មន្ត្រីបានឲ្យដឹងកាលពីម្សិលមិញថា បុរសជនជាតិខ្មែរម្នាក់ត្រូវបានកត់ត្រាចូលក្នុងបញ្ជីឈ្មោះឧក្រិដ្ឋជនដែលសមត្ថកិច្ចចង់ចាប់ខ្លួនបំផុតរបស់នគរបាលអាំងទែប៉ូល ហើយគេគិតថា ជននេះកំពុងលាក់ខ្លួននៅក្នុងប្រទេសឡាវ ឬភូមា បន្ទាប់ពីគេចពីនគរបាលកាលពីខែមុន នៅពេលនគរបាលព្យាយាមតាមចាប់ខ្លួនពីបទដឹកនាំក្រុមជួញដូរថ្នាំញៀនអន្តរជាតិមួយដែលមានទឹកប្រាក់ជាច្រើនលានដុល្លារ។
លោក លឹម សុខារស្មី ប្រធានស្ដីទីនៃការិយាល័យនគរបាលអាំងទែប៉ូលកម្ពុជា លើកឡើងថា នគរបាលអាំងទែប៉ូលបានចេញនិវេទន៍ក្រហមតាមចាប់ខ្លួនបុរសឈ្មោះ ដាំ ញ៉ា អាយុ៥៣ឆ្នាំ កាលពីពីរសប្ដាហ៍មុន ប៉ុន្តែមិនចាំច្បាស់ថាពេលណាឲ្យប្រាកដទេ។
លោកបានមានប្រសាសន៍ថា ”ជននេះ [ជាប់ពាក់ព័ន្ធ] នៅក្នុងករណីជួញដូរថ្នាំមេតំហ្វេតាមីនទម្ងន់៥៥គីឡូក្រាម ដែលនគរបាលបានរឹបអូសនៅក្នុងរាជធានីភ្នំពេញ”។
សាលាដំបូងរាជធានីភ្នំពេញបានចេញដីកាតាមចាប់ខ្លួនជននេះកាលពីចុងខែមិថុនា ដើម្បីនាំខ្លួនមកសាកសួរអំពីក្រុមជួញដូរគ្រឿងញៀន ដែលនគរបាលបានបង្ក្រាបប៉ុន្មានថ្ងៃមុនពេលចេញដីកា។ ប៉ុន្តែនៅពេលនគរបាលឆ្មក់ចូលផ្ទះរបស់បុរសរូបនេះក្នុងខេត្តស្ទឹងត្រែង បុរសរូបនេះបានគេចខ្លួនបាត់ ហើយបានបាត់ខ្លួនតាំងពីពេលនោះមក។
លោក ម៉ក់ ជីតូ អគ្គស្នងការរងនគរបាលជាតិបានលើកឡើងកាលពីម្សិលមិញថា នគរបាលជឿជាក់ថា ជនដែលគេគិតថាជាមេខ្លោងម្នាក់ក្នុងចំណោមមេខ្លោងរបស់ក្រុមជួញដូរគ្រឿងញៀននេះបានចេញពីប្រទេសកម្ពុជាហើយ។លោកបានមានប្រសាសន៍ថា ”យើងគិតថា ជននេះប្រហែលជានៅប្រទេសឡាវ ឬភូមា ហើយនគរបាលអាំងទែប៉ូលកំពុងតែតាមស្វែងរក”៕ ស៊ុយឈាង