33 C
Phnom Penh

រយៈ​​​ពេលមួយ​​​ឆ្នាំ​​​​​​ចាប់​​​តាំង​​​ពី​​​មាន​​​​​​កិច្ច​​​ព្រម​​​ព្រៀង​​​ខាង​​​នយោបាយមក​​​ ការ​​​ស្រុះ​​​ស្រួល​​​គ្នា​​​នៅ​​​តែ​​​ជួប​ការ​​​លំបាក​​​

ដោយ ឌឹ ខេមបូឌា ដេលី

បទវិភាគ

ពេលចេញពីកិច្ចប្រជុំរយៈពេលប្រាំម៉ោង នៅព្រឹទ្ធសភានៅថ្ងៃនេះកាលពីឆ្នាំមុនលោក នាយករដ្ឋមន្រ្តី ហ៊ុន សែន និងលោក សម រង្ស៊ី ប្រធានាគណបក្សប្រឆាំង​បាន​ថត​រូប​រួមគ្នា ក្នុងភាពស្និទ្ធស្នាលរាក់ទាក់គួរឱ្យកត់សម្គាល់ បន្ទាប់ពីមានការតវ៉ាកាន់តែខ្លាំងឡើងៗអស់ រយៈពេល​មួយឆ្នាំ​ដើម្បី​ទាមទារ​ឱ្យ​នាយក​រដ្ឋមន្ត្រី​ដែល​កាន់​តំណែង​ដុះស្លែ​របស់​កម្ពុជា ចុះចេញ​ពីតំណែង។

មេដឹកនាំ​គណបក្ស​ប្រឆាំង​ លោក សម រង្ស៊ី (ឆ្វេង) និង​លោកនាយក​រដ្ឋ​មន្ត្រី​ ហ៊ុន សែន ចាប់ដៃពេល​ចេញពី​ប្រជុំ​នៅឯ​ព្រឹទ្ធសភា​ នៅថ្ងៃទី​២២ ខែកក្កដា ឆ្នាំ​មុន។ រូបថតៈ ស៊ីវ ចាន់ណា/ The Cambodia Daily

ឈរនៅខាងមុខក្រុមដឹកនាំការចរចាដែល​​​មកពីគណបក្សទាំងពីរ និងបញ្ចេញស្នាម​​​ញញឹម​​​ស្ទើរបិទមាត់មិនជិត មេដឹកនាំទាំងពីរបាន​​​ចាប់​​​ដៃគ្នា​រលាក់​ហាក់​ដូចជា​ភ្លេចអស់​នូវឆ្នាំកន្លង​​​ទៅដែលធ្លាប់តែគំរាមគ្នាទៅវិញទៅមក និង​មានការ​បង្ក្រាប​ដ៏​​​​ហិង្សា​​​។

​​​នៅ​​​ពេល​​​លោក ហ៊ុន សែន បាន​​​សន្យា​​​ថា​​​នឹងធ្វើ​​​កំណែ​​​ទម្រង់​​​គណៈ​​​កម្មាធិការ​​​ជាតិ​​​រៀប​​​ចំការបោះឆ្នោត (គ.ជ.ប.) នៅមុនការ​​​បោះ​​​ឆ្នោតក្នុងឆ្នាំ២០១៧​​​ និងឆ្នាំ​​​២០១៨ ហើយ​​​ក៏នឹងធ្វើឱ្យមាន​​​បរិយាកាស​​​នយោបាយ​​​កាន់តែបើកទូលាយដែលពេល​​​នេះ​​​បាន​​​បំពេញរួចទៅហើយនោះ លោក សម ​​​រង្ស៊ី​​​ ក៏​​​បាន​​​បញ្ចប់ការធ្វើពហិការ​​​របស់​​​គណ​​​បក្ស​​​សង្គ្រោះជាតិមិនចូលសភា ហើយបាន​​​ប្តេជ្ញា​​​ចិត្តធ្វើការរួមគ្នាជាមួយគណបក្សប្រជាជន​​​កម្ពុជាកំពុង​​​កាន់​​​អំណាច​​​។

មួយឆ្នាំក្រោយមក គ.ជ.ប.ថ្មី​​​កំពុងតែ​​​ដំណើរការនៅពេលនេះ គណបក្ស​​​សង្គ្រោះ​​​ជាតិកំពុងត្រៀមបើកដំណើរការស្ថានីយទូរ​​​ទស្សន៍របស់ខ្លួន ដែលជាស្ថានីយ​​​ទូរទស្សន៍​​​ដំបូងគេបង្អស់របស់គណបក្សប្រឆាំងនៅក្នុងប្រទេសកម្ពុជា ហើយ​​​គណបក្សទាំងពីរ​​​បាន​​​ឈានដល់កិច្ចព្រមព្រៀងដែលមិនធ្លាប់មាន​​​ពីមុនមក ដើម្បីក្រោក​​​ឡើងប្រឆាំង​ការ​​​ឈ្លាន​​​ពាន​​​ព្រំដែនពីសំណាក់វៀតណាម។

លោក សម រង្ស៊ី បានមានប្រសាសន៍ថា “កិច្ចព្រមព្រៀងនេះកំពុងដំណើរការយ៉ាង​​​រលូន ពីព្រោះចំណុចសំខាន់គឺ ​​​គ.ជ.ប.។ គ.ជ.ប. ​​​ត្រូវបានបង្កើតឡើងហើយ ហើយ​កំពុងតែ​​​ដំណើរការតាមការរំពឹងទុក។ ចំណុចទី២ គឺការបញ្ចប់អំពើហិង្សានយោបាយ ហើយ​​​លែងមានបរិយាកាសបំភិតបំភ័យ និងការ​​​ភ័យខ្លាច​ទៀត​ហើយ​នៅក្នុង​ប្រទេស”។

ការបង្កើត គ.ជ.ប.ថ្មីមួយដែល​​​មានអព្យាក្រឹតភាពជាងមុន​​​បន្ទាប់ពីមាន​​​លទ្ធ​​​ផលបោះឆ្នោតចម្រូងចម្រាសជាច្រើនឆ្នាំ និង​​​បរិយាកាស​នយោបាយ​កាន់តែ​បើក​ទូលាយ ​គឺជាគោលបំណងចម្បងៗរបស់គណ​​​បក្ស​​​សង្គ្រោះជាតិនៅក្នុងការចុះកិច្ចព្រមព្រៀង​​​ថ្ងៃ២២ កក្កដានោះ អត្ថប្រយោជន៍​​​សម្រាប់​​​រដ្ឋាភិបាល​គឺការកាត់​បន្ថយ​អំណាច​របស់​​​គណ​​​​​​បក្សប្រឆាំង។

លោក ផៃ ស៊ីផាន អ្នកនាំពាក្យ​​​ទីស្តីការ​​​គណៈរដ្ឋមន្ត្រី បានមានប្រសាសន៍ថា​​​ “កិច្ច​​​ព្រម​​​ព្រៀងនេះបានធានាស្ថិរភាព និង​​​សន្តិ​​​សុខក្នុងសង្គមកម្ពុជា ប៉ុន្តែកិច្ចព្រម​​​ព្រៀង​នេះ​​​គឺជាការរៀនសូត្ររវាងគណបក្សប្រជាជន និងគណបក្សសង្គ្រោះជាតិ ហើយនោះ​​​ជា​​​មូល​​​ហេតុដែលយើងហៅវាថា ‘វប្បធម៌​​​សន្ទនា’។ យើងបាន​និងកំពុង​ព្យាយាម​ធ្វើឱ្យគណបក្សសង្គ្រោះជាតិស៊ីវិល័យដូចគណបក្ស​​​ផ្សេងៗទៀត ដែលមានសមត្ថភាព​​​ធ្វើជា​​​ដៃគូ”។

លោក គល់ បញ្ញា នាយកប្រតិបត្តិនៃ​​​គណៈ​​​កម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បាន​​​លើកឡើងថា សូម្បីគណបក្ស​​​សង្គ្រោះ​​​ជាតិ​​​កំពុងទទួលបានជ័យជម្នះនៅក្នុងការធ្វើកំណែ​​​ ទម្រង់បោះឆ្នោតក៏ដោយ ក៏ប្រឆាំង​​​ដែល​​​រក្សា​​​ជំហរសន្តិភាពនិយម បានធ្វើឱ្យគណ​​​បក្សប្រជាជនកម្ពុជា ងាយ​ស្រួលច្រើន។

