31 C
Phnom Penh

តុលាការ​សាកសួរលោក អ៊ុត ធី ​​ឪពុក​របស់​​​​កញ្ញា សាសា ជុំវិញ​ករណី​​វាយ​ដំ​កូនស្រី​របស់ខ្លួន​

ដោយ ឌឹ ខេមបូឌា ដេលី

បទវិភាគ

ឪពុក​កញ្ញា ឯក​ សុជាតា ​ហៅ សាសា ​ដែល​​​ត្រូវ​បាន​វាយ​ដំ​​យ៉ាង​ឃោរឃៅ​​ពី​សំណាក់​លោក សុខ ប៊ុន ឧកញ៉ា​ផ្នែក​អចលន​ទ្រព្យ​ កាលពី​ថ្ងៃទី​២ ខែ​កក្កដា ​​កាលពី​ម្សិលមិញ​ត្រូវ​បាន​​​សាក​សួរ​នៅ​សាលា​ដំបូង​រាជធានី​ភ្នំពេញ​ជុំវិញ​សំណុំរឿង​​នេះ​។

យោង​តាម​ក្រសួង​មហាផ្ទៃ​បាន​ឲ្យ​ដឹង​ថា លោក សុខ ប៊ុន ត្រូវ​បាន​ចាប់​ខ្លួន​ពេល​ត្រឡប់​​​មក​ដល់​ប្រទេស​កម្ពុជា​វិញ ​បន្ទាប់ពី​ចាក​ចេញ​​ពី​ប្រទេស​​កាលពី​ថ្ងៃទី​៧ ខែ​កក្កដា ​ថ្ងៃ​ដែល​កាមេរ៉ា​សុវត្ថិភាព​​ថត​បាន​ពី​ការ​វាយ​ដំ​នោះ​បាន​ផ្សព្វ​ផ្សាយ​តាម​ប្រព័ន្ធ​អុីនធើណិត​​។ លោក​ប្រឈម​នឹង​ការ​ចោទ​ប្រកាន់ពី​បទ​ប្រើ​អំពើ​ហិង្សា​ដោយ​ចេតនា​ និង​ប្រឈម​​ការ​ជាប់​ពន្ធនាគាររហូត​ដល​់៥​ឆ្នាំ ប្រសិន​បើ​ត្រូវ​បាន​រក​ឃើញ​ពិរុទ្ធភាព​។

លោក អ៊ុត ធី ឪពុក​របស់​កញ្ញា សុជាតា ដែល​​ទទួលបាន​​​គោរមងារ​ជា​ឧកញ៉ា​​ មិន​មាន​វត្ត​មាន​អំឡុង​ការ​វាយ​ដំ​​នោះ​ទេ ហើយ​​​​កាល​ពី​​​ម្សិលមិញ​បាន​បដិសេធ​មិន​និយាយ​​ពី​អ្វី​ដែល​​​តុលាការ​បាន​សាកសួរ​គាត់​ពី​រឿង​នោះ​​។

លោក​បាន​​ប្រាប់​ក្រុម​អ្នក​យក​ព័ត៌មាន​​​​នៅ​ខាង​ក្រៅ​សាល​សវនាការ​ថា “​ខ្ញុំ​នឹង​មិន​ដោះ​ស្រាយផ្លូវ​​ស្ងាត់ៗ​ដោយ​ការ​យកលុយ​​​ ឬ​សំណូក​​​សូកប៉ាន់​ដើម្បី​បិទរឿង​នេះ​ឡើយ​ ខ្ញុំ​អត់​​ធ្វើ​កើត​​​​​​​ទេ វា​នឹង​ខូច​ដល់​ថ្នាក់​ដឹក​នាំ ដល់​រដ្ឋាភិបាល​ទាំង​មូល ​ដែលខំប្រឹង​ប្រែង​រក​ជនល្មើស​មក​ផ្ដន្ទាទោស​។

លោក​បាន​បន្ថែម​ថា “​ខ្ញុំ​ចង់​ឲ្យ​ឧកញ៉ា​មួយ​ចំនួន​ដែល​ខិលខូច​ដែលប្រព្រឹត្ត​អំពើ​អ៊ីចឹង​ដឹង​ឮថា ប្រទេស​ខ្មែរទាំងមូល​​ជាប្រទេស​​មួយ​​​​មាន​ច្បាប់​”។

លោក សុខ ប៊ុន បាន​​ប្រកាស​ជា​សាធា​រណៈ​​​សុំ​ផ្ដល់​​សំណង​​​ដល់​កញ្ញា​ សុជាតា ចំនួន​១០០.០០០​ដុល្លារ​ ដើម្បី​ដោះ​ស្រាយ​រឿង​​នេះ​។ លោក​ អ៊ុត ធី បាន​និយាយ​ឡើង​វិញ​ថា លោក​​ សុខ ប៊ុន​ បាន​ព្យាយាម​​ផ្ដល់សំណង​​ដើម្បី​​បញ្ចប់​រឿង​នេះ​។

លោក​បាន​និយាយ​​​ថា “មេធាវី​របស់​ពួក​គេ​​​បាន​សរសេរសែក​ឲ្យ​ខ្ញុំ ដើម្បី​បញ្ចប់​រឿង​នេះ​ ប៉ុន្តែ​ខ្ញុំ​​ថា ខ្ញុំ​អត់ត្រូវ​ការ​លុយហ្នឹងទេ​”។

លោក​​​បន្ថែម​ថា “​ឧកញ៉ា​ធំៗ​ជាច្រើន​” បាន​​​តេមកខ្ញុំដែល​លោក ប៊ុន​ ពឹងពាក់ ​មាន​ឧត្ដម​សេនីយ៍ “​ផ្កាយ​បី ​បួន​” ជាដើម​មកសុំ​បញ្ចប់​រឿង​ រហូត​ដល់សុំដកឃ្លីប​វីដេអូ​ចេញ​”។

យោង​តាម​លោក ពុទ្ធ ធាវី មេធាវី​របស់​កញ្ញា​ សុជាតា បាន​ឲ្យ​ដឹង​ថា អង្គរក្ស​របស់​លោក សុខ ប៊ុន ដែល​គេ​ឃើញ​នៅ​ក្នុង​កាមេរ៉ា​​​សុវត្ថិភាព​​​ដក​កាំភ្លើង​ភ្ជង់​​ក្បាល​ជន​រងគ្រោះ​ ដែល​ជន​នេះ​កំពុង​រត់គេច​ខ្លួន​នៅ​ឡើយ ហើយ​​​​ឥឡូវ​នេះ​​ត្រូវ​បាន​ចោទ​ប្រកាន់ពី​បទ​ប៉ុង​ប៉ង​មនុស្ស​ឃាត។

លោក លាង សំណាត ចៅក្រម​ស៊ើបសួរ​ក្នុង​សំណុំរឿង​នេះ​មិន​អាច​ទាក់​ទង​សុំ​អត្ថា​ធិប្បាយ​បាន​ទេ​៕ សារុន​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស