នៅពេលដែលអ្នកតវ៉ារាប់រយនាក់បានប្រមូលផ្ដុំគ្នាខាងក្រៅព្រឹទ្ធសភាកាលពីព្រឹកថ្ងៃសុក្រ មានសមាជិកព្រឹទ្ធសភាគណបក្សកាន់អំណាច៤៤រូប បានសម្ដែងការគាំទ្រចំពោះច្បាប់អង្គការក្រៅរដ្ឋាភិបាលដ៏ចម្រូងចម្រាស មុននឹងបោះឆ្នោតអនុម័តជាឯកច្ឆន្ទ ហើយបញ្ជូនទៅកាន់ក្រុមប្រឹក្សាធម្មនុញ្ញ។
លោក ម៉ម ប៊ុននាង អ្នកនាំពាក្យព្រឹទ្ធសភាបាននិយាយថា សមាជិកព្រឹទ្ធសភាប្រាំបីរូបបានផ្ដល់យោបល់គាំទ្រច្បាប់នោះ ដែលត្រូវរិះគន់ដោយអង្គការក្រៅរដ្ឋាភិបាល និងម្ចាស់ជំនួយអន្តរជាតិ មុននឹងបោះឆ្នោតអនុម័តនៅក្នុងកិច្ចប្រជុំរយៈពេល៣ម៉ោង។សមាជិកព្រឹទ្ធសភាគណបក្ស សម រង្ស៊ី ១១រូបបានធ្វើពហិការមិនចូលរួមសម័យប្រជុំនេះទេ។
លោក ប៊ុននាង បាននិយាយថា “យើង សមាជិកព្រឹទ្ធសភា បានពិនិត្យមើលមាត្រានីមួយៗ ហើយពិភាក្សាយ៉ាងហ្មត់ចត់មុននឹងបោះឆ្នោត។ លោក ប៊ុននាង បានបន្ថែមថា ច្បាប់នេះនឹងបញ្ជូនទៅក្រុមប្រឹក្សាធម្មនុញ្ញនៅថ្ងៃច័ន្ទ។
ប្រសិនបើអនុម័តដោយក្រុមប្រឹក្សាធម្មនុញ្ញ ព្រះមហាក្សត្រ នរោត្តម សីហមុនី នឹងឡាយព្រះហស្តលេខាដើម្បីឲ្យច្បាប់នោះចូលជាធរមាន។
លោក ប៊ុននាង បាននិយាយថា “ច្បាប់នេះមានសារៈសំខាន់ណាស់ ពីព្រោះវាជួយធ្វើឲ្យសមាគម និងអង្គការក្រៅរដ្ឋាភិបាលក្លាយជាអង្គភាពស្របច្បាប់ដែលការពារដោយច្បាប់។
ប៉ុន្តែក្រុមអ្នកតវ៉ានៅខាងក្រៅព្រឹទ្ធសភាបានជំទាស់។
ដោយប្រវាយប្រតប់ជាមួយនឹងនគរបាលដែលដាក់ពង្រាយដើម្បីរារាំងពួកគេមិនឲ្យចូលទៅក្បែរខ្លោងទ្វារព្រឹទ្ធសភានៅតាមមហាវិថីនរោត្តម ក្រុមអ្នកតវ៉ាបានកាន់បដា និងស្រែកពាក្យស្លោកទាមទារឲ្យលុបចោលច្បាប់ស្ដីពីអង្គការក្រៅរដ្ឋាភិបាល។
អ្នកស្រី ឆាយ គឹមហ៊ន សកម្មជនសិទ្ធិដីធ្លីមកពីតំបន់បុរីកីឡាក្នុងក្រុងភ្នំពេញ បាននិយាយថា “នៅពេលច្បាប់នេះត្រូវអនុវត្ត វាមានន័យថា យើងទាំងអស់គ្នានឹងស្លាប់ ពីព្រោះច្បាប់នេះនឹងរឹតត្បិតសិទ្ធិរបស់យើងក្នុងការជួបជុំគ្នាដោយសន្តិវិធី និងការប្រើសេរីភាពរបស់យើង”។ សកម្មជនសិទ្ធិដីធ្លីរូបនេះបាននិយាយថា “ច្បាប់នេះនឹងជះឥទ្ធិពលលើពលរដ្ឋដែលប្រឈមនឹងបញ្ហាដីធ្លីនៅក្នុងក្រុងភ្នំពេញ និងទូទាំងប្រទេស ពីព្រោះរដ្ឋាភិបាលអាចបកស្រាយដើម្បីផ្ដន្ទាទោសអង្គការក្រៅរដ្ឋាភិបាលណាដែលចេញមុខគាំទ្រពួកយើងក្នុងការតស៊ូមតិដើម្បីសិទ្ធិដីធ្លី”។
អ្នកស្រី គឹមហ៊ន បានស្ថិតនៅក្នុងចំណោមអ្នកតវ៉ាដោយសន្តិវិធីប្រមាណ៥០០នាក់ដែលបានឈរពីម្ខាងផ្លូវស្ទើរពេញមួយព្រឹកពីទ្វាររបងព្រឹទ្ធសភា ដែលមានកម្លាំងនគរបាលរារាំងពួកគេមិនឲ្យនៅពីមុខខ្លោងទ្វារ។
លោក ស៊ឹម វុទ្ធី ស្នងការរងក្រុងភ្នំពេញដែលឃ្លាំមើលបាតុកម្មនោះ បាននិយាយថា ការអនុញ្ញាតឲ្យក្រុមអ្នកតវ៉ាប្រមូលផ្ដុំគ្នានៅម្ខាងផ្លូវ គឺជាការសម្របសម្រួល។
លោកស្នងការរងរូបនេះបាននិយាយថា “ខ្ញុំមិនអាចឲ្យពួកគេឆ្លងទៅម្ខាងផ្លូវបានទេ យើងមិនរឹតត្បិតសិទ្ធិរបស់គេទេ ប៉ុន្តែយើងសុំឲ្យពួកគេកុំប្រមូលផ្ដុំគ្នា ពីព្រោះវាប៉ះពាល់ដល់សណ្ដាប់ធ្នាប់សាធារណៈ”។ លោកស្នងការរងរូបនេះបាននិយាយបន្តថា “ឥឡូវខ្ញុំសម្របសម្រួលដោយឲ្យបងប្អូនប្រមូលផ្ដុំគ្នានៅម្ខាង ដើម្បីប្រើសេរីភាពនៃការបញ្ចេញមតិ”។
នៅត្រង់ចំណុចមួយ នគរបាលដែលកាន់ខែល និងក្រុមអ្នកតវ៉ាបានរុញគ្នាទៅវិញទៅមកប្រហែល៣០នាទី ប៉ុន្តែបានបញ្ចប់ទៅវិញដោយគ្មានរបួសធ្ងន់ធ្ងរទេ។
លោក អំ សំអាត អ្នកគ្រប់គ្របផ្នែកបច្ចេកទេសជាន់ខ្ពស់របស់អង្គការលីកាដូបាននិយាយថា ការប្រឹងប្រែងរារាំងការតវ៉ានៅថ្ងៃសុក្រនេះគឺប្រៀបបាននឹងឥទ្ធិពលដែលច្បាប់អង្គការក្រៅរដ្ឋាភិបាលនឹងមានទៅលើការរិះគន់ជាសាធារណៈចំពោះរដ្ឋាភិបាល។
លោក សំអាត បាននិយាយថា “តាមពិតអាជ្ញាធរ និងនគរបាល បានរុញច្រានក្រុមអ្នកតវ៉ាដែលគ្រាន់តែតវ៉ា និងប្រមូលផ្ដុំគ្នាដោយសន្តិវិធី។ វាជានិមិត្តសញ្ញាដែលបង្ហាញនូវឥទ្ធិពលដ៏ធ្ងន់ធ្ងរទៅលើសេរីភាពនៃការបញ្ចេញមតិរបស់ពលរដ្ឋ”៕ រើន