28 C
Phnom Penh

មហា​​​ជន​​​ផ្ទុះ​​​កំហឹង​​​ទាមទារ​​​ឲ្យ​​​នគរ​​​បាល​​​ប្រគល់​​​ជន​​​ដើរ​​​វះ​​​យក​​​សេរីរាង​​​មនុស្ស​​​ដើម្បី​​​កាត់​​​ទោស​​​

ដោយ ឌឹ ខេមបូឌា ដេលី

បទវិភាគ

ក្រុម​​​មន្ត្រី​​​បាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា ​​​ក្រុម​​​មនុស្ស​​​ដែល​​​មាន​​​កំហឹង​​​រាប់​​​រយ​​​​​​នាក់​​​បាន​​​ឡោម​​​ព័ទ្ធ​​​ប៉ុស្តិ៍​​​នគរបាល​​​ក្នុង​​​ខេត្ត​​​តាកែវ​​​រយៈ​​​ពេល​​​៩​​​ម៉ោង​​​ កាល​​​ពី​​​យប់​​​ថ្ងៃ​​​ពុធ​​​ ហើយ​​​បាន​​​ទាម​​​ទារ​​​ឲ្យប្រគល់​​​​ជន​​​ដែល​​​គេ​​​អះ​​​អាង​​ជា​​​អ្នក​ដើរ​វះ​យក​សរីរាង្គ ដែល​​​ជាប់​​​ចោទ​​​ថា​​​បាន​​​ចាប់​​​ពង្រត់​​​​ក្មេង​​​ស្រី​​​អាយុ​​​៦​​​ឆ្នាំ​​​ម្នាក់​​​ មក​ឲ្យ​មហាជន​កាត់​ទោស។

យោង​​​តាម​​​លោក ជុំ ឈឿន អធិការ​​​នគ​​​រ បាល​​​ស្រុក​​​បាន​​​ឲ្យ​​​ដឹង​​​ថា មនុស្ស​​​ពី​​​៤០០​​​ទៅ​​​៥០០​នាក់​​​បាន​​​ឡោម​​​ព័ទ្ធ​​​ប៉ុស្តិ៍​​​នគរ​​​បាល​​​ឃុំ​​​ចារ​​​ ក្នុង​​​ស្រុក​​​ព្រៃ​​​កប្បាស​​​នៅ​​​ម៉ោង​​​ប្រហែល​​​៦​​​ល្ងាច​​​ ហើយ​​​បាន​​​ព្យាយាម​ចូល​​​​​​ទៅ​​​ខាង​​​ក្នុង​​​ដើម្បី​​​សម្លាប់​​​អតីត​​​ទាហាន​​​ម្នាក់​​​ឈ្មោះ ​​​ឌឿន ​​​គៀង​​​ អាយុ​​​៦៥​​​ឆ្នាំ ដែល​​​ពួក​​​គាត់​​​អះ​​​អាង​​​ថា ​​​បាន​​​ចាប់​​ពង្រត់​​​​ក្មេងស្រី​​​រូបនេះ​​​កាល​​​ពី​​​រសៀល​​​​​​ថ្ងៃ​​​សៅរ៍។

លោក​​​បាន​​​មាន​​​ប្រសាសន៍​​​ថា “ពួក​​​គាត់​​​មិន​​​​​​ស្តាប់​​​យើង​​​ទេ ពីព្រោះ​​​ពួក​​​គាត់​​​ចង់​​​សម្លាប់​​​បុរស​​​រូប​​​នោះ។ ពួកគាត់​​​និយាយ​​​ថា សម្លាប់​​​ចោល​​​ទៅ​​​ៗ”។

លោក ជុំ ឈឿន បាន​​​មាន​​​ប្រសាសន៍​​​ថា ​​​នគរ​​​បាល​​​អាច​​​នាំ​​​លោក គៀង ចេញ​​​ពីប៉ុស្តិ៍​​​នគរ​​​បាល​​​បាន​​​នៅ​​ម៉ោង​​​ប្រហែល​​​៣​​​រំលង​​​អធ្រាត្រ​​​ បន្ទាប់​​​ពី​ស្ត្រី​​​​​​មួយ​​​ចំនួននៅ​​​ក្នុង​​​ក្រុម​​​មនុស្ស​​​បាន​​​ត្រឡប់​​​ទៅផ្ទះ​​​វិញ ហើយ​​​បុរស​​​ៗ ​​​បាន​​​ផឹក​​​ស្រាស​​​ស្រវឹង​​​អស់​​​។

លោក​​​បាន​​​ថ្លែង​​​ថា “បន្ទាប់​​​ពី​​​ពួក​​​គាត់​​​មួយ​​​ចំនួន​​​ស្រវឹង​​​ស្រា​​​ យើង​​​បាន​​​បញ្ជូន​​​បុរស​​​រូប​​​នេះ​​​​​​ទៅ​​​កាន់​​​អធិការដ្ឋាន​​​​​​នគរ​​​បាល​​​យ៉ាង​​​លឿន​​​។ ជន​​​សង្ស័យ​​​រូប​​​េនះ​​​អាច​​​​នឹង​​​ស្លាប់​​​ ប្រសិន​​​បើ​​​​​​​យើង​​​ទុក​​​គាត់​នៅ​​​ប៉ុស្តិ៍​​​នគរ​​​បាល​​​ឃុំទៀត​​​”។

លោក ឈឿន បាន​​​មាន​​​ប្រសាសន៍​​​ថា ​​​លោក ​​​គៀង ត្រូវ​​​បាន​​​ឃុំ​​​ខ្លួន​​​នៅ​​​អធិការដ្ឋាន​​​នគរ​​​បាលស្រុក​​​កាល​​​ពីម្សិលមិញ ដើម្បី​​​សាក​​​សួរ​​​ជុំ​​​វិញ​​​ការ​​​ចោទ​​​ប្រកាន់​​​ពីបទ​​​ចាប់​​​ពង្រត់​​​នេះ​​​។

លោក អ៊ូ វណ្ណារិទ្ធ អធិការ​​​រង​​​នគ​​​របាល​​​ស្រុក​​​ដែល​​​ស្ថិត​​​ក្នុង​​​ចំណោម​​​មន្ត្រី​​​​​​ឃុំ និង​​​ស្រុក​​​​​​ប្រហែល​​​៥០​​​នាក់​​​​​​ដែល​​​ត្រូវ​​​បាន​​​ដាក់​​​ពង្រាយ​​​ដើម្បី​​​សម្រួល​​​ស្ថាន​​​ការណ៍​​​នោះ​​​បាន​​​មាន​​​ប្រសា​សន៍​​​ថា លោក គៀង បាន​​​ប្រាប់​​​ក្រុម​​​​​​​​​អ្នក​​​សើុប​​​អង្កេត​​​ថា គាត់​កំពុង​​​ជិះម៉ូតូ​​​មក​​​ផ្ទះ​​​តាម​​​ផ្លូវ​​​លំ​​​មួយ​​​ក្នុង​​​ឃុំ​​​ស្នោ​​​ កាល​​​ពី​​​ថ្ងៃ​​​សៅរ៍ ​​​ស្រាប់​​​តែ​​​គាត់​​​បាន​​​ឃើញ​​​ក្មេង​​​ស្រី​​​រូប​​​នេះ ​​​ហើយ​​​​​ គាត់​​​​គិត​​​ថា នាង​​​ត្រូវ​​​ការ​​​ឲ្យ​ជួយហើយ​​​។

លោក​​​បាន​​​ថ្លែង​​​ថា “គាត់​​​បាន​​​ប្រាប់​​​យើង​​​ថា ដោយ​​​សារ​​​មេឃភ្លៀង​​​ គាត់​​​មិន​​​អាច​​​រក​​​ឪពុក​​​ម្តាយ​​​របស់​​​នាង​​​ឃើញ​​​ទេ​​​ គាត់​​​បាន​​​សម្រេច​​​នាំ​​​នាង​​​ទៅផ្ទះ​​​របស់​​​ខ្លួន​​​”។ លោក​​​បាន​​​បន្ថែម​​​ថា លោក គៀង ដែល​​​ក៏​​​អះ​​​អាង​​​ផង​​​​​ដែរ​​​ថា គាត់​​​ស្រវឹង​​​ស្រា​​​នៅ​​​ពេល​​​នោះ ​​​រស់​​​នៅ​​​ក្នុង​​​ស្រុក​​​ស្អាង​​​ ខេត្ត​​​កណ្តាល​​​។

លោក វណ្ណារិទ្ធ បាន​​​បន្ថែមថា លោក ​​​គៀង ​​​បាន​​​និយាយ​​​ថា នៅ​​​ពេល​​​ម​​​ក​​​ដល់​​​ផ្ទះ​​​ប្រពន្ធ​​​របស់​​​គាត់​​​បាន​​​ឲ្យ​​​គាត់​​​ជូន​​​ក្មេង​​​ស្រី​​​នេះ​​​ទៅ​​​ផ្ទះ​​​របស់​​​នាង​​​វិញ ប៉ុន្តែ ដោយ​​​ភ្លៀង​​​ធ្លាក់​​​ខ្លាំង​​​ធ្វើ​​​ឲ្យ​​​​​​គាត់​​​ពន្យារ​​​ពេល​​​អស់​​​ជា​​​ច្រើន​​​ថ្ងៃ​​​។

លោក​​​បាន​​​មាន​​​ប្រសាសន៍​​​ថា “ដោយ​​​សារ​​​ភ្លៀង​​​ខ្លាំង​​​ គាត់​​​បាន​​​សម្រេច​​​ទុក​​​​​​ក្មេង​​​ស្រី​​នេះ​​​ឲ្យ​នៅ​​​ជាមួយ​​​កូន​​​ៗ​​​របស់​​​គាត់ ហើយ​​បាន​​​ផ្តល់​​​អាហារ​​​ និង​​​សម្លៀក​​​បំពាក់​​​ដល់​​​នាង​​​”។

លោក​​បាន​បន្ថែម​ថា ទី​​​បំផុត​​​ នៅ​​​ពេល​​​បុរស​​​រូបនេះ​​​បាន​​​នាំ​​​ក្មេង​​​ស្រីនេះ​​​​​​​ទៅ​​​កាន់​​​ឃុំ​​​ចារ​​​កាល​​​ពី​​​រសៀល​​​ថ្ងៃ​​​ពុធ ដើម្បី​​​ស្វែង​​​រក​​​ឪពុក​​​​​​ម្តាយ​​​របស់​​​នាងនោះ​​​​ សាច់​​​ញាតិ​​​ក្មេង​​​ស្រី​​​រូ​​​ប​​​នេះ​​​បាន​​​ស្គាល់​​នាង​​​។

លោក វណ្ណារិទ្ធ​​​​​​ បាន​​​ថ្លែង​​​ថា “នៅ​​​ពេល​​​គាត់​​​ឈប់​​​ម៉ូតូ​​​ដើម្បី​​​សួរ​​​គេ​​​ នារី​ជំទង់​អាយុ​​​​​​ ១៧​​​​​​ឆ្នាំ​​​ម្នាក់​​​ដែល​​​ត្រូវ​​​ជា​​​បង​​​ប្អូន​​​ជីដូន​​​មួយ​​​ក្មេង​​​ស្រី​​​នោះបាន​​​ស្គាល់​​​នាង​​​ភ្លាម​​​ ហើយ​​ពេល​​​​​​នោះ​​​បាន​​​​​​មក​​​ទាញ​​​ដៃ​​​នាង​​​ចេញ​​​ពី​​​បុរស​​​រូប​​​នោះ​​​”។

លោក​​​បាន​​​មាន​​​ប្រសាសន៍​​​ថា បន្ទាប់មក​​​មនុស្ស​​​មួយ​​​ក្រុម​​​​​​បាន​​​ឡោម​​​ព័ទ្ធយ៉ាងលឿន ធ្វើ​ឲ្យ​លោក​ គៀង​ រត់​យកប្រាស​អាយុ​​​​ ហើយ​​​​​​​​​ទៅ​​​ដល់​ប៉ុស្តិ៍​​​នគរ​​​បាល​​​។

លោក​​​បាន​​​បន្ថែម​​​ថា “ក្រុម​​​អ្នក​​​ភូមិ​​​ក៏​​​បាន​​​ចោទប្រកាន់​​​គាត់​​​ថា ជាអ្នកដើរ​វះ​យក​សរីរាង្គ​​​​មនុស្ស​​ផង​​​ដែរ​​​”។

យោង​​​តាម​​​លោក វណ្ណារិទ្ធ បាន​​​ឲ្យ​​​ដឹង​​​ថា ​​​ក្រុម​​​មនុស្ស​​​បាន​​​ឡោម​​​ព័ទ្ធ​​​ប៉ុស្តិ៍​​​នគរ​​​បាល​​​ហើយ​​​បាន​​​គប់​​​ដំ​​​ុថ្ម​​​ទៀត​​​ផង ធ្វើ​​​ឲ្យ​​​ខូច​​ដំបូល​​​និង​​​បែកបាក់​​​​បង្អួច​​​។ លោក​​​បាន​​​ថ្លែង​​​ថា នគ​​​រ​​​បាល​​​មិន​​​មាន​​​គម្រោង​​​ចាប់​​​ខ្លួន​​​ក្រុម​មនុស្ស​​​ទាំង​​​នោះ​​​ទេ​​​ ពីព្រោះ​​​មាន​​​មនុស្ស​​​ចូលរួម​ច្រើន​​​​​​ណាស់​។

លោក សាក់​ សាអែម នាយ​​​ប៉ុស្តិ៍​​​ឃុំ​​​ចារ​​​បាន​​​មាន​​​ប្រសាសន៍​​​ថា លោកជឿ​​​ថា លោក​​​គៀង បាន​​​នាំ​​​​​​ក្មេង​​​ស្រី​​​នេះទៅ​​​​ក្នុង​​​ហេតុ​​​ផល​​​មិនល្អ​។

