26 C
Phnom Penh

​តាម​បណ្ដា​ខេត្ត ប្រជាពលរដ្ឋ​រាប់​រយ​នាក់​​តវ៉ា​​ប្រឆាំងនឹង​​ច្បាប់ NGO

ដោយ ឌឹ ខេមបូឌា ដេលី

បទវិភាគ

ប្រជាពលរដ្ឋ​រាប់​រយ​នាក់​​​បាន​ប្រមូល​ផ្ដុំ​គ្នា​នៅ​តាម​​ខេត្ត​​​​នានា​ទូទាំង​ប្រទេស​កាលពី​ម្សិលមិញ ដើម្បី​ធ្វើ​​ការ​​តវ៉ា​ប្រឆាំង​​ច្បាប​់​ស្ដីពី​​​​អង្គការ​មិន​​មែន​រដ្ឋាភិបាល ដែល​បណ្តា​​អ្នក​ប្រឆាំង​​​​ព្រួយ​បារម្ភ​​ថានឹង​ត្រូវ​​បាន​​ប្រើ​ប្រាស់​ដើម្បី​បំបិទ​មាត់​អង្គការ​ដែល​រិះគន់​គណបក្ស​ប្រជាជន​កម្ពុជា​កំពុង​កាន់​អំណាច​​។     

​សកម្មភាព​ជា​សមូហភាព​នេះ​បាន​ធ្វើ​ឡើង​​​​​​ក្នុង​ថ្ងៃ​តែ​មួយ​ដែលព្រឹទ្ធសភា​​​បាន​កំណត់​យក​​​​ថ្ងៃ​សុក្រ​សម្រាប់​បោះ​ឆ្នោត​អនុម័ត​ច្បាប់​នេះ​។

លោក​ អំ សំអាត ប្រធាន​​ផ្នែក​បច្ចេក​ទេស​​​ឃ្លាំ​មើល​ការ​រំលោភ​សិទ្ធិ​មនុស្ស​នៃ​អង្គការ​លីកាដូ បាន​មាន​ប្រសាសន៍​ថា ប្រជាពលរដ្ឋ​ចន្លោះ​ពី​៣០​នាក់​​​ទៅ​៥០០​នាក់ ​​បាន​ជួប​ជុំគ្នានៅ​ក្នុង​ខេត្ត​នីមួយៗ​ក្នុង​ចំណោម​ខេត្ត​ចំនួន​១៣​ ដែល​អង្គការ​មិន​មែន​រដ្ឋាភិបាល​មាន​ការិយាល័យ​ ដើម្បី​បង្ហាញ​ការ​ប្រឆាំង​របស់​ខ្លួន​ចំពោះ​ច្បាប់​នេះ​។

លោក​បាន​លើក​ឡើង​​​បន្ថែម​ទៀត​ថា ”​នៅ​​​កន្លែង​ខ្លះ​ ពួកគាត់​បាន​ប្រមូល​ផ្ដុំគ្នា​នៅ​តាម​ការិយា​ល័យ [អង្គការ​មិន​មែន​រដ្ឋាភិបាល​] ខ្លះ​ទៀត​​ហែក្បួន ហើយ​ចែក​ខិត្តប័ណ្ណ​​ និង​ស្ទីកគ័រ​​ដល់​ប្រជាពល​រដ្ឋ​ដើម្បី​បង្ហាញ​ថា ពួកគាត់​មិន​គាំទ្រ​ច្បាប់​នេះ​ និង​ដើម្បី​ស្នើ​ឲ្យ​ព្រឹទ្ធសភា​ទម្លាក់​​វា​​ចោល​។ ពួកគាត់​ធ្វើ​យុទ្ធនា​​ការ​នេះ បន្ទាប់ពី​ពួកគាត់​ដឹង​ថា វា​នឹង​ប៉ះ​ពាល់​​​​ដល់​សហគមន៍​របស់​ពួកគាត់​ និង​​អង្គការ​មិន​មែន​រដ្ឋាភិបាល​នានា”។

ច្បាប់​នេះ​នឹង​តម្រូវ​ឲ្យ​អង្គការ​មិន​មែន​រដ្ឋា​​ភិបាល​ភាគ​ច្រើន​ចុះបញ្ជី​ជាមួយ​​រដ្ឋា​ភិបាល​ ហើយ​ដាក់​របាយការណ៍​ប្រចាំ​ឆ្នាំ​ទៅ​រដ្ឋាភិបាល​​ស្ដីពី​សកម្មភាព និង​ហិរញ្ញវត្ថុ​របស់​ខ្លួន​។ រដ្ឋាភិបាល​និយាយ​ថា ខ្លួន​ត្រូវ​ការ​ច្បាប់​នេះ​ដើម្បី​ប្រយុទ្ធប្រឆាំង​​ការ​លាង​លុយកខ្វក់​​ និង​ហិរញ្ញប្បទាន​​ភេរវកម្ម ​ប៉ុន្តែ​អង្គការ​មិន​មែន​រដ្ឋាភិបាល​នានា​​ព្រួយបារម្ភ​ថា រដ្ឋាភិបាល​​​នឹង​ប្រើ​ប្រាស់​​បទប្បញ្ញត្តិ​មិន​ច្បាស់​លាស់​ស្ដីពី​ការ​​រក្សា​​​​​អព្យាក្រឹតភាព​​ផ្នែក​នយោបាយ​ និង​ការ​​គោរព​ប្រពៃណី​ខ្មែរ​ ដើម្បី​រារាំង ​ឬ​បិទ​អង្គការ​ណា​ដែល​ហា៊ន​និយាយ​អំពី​​​បញ្ហា​រសើបៗ​។ ​​​​​

បន្ថែម​ពី​​លើក​្តី​​​​បារម្ភ​ទាំងនោះ​ កង​សន្តិ​សុខ​​​​​​រដ្ឋាភិបាល​នៅ​ក្នុង​រាជ​ធាន​ី​ភ្នំពេញ​​បាន​ចាប់​ខ្លួន​ស្ត្រី​ប្រាំនាក់​​កាលពី​ថ្ងៃ​សៅរ៍​ពីបទ​ចែក​ចាយ​ខិត្តប័ណ្ណ​​ និង​ស្ទីក​គ័រ​ប្រឆាំង​ច្បាប់​ស្តីពី​អង្គការ​មិនមែន​រដ្ឋាភិបាល​​នៅតាម​ផ្សារ​​នានា​​​​ទូទាំង​រាជធានី​ភ្នំពេញ។​​ ប៉ុន្មាន​ម៉ោង​ក្រោយ​មក​ ស្ត្រីទាំង​នេះ​ត្រូវបាន​ដោះលែងវិញ។​

លោក​ អំ សំអាត​ បាន​បន្ថែម​ទៀត​ថា​ ​ ទោះ​ជាយ៉ាងណា​ អាជ្ញាធរ​មិនបាន​ព្យា​យាម​​​ជ្រៀត​ជ្រែក​នៅក្នុងសកម្មភាព​កាលពី​ម្សិល​មិញ​​​ទេ​។​

នៅខេត្ត​កំពង់ធំ​​​ ​លោក​ ឈួម រុន​ អ្នក​ឃ្លាំ​​មើល​សិទ្ធិមនុស្សនៅអង្គការ​លីកាដូ​ប្រចាំ​​ខេត្ត​​នេះ ​​បានលើកឡើងថា មនុស្ស​ប្រហែល​២៥​​នាក់​មកពី​អង្គការ​ចំនួន​១០​ បានចែក​ចាយ​ខិត្ត​ប័ណ្ណ​និងស្ទីកគ័រ​ជាង​២០០​សន្លឹក​នៅឯ​ផ្សារ​មួយកន្លែង។