សកម្មជន​គណបក្ស​សង្គ្រោះជាតិ​កាន់​ទង់ជាតិ​កម្ពុជា​ នៅ​​ក្បែរ​ព្រំដែន​វៀតណាម​ នៅក្នុងខេត្ត​ស្វាយរៀង​ កាលពី​ថ្ងៃអាទិត្យ​ ក្នុងពេល​ធ្វើ​ដំណើរ​ទៅ​កាន់​បង្គោល​ព្រំដែន​មាន​ជម្លោះ​ នៅក្នុងស្រុកកំពង់រោទិ៍​។ រូបថតៈ Satoshi Takahashi

លោកបានថ្លែង​ទៀតថា “បញ្ហា នេះ​​​នៅ​​​ត្រង​​់ការអនុវត្ដកំណែទម្រង់បោះ​​​ឆ្នោត​​​ជា​​​មួយនឹងច្បាប់បោះឆ្នោតថ្មីដែលមានហានិភ័យ​​​​​​ហាមឃាត់សិទ្ធិនិងសេរីភាពរបស់​​​ពលរដ្ឋ​​​​មិន​​​ឱ្យចូលរួមនៅក្នុងសកម្មភាពបោះឆ្នោត”។

លោកបានលើកឡើងអំពីការចុះញ៉មរប​​​ស់គណបក្សសង្គ្រោះជាតិចំពោះការទាមទាររបស់គណបក្សប្រជាជនកម្ពុជា កាល​​​ពី​​​ដើម​​​ឆ្នាំ​​​នេះ​​​ថា ច្បាប់បោះឆ្នោតថ្មីនេះ​​​រាប់ បញ្ចូល​​​បម្រាមមិនច្បាស់លាស់លើអ្នក “ប្រមាថ” អ្នកនយោបាយ និង “ការលម្អៀង” របស់​​​បុគ្គលិកអង្គការមិនមែនរដ្ឋាភិបាល ព្រមទាំងជោគ​​​ជ័យ​របស់​គណបក្ស​ប្រជាជនកម្ពុជា នៅ​​​ខែ​​​នេះក្នុងការជំរុញឱ្យចេញច្បាប់ថ្មីស្តីពីអង្គការមិនមែនរដ្ឋាភិបាល ដែលគំរាមបង្ក្រាប​​​បណ្តា​​​អង្គការសង្គមស៊ីវិល។

លោកបានមានប្រសាសន៍ទៀតថា “ក៏​​​គ្មានការសន្ទនាស្ថាបនាដែរអំពីច្បាប់អង្គការ​​​មិនមែនរដ្ឋាភិបាល។ គណបក្សប្រជាជន បាន​​​ជំរុញច្បាប់អង្គការ​មិនមែន​រដ្ឋាភិបាល​ក្នុង​បំណងបង្ក្រាបសង្គមស៊ីវិល ហើយគណបក្ស​​​ប្រឆាំងគ្មានសមត្ថភាពធ្វើឱ្យគណបក្សប្រជា​​​ជន​​​ស្តាប់ និងពិភាក្សាអំពីច្បាប់នេះទេ។ គណ​​​បក្សប្រជាជន​ព្យាយាម​ប្រើ​ប្រាស់​​​​គ្រប់មធ្យោ​​​បាយ ដើម្បីរឹតបន្តឹងសេរីភាពបញ្ចេញមតិ។ វាជាមូលហេតុដែលគេ​​​បង្កើត​​​វប្បធម៌​​​សន្ទនា ​​ដែល​​​គេបានដាក់បញ្ចូល​​​ចំណុច​​​ទាំង​​​នោះ​​​ទៅ​​​ក្នុងច្បាប់​បោះ​ឆ្នោត​ ដើម្បីរឹត​​​បន្តឹង​​​សេរី​​​ភាព​​​បញ្ចេញមតិ ហើយក៏បាន​​​បង្កើត​​​ច្បាប់​​​អង្គការមិនមែនរដ្ឋាភិបាល”។

ប៉ុន្តែលោក ផៃ ស៊ីផាន បាន​​​លើក​​​ឡើង​​​ថា ទោះបីជាមានការព្រមព្រៀងគ្នាជាមួយ​​​គណ ​​​បក្សសង្គ្រោះជាតិក៏ដោយ ក៏មន្ត្រីមួយ​​​ចំនួន​​​នៅក្នុងជួររដ្ឋាភិបាលកាន់តែ​មាន​ការព្រួយ​​​បារម្ភថា ក្រុមតំណាង​​​រាស្ត្រគណបក្ស​​​ប្រឆាំង​​​បានប្រើប្រាស់ដំណោះស្រាយរាងបន្ធូរ​​​ដៃ​​​របស់គណបក្សប្រជាជនកម្ពុជា ដើម្បី​​​កេង​​​ចំណេញ​​នយោបាយ​លើ​គណបក្ស​​​កំពុង​​​កាន់​​​អំណាច​​​។

លោកបាន​​​មាន​​​ប្រសាសន៍​​​ទៀត​ថា ”អ្នក​​​ខ្លះ​​​​​ប្រើ​​​វប្បធម៌​​​សន្ទនា​​​ដើម្បី​​​បម្រើ​​​ផល​​​ប្រយោជន៍​​​​​​​ផ្ទាល់​​​ខ្លួន​​​។ គណបក្ស​​​សង្គ្រោះ​​​ជាតិ​​​ធ្លាប់​​​ជា​​​គណ​​​បក្ស​​​ប្រឆាំង​​​​​​ ប៉ុន្តែ យើង​​​សង្ឃឹម​​​ថា [ពួក​​គេ​] ​​នឹង​​​​​កាត់​​​បន្ថយ​​​សកម្មភាព​​​របស់​​​ខ្លួន​​​ ហើយ​រំពឹង​​​​​ថា ​​ពួក​​​គេ​​​នឹង​​​ធ្វើ​ខ្លួន​​​ឯង​ប្រសើរ​​​​។​ឧទាហរណ៍​​​ពាក់​​​​​​​​​​​​ព័ន្ធ​​​បញ្ហា​​​ព្រំដែន​​​រវាង​​​កម្ពុជា​​​ និង​​​វៀតណាម​​​គណបក្ស​​​សង្គ្រោះ​​​ជាតិបាន​​​​ធ្វើ​​​ការ​​​តែម្នាក់​​ឯង​​​ពួក​​​គេ​​​​​​​ក្លាយ​​​ជា​​​សកម្មជន​​ផង​ និង​​​ជា​សន្តិស​​​ុខ​​​ការ​​​ពារ​​​ព្រំដែនផង ​​​​គឺដើម្បី​​ធ្វើ​​ឲ្យ​​ខ្លួន​​​ឯងមាន​ប្រជាប្រិយភាព​​​​ និង​​​​​​​ញុះ​​​ញង់​​​ឲ្យ​​​ពល​​​រដ្ឋ​​​​​​ស្អប់​​​រដ្ឋាភិបាល​​​តែប៉ុណ្ណោះ”។

លោក​​​បាន​​​ថ្លែង​​បន្ត​​​​ថា “នៅ​​​ក្នុងស​​​ង្គម​​​បើក​​​​​ទូលាយ​​​បែប​​​នេះ​​​ គណបក្ស​​​សង្គ្រោះ​​​ជាតិ​​​អាច​​​​​ឆ្លៀត​​​ឱកាស​​​ ហើយ​​​ប្រើ​​​ប្រាស់​​​បញ្ហា​​​នេះ​​​ប្រឆាំង​​​​​​​រដ្ឋាភិបាល​​​ដើម្បីប្រយោជន៍​នយោបាយ​​​​​​​របស់​​​ខ្លួន​​​ ស្របពេល​ការ​​​បោះ​​​ឆ្នោត​​​ឃុំ​​-សង្កាត់​​​កាន់​​​​​តែ​​​ខិត​​​ជិត​​​មក​​​ដល់​​​​។ យើង​​​មាន​​​ការ​​​ព្រួយ​​​បារម្ភ​​​ប៉ុន្តែ វា​​​មិន​​​ទាន់​​​ដល់​​​ពេល​​​​​​ត្រូវ​បញ្ចេញ​​​ប្រតិ​កម្ម​​​​ទេ​​​”។ ​​​រដ្ឋាភិបាល​​​របស់​​​លោក ហ៊ុន សែន ខ្លួន​ឯង​ ​[ដែល​​​ត្រូវ​​​បាន​​​បង្កើត​​​ឡើង​​​​​​អំឡុង​​​វៀត​ណាម​​​​​​​កាន់​​​កាប់​​​កម្ពុជា​​​ក្នុង​​​ទសវត្សរ៍​​​ឆ្នាំ​​​១៩៨០]​​​ ​​​បាន​​​​​​បន្ត​ប្រកាន់​​ជំហរ​ថ្មី​​​លើ​​​បណ្តឹង​ចាស់​ៗ​របស់​គណបក្ស​​​ប្រឆាំង​​​​​ពាក់ព័ន្ធ​​អន្តោ​​​ប្រវេសន៍​​​ខុស​​​​​ច្បាប់​និង​ការ​​​ឈ្លាន​​​ពាន​​​ព្រំដែន​​​ពីសំណាក់​​​​វៀតណាម​​​​​​។

ប្រហែល​​​មួយ​​​សប្តាហ៍​​​បន្ទាប់​​​ពី​​​កិច្ច​​​ព្រម​​​ព្រៀង​​​​ថ្ងៃ​២២​​​កក្កដា ​​​​​​​ត្រូវ​បាន​ចុះហត្ថលេខា​​​​ឯកភាព​​​កាល​​​ពី​​​ឆ្នាំ​​​មុន​​​ លោក ​ខៀវ ​សុភ័គ ​អ្នក​នាំពាក្យ​​​ក្រសួង​​​មហាផ្ទៃ បាន​​​លើក​​​ឡើង​​​ថា ​រដ្ឋាភិបាល​​​ដឹក​​​នាំ​​​ដោយ​​​គណបក្ស​​​ប្រជា​​​ជន​​​កម្ពុជា​​​ នឹង​​​ពិចារណា​​​សំណើ​​​របស់​​​លោក ​កឹម ​សុខា អនុប្រធាន​​​គណបក្ស​​​សង្គ្រោះ​​​ជាតិ ដែល​​​​​​ស្នើ​​​ឲ្យ​​​​បញ្ចប់​បញ្ហា​​​ជន​​​ជាតិ​​​វៀតណាម​​​​​​​ធ្វើ​​​អន្តោ​​​ប្រវេសន៍​​​មក​​​រស់​​​នៅ​​​ក្នុង​​​ប្រទេស​​​កម្ពុជា​​​ដោយ​​​​​​គ្មាន​​​ឯកសារ​​​ត្រឹម​​​ត្រូវ​​​។

លោក​​​មាន​​​ប្រសាសន៍​​​​​​នៅ​​​ក្នុង​​​​កិច្ច​​​សម្ភាសន៍​​​​​តាម​​​​​​វិទ្យុ​​​​​​​​​កាល​​​ពី​​​ថ្ងៃ​​​ទី​​​៣០​​​ ខែ​​​កក្កដា ឆ្នាំ​​​មុន​​​ថា ” និយាយឲ្យខ្លី យើង​​​នឹង​​​គ្រប់​​​គ្រង​​​ពួក​​​គេ​​​តាម​ច្បាប់​​​អន្តោ​​​ប្រវេសន៍​​​របស់​​​យើង​​​។ ប្រសិន​​​បើ​​​​​ពួក​​​គេ​​​មក​​​ដោយ​​​ខុស​​​ច្បាប់​​​​​​ យើង​​​នឹង​​​អនុវត្ត​​​តាម​​​ច្បាប់​​​​​​របស់​​​យើង​​​ ហើយ​​​មិន​​​អនុញ្ញាត​​​ឲ្យ​​​ពួក​​​គេ​​​ដើរ​​​ហើរ​​​ដោយ​​​សេរី​​​ និង​​​គ្មាន​​​សណ្តាប់​​​ធ្នាប់​​​​​​ឡើយ​​​”។

ចាប់តាំង​​​ពី​​​ពេល​​​នោះ​​​មក​​​ នគរ​​​បាល​​​អន្តោ​​ប្រវេសន៍​​​​​​ប្រមូល​​​ជន​​​អន្តោ​​​ប្រវេសន៍​​​ជន​​​ជាតិ​​​វៀតណាម​​​​​ខុស​​​ច្បាប់​​​ បាន​​​ប្រហែល​​​២.៥០០​​​នាក់​​​ ហើយ​​​បាន​បញ្ជូន​​​ពួកគេ​​​ទៅ​​​វៀតណាម​​​វិញ​។ ហើយ​​​ក្នុង​​​ពេល​​​ថ្មី​​​ៗ​​​នេះ​​​រដ្ឋាភិបាល​​​ក៏​​​បាន​​​ផ្ញើ​​​កំណត់​​​ទូត​​​ជា​​​បន្ត​​​បន្ទាប់​​​ទៅ​​​វៀត​ណាម​​​​​ផង​​​ដែរ​​​ ដើម្បី​​​​ទាម​​​ទារ​​​ឲ្យ​​​វៀតណាម​​​​​​ដក​​​ខ្លួន​​​ចេញ​​​ពី​​​តំបន់​​​ផ្សេង​​​ៗ​នៅ​​​​​ក្នុង​ទឹកដី​កម្ពុជា​​​តាម​​​បណ្តោយ​​​​​​ព្រំដែន​​​ភាគខាង​​​កើត​​​។

​ចំពោះ​​​គណបក្ស​​​សង្គ្រោះ​​​ជាតិ​​​វិញ​​​ បាន​​​បញ្ជូន​​​តំណាង​​​រាស្ត្រ​​​របស់​​​ខ្លួន​​​ទៅ​​​ពិនិត្យ​​​​​​មើល​ស្ថានភាព​ឈ្លាន​​​ពាន​​​ព្រំដែន​​​ ស្របពេល​ដែល​​ខ្លួន​កំពុង​តតាំង​​ជា​​​សាធារណៈ​​​ជំុវិញ​​​ការ​​​បដិ​សេធ​​​របស់​​​រដ្ឋាភិបាល​​​​​​​​មិន​​​ព្រម​​​បង្ហាញ​​​​​​ផែន​​​ទី​​ព្រំដែន​​​​ដែល​​​ត្រូវ​​​​បាន​​​ប្រើ​​​សម្រាប់​កំណត់​​​បង្គោល​​​​​ព្រំដែន​​​​​​ដើម្បី​​​បញ្ជាក់​​​ថា​គ្មាន​ការ​​​​កាត់​​​ដី​​​ឲ្យ​​​វៀតណាម​​​។

លោក សម រង្ស៊ី បាន​​​លើក​​​ឡើង​​​ថា ការ​​​ផ្ទុះ​​​អំពើ​​​ហិង្សា​​​ពេល​​​​ចុះ​​​ទៅ​​​តំបន់​​​ព្រំដែន​​​ដោយ​​​គណបក្ស​​​ប្រឆាំង​​​ ដូច​​​ជា​​​ការ​​​ប៉ះ​​​ទង្គិច​​​គ្នា​​​​អំឡុង​​​ពេល​​​លោក រៀល​ ខេមរិន្ទ្រ ​តំណាង​​​រាស្ត្រ​​​គណបក្ស​​​សង្គ្រោះ​​​ជាតិ​​​ បាន​​​ចុះ​​​ទៅ​​​តំបន​​​់​​​​​ព្រំដែន​​​​​​ក្នុង​​​ខេត្ត​​​ស្វាយ​​​រៀង​​​កាល​​​ពី​​​​​​ថ្ងៃទី​​​២៨​​​ ខែ​​​មិថុនា​​​ជា​​​ដើម​​​ អាច​​​​​​ធ្វើ​​​ឲ្យ​​​​​​ប៉ះពាល់​​​ដល់​​​កិច្ច​​​ព្រម​​​ព្រៀង​ថ្ងៃ​​​​២២ កក្កដា។

លោក​​​បាន​​​មាន​​​ប្រសាសន៍​​​ថា “ខ្ញុំ​​​មិន​​​និយាយ​​​​​​អំពី​​​ថ្នាក់​​​​​​លើ​​​ទេ ប៉ុន្តែ អ្នក​​​ខ្លះ​​​ប្រហែល​​​ជា​​​មិន​​​សប្បាយ​​​ចិត្ត​​​​​​ដែល​​​គណបក្ស​​​សង្គ្រោះ​​​ជាតិ​​​អាច​​​​​​ប្រមូល​​​​​​មនុស្ស​​​បាន​​​យ៉ាង​​​ច្រើន​​​​ដើម្បី​​​លើក​ឡើង​​​​​​​ពី​​​បញ្ហា​​​នេះ​​​​​​ ហេតុ​​​ដូច្នេះ​​​ពួក​​​គេ​​​ប្រហែល​​​ជា​​​បង្កើត​​​ឲ្យ​​​មាន​​​បញ្ហា​​​ដើម្បី​​​យក​​​​​លេស​​​​​​បំផ្លាញ​​​​​​វប្បធម៌​​​សន្ទនា​​​”។

លោក​​​បាន​​​មាន​​​ប្រសាសន៍​​​បន្ថែម​​​ថា ​”ហេតុ​​​​ដូច្នេះ​​​​​​យើង​​​ត្រូវ​​​តែ​​​ធានា​​​ឲ្យ​​​បាន​​​ថា គ្មាន​​​​​​ការ​​​រំលោភ​​​បំពាន​​​​​សិទ្ធិមនុស្ស​​​​​​លើ​​​ជន​​​ជាតិ​​​វៀត​ណាម។​​​​ ទោះ​​​បី​​​ក្នុងស្ថាន​មួយ​ដែល​​​កំពុង​តែ​​​​មាន​​​ភាព​​​តាន​​​តឹង​​​​​​តាម​​​ព្រំដែន​​​ក៏​​​ដោយ​​​ ​ក៏​យើង​​​​​​​​​​​ចាំបាច់​​​ត្រូវ​​តែ​​​មាន​​​ការ​​​ប្រុង​​​ប្រយ័ត្ន និង​​​​ការ​​​ពារ​​​​​​កុំ​​​ឲ្យ​​​​​​កើត​​​មាន​​​បញ្ហាមិន​​​អាច​​​គ្រប់​​​គ្រងបាន​​​​​ដែល​​​​​​ធ្វើ​ឲ្យមាន​​​​ភាព​​​តាន​​​តឹង​​​ជាមួយ​​សហគមន៍​​​ជ​​​ន​​​ជាតិ​​​វៀតណាម​​​”។

ប៉ុន្តែ​​​លោក​​​សង្ឃឹម​​​ថា ការ​​​រក្សា​​​សន្តិភាព​​​ជា​​​មួយ​​​រដ្ឋាភិបាល​​​ចាប់​​​តាំង​​​ពី​​​ពេល​​​មាន​​​កិច្ច​​​ព្រម​​​ព្រៀង​​​កាល​​​ពី​​​ឆ្នាំ​​​មុន​​​មក​អាច​​​បន្ត​​​ទៅ​​​មុខ​​​ទៀត។ លោក​​​បាន​​​មាន​​​ប្រសាសន៍​​​ថា ”​​​យើង​​​​​ត្រូវ​​​តែ​​​រក្សា​​​គំនិត​​​សុទិដ្ឋិនិយម​​​ដោយ​​​សម​​​ហេតុ​​​​​ផល​​​។ មាន​​​​​​សង្ឃឹម​​​ឡើង​​​។ យើង​​​កំពុង​​​ខិត​​​ខំ​​​ឲ្យ​​​អស់​​​ពី​​​សមត្ថ​ភាព​​​​​​ដើម្បី​​​កុំ​​​ឲ្យ​​​នរណា​​​ម្នាក់​​​​អាច​​​​​​យក​​​លេស​​​មក​​​បង្ក្រាប​​​យើង​​បាន​​”៕ សុខុម និង​​​ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស