឆ្លើយតបថា “ល្មមបើកភ្នែកហើយ”។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូ ជាអង្គការសិទ្ធិមនុស្សមួយក្នុងចំណោមអង្គការសិទ្ធិមនុស្ស ដែលបានគាំទ្រក្រុមអ្នកតវ៉ា បានបដិសេធការបង្គាប់បញ្ជា ឬបង់ប្រាក់ឲ្យធ្វើបាតុកម្ម។
លោកបាននិយាយថា “គ្មាននរណាជួលពួកគេឲ្យតវ៉ាទេ វាផ្ទុយនឹងគោលការណ៍របស់យើង។ ចំពោះការចូលរួមការតវ៉ាអំពីរឿងក្រៅពីជម្លោះដីធ្លី ពួកគេមានសិទ្ធិសេរីភាពធ្វើ ដោយគ្មាននរណាបង្ខំពួកគេ ឬគាបសង្កត់ពួកគេឡើយ”។
អ្នកស្រី ទេព វន្នី ដែលត្រូវគេចាប់ដាក់ពន្ធនាគារនិងដាក់ទោសជាច្រើនលើក ព្រោះធ្វើការតវ៉ា ក៏បានបដិសេធការចោទប្រកាន់របស់លោកអភិបាលក្រុងដែរ។
ប៉ុន្តែ អ្នកស្រីបាននិយាយថា ក្រុមនេះទទួលអំណោយសប្បុរសពីពលរដ្ឋខ្មែរដែលរស់នៅក្រៅប្រទេស។
អ្នកស្រីបាននិយាយថា “យើងតស៊ូនិងលាក់ការអត់ឃ្លានរបស់យើង តែអ្នកដែលអាណិតអាសូរយើង ជួយយើង។ វាជាចិត្តសប្បុរសធម៌ពីបងប្អូនសហគមន៍ខ្មែរនៅបរទេស។ ពួកគេមិនចិញ្ចឹមយើងឲ្យយើងធ្វើការតវ៉ាទេ ប៉ុន្តែ ពួកគេជួយយើងក្នុងនាមសេចក្តីសប្បុរស អាណិតអាសូរ និងយោគយល់”៕ និត