​​​នៅ​ក្នុង​ខេត្ត​ត្បូងឃ្មុំ​ឯណោះ​វិញ ​ប្រជា​ពល​​រដ្ឋ​​ជិត​៣០០​នាក់​ដែល​ជាប់​ពាក់​ព័ន្ធ​ក្នុង​វិវាទ​ដីធ្លី​​មួយ​បាន​ប្រមូល​ផ្ដុំគ្នា​នៅ​ខាង​ក្រៅ​​សាលា​ស្រុក​មេមត់​ ហើយ​នាំគ្នា​ហែក្បួន​ទៅ​កាន់​​ផ្សារ​មួយ​​ ដែល​ពួក​គេ​បាន​ចែក​ខិត្ត​ប័ណ្ណ​ និង​ស្ទីកគ័រ​រាប់​រយ​សន្លឹក​​ដែរ​ នេះបើ​យោង​តាម​ លោក វ៉ន សេងធុយ ​អ្នក​​ឃ្លាំមើល​សិទ្ធិ​មនុស្ស​​​មួយ​រូប​ទៀត​នៅ​អង្គការ​លីកាដូ។​

លោក ប៉ុន សុផល អ្នក​​ហែក្បួន​ម្នាក់​ក្នុង​ចំណោម​អ្នក​ហែក្បួន​ទាំង​នេះ​ បាន​និយាយ​ថា ”យើង​​មិន​អាច​ទទួល​យក​ច្បាប់​នេះ​បាន​ឡើយ ព្រោះ​វា​នឹង​ធ្វើ​ឲ្យ​មាន​ការ​លំបាក​ក្នុង​ការ​ចុះ​បញ្ជី​ ហើយ​នឹង​រារាំង​អង្គការ​មិន​​មែន​​រដ្ឋាភិបាល និង​សមាគម​មិន​ឲ្យ​ជួយ​សហគមន៍​របស់​យើង​ទទួល​បាន​​សិទ្ធិ​ និង​ដីធ្លី​របស់​យើង​មក​វិញ។ រដ្ឋាភិបាល​​នឹង​ប្រើ​ច្បាប់​េនះ​ដើម្បី​រារាំង​អង្គការ​មិន​​មែន​រដ្ឋាភិបាល​ណាដែល​ជួយ​ប្រជា​ពលរដ្ឋ​​​តស៊ូ​ប្រឆាំង​​នឹង​​មន្ត្រី​មាន​អំណាច ឬ​អ្នក​មានលុយ”។

គណបក្ស​ប្រជាជន​កម្ពុជា​​បាន​ប្រើ​​សំឡេង​​​​​ភាគច្រើន​របស់​ខ្លួន​នៅ​ក្នុង​សភា​​ ដើម្បី​អនុ​ម័ត​​​ច្បាប់​​នេះ​កាលពី​សប្ដាហ៍​មុន ចំពេល​​​គណ​បក្ស​​​សង្គ្រោះ​ជាតិ​​​​ធ្វើ​ពហិការ​​​​ដើម្បី​ជំទាស់​នឹង​ច្បាប់​នេះ​។

កាលពី​ម្សិលមិញ ព្រឹទ្ធសភា​បាន​ប្រកាស​ថា ខ្លួន​​នឹង​បោះ​ឆ្នោត​​អនុម័ត​​ច្បាប់​នេះ​នៅ​ថ្ងៃ​​​សុក្រ។ ​​រីឯ​​សមាជិក​ព្រឹទ្ធសភា​​មក​ពី​គណបក្ស​ប្រឆាំង​​ បាន​ប្រកាស​អំពី​បំណង​​ធ្វើ​ពហិការ​​របស់​ខ្លួន​មិន​ចូល​រួម​ការ​​បោះ​ឆ្នោត​នេះ​​៕ សុខុម និង ស៊ុយឈាង​​​​​​​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស