កាលពីម្សិលមិញ កម្មការិនីបីនាក់ដែលត្រូវបានអភិបាលក្រុងបាវិត បាញ់ប្រហារកាលពីឆ្នាំ២០១២ ខណៈកំពុងធ្វើការតវ៉ានៅខាងក្រៅរោងចក្រកាត់ដេរមួយក្នុងខេត្តស្វាយរៀង បានអំពាវនាវសុំអន្តរាគមន៍ពីថ្នាក់ដឹកនាំកំពូលឲ្យចាត់វិធានការដើម្បីរកយុត្តិធម៌ជូនពួកគេដូចករណីប្រើអំពើហិង្សាលើកញ្ញា ឯក សុជាតា ហៅ សាសា អតីតពិធីការិនីកាលពីដើមខែនេះដែរ។
កម្មការិនី នុត សុខន ប៊ុន ចិន្តា និង កែវ នា បានដាក់ញត្តិទៅរដ្ឋសភាដើម្បីអំពាវនាវសុំឲ្យនាយករដ្ឋមន្ត្រី ហ៊ុន សែន និងលោក ស ខេង រដ្ឋមន្ត្រីក្រសួងមហាផ្ទៃ ជួយស្វែងរកតាមចាប់ខ្លួនលោក ឈូក បណ្ឌិត ដែលនៅមានសេរីភាពនៅឡើយ ទោះបីជាត្រូវតុលាការផ្ដន្ទាទោសឲ្យជាប់ពន្ធនាគាររយៈពេល១៨ខែ ដែលត្រូវបានសាលាឧទ្ធរណ៍ និងតុលាការកំពូលតម្កល់ទុកជាបានការក៏ដោយ។
កែវ នា អាយុ២៣ឆ្នាំបាននិយាយដល់កញ្ញា សាសា ដែលបានរងការវាយដំយ៉ាងព្រៃផ្សៃពីសំណាក់លោក សុខ ប៊ុន ឧកញ៉ាក្នុងវិស័យអចលនទ្រព្យដែលបានធ្វើឲ្យលោក ហ៊ុន សែន និងលោក ស ខេង ផ្ទុះកំហឹងថា “យើងគិតថា ករណីរបស់យើងស្រដៀងនឹងករណីកញ្ញា សាសា ដែរ ដូច្នេះហើយយើងសុំឲ្យរដ្ឋាភិបាលជួយស្វែងរកយុត្តិធម៌ឲ្យពួកយើងទាំងបីនាក់ដែរ។ យើងចាត់ទុកគាត់ [លោក ហ៊ុន សែន] ដូចស្តេចអ៊ីចឹង ប៉ុន្តែគាត់បានត្រឹមតែឈរមើលប៉ុណ្ណោះ។ លោក ឈូក បណ្ឌិត បានព្យាយាមសម្លាប់យើង ចំណែកឯកញ្ញា សាសា គ្រាន់តែត្រូវគេវាយដំប៉ុណ្ណោះ ហើយត្រឹមតែ១សប្ដាហ៍ រដ្ឋាភិបាលក៏ដោះស្រាយបញ្ហានេះបាន ចំណែកឯករណីរបស់យើងបានអូសបន្លាយអស់៣ឆ្នាំហើយ។ រដ្ឋាភិបាលអាចស្វែងរកយុត្តិធម៌ឲ្យកញ្ញា សាសា បាន ប៉ុន្តែមិនអាចរកយុត្តិធម៌ឲ្យយើងទេ”។
លោក សុខ ប៊ុន បានភៀសខ្លួនចេញពីប្រទេសបន្ទាប់ពីបែកធ្លាយរូបភាពវីដេអូដែលបង្ហាញពីសកម្មភាពលោកវាយដំកញ្ញា សាសា និងដែលត្រូវបានគេចែករំលែកតៗគ្នាតាមប្រព័ន្ធផ្សព្វផ្សាយសង្គម។ លោកបានវិលត្រឡប់មកកម្ពុជាវិញ ក្រោយពីលោក ហ៊ុន សែន បានជំរុញឲ្យលោកត្រឡប់មកវិញអំឡុងពេលថ្លែងសុន្ទរកថាជាសាធារណៈ ហើយត្រូវបានចាប់ខ្លួននៅអាកាសយានដ្ឋានអន្តរជាតិភ្នំពេញ។
លោក អេង ឆៃអ៊ាង តំណាងរាស្ត្រគណបក្សប្រឆាំង និងជាប្រធានគណៈកម្មការសិទ្ធិមនុស្សនៃរដ្ឋសភា បានបញ្ជាក់ថា ញត្តិកាលពីម្សិលមិញទទួលបានហើយ ហើយបានសន្យាថានឹងខិតខំជំរុញករណីនេះបន្ថែមទៀត។
លោកបានមានប្រសាសន៍បន្ថែមថា ”យើងនឹងអន្តរាគមន៍ [ហើយស្នើឲ្យ] ក្រសួងយុត្តិធម៌ជំរុញការអនុវត្តច្បាប់ឲ្យបានត្រឹមត្រូវ និងពេញលេញ។ ប្រសិនបើគ្មានប្រសិទ្ធភាពទេ យើងនឹងកោះហៅរដ្ឋមន្ត្រីក្រសួងយុត្តិធម៌ [លោក អង្គ វង្សវឌ្ឍានា] មកសាកសួរ”៕សុខុម