លោក​​​បាន​​​ថ្លែង​​​ថា “ប្រសិន​​​បើ​​​គាត់​​​មិន​​​មាន​​​បំណង​​​អាក្រក់​​​ទេនោះ​​​… ហេតុ​​​អ្វី​​​បាន​​​ជា​​​គាត់​​​​​​ទុក​​​កូន​​​ស្រី​​​របស់​​​គេ​​​យូរ​​​ថ្ងៃ​​​ម្លេ៉ះ​​​?។ គាត់​​​គួរ​​​តែ​​​ប្រាប់​​​អាជ្ញាធរ​​​មូលដ្ឋាន​​​ថា គាត់​​​បាន​​​មកយក​​​ក្មេង​​​ស្រី​​​រូ​ប​​​នេះ​​​។

លោក សាអែម បាន​​​បន្ថែម​​​ថា សាក្សី​​​បាន​​​រាយការ​ណ៍ថា ពេល​​​គាត់​​​ឈប់​​​ម៉ូតូ​​​ លោក ​​​គៀង មិន​​​បាន​​​សួរ​​​រក​​​អាសយ​​​ដ្ឋាន​​​ក្មេង​​​ស្រី​​​រូប​​​នេះ​​​ទេ ប៉ុន្តែ ​​​គាត់​បែរ​​​ជា​​​សួរ​​​រក​​​ទិសដៅ​​​ទៅ​​​ភ្នំពេញ​​​ទៅ​​​វិញ​​​។ លោក​​​បាន​​​ថ្លែង​​​ថា ​​​”អ្នក​​​ភូមិ​​​ជឿ​​​ថា គាត់​​​ព្យាយាម​​​ដឹក​​​ក្មេង​​​ស្រី​​​រូបនេះ​​​ទៅ​​​លក់​​​នៅភ្នំពេញ​​​”។

យោង​​​តាម​​​នាយ​​​ប៉ុស្តិ៍​​​ឃុំ​​​រូប​​​នេះ​​​បាន​​​ឲ្យដ​​​ឹង​​​​​​ថា លោក គៀង អាច​​​គេច​​​ចេញ​​​ពី​​​ប៉ុស្តិ៍​​​នគរ​​​បាល​​​បាន​​​បន្ទាប់​​​ពី​​​​​មន្ត្រី​​​នគរ​​​បាល​​​ឲ្យ​​​គាត់​ស្លៀក​​​ពាក់​​​ឯក​​​សណ្ឋាន​​​នគរបាល​​​។

លោក​​​បាន​​​បន្ថែម​​​ថា “ខ្ញុំ​​​ក៏​​​បាន​​​ព្យាយាម​​​ប្រាប់​​​អ្នក​​​ភូមិ​​​ឲ្យ​​​ឈប់​​​គប់​​​ដុំ​​​ថ្ម​​​ដែរ​​​ពីព្រោះ​​​វា​​​ខុស​​​ច្បាប់ ប៉ុន្តែ ពួក​​​គាត់​​​មាន​​​កំហឹង​​​យ៉ាង​​​ខ្លាំង​​​”។

លោក យង់ ញៃ នាយការិយាល័យ​​​នគរ​​​បាល​​​ព្រហ្មទណ្ឌកម្រិត​​​ស្រាល​​​ខេត្ត​​​បាន​​​មាន​​​ប្រសា​សន៍​​​ថា នគរ​​​បាល​​​ប្រហែល​​​ជា​​​ដោះ​​​លែង​​​លោក គៀង បន្ទាប់​​​ពី​ការ​​​សាក​​​សួរ​​​រួច​​​ ពីព្រោះ​​​បច្ចុប្បន្ន​​​នេះ​​​ពួក​​​គេ​​​​មិន​​​មាន​​​ភ័ស្តុតាង​​​គ្រប់​​​គ្រាន់​​​ ដើម្បី​​​បន្ត​​​ឃុំ​​​ខ្លួន​​​គាត់​​​ឡើយ​​​។

លោក​​​បាន​​​មាន​​​ប្រសាសន៍​​​ថា “នគរ​​​បាល​​​ប្រហែល​​​ជា​​​មិន​​​បញ្ជូន​​​ជននេះ​​​​ទៅ​​​តុលាការ​​​ទេ​​​ ពីព្រោះ​​​ករណី​​​នេះ​​​គឺ​​​មិន​​​មែន​​​ជា​​​ការ​​​ចាប់​​​ពង្រត់​​​​ឡើយ​​​។ អ្នក​​​ភូមិ​​​មាន​​​ការ​​​យល់​​​ច្រឡំ​​​ហើយ​​​​​​ពួក​​​គាត់​​​មិន​​​យល់​​​អំពី​​​ស្ថានការណ៍​​​នោះ​​​”៕​​​ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស